Heart touching story…
(Fiction)
By : M. Lalcha Haokip
Part -1
___________________________________
Kaloi ho school kai gamta a kei itih leh kakai pet ding ham heno? Jing nikho hitalou ham nakai pet ding ahitai tia nasei ni kho chu? Tu jingkah a jong chu kaloi hon itih leh school nahung kaipet ding ham? Tukum admission kibol, kum danga sangin mi atame, eiho class jong mi dim vah ding ahitai, school nakai ding leh admission hin kibol gangin lang tu hapta sung mama’n hung kai panin achuti lou leh touna nachan lou ding ahitai. Chuleh jing teng school uniform, lekhabu, notebook, pencil chuleh adang dang jong kihom ding ahi atiuve ” tia achapa’n ahinsei chu hetmanlou kah in nu Ngaivah mit a konin thongo bangin mitlhi ahung vachut chut in ahi.
Anu chutia alhiso amu jeh chun Sasat jong chapang cha ahi vangin anu mitlhi lon chu ve joulouvin achuti ka jeng tan ahi.
Chutia anucha lhonna aka jing lhon lai chun jingkah matah a ana potdoh Pa Khailen jong insah langa kipet che jong chethei beh louvin ahung kisen suh peh in ahi. Kahkom leh ahat ahol in, kahkom leh haosa upa ademin hiti chun kham phel in ahung suh in ahi.
Chutia asenji ahungsuh amu mu chun Nu Ngaivah in jong achapa Sasat chu angsunga apom, nomtah a imu kum ni bep hinalai Seiboi chu kinloi tah in apedoh in ” Napa hunglhun kah in nanao hi po in lang na nu Lhing te in ah khu’n ana jampi in.
Sasat jong chutia anu’n asei chai chai chun mitlhi kitheh pumin nomtah a imu anao Seiboi chu apo in kichat toh tijatna dimset pumin anu Lhing te in thi del in adel phei tan ahi.
Chomlou kah in pa Khailen jong khamphel in ahung vailhungin, leltah a thingpo a che hung vailhung panpan asenji Nu Ngaivah kom ah chun bu asem dingin seipeh tan ahi..
( Hung kisen jah… )
” Ngaikhovah ! Kei hi ipia neigel a hiche bu khing hi nei neh sah gut ham? Nahetlou leh nanga dia lallukhuh kahi nahet nailou ham? Hiche insunga dia head kahi nahetlou ham? Ibol a hiche bukhing deh duh, me khing deh duh hi nei neh sah gut ham? “
Hiti chun insung ah chu akitomin, bu bel me bel jong kemchol lang se nan anei yin,
Alang khat ah, Sasat in jong anu Lhing te kemchol a konin jachat leh kichat toh tho’n a in lam u ahin ve in ahileh apa kisen gin leh, anu kagin ajah jeh chun anaopoh pumin mit a kon in mitlhi tanglouvin along in ahi. Aman jong anao pohna pon mangcha’n amitlhi akitheh in ahi.
Hiche pet chu mitin vai che doh jou theu ahijeh chun numei chapang chuleh khosunga tehse them khat tailou koima khosunga umlou ahi. Hiti chun pa Khailen jong akham jeh chun leltah a ana vailhung asenji Ngaivah chu lungsetna beihel in achuti voh in ahi. Chutia avoh kiuseh hilouvin akham jeh chun jachat umtah leh thanghoi tah thucheng in jong ahouse in ahi…
” Ken nanghi kadei jeh a kana kichenpi nahipoi, moh a facebook kichep nop thei nadia timepass a fake account a konna kanajol a kana kingaipi leh nangin neina dei val jeh a kaki moh chenpi nahi e, lungset tah tah a kalungset nahipoi, keiya dingin numei akivatpoi, tu’n jong kamasang ah umsot hih in, gangchal in na in ah kinung le in, kakom ah umsot hih in… “
Chutia asenji’n akham jeh a ahinalou beh a ahouset chu apona lheh in ahi. Hinlah asunga peng achateni Sasat leh Seiboi khankho ding agel leh ijat a ajachat, alhaset vangin akivohna maha thohlel pumin insungah alut in, atoh ding atham ding, mitlhi long pumpum chun abol in, lhasetna dimset pum hijong leh achate ni ding gel nan akipah pen abangin in ahi.
Chutia achateni jeh a agimna leh athohna ho gel jing puma aum jing laiyin pa Khailen in jong aban ah ahin man paiyin, ” kinloi tah in na in ah kinung le in, tunia kipat nanghi kaji nahi tapoi ” tia asei chu lhasetna adimset in, achateni ngailheh in tin hijong leh ngailou bang kisan Kilometer 50 vel a gamla a in lam jonin akipat doh in ache phei tan ahi.
Alangkhat ah Sasat in jong kem chunga konin a-in lam u mitlhi long pumin ana galdot jing nalai in ahi. Chomkhat jouvin ama’n jong anu ka gin ajah lou phat in amit a konin mitlhi ahin kitheh hul in kipah tah in inlam jon dingin anao Seiboi chu ahinpo phei tan ahi.
Chutia kipah tah a a inlam u ahin jot jing lai chun anung lama apoh anao Seiboi jong a imut a konin ahung khang paiyin, ” Nunu ” tin anu ahin hol paiyin ahi. Ajeh chu sun nilhuma anu noichep ahi nah lai jeh a dangchah a anu ahin hol pan ahitai.
Sasat jong anao gilkil a aka jeh chun ahin lhaipi tho in, in lhun a anu’n anao dangchahna adang nou sah ding kinem pum pumin ahungin ahileh insung ah koima ana umpon ahi.
Chutia anu akou jing laiyin, khangpheiya ju nam the thu a kho hephalouva imu, apa chu amu doh paiyin, ” Papa, kanu hoiya che ham ?” Tia ni vei thumvei adoh jou nunga jong ahin donbut lou phat chun ama’n jong ka aw chengin
” HENO KANAO AKAP E ” tin anu akouvin ahi.
Nilhum kon ahitan, lou che ho vai hunglhung phat jong ahitai. Hinlah Seiboi bang anu ngaiyin tanglou hel in achuti ka jing nalaiyin ahi. Chutia anaopa aka jeh chun Sasat jong anao chu apo pheiyin khosungah anu chena mun doh thei thei adongin hinlah koima’n ahedeh pon ahi. Achai chai na’n..
Hechong : Sasat, tu khojin kon tah a hoilai che dinga nanao chu napoh a ham?
Sasat : Hepi, kanao agilkil phat a kap kap jenga le kanu kahung hol ahi. Kanu namu lou ham hepi?
Hechong : Anjou langa chu lou lampi langa kamu jap hichu o…! Ipi hileh nanao chu hinpui in lang ken chang twi nahalpeh lhon inge, nanu chu sun a athing pohmo ho agapo khat tou hinte.
Hiti chun api Hechong te in ah anu khal twi bangin angah lhonin ahileh anu ahung kile mong mong tapon ahi. Chung tonisa jong molpang lep kon ahitah jeh chun Seiboi jong dapsa in anu bou achuti kouvin koima’n alhembi joupon ahi.
Hichun Sasat jong adong manin anao chu apo pheiyin lou lampi kigal mu namun khat a adingin kap pum pumin
” HENO KANAO AKAP E ” tia anu akou vangin anu’n tong ahin donbut tapon ahi. Hiche nikhoa kipat chun aloi apai nung phah tei ding kinempuma school che ding bou ngahlel Sasat hinkho chu anao Seiboi donna’n phat jouse amang in, loi leh pai hinkho otchat in guhthimin lonlhi along jing ahi.
Part – 2
___________________________________
Chutia anao Seiboi anu ngaiya sun leh jan a achuti ka jeh chun Sasat dingin, jan jong imuthei louvin chapangcha hinalai jong leh anu umtah lou jeh chun anaopa ding gel nan genthei tincheng athoh in ahi. Alangkhat a asenji aumlou nungin jong pa Khailen in ajudon anga deh pon ahi. Jingkah nilhah kitheilouva phatseh a akham jeh chun ” Kacha’n ipi aneh a adon ding ham?” Ti himhim agel phapon ahi.
Sasat teni ucha vang bu aneh lhon louna ahung tam thim ta’n, achai chai nan in sah in lhang jouse’n jong Sasat teni ucha chu ahin theida doh tan ahi. Ajeh chu in a bu aneh lhon lou jeh a mi in a bu aganeh lhon nalou mun umlou ahitai.
Sasat jong aloiho school ache phat teng, a otchalheh ji in hinlah ama dia nao don tailou bol ding aumlou jeh chun, guhthim thimin aloiho school che chu mitlhi long pumin ave lhum kei ji’n ahi. Aman jong lunghel leh aloiho otchat banna ding ti gel pumin anao akipoh doh ji in, lou lampi kigalmuna mun ah chun aga ding doh ji in mitlhi long chut chut pumin
” HENO KANAO AKAP E !” Kei jong school kache nome, itih leh nahung ding ham heno? HENO KANAO AKAP E, kagil akil lhon e nahung teng nehthei neihin poh peh lhon o ” agati ji in ahi. Hinlah akinepna jouse athon ahijeh in, lung lhadai deh in sun thip teng in lam ahin jonsuh ji in ahi.
