Home Chaga Thusim HENU, KAPA PHU KALAH DING AHI-1

HENU, KAPA PHU KALAH DING AHI-1

549
0

-Lelen Kipgen
(7629033890)

(Part-I)

Kasen katoi a kipat in “Hepa” tiding neilouvin hinkho kahin mang toupeh e. Kapen kalhah a kipat kapa melmu lou kahijeh chun imachan jong kagel pon, kachunnu koma kaum pouleh kalung amongsel ji’e. Kho hethei kahung hitan, kaloi kagol hon “Hepa” tiding anei un, ken ibola kaneilou ham, tin kalung adong lheh ji’e. Kachunnu jah a “Henu, kaloi kagol hon Pa anei un, ken ibola Pa kaneilou ham?” tin kadong jin, “Naosen, nahung golhan teng leh kaseipeh ding nahi. Tun nachapang nalaiyin, thu hethei nahi nai poi” tin eidonbut jin ahile kahung khanlet ding kal kangahlel lheh jin ahi.

Chapangcha Hinkho kamanlai

Kachenna lhon hi Ccpur Town kom thinglhang leh phaitol chih lah ahin, Gancha Bong, Kelngoi, Kelcha tampi kavah lhon e. Gancha ho kanu changseh in aboipi jou lou jeh chun kanuneo in akithopi jin, kei School kakai jie. Chapangcha kahinalai jeh chun jingkal lam leh kanun School chan eihung thah jin, nilhah lam jong leh hiti chun eihung pui kit jie.

Kachenna lhon khosung toh akigamlhat jeh chun kivoppi ding kanei ji pon loi le gol kalhangai ji lheh e. Kachenna lhon koma kho khat a chun golphatah khat kaneiyin, amin “Mangboi” ahiye. Kaschool kaina lhon jong akibangin, School kache lhon teng leh kachunnun Activa a eihung thah ji lhonin, kikhen teng jong leh kahung kilhon kit ji lhon e. Saturday ni leh ka-in uva ahung jin, sun teng Kelngoi, Kelcha ho kaching ji lhonin, anou neo hoa chun kakichem ji lhonin nom kasa lheh ji lhon e. Loi le golphatah nei hi sopi kisuhlou tah nei sangin aphachom joi.

Phat le ni achalin, kum le lha akiheiyin, keijong kakum leh kalungthim khangdong cha hijong le mi mitvet dinga golhang chu kahitai. School a kaloi kagol hon dongma anei un, adongmahou toh akilungset dan hou asei jiuvin, aumchan hou kamu ji teng “O, kenjong amaho bangin dongma kinei leh” tin dongma nei ding katha anom lheh jie. Golhang khat hinajal chun chele valena ho’ah nungah melhoi ahung kivelhi le tan ahi.

Kanun Guitar khat eichohpeh in, jan teng leitol a songpi chunga chun katou jin, kajan-mao jie. Lasah kalung alut in, jan teng chung Chollha vahnuoiya maona din la khat kana bol e.
Ala chu:

“Golhan lai Sana khang hoilai ni,
Khonung khoma ding gel louvin;
Lungkhat in kaleng ui golngai cheng toh.

Golhan lai hinkho anom e;
Tolthing-na bang nou lai ni;
Nakhang hoi amol kahsen,
Zalen in leng in kisih louna din.

Golhan lai Sana khang hoilai ni,
Vangkho-jol ah lai kaleng ui;
Sanakhang molpang lep lou jen in.”

Hiti hin la kana bolin, jan teng kana mao jie. Hiche keu hilou adang jong ijat hamkhat kana bolin, la khum ding kati leh kanun ana jahda jeh chun kana khum tapoi.

Kaschool kaina agamlhat jeh chun kanun School kachena din Pulsar khat eina choh peh in, thanom tah in school kana che jie. Kaneova kipat kaschool kaina kachon khapon, ka class uva “Jennifer” kiti nungah khat toh class topper kana kichu toupeh lhon e. Amahi alekha thep keu hilouvin amel jong ahoiyin, ka school uva chun aluck lheh e. Neova pat school hung kikai khom jing ahijeh chun kakimai ngal lhonin, vop jong kahung kivop thei lheh lhontan ahi.

Neolai chun ima ana kigel pon, nungah golhang hinkho ahung kiman phat chun aguh in Jennifer kahin lungset doh tan ahi. Amahi lekhasim lunglut mi ahijeh chun dongma nei ding alungin agel pon, keijong class 10 chai kahsea dongma nei ding chu kana gelthei poi. Ahinlah kakigel louna lam tah in Lungsetna lama kana lhalut kha tan, suntin jantin Jennifer gelnan hinkho kahin mang jing tan, nikhat tou School ahung kailou jong leh sun nilhum in ka class lah jong asuhsah aum ji tapon ahi. Saturday, Sunday ahung lhun a school akikai lou ni leh nikhat nini jong kum khat kum ni kabah sah jie. Jennifer jal chun niseh leh pontho tah in school kahung kai jing tan ahi.

