BY: BOIMANG HAOKIP
Mangboi jong vangset na jeh in aneolaiyin a pa in ana dalha tan,anu seh2 toh hungkisin ahi in,hijeh chun inchen louchen in koima aphajou behseh lhonpon ahileh,Mangboi jong achagat chu akilang dehset in hijeh chun aloilegol telah a chun alunglen joupon ahi..
Apa in a dalhah kal kum get(8)jouvin Mangboi jong Gollhang ahung hitan ahi..
Jingkah khat hi anu in ahinkou tan ahileh amajong achetai
Anu…Boipu ven,napa in eidalhah kallhon jong asottan,hijong leh Ken vang na chagat hi suhmil sahtei a naloi nagol bang2 a hinkho nomtah a mansah teiding hi kana got jing ahi in hinlah tunvang nangjong Gollhang nahitan hijeh chun tohletham hihen lang Epi hijong leh ekitho khomjing louleh keima thahat naseh in ema a hithei tapoi
Mangboi..Heno epidinga kisonglal nahi ham,mite vang a U anao nulepa kikimsel in aum in nom asah lheh uve,hijong leh keijong neingailut nahi a chamkim selin emacha lungkham na kaneipoi hijeh chun olmo hih in keima in na kithopi jing nange tin alhamon in ahi..
Hiche nia konchun Mangboi jong natoh in sum a hol pantan,aloiteho hinkho man bang mangnom jongleh ama dinga a hithei loujeh chun genthei tah leh mite hinkho otcha pum2 in na atong jing in anu toh akitho khom jingtai..
Anu jong achapa toh natoh le tham a akitho theijeh chun nom asa in,chuleh amani kimanchah nakham chu aneijing lhon in ahi..Mangboi jong natoh alal jijeh chun nikhat khat leh aloiho toh aga kihuilha jiuvin ahileh nom asajilheh uvin,hijeh chun aban a vadoh nading mun ho akisem kitji uvin ahi.Hiti chun mun nom2 veding chun aloiho chu hapta seh in achejing taovin ahileh Mangboi jong athanom jilheh in hinlah mite toh akibah loujeh chun aloiho bang2 chun ache thei jipon ahileh alungthim in chaga hinkho a hahsa ngeiye tin akilhaset jitai..
Hiti chun aloiho in vonhoi2 akichoh un fon hoi2 akichoh un,garineo jong akichoh uvin hiti chun anop2 na uvin avah jing taovin ahileh Mangboi jong Gollhang chapang ahijeh chun aloiho hinkho manchu ahin otcha tan,hinlah ama dinga hitiho kichoh dingchu agelleh hahsa asah jeh chun anu ahet sah nompon,hinlah hinkho kipah thei behseh Lou ahijeh chun anu in vang achapa lunggel dingho chu ana hethem in guhthim in ana lhisoh jitai..
Nikhat hi Mangboi loiho jong kihuilha ding in akigo uvin,Mangboi jong atem uvin ahileh Mangboi jong athanom lheh jeng in hinlah anu seh2 toh nikhotha kilo thua kivah ahijeh chun a potdoh leh aboiding ahe in,hijeh chun ama natong ding in akigo tan ahi.Aloiho toh akihou uchu insung a anu in ana ja in,achapa aloiho hinkho banga a mansah joulou jeh chun agelleh lainat nan adim in,guhthim in ana lhisoh kitin ahi..
Hichan a achapa chagat jeh a aloiho lahjenga jong agollhan hinkho nomtah a amanthei loujeh chun anu injong achapa hinkho a nopsah na atoding agelleh hahsa asa in,ama leh ama themmo akichan ji in ahi..Hitia anu hinkho manjing chu Mangboi in ahet phat in anu akouin
Mangboi…Heno Gollhang hina jalchun loilegol te hinkho man vang otchat aumnai,hinlah keidinga hitabang hinkho manna phat chu lhungloulai joh hinte,hijeh chun pona behseh hih in tin anuchu alhamon in ahileh
Anu…Boipu Napa beh ana damnalai hileh neokhat beh jong nomsa dom in natin,milah a jong lhathei dom nan Nate,hinlah tunvang na nopsah na phat ding laiyin genthei na nathoh tai tin alhi akitheh tai..
Anu injong boipu Napa damlai a nikho khat leh nahung gollhan ding hi teng chuleh nalampi neokhat beh hijong leh na kisem thei nading tia bank a sum them khat kana koipeh lhon nahi in hiche sum chu ladoh hitin nangjong naloi lepai lah a nachele natheiding gari khat kilah tan tin asei tai.