Chutia Sasat teni ucha hinkho man dan chu nu Hechong in ijakai ahetsoh jeh chun alainat pi mama in, aman jong Sasat leh anao Seiboi chu akou ji in a in uvah bu anehsah ji’n ahi. Chutia Nu Hechong in ngailut leh khotona dim puma Sasat le anao bu anehsah chu pa Khailen in nikhat ahin heodoh tan,
Khailen : ( Kham pum a) Hechong, ipi bol a nangin kachateni na in uva guhthim thima bu naneh sah ji ham? Oelh kei hin kachateni avahlel e nati ham? Sum nati jong leh tampi kanei in, chang nati jong leh tampi kanei e. Ibol a apa kei um henasasa a kachateni chu chaga bol a nabol ham?
Chutia Pa Khailen in asei chu apetpet in nu Hechong jong lhaset nan adimin ahi. Hinlah chapang teni ding agel kit leh avoujang natpi mama’n, ” Hiche jukham ho thu akilah leh, akhampa sanga kingol jo ding ahi ” ti gel pumin hiche nikhoa kipat chun guhthim thim in apa hetlou kah in Sasat teni ucha chu a in uvah bu aneh sah ji in ahi.
Alangkhat ah nu Ngaivah jong asenji Khailen in chutia ahousetna maimaiya in lam aki le chu agel leh akisih mama’n, hinlah ” chomkhat beh ki engbol leh chateni khankho ding gel na’n nikho khat leh eihung pui tei nah ta” ti jong agel ahi. Ahin anu le apa chuleh a inkote’n vang ijat in hung thum jong leh nungsol kit tahlou dia ijakai kiphat sah u ahitai. Ajehchu achanu u, anao nu u sopi neilou bang banga ahin bol chu nasatah a apohnat u ahi.
Nu Ngaivah dingin hinkho kipana him him aumthei tapon ahi. Ahin dalhah Sasat leh Seiboi khankho ding gel gel nan angol pai ding ahitai. Hiti ho agel ji teng anuhgui abing ji in hinlah amadia asunga peng achateni toh akimuto kitna ding nikho agam mang cheh cheh in kinepna jouse pahbangin amol ji tai. Hinlah Pathen henga ataona thupi pen chu achate ni dama aum lhon a nikho khat leh kipah tah a aki muto diu hi ahi.
Phat leh nikho ahungchal in Sasat in jong leiset a angailut pen anao Seiboi gentheina tampi kimaitopi pumin ahin donin, insung genthei tah akon hungsei len ahijeh chun neocha ahivangin alung thim alim geh tan ahi. Alangkhat a Seiboi jong anu noichep ban hinalai jong leh anu aum tahlou jeh chun, aphatlouvin nomhen lang da jong leh chang twi ahin don pan tan ahi. Hiche hin nasatah in Seiboi tahsa asukha lheh in ahi. Mel a vet dingin atahsa poh jong koiman ahing doh talou dia agel ahi. Hijong leh Sasat in anaopa avoujang natpi jeh chun chapang cha hijong leh mi naopou anaopa toh adon tha ji in nilhah teng anao donna ten, Seiboi in jan a achep ji dia bongnoi themkhat khat ahin peh ji u ahi. Chutia achateni gentheitah a aum vangin pa Khailen in ajuneh anga deh naipon ahi. Chutia jingkah nilhah a ju akham jing jeh chun khosung mi chuleh gamsung mi jouse’n JING JUKHAM bou a amin ahet u ahitai.
Sasat jong insunga chat le thei natong le thei ahitah jeh chun insung minu um tahih hen lang, insunga mipa’n inchen lou chen don tahih jong leh anao Seiboi genthei sah louva umsah ding ti agel thupi pen ahi. Chuleh ama’n dei banga lekha asim joulou jong apona lheh in hitoh kilhonin ” Ken dei bangin lekha kisim jou tahih jong leh kanaopa vang lekha phatah a kasim sah tei ding ahi” ti bou agel ahi.
Jankhat ginchat lou beh in Seiboi nasatah in ahungdammo tan ahileh Sasat jong chapang cha ahijeh chun alo naje ahe tapon ahi. Adan chu sun a agilkil val jeh a neh lou ding khat ana kineh khah a chutia chu damlou ahi. Chutia lunggim tah leh lungdong tah a aum jing laiyin apa khamphel in ahung vai lhungin…..
Part – 3
___________________________________
Apa : Sasat, nanao ipi ti ham?
Sasat : ( Apa jukham akichat val jeh a sei ding ima helou, moh ka lhah jeng..)
Apa : ( Hung kisen) Na nao Seiboi ipi ti ham kati hichu o? Phaten ana ve in tia kavai lhah nahi hilou ham?
Chutia jukham puma hung vailhun apa akichat val jeh chun, Sasat jong kap pumpumin…
” Henu, hung loiloi o kanao toh kahin ngaival lhon e nu, nang naumlou nikhoa kipat bu jong kava khalhon tapoi nu, hung loiloi o.. kanao jong adammo in nang bou nakou kou jenge, ibol a neidalhah lhon ham? “
Chutia Sasat anu ngaiya aka jing lai chun,in sah a cheng Nu Hechong in jong ahin del lut paiyin, lupna chunga anatna thohlel a kijam Seiboi le lhong laiya anu ngaiya kap, Sasat chu aga puidoh in a in uvah bu aneh sah in chuleh Seiboi jong damdoi ima abol peh najal in anatna konin ahung oldomin chomkhat jouvin kihoupi thei ahung hitan ahi.
Alangkhat a chutia ju akham seh leh achate ni asuh genthei jing jeh chun khosunga Volunteer hon pa Khailen chu ajan mama’n aman un
Haosate changsal a ahen khovah un ahi.
Jingkho ahung vah in achate ni ana suh genthei dan khomi hon aseipeh ajah jah chun jachatna leh kiphatlamna adimset in ahi. Ajeh chu aju kham jeh a anung ama ahet phah jilou ahitai. Chuleh ajudon chu akisih lheh ji vangin kho ahunga vah a, ju kijohna mun alhun teng abep bep ahiji kit tan ahi.
Hiche nikhoa kipat chun achate nin apa akichat lhon jeh chun hou jong ahoupi ngam lhon pon chuleh apenna pa lhon ahivangin adei angai jong asei ngam ji lhon pon ahi. Hiche sang chun melma gin in aging lhonin ahi.
Chutia kahkom leh an ne jilouva gentheitah a hinkho ahin man lhon na ban ah Sasat jong chapang behsehlou ahitah jeh chun ” Hitia ipenna pa angsunga genthei thoh thoh jeng sangin” ti gel pumin kum thum bep hinalai anao Seiboi ahin kipoh in, mitlhi long pumin kilometer 50 vel a gamla Imphal tolpi jon dungin jan lhavah noiyah keng lampi in ahung phei lhon tan ahi.
Chutia anu ngai leh gilkil thoh pum puma lampi ahin jot jing laiyin anung lama apoh anao Seiboi chu anu ngaiyin ahung kap in, Sasat jong agilkil toh apa chunga alhaset toh, ahung moh lung hannin anaopoh chu ahin kumsah in, aloi apai kinahpi bangin anaopa chu akhut leh akeng tho’n ahin vo pan tan ahi.
” Nang jeh a hibanga gilkil dangchah kithoh a ibol a naka jing jeng ham? Henu le hepa hing nalai jong leh chaga ihi lhon nahet hilou ham? “
Hiti chun kho hephalou, agil kil leh anu ngaiya kap anaopa Seiboi chu ahouset toh avop akop in, hichun aman jong alung han val jeh chun mun khat ah anaopa chu adalha in,
” Nangho jeh a genthei hibanga kathoh ahi, nati ti kiti uvin lang, naso so kisoh un! ” tin chubang jan dap lai chun anaopa chu lampi pam ah kap pum pumin amoh dalhah tan ahi.
Sasat jong alung genthei val jeh a gilkil jeh le anu ngaiya kap anaopa adalhah vangin aki oideh pon ahi. Chomkhat chutia lampi ajot lai chun Seiboi in kap pum puma ” U u kakicha e, kagil akil e, mama kangai e,.. u u neidalha hih o.. kei jong neipui o, kaka lou ding ahitai, kei jong neipui o u u.. kakicha e.. kagil akil e, mama kangai e…” tia anaopa ka aw cheng ajah jah chun kitim joulouvin anaopa umna lang chu ahin del phaiyin kap pum pumin, ” Boi, heo in kadalhah lou ding nahitai, ibol a naka ham? Ibol a nakichat ham? Ibol a henu ngaiya naka ham? Na upa kei kaume boi, kap hih..
Chutia anaopa koma ” Kap hih in ati vang chun, amajoh kitim joulouvin achuti moh kalhah jeng tan ahi.
Mi dang dingin hiche ni jan chu insung mite toh kipah tah a an nekhoma, nomtah a choldo ni jan hijong leh Sasat teni ucha adingin gilkil dangchah thohni jan leh dapsa a nu ngaiya ka ni jan asoh doh tai.
Chutia lampi pama a ucha lhon a ki ngongkoi puma aka jing lhon lai chun….
Part – 4
___________________________________
Vangphat umtah in gari set jeh a hung vaigei Shaktiman khat ahungin, lampi pam’a chapang ni anu ngai leh gilkil jeh a ana ki ngongkoi lhon a kithin sutsut a ana ding lhon chu amu pai un ahi. Hiti chun amahon jong gari ahin kham pai un,
Driver : Boi, ipi bol a tujan hibang dap a hiche lai mun a dap thoh a naum lhon ham?