Jennifer kalungsetna kaloi kapai ho koma kasei jin “chutia nalungset leh navaigei masang in sei jengin” tin eisol jiuve. Ahinlah ‘hung nom hih kha leh’ tin jachat, kisonlel nan kadim jie. Chuphat in la khat kahin bol kit in,

Ala chu:

“Guhthim lungset anai keidin,
Lel ngam lou kathimthu cheng;
Golin hethem tave le o.

Gol le pai cheng in sei jengtan tin eisol ui,
Genthei tangpa kahijeh in;
Lel ngam lou kalungsetna.”

Hiti chun la kabolin, jan teng chung Chollha vahnuoiya kajan-mao jin ahi.

Final exam kon ahitan, nikhat hi letter kahin jin tai.

Jennifer, amasan nakoma kalunggel sei theiya kaum jeh in kakipah’e. Nangin jong sot a pat kaumchan, kakhanchan in jong hetan nate. Kisonlel jeh in kana seingam poi. Jennifer lunghan nan sang hih in, thengtah in sei mei leng ken nang kalungset e. Jahcha pum pum leh kisonglel pum a nakoma lungsetna kathum hi lungset in nei sanpeh in. Sana leh Dangka sanga kangaichat jing nakamcheng.

Hiti hin lekha khat kasun in, nikhat school a aloinu kapehsah tan ahi. Hiche lekha kapeh a kipat chun hou jong eihou tapon, aumchan jeh chun kajachatna akibe in keidin school kai chu hahsa kasa lheh tan ahi. Exam kahinbol tauvin, chubanga kikihou thei chu, lungsetna thu kaseiya kipat in eimu jong le akisel le le jeng tan, kajachatna leh kakisonlelna jeh chun kalekhasim jong asuhsah aum thei tapon ahi.

Exam kichai ni chun class room a kipat mit san deh duh a kahung pot leh gate maiya agolnu toh anatou lhonin, amani kamu phat chun kajah achan munkhat a katou den tan ahi. “ipi khat jong ana kisei kha ham” tin kakisih lheh jenge. Hitia kanatou laitah in agolnu ahungin “Boilen, ibola nahung pei lou ham? nang kana nga lhon ahiye. Hungo chao ne in gache ute” tin eihung kouvin, kajachat toh che lou ding jong kanom pon, ui-cheh chuh in Bazar chao kijohna lang kahin jon tauvin ahi.

Chao kijohna mun kalhun un, plate thum ka order in kane tauvin ahi. Kei le Jennifer vang chu kihou lou kahi lhontai. Chomkhat jouvin aloinu phone bol beh akisan apot doh tai. Aumdan chu keini chance eipeh lhon dan ahi. Chomkhatpi thipchet a kaum jou lhonin lekha neocha khat eipe in, kavet le “I love you too” tia kisun chu ahitan ahi. Chuphat in keijong kakipa val jeh chun kipa vetsan nan kasum neisun nunin Omlet plate khat ka order peh in kaneh sah tai.

KEIMA: “Jennifer, ahile ibola hitihchan a nei reply lou ham?”

JENNIFER: “exam kon hita a ilekhasim hungboi khante kati a le kan reply lou nahiye. Nalung hang em Boilen?”

KEIMA: “kalung ahang poi, kajah acha e”

Hitia kana kihou lai lhon chun aloinu jong ahung lut tan, ka-in lam cheh kahin kijot tauvin ahi. Jennifer toh kilungset hinkho kahin mang lhontan, kadei kachan jeh in kakipah lheh e. Tulai bangin Mobile Phone jong atam naipon, mikhat le nin bou ana choi nalaiye. Keini jong phatseh in kakimuto jing lhonin, kavil jou lou kan leh chethi(letter) in kakijou ji lhon e. Hiti chun ama jong keijong kitah tah leh kingailu tah in kilungset hinkho kamang lhon e.

Nikhat hi Jennifer in anu le apa kakimupi ding ahasei val jeh chun a-in uva kagache tan ahi. Kalhun leh anu le apa jong anaum lhonin, katoukhom un kakihoulim uve. Chomkhat jouvin apan kanu kapa min leh kaumna ho eidong in, kenjong “kapa min Hesei ahin kanu min Nengcha ahiye. Kapa kei neo laiyin anaum tapon, tua hi kanu bou toh chengkhom kahi lhon e.” hitia chu imajouse kaseipeh le amai asan liuvin, aumchan chu kalung adong lheh e. Chujouvin “nanu dam dam hinam?” tin eidongin “henge adam e. Nakihet khah lhon ham hepa?” kati le “kakihe kha lhon poi” atin adang imacha sei talouvin apotdoh tai.

To be Continue….

©2020, Lelen Kipgen, All Right’s Reserved

Previous articleLOVE IN QUARANTINE CENTRE
Next articleHENU, KAPA PHU KALAH DING AHI-2