Mangboi…Lungdong tah in anuchu ave in,heno hiche nasumkoi lhonchu a manchah nading nikho alhin masang se in chuti um um tante,keidingin gari neiphat avat nalaiye tia anujoh alhamon chun,anujong akitim jou tapon,achapa chu angongkoi in boi nachagat jeh a naloi lepai lah jenga jong lungmonga nalhat theilou hi nanu keidingin vetjou ahipoi,hijongleh nangin pha nasah dan dan himaihen tin a dalha tai..
Mangboi jong chaga ahia anujong meithai ahi vangchun anu chun alungmonpi lheh jeng in ahi…
Hiti chun anucha lhon in vai akonji lhonin kipah tah in aneikham kham lhon a chun alunglhai seljeng lhonin ahi leh,kholai mi phabep chun akipapi lheh uvin ainsung jeng uva jong kihil na in anei uvin ahi..
Nikhat hi anu jong ahungdammo tan ahileh,Mangboi jong a lungkham lheh jeng tan,hijeh chun anu in bank a sum kikoi ana seipeh chu lahdoh a anu jending atitai..hinlah anu in akouin ,,
Boipu hiche sum chu lahdoh ding ngaito hih in,keijong natna sang tah kahi pon,hijeh chun box sunga kakoi chu choiyin lang loujoh gala tan tin asoltai.Mangboi jong hiti chun lou cho dingchun achetan ahileh,loukijoh nakoma chun mipha bep ana umin amahonjong Mangboi komchun aboina hochu adong uvin ahileh hoitah in aseipeh tai..
Chomkhat jouvin lampia nungah ni hung kilhon chu amutan,hichea patchun Mangboi jong khatnu chunga chun alunggel aumpai tan,hinlah houpi ding jong ajahcha in,houpi louding jong hoia kon ham ahetnom jeh chun njoleh kivelmu tahih leh atikit in hijeh chun amani kichai chu angah tan ahileh,akoma nupi khat chun,Mangboi Epi nanga ham nanu in na2ngalal dhe,ole nungah teni chu nanga ngapham tia ahin seichun miho chun avesau2 uvin ahileh Mangboi jong ajahcha cheh2 in tollang ave in adonbut tapoi.Hitia thukisei chu nungah teni injong aja lhonin agah nuisat lhon e.Hichun nupi khatnu chun ahin seipai kit in,Mangboi amani chu chanding nati leh nachagat na lungthim chu lehlha inlang,garineo kichoh inlang naloiho bang2 khun smart thet in anunglhon juio chuti loule koiman nadei ponte tin ahinsei kit in ahileh Mangboi jong vetnading he talouvin,thipchet in akile tai..
In alhun in alungthim in emadang aum tapon,nungahnu masanga min nachagat lungthim lehlhan tia ahouna ho chu agel jing in ahileh alunghang cheh2 tan,anuin ahin hetdoh phat in thu umchan jouse aseipeh kittai…Hichun anujong thangtom behseh in boipu gari neo choh vangin kithi Sam ponte kasei2 ngaiyin ati in bank a sum umchu aladoh lhon in Mangboi ding in gari acholhon tan,hiti chun Mangboi jong kahlah kom2leh aloiho lah in alhathei jingtan ahileh anujong achapa milah a lungmong sela alhatthei jeh chun akipah jilheh in ahi..
Mangboi jong nikhat aga vadoh leh lampia nungah khat in gari ana nga amutan,amanjong akom aphah chun agah kham in ahileh,alunga chengjing nungahnu ahi phat chun,pharmacy maia a jachat naho chu ageldoh kittan,hijong leh akham ngal ahijeh chun achenading munchan akilhonpi tan,akile lamlhon jongleh kilhon kitding in akitemtoh lhonin akin cheh lhonin aboi kitlhon tai..Hitia Mangboi in ainchan ale thah kit jouchun achenna jong ahetan,aminjong Hoineo ahichu ahetai..Hiche a konchun Mangboi jong aga chejing tan ahileh amani kikah a chun kingailut na ahung umtan hijeh chun Mangboi injong achagat chu jachat pitalou vin aumtai..
Mangboi lungthim a Hoineo chu aumjing tah jeh chun nilhah khat hi anu akouin
Mangboi…Heno seinom khat kaneiye
Anu..Epi ham boi seiyin
Mangboi..Heno eihokho sah langa nungah khat kalungset in epiti nagel em
Anu…boi ken koi ahila kiheloua Epi kasei dhm,nangin pha nasah leh apha hijeng lou dhm tin aseipeh tai..Hichea patchun Mangboi jong Hoineo komchun lungngam pel in a chejing tan ainkote geitoh jong akihe tauve…
Hoineo nulepa injong Mangboi thusei danleh chonchan danchu avet lhonleh midang sanga kiphatlam nakhat anei danin amulhon in,chuleh ngailut na jong aneilhon in ahi..