( Kichat toh gilkil tho puma koiman donbut lou)
Hiti chun amahon jong ave un ahileh, amaiso lhon a kon chun bailam tah in, ni ijat ham khat bu phatah aneh lhon tahlou ahethei jeng un ahi.
Amahon jong sun a aneh moh u, nehthei themkhat aum jeh chun aneh sah un ahileh anu ngaiya aka lhonna leh agilkil jeh a aka lhonna atang hel in ahi. Chutia Sasat leh Seiboi thil neh chu driverpa leh gari nung jui ho chun vetnom leh lungset thon avet nom thei lheh un ahi. Ajeh chu ni ijat ham khat bu nelou ahi lhon jeh a tampipi aneh lhon ahi.
Hiti chun amahon jong chapang teni chu lungset leh khotona neipumin gari sungah atousah un, kihoulim toh akop un achepai pai tauvin ahi. A oisung themkhat ahung dim tah jeh chun anu leh apa angaina lhon amang hel tan ahi. Hinlah Seiboi chu aneo jo ahijeh in kah kom leh nunu, papa ahin ti ji in ahi. Sasat in jong Shaktiman driverpa’n adoh jouse kichih tah leh hetthei tah in adonbut soh in ahi. Hiti ho jeh hin chapang Seiboi leh Sasat hinkho mandan ichan geiya agenthei lhon dan gari sunga tou ho chun ahetsoh jeh un, akaplou le alhisoh lou koima aumpo’n ahi.
Sasat taona jeh chun jingkah nilhah a jukham apa koma nungche kit louva, gari mahajon te koma umlhon dingin asunga tou driverpa leh gari nungjuiho akinopto tauvin ahi. Chuban ah news hihen lang, ipi social media facebook, whatsapp hijong leh Sasat le Seiboi chung chang thu ima thethang loudungin jong akinop to tauvin ahi. Ajeh chu apa’n abol gim lhon dan ijakai ahetsoh jeh uva, Sasat le Seiboi ding gelna ahi. Ahin khonung teng iti ham khat a a anu le apa’n ahin nung hol khah leh nungpeh dingin ijakai akinopto tauvin ahi.
Alangkhat ah mahajon te jong achate munchom choma themjil ahijeh un , in a chenkhompi ding mi ahomtho mama un ahi. Hiti ho jouse nung ah jong driverpa leh anungjui hon pha asah jouse chu mahajon pan jong pha asasoh keiyin ahi.
Hiti chun Sasat leh Seiboi jong anu le apa hing nalai jong leh nu le pa neilou bangin gentheina tampi thoh jing pumin hinkho ahin man peh lhonin ahi. Vangphat umtah khat chu Mahajon te jong Pathen hetah ahijeh un Sasat leh Seiboi chu amaho cha le penpi sopi bang bangin abol un kingailu tah in acheng khom un ahi.
Phat leh nikho ahung chal in, kum leh lha jong ahung chal in Sasat le Seiboi jong gollhang deh deh tan ahi. Sasat vang anaopa ding gel nan Saktiman nung ajui in hiti chun athemjil sah in ahi. Ajeh chu mi in a um lhon ahijeh a ijat in Sasat School kainom jong leh Saktiman nung jui ding aumlou phat a Shaktiman nung ajui ahitai.
Mahajon ten jong Sasat teni ucha chu alungse lheh un hinlah in cheng khat ahi jeh un mouthah ahin nei uleh, kakom leh kihet khelna ahun um jep jep ji in ahi.
Nikhat jong Sasat leltah in thinglhang langa konin ahungin ahileh, lampia gari set jeh chun ahung vai geilheh un, hetman lou kah in jan pung 11 lam ana hitan ahi. Jingkah a jong bu nelou ahijeh chun agil akil val in, kitchen a bu avet leh aum lou jeh chun, a in kote tho ding ati leh jan asot tah jeh chun akiphalam mama’n ahi. Hijong leh jingkah a kipat bu nelou ahijeh chun agil kil mama jeng in ahi. Ama’n jong neh ding ima kitchen a akisem ding ti agel jeh chun, Gas a ki on in bel agah son doh leh, room sunga kipat atahpenpa loinu ahung phun in aman jong thipchat a athusei chu angai leh,…
” Natong thamlou ibol a neh ding bou ahol a nahol u ham? Nahung lhun u leh neh ding, napot doh uleh neh ding, ija insunga thil phachom boldoh lou ! Nu le pa neilou bon hilou, hitin kisin sin jong leh lekha hung them un tin natoh ahin kimu teng uleh aneo a konna ahinvah doh koi ahi jong hephatapo vinte. Aneo jopa la ichom hilou, alenpa jong ichom hilou amaho jeh tah tah a jong sum le pai saving kibol theilou ahi. “
Chutia room sunga konna Veilam phun chun Sasat in jong ajah phat chun ama le anao kiseina ahi ti kichih tah a ahet jeh chun, Gas stove a abu hon ban chu olcha’n athat in, gilkil lheh in tin lel lheh jong leh olcha’n a ihmutna mun ajon paitan ahi.
Alangkhat ah Veilam thusei ho chu ana ihmu Seiboi in phatah in ana ngaiyin, a upa ding agel leh athoh joulou jeh chun mitlhi vachat chut in ana umin ahi.
Sasat : Boi, ibol a tuchanna imu nalailou nahim?
Seiboi : Heo, nang hunglhun ding kana nga jing ahi. Iti nang umlouva nanaopa kei imu hen tia nagel ham? Heo, nagil hakil ham?
Sasat : Akilpoi boi, nomtah in kichol jeng in.
Sasat chubanga agilkil vang chun ajou teng kanaopa’n kagilkil hedoh leh imutheiponte ti agel jeh chun gilkil lheh in tin lel lheh jong leh akillou leh alellou bang kisan aumin ahi.
Seiboi : Heo, hiche nehthei hi tunia kaloiho khat in, school a kaneh thei neh khatvei cha amu khah lou leh ngailut jal a eichoh peh ahi.
Tin a school bag a konin nehthei ahinla doh in. Chutia anaopa’n nehthei ahinlah doh amu phat chun,
Sasat : Hoiya sum nakilah a nangin nehthei nakichoh ham? Koi sum naguh ham? Mi sum guh lou ding ti ijat vei nakoma kasei ding ham? Eini hi nu le pa hing nalai jong leh chaga ihilhon nahet nailou ham?
Sasat hin anaopa nehthei peh chu School a aloi apai sum ahin guh dan a agel ahi. Ajeh chu amani dia nehthei chohna ding kiti sum aneilhon ding chu agel phah lou ahi. Hichen geiya hi hinkho gentheitah a ahin man peh lhon ahi.
Chutia ngailutah a apeh nehthei aupan, aloiho sum guh a konna ahinchoh angoh jeh chun lhasetna adimset in, mitlhi long pumin bang(wall) lang ngan nuhgui pumin akap in ahi.
Sasat jong agilkil val jeh jong hintin chutia anaopa ahouset jeng chu aki oimo lheh in ahi. Ajeh chu sapte thuchih khat in ” A hungry man is an angry man ” atiu tobang ahi. Leltah leh gilkil a tah ahung vailhun jouva lupna chunga konna ki oimona ngen thu kisei ajah toh hicheho jouse jeh a chu anaopa chunga moh lung han ahi.
Hiti chun a ucha lhonin mitlhi long pumin achuti ka jeng lhonin, khat leh khat ngaidam akithum to lhonin ahi. Jan jong ahung sot thim tan hijong leh Sasat teni ucha vang ngailut thimthu a oikhom lhonin ahi..
Sasat : Boi, tun genthei jong leng nangin lekha hasima nahin sim ding, sap le leng nahung hi teng nomsatah a ichen lhon ding ahitai. Chuleh ahithei channa nilhah lang seh a ground a ball naga peh ji khu nangah ding ahi. Ajeh chu lekha sim ho dia hiche football peh khu’n phat jouse asuh mang ahi. Chuleh jat le nam neo ihi naban uvah kitoson to theilou nam ihijeh un ijat in them jong le chun agamneite engset thangset jeh a sang tah nahung geilou ding thou thou ahi. Hijeh hin lekha joh phate ten kisim in lang football napeh ji vang ahithei channa nangah doh a pha ahi.
Chutia aupa’n ahilna chu thipchat in angaiyin ahi. Ajeh chu aneo a konna a upan angailut dan gil tah a ahet chet jeh a aupa thusei anel ngam lou ahi. Hinlah amaiso a kon alung lhailou dan hetdoh thei jeng ahi.
Seiboi hi aneojo hijong leh atahsa leh amel put dan aupa sangin ahoiyin chuleh alhing jo in ahi. Hiti ho jouse nung ah jong aneo a konna chaga hinkho tobang ahin man peh jeh chun aloi apai lah a kiphatlam na lungthim anei jingin koimatoh jong akina kha pon ahi. Hitiho jeh hin aloi apai chuleh asanga len ho ngailut achang jingin ahi.
Chutia kingailu tah a akihoulim lai lhonin jingkho ahung vah paiyin hinlah Sasat alel jeh chun khovah konin ahung ihmu lha’n ahi. Jingkah pung 8 lang ahitan, Seiboi jong school che dingin ijakai akigut tup jou tan ahi. Chutia aupa akitho lou phat chun aman jong aga thouvin ahileh lupna chung ah chun aupa……
Part – 5
___________________________________
Kho helouvin ana imu in ahi. Ajeh chu jingkah bu anehlou toh alel toh jingkho vah lam jong ana hetdohlou ahi.
Seiboi : Heo, kithou o..kithou o school kache ding ahitai.
Sasat : ( Hung kije) Ash ! Boi, pung ijat lha hitam? Kalel val a kho kana hai hita chu o!
Seiboi : ( Tot puma) Jingkah matah pung 8 lha ta hi, kithou gangta.
Chutia lupna chunga kipah tah a aumjing lai lhon chun,
Veilam : Nom nasa uve ! nom nasa uve ! hibanga kiki seimo a noptah a lupna chunga naum lhon, na natohnom tah hih u jong leh aneh beh aphatcha’n hung kineh ji un, kon nangho sap le leng banga nasin diu ham? Naneh u jong hol ding, naneh nau jong suhtheng ding !
Chutia Veilam thusei ajah jah chun a ucha lhonin kiphalam tah in lupna chungah koima apao doh umlouvin atou lhonin ahi. Alangkhat ah chutia amou nu uvin Sasat teni ucha asuh genthei jing chu mahajon pa’n ahet phah lou hel ahi. Hiti chun lungnommo tah leh lung thase tah in bu ne dingin kitchen lam ahin jon lhonin ahileh,
Mahajonpa : Sat, ipi nati ham itih ham a kipat insungah nakipah thei tahih beh e, oleh adamlou ngap nahi ham? Nadammo jong leh hinsei o damdoi ichoh diu ahi. Na insung bang bangin gel lhonin lang ima kipatlamna nei lhoh hih in.
Sasat : ( Amasanga tou Veilam amu jeh chun kiphalam tah in) Hepa, ima katipoi, kadam nai.
Hiti chun jing an ane khom un, jan a konna Veilam thusei jeh chun alungthim vang akichol theipon ahi.
Hiti ho jeh hin adamlou bangin hinkho amang jingin ahi. Ajeh chu lungthim damlou teng kipana taikou damdoi um jilou ahi.
Chutia kiphalam tah a hinkho man jing ding chu agel leh Sasat jong jan jong leh a imu theipon chuleh bu anehlouna jong atam jo ahung hitan ahi. Chutia niseh a agel jing jeh chun achai na’n jam manga munchoma anaopa toh umkhom ding ti ahin gellha tan ahi. Nu le pa hing nalai jong leh nu le pa neilou banga aum jeh lhon chun ima jouse agel leh hahsa asa maman ahi. Hijong leh mi in a kiphalam tah a um jing sang ti gel pumin anaopa akipuiyin, kumsot tah aneo a konna ngailutna neitah a ahin sin mahajon pa ngailheh jong leh amounu u phatlou jeh in munchom ah ache mang lhon tan ahi.
Chutia Sasat teni ucha ajam mang nikhat jou a ahin het doh phat chun Mahajonpa jong lunggim toh lunghan thopumin ahin hol in ahileh whatsapp group news hoa konin auman lhon ahin hedoh tan ahi. Aman jong kin loitah in aumna lhon adel pheiyin ahileh Sasat teni ucha chu Youth Club ho vetsuina noiyah tijat leh kichatna dimset pumin ana um lhonin ahi.
Mahajonpa : Sat, ken nang hi chapang sinthei tah ham tia, kacha bang banga kana gel a, atui nati leh kachohpeh, von nati leh kachoh nahilou ham? Chuleh nanaopa jong nang lekha sim joulou potnatna jal a neilou sasa a lekha kahinsim sah a tua jong class x asim hitalou ham? Ibol a tunikhoa milah a nei jumso ham? Ipi nalungkimlouna um ham?
Sasat : ( Akhut a mitlhi ahin kitheh) Hepa, neingailut lhon jong kahesoh nai, chuleh keini jong kanop a chelhon kahi lhonpoi,….
(Asei ding seilha louva kaplha jeng)
Chutia Sasat mitlhi puma ahoulim pet chun Seiboi jong in ning langah aga che phei in nao bangin aga kap in ahi. Ajeh chu anjou khat leh mahajonpa’n kumsot tah ahung um lhonna aman hinsei khante tia agel ahi.
Hiti chun Sasat kiphatlam dan leh kineosah dan amaiso a kon bailam tah a ahet jeh chun mahajon pan jong ima jouse amounu jeh ahi ding ahin gingmo cheh cheh tan ahi. Ajeh chu Sasat ahouset ni jan a chu thu kisei ho amang tobang atah tobanga ana jah ahi. Hitiho ahinsuhto to leh ima jouse amounu jeh ahiti kicheh tah in ahin hedoh tan ahi.
Hiti chun aman jong asakhao a konin sum sangsom ahinla doh in..
Mahajon : Sat, ima jouse kahetthem soh tai. Phakhat lai chun kipah tah in ina umkhom un hinlah kamounu u phatmo jeh in nangni jong ichan gei ham khat in kiphatlam na leh gentheina nahin to lhon ding ahitai. Hijong leh hiche ho jouse chu pona tahih in, nangni nabolna lhon chu ima ahipoi kei le nanu jong seidoh thei louva genthei kathoh jing lhon ahi. Ven, tun Pathen lungset in nang le nanao Seiboi jong gollhang mel napu lhon tan, hiche sum sangsom hi kikoi in lang nangma nin nop nasah namum lhon leh pha nasah namum lhon ah um jeng lhon tan. Pathenin damna nahin pe lhon hen lang nikho khat leh kipah tah a ikimu to diu taona toh thon galdot jing ute…
Kiphatlam leh kichatna adim laitah a mahajon pan chutia asei chu kidang asalheh in ahi. Alangkhat ah Pathen thilgon ahi ti ahet jeh chun akipah lheh in ahi. Hiche nikhoa kipat chun Sasat le Seiboi jong in bahara akilah lhonin genthei tin cheng thoh pumin inchen khosah ahin pan lhon tan ahi.
Mibanga neilou ahijeh naban lhon ah bel ding sopi ule nao anei lhonlou jeh chun nitin a Sasat teni ucha kiman chah dan ahah salheh in ahi. Hijong leh nelou chalou thei lou ahi lhon jeh in jachatna tampi thoh pumin an neh twidon akihol pan lhon tan ahi.
Aman lekha ana sim joulou pohnatna lentah neipumin sum le pai ahol in anaopa Seiboi athem jil sah in ahi. Ajeh chu ama kinepna chu tun gentheina tampi kithoh intin, mite nuisat in hinkho kimang jong leh kanaopa lekha ahung thep a natoh ahin kimu teng igimna le acholna jouse beitan te ti kinepna lentah anei ahi.
Phat le nikho ahung chal in Seiboi jong polsom le ni(10+12) ahin achai tan ahi. Hiti ho jeh in Sasat dingin lungmon aum lheh in ahi. Ajeh chu masanga konna ana kinepna leh analungtup chu hunglhung vah ding ahitai tia agel ji ahi.
Nikhat Seiboi college ache ahung kile nailou jeh chun alunggim lheh in ahi. Mibanga phone choi ahi lhonlou jeh chun kijah matto nading lampi dang aumpon, jan jong ahung sot tan hinlah Seiboi ahung kile nai dehpon ahi. Aman jong insah inlhanga akivoppi aloi apai khat le ni aga dongin hinlah koima’n Seiboi che na ahe dehpon ahi. Chutia lunggim leh lungdong tah pum’a aum jing lai chun…..
Part – 6
___________________________________
Kiphatlamna dimset maiso pumin Seiboi jong ahung vailhung in ahi.
Sasat : ( Lunghang thimtah a) Iti dan a nache nading mun jong seilouva um nahim? Nang jeh a ichanna kana lunggim le kanaboi nahet lou ham? Boina ito lhon leh eini a dia ibel lhon ding leh ikithopi lhon ding aumlou hi tuchanna nahet nailou ham? Among monga tulai hibang gamsung thuboi,laboi laiya ibol a nache nading mun seilou nahim? Ina tohna a ilel ji toh bu le me aminsa ana um tadem kiti a….
(Asei ding seilha joulou, mitlhi’n donbut pai)
Seiboi : ( Kiphalam tah a) Heo, neingaidam o, kaloi hon LAGSA sports a football peh dia eihung tep u ahin, che lou ding kati leh eihung jol jol jeng phat uva kana che ahi. Chuleh matah a in hunglhung ding kati ahin, hinlah kahung nau gari lampi a aset jeh in kahung vaigei khatai. Lungset tah in neingaidamin o? Akit teng kache tahlou ding ahi.
Sasat : (Hung kisen jah) Ball peh in kache e ! Ijat vei ball peh ji tahih in kati hilou ham? Ken gentheitah a lekha kasim sah hi nisa noiya ball khat nunga lhai lele dia kasim sah nahipoi ! Nikho khat leh service khat hin ki jih doh in natin tunia naupa gentheina ho hin ki lesah kit tei ding kinem puma kasim sah nahi. Ken kana sim joulou potnat najal a, neilou sasa a gentheitah a sum kahol a lekha kasim sah nahi. Hiche ball napeh jeh a ijat vei nakeng jong nakisuh khah hitalou ham? Aphachomlou ding thil ah naphat sumang mang hih in . Amonga jong polsom le ni nahin chai nikhoa kana thusei ho chu nagel dohlou hitam? ” Eini hi nu le pa hing nalai jong leh chaga tobanga hinkho mang ihilhonin, genthei hahsatna, nopni dani ito nikho lhon jong leh ikipapi ding leh itilkhou lhon ding mi aumpoi, lekha hasim simin sim in boi nang bou kakineppi ahi” tia kana seisa hilou ham? Ibol a tunia kalung hibanga nasuh nat ham?
Chutia a upa’n ahouset chu ima seilouvin phatah in mitlhi long chut chut pumin angaiyin ahi. Ajeh chu aupa hina jal a ajana vetsah na a thucheng khatcha a adonbutlou ahi. Hinlah Seiboi vang a football peh thep jeh a ahelou koima umlou ahi. Hijong leh aupa’n a ball peh ding aphallou jeh in ball peh a ache ji teng jong leh guhthim thimin ache ji in ahi. A ball peh thep jeh in ama panna pou pou team chun gol alel ngaipon ahi. Chutia ball peh aminthan vang chun aupa’n ahedoh pon ahi. Ajeh chu kichema ache ji teng amasapen a aloiho koma ka upa koma nasei doh uleh kahung lou ding ahi tia asei peh masat ji jeh a koima’n Seiboi ball peh thep chu a upa Sasat koma asei doh jilou ahi.
Phat le nikho ahungchal in Seiboi jong guhthimin Pathenin apeh ball peh theina mangcha’n area sports ho ah aminthang lheh in ahi. Ijat a ball agapeh ji a upa koma a-im vangin Sasat in ahe doh thou thouvin ahi. Hinlah a upa’n aphal loujeh in guhthim thim ball peh in aga che ji in gentheina tampi athoh jingin ahi. Alangkhat ah area sports ahilou leh mun dang danga akichep na ah best player ahilou leh top scorer ala jingin, kipaman a asan Certificate leh trophy ho jong in lhut louvin aloite in ah akikoi ji in ahi. Ajeh chu in alhut ngai ngai leh aupa’n ahin pho ding chu ahet jeh a chutia abol ji ahi.
Chutia Seiboi in aupa hetlou natei dia ball agapeh ji vangin ” Pon noi ah mei-al akisel theipoi ” kiti bangin ahin hedoh thou thou in ahi.
Sasat : Boi, ibol a na upa’n kahil naho leh kahin kineppi naho hi nasuh mil ji ham? Hitia kasei nangailou ding thou thou ahi leh, hin hin sangin thidoh tange. Ajeh chu nang lekhasim ding khosah najal a hichan a ulsa long leh jachatna tampi thoh puma sum le pai kihol a, hitia kasei nangailou hi….
(Athusei ban angah a kap lha jeng)
Chutia aupa ama ball peh jeh a thi ding chan gei asei phat chun, Seiboi jong nasatah in aki oimo in, akoma towel kikhai chu ala in mit a konna tanglou hel a hungva lha aupa mitlhi chu aga theh peh in ahi.
Seiboi : Heo, lungset tah in avel in neingaidam in.. Nanaopa’n Pathenin eipeh ball peh thepna talent hi kamoh ngah theilou jeh a nathusei ngailou banga kaum ahi. Hijong leh heo, tua kipat ball peh nga tange nakinepna bangin ken jong service hoitah khat kahin kijih doh natei ding lekha sim kithah pat kit tange.. Henu le hepa kikhen til laiya lou lampi kigalmu namun a neipoh a kaka pet a ….
” HENO KANAO AKAP E ” tia nasei chu athah beh in kalung ah ahung ki lange..
Hiti chun Seiboi in jong aupa ama ball peh jeh a alhiso jing leh hinnom lou chan geiya asei phat chun aman jong, a it tah leh ahomtho tah Game boot ahin chuleh aball pehna manchah dang dangho agala doh in, kerosine kichoi pumin in nung lang ah achephei tan ahi. Chutia ache jing lai chun….
Part – 7
Gellou ding tincheng agel ji in,kah komleh ” kathanopna kaupa’n eihet pehlou ” ti ho agel ji teng lam ajot pum chun anuhgui ahung bing ji in hinlah ” kaneo a konna ka upa’n eihin khohsah dan leh eingailut dan ho ” tia agel ji teng ama le ama themmo akichan ji in ahi.
Chutia lunggel gentheina dimset puma ache jing lai chun polko(Cl-ix) anasim kum’a Thadou-Kuki subject a jilkung pu’n Football peh minthang Pele hinkho thusim ana sei ho le ana tilkhou naho chu athah beh in alungsung ah ahingel doh kit in chuleh ISL player lah a Kuki Chapa Len Doungel, Boithang Haokip, Thongkhosem Haokip chuleh adamg dang ho jong ahin geldoh in nasatah amaho jal in akitilkhouvin ahi. Hiti chun alungthim sung ah ama le ama akihoulim in ” Kajat chankhompi, kapao tho kibahpi ho jong India gam sunga mi hetthei a aum u leh kei jong Pathen song jing puma kaum leh nikho khat leh kei jong amaho banga mi hetthei a kahung um ding ahi, hiteng chuleh ka utoh kagenthei naho jouse nopsah na a kakile sah ding ahitai” tia ahung kigel lhah phat chun akhut a kerosine leh Gameboot achoi chu tol se nan aneiyin ahal lha tapon ahi.
Hichun ama’n jong gameboot chu phatah in aki koi in, hinlah chutia akikoi tup chu a-upa ahetsah lou ahi. Hiche nikhoa kipat chun Seiboi jong nikho khat leh ball peh minthang tah ahung hi ding kinem pumin jingkah nilhah leh Pathen kom ah taona amang jingin ahi. Ajeh chu Pathen lekhabua ” Amasa tah in ama gam le chonphatna holmsa’n, Chuteng hichengse jong chu nakipeh be dingu ahi ” tia kisun khu alungthima ageldoh jing ahi. Hitiho jeh hin nikho khat leh Pathenin apeh talent a konna genthei hahsat najouse kile sah tei ding atup le adoi thupi pen ahi.
Phat le nikho ahungchal in Seiboi in jong aupa thusei anil nomlou jeh chun ijat a football peh alunglut a akichep nom vangin lhangphong tah in ball aga peh ji tapon ahi. Hinlah nilhah lang ahung hiteng lentol a aloiho ball peh gin ajah ji teng che ding bou atha nom ji in ahi. Hinlah aupa lung anatsah nom lou jeh chun ijat in chenom in tin gakichemnom lheh jong leh ache jipon ahi. Hinlah nikho khat leh vang football peh minthang tah ahung hitei ding akinem jingin ahi. Hitoh kilhonin aupa munchoma apotdoh ni ho leh area sports ahilouleh mundang dang ah aga kichem ji in ahi.
Phat leh nikho ahung chal in Vangphat umtah in nikhat club minthang tah a coach khat in Seiboi kichep dan ho ahinmu doh in alung alhai lheh in ahi. Hitoh kilhonin aman jong Seiboi chu amaho club a kichem dingin atem in ahileh Seiboi jong da ding ati leh masanga konna Pathen koma anatao jing na chu Pathenin alampi ahin gonpan hitante tin agel in, hinlah kahkom leh lung lhahdaina tampi anei jin ahi. Ajeh chu aupan football akichep ding aphallou ahi. Hiche sanga goverment service hoitah khat abol ding joh adeisah in ahi. Hiti chun aman jong ipi hileh aupa ahin doh masat dingin Coach pa toh akinopto lhonin ahi.
Nilhah in ahunglhunin ama’n jong aupa koma thil ijakai sei ding atileh kiphatlamna adimin ahi. Ajeh chu ahung nop lou tei ding ahetsa ahi. Hiti chun ama jong lungdong leh lung lengvai tah a akingaito jing lai chun….
Sasat : Boi, kei hi alou theilouva lha ijat ham khat hi thinglhang langa hepu te khoa chomkhat na kaga to tei dingin aumtai. Ajeh chu exama nakigut nathei dia sum le pai ijat ham khat hung ngai tei ding ahijeh in,ima jouse kima guttup chu thilpha ahi. Kei jong hilanga sum leh pai ahi hina a hol ding kati leh hepu’n eihin hatep val a alou theilouva kache tei ngai ahitai. Boi, ipi hileh kapot doh teng kathusei ho phaten kimel chih in lang, tua nahin bol dingpen exam a hi phatah a, gunchutah a nakigut ding ahi.
Alangkhat ah a upa’n ” Lhani lhathum kapot doh ding ahi ” ati chu ama dia Pathenin alampi ahin gon peh dan in akilah in ahi. Ajeh chu hiche sunga chu CC Meet kichem ding ahi.
Hiti chun aman jong coach pa chu akijahmatto peh toh lhonin ijakai akigutup pan tan ahi. Hiche kichepna sungah chun Seiboi in abol hoilheh in ahi. Hiti ho jeh hin amaho club kichepni teng mitin in avetnom thei lheh un, sim le mal sah le lhanga konin ave in mintin ahung ji in ahi. Alangkhat ah chutia anaopa Seiboi football peh thep akithan dan chu thinglhang langa natonga um aupa Sasat in ahetphah lou ahi. Ajeh chu Seiboi in akichepna club ho koma aupa ahetsah lou diu dan ijakai aseipeh masat ahitai.
Seiboi kichep chu mijouse lungsung alo dimin ahi, ajeh chu koima toh kinalou, kiphun louvin mailhaisel in umpire ho janna neitah in abol in akichep dan chu avenom lou leh themsahlou koima aumpon ahi. Hitoh kilhonin club dang danghon jong amaho club a kichem dingin adeilheh un ahi. Hinlah aupa’n akichep ding aphal lou jeh in, club danghon ijat a ajol vang un anjou khat leh ka upa”n hedoh khat tou in te atijeh in aki gel lha theipon ahi.
Phat le nikho ahung chal in Sasat jong thinglhanga anatoh namun a konin ahung kile in, thoukang hatna gam ahijeh in malaria nat in ahin pha in tahsa damlou tah in, in ahung vailhungin ahi. Chutia adammo vang chun pharmacy a damdoi khat le ni akichoh chu ahi jengin hopsital a kivetsah ding ti agel theipon ahi. Ajeh chu sum le pai themkhat ahin mu sunsun chu anaopa lekhasim ding gelkhoh najal a akoitup chat ahi. Hinlah ani ani a atahsa ahunglel cheh cheh jeh chun, ajo jo nan nasatah in ahung dammo lo tan ahi.
Chutia aupa thiding chan geiya ahung dammo phat chun Seiboi in jong club hon kithopina a anapeh u sum themkhat ana koi chu aupa hetsah louvin hospital a agapuyin ahileh vangphat umtah in adammo na a konin ahung damdoh tan ahi.
Ajeh chu asum koi chu aupan ahet ngai ngai leh a ball peh ahin hetdoh ding ahijeh a guhthima aman chah ji ahi.
Sasat : Boi, kadammo laiya sum nasuh mang ho chu hoiya nalah ham?
Seiboi : Heo, kaloi ho koma apa a kahin lah ahi. Service kahin jih doh teng sah dinga kalah ahi. Nanaopa kaum laisen ima lungkhamna nei hih in heo, kaneo laiya kachunga nana gentheina ho akeh khat jong kaboldoh nailou ahi. Hinlah nanao keiman nanga dinga tuchanna kabol thei sun hi nathusei ho jui jing ding hi ahi.
Phat leh nikho ahung chal in Seiboi jong CC meet a akichep dan ahoijeh in, Manipur thalhenga gampama kichem dingin amin ahung chong tan ahi. Alangkhat ah aloi apai hon amin ahung chon jeh chun a otcha lheh un ahi. Hinlah Genthei Seiboi a dia lungkham umna tah khat ahung hitan ahi. Ajeh chu football akichep a-upan ahin het doh tei ding ahitai tia agel ahi.
Hiti chun ijakai agel a angaito teng lungkhamnan adimin ahi. Ajeh chu mi tampi’n amunoma amu jou lou, ginchat louva amin ahung jao chu agel ji teng ” Pathenin kataona asang mong mong ahitai ” tia agel ji ahi. Hinlah a upa’n ahet ngai ngai leh asollou ding atah san jeh chun, hiti ho agel ji teng jan jong leh a imuthei jipon, chuleh bu jong ane nom jipon ahi.
Chutia lunggim le lungkham tah a aum jing lai chun, aloipa ngaitah Lenthang ahungin..
Lenthang : Bai, tulah namaiso kavet ji teng nalung thim anommo lheh e, ipi boina nanei ham?
Seiboi : ( Kiphalam thimtah a) Bai, ima katipoi…
Lenthang : Sei tango bai, huimut louvin thingna aling ngaipoi.
Seiboi : ( Maiso nguithim puma) Bai, kahe tahih e ! Keila football peh Pathen jal a hichan chan kipha ta a ei tosot ding insungmi koima umlou, tuchunga State level thalhenga kakal son nadinga a jong kiman chah le nading sum le pai jong kaneilou, kahe tahih e bai kei a dia football kapeh sang channa keiya dia lunggimna kibe bang jeng….
( Asei ding seilha louva lhasetna dim set puma anuh gui hung bing)
Chutia aloipa Seiboi kitim joulouva anuhgui ahung bin a amit a kon mitlhi ahung lonlhah amu jeh chun Lenthang jong aloipa ding agel leh hah asa mama in, ama jong ahetmanlou kah in amit akonin mitlhi ahung long lha tan ahi.
Lenthang : Bai, hiti hin bol hite, na
u-pa phalna louva nakal son ding jong chu anop theipon, hijong leh tuchunga hi nache pou pou leh nanga dinga namalam hinkho hung vah tei ding dinmun in aum e. Che tei dingin vang kigo in, na upa kom ah ” College study tour kache ding ahi ” tin lap hite. Hiti hin kisei leh ima aseilou ding ahi. Hiti chun Seiboi le Lenthang jong kilungtoh tah in COLLEGE STUDY TOUR a dingin aupa Sasat kom ah alap lhon tan ahi.
Phat le nikho ahungchal in, Seiboi jong Manipur thalheng dingin a u-pa hetsah nom lheh intin hijong leh alou theilou ahijeh in hetsahlou vin lungthim nopmo thimtah in Manipur dalhan akal song tan ahi. Alang khat ah Sasat jong masanga apute khoa anatoh ban tong jom kit dingin thinglhang lam jonin ache kit tan ahi.
Seiboi jong masanga akichep sangin abol hoilheh in ahi. Hitiho jeh hin akichepna club coach ho leh manager hon Seiboi kichep ave un alung lhai lheh un ahi. Amaho club kichep seh leh Seiboi in jong award khat amutei in ahi.
Chutia anaopa football peh aminthan vang chun thinglhang lang a um aupa Sasat in ahetphah lou ahi. Ajeh chu aumna mun khoa chu Mobile network alhun louna ban a kijahmatto na lampi dang umlou ahi.
Vangphat umtah in Seiboi jaona club chu amajal in final chan ahung kai un, a upa hetsah ding ati leh anjou khat leh eihin house in te tia agel jeh chun ima asei ngam kitpon ahi. Ama jong ima jouse agel ji teng lhasetna adim jingin ahi. Ajeh chu midang akipa ahilou leh alhaset nikho teng lunggel ngapna ding anei ji un hinlah amavang akipana hi hen lang alhasetna hijong leh lungngapna ding aneilou ho agel ji teng aloi apaiho mulou natei dingin guhthimin mitlhi along jingin ahi. Hinlah nikho khat teng aupa’n athanopna Fooball peh ahin tosot tei ding kinepna lentah neipumin Pathen kom ah taona amang jingin ahi.
Sasat jong thinglhang langa konin leltah in ahung vailhungin, vengsunga mi khat le nin ” Sat, nanaopa Seiboi chungchang nahet khahlou ham?
Sasat : Ipi ti ham kahe doh hih beh e. Ole study tour anachena uva toset ima ato khat tou ham?
” Ahipoi, nanaopa Seiboi chu mi hetthei tah in aumtai, tule tua ama helou koima aumtapoi,tunilhah jong leh amaho club in final apeh diu ahitai “
Hiti chun Sasat jong agelphah lou hel a anaopa football peh a aminthan chu agel leh masanga aball peh jeh a ana jahda ho chu ahingel doh in alungthim sungah kisihna dimset pumin thonggo bangin mit a konin mitlhi ahung valha in ahi.
Nilhah ahung hipaitan, khosung vengsunga mitin in Seiboi kichep ding vetkal ngahlel in aum un, nungah gollhang kimkhat chun nehthei ima akisem un football peh ve dingin amun mun ah akitit un ahi.
Sasat jong thinglhang langa konna leltah a hungvai lhung ahijeh in achol lheh in ahi. Hijong leh anaopa kichep ve dingin thanom tah in akigo in, bu jong matah in akihon mintan ahi. Vangset umtah khat chu hiche nilhah tah a chu kolphe meivah vahlouni jan ana hikha tan ahi. Hijong leh veng sunga youth club ho kihapei najal in final match vet thei ding dinmun in aum tan ahi.
Sasat in jong aganna thei channin bu ane in, kipah le thanom tah in final match ve dingin isunga avah candle chu amut mit in ache phei tan ahi. Chutia ache jing lai chun jan lhavah emsel chun khosung veng sung ahin sal emsel in phatchesa a anaopa toh gamnoi a gilkil dangchah ana thoh lhonna, ki ngong koi puma anu le apa ngaiya ana ka lhon nikho chu ahin geldoh in, hiti chun kitim joulouvin anuh gui ahung bingin koima umna lam hephalouvin achuti lhiso jeng tan ahi.
” Boi, neingaidam teitei in o, na upa kana lungmol jeh in natha nopna, Pathenin napeh na talent football peh thepna ana tosotlouvin nanga dingin melma bangin kana ume. Kei gin le kichat jeh a gentheina tin cheng nana to ding jong katah san e boi, hinlah tunin India gam pumpia mi hetthei khat a nahung um keu hilouva final match chan geiya nahung kichep doh hi na upan kahin kipapi in, kahin kithang atpi val e. Tunikhoa kipat lungmong tah a football kichema nache ji ding ahitai. Boi, nahung ding kal ngah lel in kaume “
Hiti chun Sasat jong jan lhavah noiyah chun angol bangin achangin achuti kihoulim in ahi. Ama jong chomlou kah in football vetna ding mun chu ahunglhung paiyin mi anadimset in ahi. Seiboi in ball ana kichep khompi aloi khat le ni chun a upa Sasat anaopa ball kichep ve dinga ahung chu kidang asalheh un ahi. Kim khat chun tot toh tah gomin ” Tunilhah vang go hung ju tei ding ahi Seiboi upa football ve in ahunge ” akitiuvin ahi.
Sasat hin anaopa Seiboi ball peh ding ana phallou najeh pen hi aman lekha ana sim nomlheh jong leh insung genthei naho jeh a ana sim sang joulou pohnatna jeh a
” Kanaopa vang gentheina ijat kimaitopi ding hijong leh kimaitopi a lekha phatah a sim sah ding, nikho khat leh chaga banga hinkho kaman lhon hi ahung kile kit tei nading kinepna lentah neipuma football apeh sanga natoh khat beh hin kijih doh tei hen ti hi ahi “.
Final match jong ahung kipan paiyin Sasat in TV screen a anaopa achuti hol vang chun amudoh pon ahi. Kahkom leh atahsan lel ji in ahi. Ajeh chu insung genthei tah ahilhon jeh a hichan geiya akichep doh ding chu atahsan lou ahi. Chutia lungdong tah a anaopa ahol jing lai chun Seiboi ho team ah mikhat ahung kikhel in ahunglut thah chu koi ham tia phatah a avet leh anung lama SEIBOI tia kijih chu ahin mudoh phat chun kipana maiso pumin mit a konin kipana mitlhi tanglouvin ahung long pan tan ahi. Chutia Sasat mitlhi vachut chut puma avet jing lai chun akoma avetkhompi ho koima alhisoh lou aumpon ahi. Ajeh chu mijousen Sasat teni ucha hinkho mandan ijakai ahetsoh jeh chun anaopa hichan chan a ball peh minthang ahung hidoh chu koima akipah lou aum jeh a kipana mitlhi long ahi.
Part – 8
___________________________________
Chutia kipah tah leh lunglut tah a avet jing lai un, ginchatlouvin generator ahung kisuhmo in, aban ave jom thei tapovin ahi. Alangkhat ah match kichai nading minute 30 bou akivat tan, vengsunga asemthei mikhat le ni pan halah najal in match kichai kon minute 2 in nah nah in ahin sem doh un TV agah on uleh match akichai chat in ahi.
Final match ahitoh lhonin alam lama pachanna neiho thilpeh phat jong aumin, hitoh kilhonin Seiboi in jong hat-trick amu jal in kipaman asangin ahi. Hiche chung chona jong best player award jong asan kit ahi.
Chutia anaopa’n best player leh hat-trick amujal a kipaman asan amu mu chun phatchesa a aball peh jeh a ana houset naho avel in ahin gel doh kit in kisihna lungthim adimset toh lhonin anaopa hung vailhun ding kal khal twi bangin angahlel in aumin ahi.
Kolphe meivah kisuhlou jeh in deibangin vethei hih u jong leh Seiboi team hon goljona ahin neina ban uvah, changval a kipaman ahinsan jeh chun mipi jong kipah tah in akikhen tauvin ahi. Hitoh lhonin Sasat jong kipana mitlhi kitheh pumin in lam ajon pheiyin ahileh amasanga che mini akihoulim in, ama min tobang akiphah jeh chun olchan anailut in kihetmo sah tah a agah ngai leh..
” Seiboi ball ana peh laiya aupan ana pho leh ana jahda ho chu aupa chun hung ve leh kati val e, anaopa chubang football peh ana thema hichan chan a ahung lhun ding hi kana mu peh ahitai. Aman ana tosot jing leh tua hi saotah aphah ding ahitai. Tuchung ache doh jong anjou leh ka upan hedoh inte tia kichatah a ima seidoh ngamlouva College study tour a kilap a kalsong ahi “.
Chutia amasanga teni kihou lim ajah jah chun anaopa hung vailhunna ngaidam thum ding kal bou angahlel pan tan ahi. Alangkhat ah Seiboi chutia mi hettheiya ahung um chu aja jousen akipapi un, hinlah ahung vailhunna kipana maicham sempeh ding leh alamto ding anu le apa chuleh a inkote aumlou jeh chun vengsung Youth Club hon ijakai thupi tah a agut diuvin jong akiphat sah tavin ahi.
Chutia ijakai agel a angaito jing puma lam ajot jing laiyin vangset umtah in jukham puma gari neo hintol khat in, ahetmanlou kah in anung lam ahin sukha in, hiti chun kho helouvin lam len ah chu thisan naisan kai pum in alum den tan ahi. Toset hijong leh vangphat umtah khat chu football ve a che ho hung kikhen pet ahijeh in, lamlen a kho hephalouva kijam Sasat chu aganna thei penin hospital ah apulut tauvin ahi. Hinlah ichan a kisu kha ham ti koiman ahetlou jeh in mijousen ahing dingin vang agel pon ahi.
Thil umdan ho chu apet pet a whatsapp group leh facebook group lah dunga aki the thang jeh chun, Seiboi in jong chomlou kah in aupa kusuh khah thu ahedoh tan ahi. Alangkhat a goljona anei jeh un akipah lheh un hinlah genthei Seiboi dingin vang, kipaman ijat a asang vang chun alungthim sungah aupa bou agel in, aloi ho ijat a akipa uva kipa golnop abol vang un Seiboi vang aning lang khat a mitlhi twi in achup denin ahi. Thil umdan ho Club Manager pan ahin het toh lhonin ajing mama leh akin theipen a Seiboi alhun thei na dingin thil ijakai aguttup peh tauvin ahi. Hiche ho jouse chungah jong aupa kijenna dingin sum lakh ni toh apeh than ahi.
Hiti chun jingkho hungvah a in lama aupa melmu ding kal ngahlel tah a aum jing laiyin phone call khat ahungin,
Lenthang Bai, na u-Sat kisuh khah thu chu nahet hitam?
Seiboi : Henge bai, hiche thu kajah a ba lunggim tah a kaum ahi. Ichan chan aphah hinam?
Lenthang : Bai,…
(Asei ding seilha theilou)
Seiboi : ( Alunggimna kibe) Bai, seijin ipi ti ham ka u chu?
Lenthang : Bai, akisuh khahna maha alet jeh in tu din mun toh abah leh..
(Athusei ding seilha louva kap lha jeng)
Hiti chun aloipa Lenthang’a kon a aupa kihasuh khah thu ajah jeh chun gellou ding tin cheng alung ah ahung kilang in kahkom leh leiset a angaipen aupa toh kimelmu kit talou dia aginmo jeh chun, koima umna lam hephalouvin room sungah chun achuti ka jeng tan ahi.
” Heo, neingaidam tei tei in o? Nanaopa’n nagentheina ho nopsahna a kile sah kit tei ding deina jal a nakoma seilouva ball peh a kana che kit ahitai. Kahung lhun teng nadei chanin nei vo in lang nei jep o heo, kei jeh a hichan nato hi nanaopa kei jeh ahi. Heo, tukal ball peh a kache kit tahlou nadin kahung lhun teng kakeng jong jep bong jengo….
Hiti chun thil umdan ima jouse angaito leh lhasetna, lhasetna ngen ahi jeh chun alupna chungah mitlhi vakang theilouvin achuti lhiso jeng tan ahi.
Jingkho ahungvah toh lhonin nidanga niso tobang louvin avetna jouse le akiheina mun jouse lunghelna ngen ahi. Ajeh chu ipi abol a asei vanga alungthima hospital mun a um aupa bou alung gel a um ahi. Hiti chun airport ajon pheiyin lunggel leh lung lengvai tah pumin chomlou kah in Tulihal Airport ahung lhung tan ahi. Aman jong phah nading le chena ding tampi um jong leh Shija hospital lam ajon pheiyin ahi.
Hospital agalhungin ahileh aupa ICU ward a aum jeh chun dei bangin akimuto thei naipovin ahi.
Doctor : Patient Sasat sopi nahi ham?
Seiboi : Henge sir, kei a dia ka upa ahi. Ichan chan aphah hitam sir?
Doctor : Na upa hi….
(Asei ding seilha manlouva nurse khat in ahin kou)
Nurse : Sir, ICU ward ah patient khat leltah in aume !
Doctor : Sorry Mr. Seiboi i will be back soon after a minute.
” ICU ward ah mikhat leltah in aume” kiti thu ajahna ban ah, Doctor pan aupa chung chang aseilhah nailou jeh chun alunggimna ahung kibe cheh cheh in, ahetman lou kah in amit a konin mithi’n ahin donbut paiyin ahi. Milah a um ahijeh chun ijat a akitem vangin akitem joupon, akitem chanin amitlhi lon atam cheh cheh in ahi. Chutia mitlhi vachat chut puma aum jing lai in doctorpa jong ahung lhung paiyin…
Doctor : Seiboi, idia na chuti lhiso jeng ham? Lungkham hih in tua nurse nun alel e tia ahungsei chu michom joh ahi. Na u-pa chu jannia sangin themkhat a oldom tai. Nikhat nini jou leh in lama kijen thei ahitai. Chuleh nilhah lam teng general ward a hin tikdoh tebi ahitai. Ima lungkhamna nei hih in, jannia alel pet chun nang min bou aphah e.
Chutia doctorpa thusei ajah jah chun kipana maiso dimset pumin doctorpa chibai aboh in ” Sir, kakipah val e, hichan chan a ka upa nana boipi jal un Pathenin phatthei naboh tau hen “
Doctor : Kei jong kakipah e.
Phat le nikho ahung chal in Sasat jong dammo na a kon neokhat ahung oldom tah jeh chun ICU ward a konin ahin tol doh un chuleh kihoupi thei ahung hitan ahi.
Hiti chun Seiboi in jong a upa lam chu anailut in kiphalam tah in..
Seiboi : Heo..
( Kiphatlam val a ima sei ding helou)
Sasat : ( Alupna a kon olcha ahin donbut) Boi, itih a nahung lhun hitam?
Seiboi : Heo, Study tour a kapot doh jeh a aphatcha nakisuh khah kahin laplou ahi. Lungset tah in nei ngaidam ta o heo?
Seiboi hin aupa’n thil ijakai ana hetnailou ding ahisah jeh a kiphatlam na dimset puma ” Study tour a kapot doh jeh a aphatcha nakisuh khah kahin laplou ahi ” tia asei ahi.
Sasat : ( Mit a kon mitlhi hung pot doh ) Boi, ibol a na upa koma najou nasei ham? Kahe them nai boi, ima kiphatlam na nei tahih in, tunikhoa kipat lungmong tah a football peh a nache ji ding ahitai.
Chutia aupa”n ijakai ahin hetthem chu agah naito leh kidang jong asan chuleh Pathen henga ana tao jing naho jong athah beh in ahin gel doh kit in, kipana mitlhi long pumin a-upa angongkoi in koima umna lam jong hephalouvin a-ucha lhonin aki ngong koi lhonin achuti ka jeng lhon tan ahi. Chutia aki ngon koiya aka jing lhon laiyin Seiboi in jong aupa’n akisil pon chu agah ho doh in ahileh leiset a angaipen aupa’n leiset hinkho chomcha anei sunga keng(leg) ni a lampi ajot thei tahlou ding chu ahin mudoh tan ahi. Ajeh chu gari’n anasuh khah chunga chu avei lang keng nasa tah a ana kitoh khah ahi.
Anaopa’n akeng ahin mumu chun Sasat jong jachat leh lhasetna dimset pumin bang(wall) lang angan nao bangin achuti ka jeng tan ahi.
Seiboi : (Kap pum puma) Heo, ibol a lungneo nahi ham? Ven ! Nanaopa kei kaum nai, tunikhoa kipat nopsatah a naum ding ahitai chuleh go juh teng in phatlou jeh a na imut chim jilou jong tunikhoa kipat nomtah a na imut ji ding ahitai. Na keng ni in lam jot thei tahih jong leh chun kei kaum nai heo, nakeng aumlou nalanga nanaopa kei kapan jing ding ahi. Nomsa tah kaum sah ding nahi, ima lungneo na nei tahih in. Ibol a lhisoh nahim heo? Eini a dia Pathen koma igentheina lhon kilesah tei dia ina tao jing lhon chu tunikhoa aga imulhon ahitai heo, ibol a lhisoh nahlai nahim?
Chutia a-upa lhisoh lou dia achuti tep vang chun ima jouse agel leh lhasetna adim jeh chun ama jong kitem jou louvin anuh gui ahung bingin mit a konin mitlhi ahung soh doh paiyin ahi.
Phat le nikho ahung chal in Sasat jong anatna a kon olol a damna lam ahin mano toh lhonin hospital ahin dalha tauvin ahi. Hinlah vangset umtah in avei lang kengin lam ajot thei tah lou jeh chun wheel chair mangcha’n nitin hinkho amang jingin ahi.
Nam sunga Civil organisation jatchom chom ho pan halah najal in Seiboi hung vailhun kipana maicham sem peh dingin thupi tah in programme ahin gong un ahi. Nam sunga lasa them ho jong kouna achan u toh lhonin ijakai guttup ahitan ahi.
Hetmanlou kah in programme nikho jong ahung lhung paiyin sim le mal, sah le lhanga konin mitin asang ajan ahung kikhomin lentol dimset in mipi ahung kihomin ahi. Programme ijakai ahin pan un nam sunga lasa them hetthei phabeh hoa konin Sasat in aneo laiya ana lasem chu ngei tah in asa un ahung kikhom mipi lungsung nasatah in atongkha in ahi. Ala cheng chu…..
HENO KANAO AKAP E !
Chung toni molpang lep ding ahitai,
Ami chunnu vai hungthong lhungta,
Kei chunnu hoiya vaitham hitam?
Chunnu ngaiyin kanunga kapoh,
Kanao akap kap e !
Chorus :
Heno kanao akap e !
Nang ngaiyin akap kap e,
Nahung vailhun ding kinemin,
Khomol akonin kahin galdot lhon e,
Gilkil leh dangchah thoh pumin,
Heno kanao akap e !
Gammang thing noiyah,
Gilkil dangchah thoh pumin,
Chun le jo ngaiyin kamao lhon e,
Ge bang khensa hita jong leh,
Vonchoi ding gel nan,
Selung haithem lhonin.
Insung mipa vaihom themlou jeh in,
Ka chun toh gebangin eikhen,
Itih tah leh sagga bang hinkho hi,
Ahung kile kit dem tin,
Kum le lha simin kagal dot jinge.
Hiche la asah sung uvin mipi koima akap lou aumpon ahi. Chuleh stage langa wheel chair chunga tou Sasat le anaopa Seiboi jong mipi masanga ijat a akitem lhon vangin mit a konin mitlhi ahung long doh thou thouvin ahi. Hicheho jouse na ban ah Sasat in atouna mun a konna anoapa toh iti hinkho ahin man lhon ham ti thusim aseiho jeh chun mipi lungsung nasatah in anguisah in ahi.
Hiti chun Seiboi in jong aneo laiya konna football peh ana lung lut dan ho leh ana kiham bol dan ho thusim ahin sei toh lhonin ahung kikhom ho lah adeh a khangdong ijat ham khat in nasatah in aphat chompi lheh un ahi.
Phat achaina lam ahung hitoh lhonin compere hoa konin mipi langa konna koitobang chomcha ahoulim nom aum le tia phat ahin hon jeh chun mipi langa konin nupi khat stage lam jonin ahung lhai tho jengin ahileh mipi’n kidang asah jeh u chun hiche nupi nu chu ave cheh un ahi. Ama jong stage langa ahung kal doh toh lhonin microphone chu ahin nailut paiyin..
Nupi : ( Kiphatlam leh lhasetna maiso puma ) Kei kahi leh minu ti dia jong lom lou beh kahi in, hijong leh tunikhoa kathisan a ana peng kachapa’n hitobang lolhinna ahin nei toh lhonna kipathu chang khat changni cha hijong leh seilou ding kati leh kanop lou jeh a kahung din doh ahi.
(Asei ding seilha louva kap lha jeng)
Chutia ahoulim jeh chun mipin Sasat le Seiboi penna nu ahi chu ahin hedoh un chuleh Seiboi leh Sasat in jong phatsot tah anu mel mu ding kal ana ngalel lhon anu ahi chu ahin hedoh lhon tan ahi.
Ajeh chu Nu Ngaivah hin asenji toh ana kikhen nunga jong nikho khat leh achateni kahtvei beh mutei ding analung tup jeh a ana hol jing laiya nilhah khat TV a Seiboi kichep ahinmu doh ahi. Hiche nikhoa kipat chu hoilai ah programme akiman dem tia ana ngalel jing ahi.
Aman jong asei ding seithei louva mitlhin adon but jeh chun atouna mun a kile kit dinga stage a kon agah kum lhah kigut leh..
Anung lama konin Seiboi in akhut ah ahin tuh in…
Seiboi : Heno, hoiya che ding nahim? Ven ! Tunikho hi eiho insunga dia kipana nikho ahi. Ka
u-toh nang le kapa ngaiya nikho ijat kahin man lhon hephalouva tua hoilam a che dia kigo nahim? Hungin tuni khoa kipat ka utoh nomtah a ichen khom diu ahitai.
Chutia anucha uva stage mun a aki ngong koi uva aka jing lai un, mipi langa konin Pa Khailen jong stage lam jonin ahung pheiyin ahi.
Pa Kahilen hi achapa kipana maicham sem peh ding ahi ti ajah nikhoa kipat chu jao tei ding ana gut ahitai. Hinlah jingkah nilhah a ju adon jeh a programme nikhoa jong anakham khah jeh a Usher hon hall sunga ana lut sah lou u ahi. Ajeh chu koiman Seiboi penna pa ahi chu ahet lou jeh u ahi. Hiti ho jeh a aphatcha hall sung hunglut manlouva neokhat ahung lim dom phat a usher hon ahin sollut u ahi.
Hiti chun ama jeh a aji achaten gentheina ijat ham khat anato chu ahung kigel doh in nasatah in akisih in mitlhi long pum pumin van lam asangin Pathen kom ah ngaidam akithumin chuleh aji achate kom ah jong ngaidam akithumin ahi. Ama jong chomkhat jouvin mipa jah dingin microphone mangchan ahung houlim in,
Khailen : Kangailut sopi ule naote, kei ju le sa neh jeh in aphatlouvin kaji kacha kana sugentheiyin ken jong nopna him him katoh deh poi. Lungset tah in kei hinkhoa konin kihil un lang ju le sa, khamna thei kiti phot phot ana bol hih un. Hiche hin insung kipah tah a cheng khom ijat ham khat aphatlouva agenthei sah ahi. Chuleh tuni khoa kipat in lungset tah in alen aneo in
” JING JUKHAM ” tia neina kou nau chu tunia kipat ” JINGKAH A TAOJING MIPA ” tin nei kou tauvin, tu nikhoa kipat Pathen le mipi hijat masanga ju vel don kit talou dia kakitep ahi.
Chutia pa Kahilen houlim chu mipin kidang asalheh un ahi. Ajeh chu mijousen aju don val jeh a amin jeng jong ” Jing jukham” bouva ana het u ahi. Alang khat ah Pa Khailen in Pathen le mipa angsunga ju don kit talou dia akitep jeh chun mipi koima akipah lou aumpon ahi.
Hiche nikhoa kipat chun Sasat te insung kipah tah in acheng khom un, masanga ju le sa neh jeh a insung genthei te chu insung maicham kisem jing namun asoh tai.
BEITA