Hiti chun Mangboi injong ol2 in Hoineo komchun Lungset thu ahinsei tan ahileh Hoineo injong thil umdanchu anulehpa ahet sah tan ahi.Mangboi chunga lungphatmo na aneilhon loujeh chun achanu lhonjong aphoh lhonpon ahi.Hinlah Hoineo nu in vang Mangboi chu insung dinmun holeh kimanchah danho hoitah in adong in ahileh emajouse a hethem lhon tan,min muneo na neijongleh amani invang ngailut najoh anei lhon e..Hijeh chun Hoineo jong Mangboi chu phatea kilungset pi a hinkho a mankhompi ding in aseipeh lhon e..
Nulepa te hetpeh na noia kilungset ahilhon phat chun amani jong nom asa lhon in,hinlah akilungset joulhon a Pat in vang Mangboi jong masanga sangchun aga viljou behseh tapoi.Ajeh chu anujong atahsa dammo na jat2 nei ahung hitan ahileh tohletham jouse ama jeng akipat angai tan,hijeh chun nungah koma lungmongsel a um naphat a lhasam jeptai..Mangboi in deibanga aviljoulou laitah chun achagat thu seijing nupi nu chapa HEKHUP kiti Gollhang pa chun Hoineo chu aga mudoh kittan ahileh adeilheh jengtan hinlah Mangboi dongma ahilam ahet lou jeh chun jolteiding angaito tan,Hoineo injong Hekhup chu Mangboi toh khokhat ahi vang ana hekitpoi.
Hekhup injong Hoineo limkhat akilah in anu avet sah leh anu injong hoi asah jeh chun Mangboi toh akihet chu aseipeh pon hijeh chun achapa toh suhto teiding angaito tan ahi…Langkhat a Mangboi jong boilheh jongleh Hoineo chu aga vilji thou in,hinlah Hoineo invang midang in ajolthu jong asei doh pon hijeh chun Mangboi jong lungmong selin aum in ahi..Mangboi injong anu damlou jeh a adeibanga Hoineo aviljoulou chu aseipeh in hijong leh jochan a vildingin asei in inlam kileding in aumtai.Hoineo nulepa injong Mangboi chu akou lhon in,sum themkhat apeh lhonleh mangboi jong anompon ahi.Hijeh chun hoineo pa in ahoulim pi in Mangboi nachagat jehleh nagenthei jeh a sum kapeh nahi poi ngailut jeh ahi in kilah intin apetei2 tai,ngailut jal atijeh chun Mangboi injong kiphatlam tah in akilah in akile tai..
Hichun Mangboi injong anukom in thil umdan asei chun anujong kipatoh kiphatlam akop in ahi..Anujong anat na a oldom tan,nikhat kholai a agache na in Hekhup nuleh nupi khat kihouna ahin jadoh tan,amajong thipchet in akomlhon a chun atouvin angai in ahileh Mangboi dongmanu ahiding chu agingmo tan,hijeh chun njoleh Mangboi dalha in Hekhup toh kicheng khaleh achapa hinkho jong boiin tin,amaho kahjong nommo dhm tin Mangboi dongma neidan holeh amin ho achenna ho ahinsei leh ahung kitoh khatan ahi.Amani la thu hechen aumlhon loujeh chun koicha pen dongma ham ti hedingin a inlam cheh akile lhon tai..
Mangboi injong anu thusei chu agelleh nom asah lou jeh chun a natoh ding dalha in Hoineo kom achetan ahileh Hoineo jong bazaar a thilcho dinga ana kigotlaitah ahijeh chun anulehpa in amani asol pai2 lhontai..lampi ajotjing lai lhonin
Mangboi…Hoi thukhat kadoh Nome nommo nasah dem
Hoineo…Heo Epi ham neidongo nommo saponge,,kiphatlam joh aumthim kigo bouve tin agah dai e
Mangboi…Nao keitai lou nakoma Lungset thu hinsei umji em?
Hoineo…ema imlouvin,heo nungah khat hina jal in aume ,hinlah kalungset najouse nang kapeh ahitan,ejat in kon Epi seijongleh nangdia bou pangjing ding kahi
Mangboi..koiham le nahin jol chu
Hoineo…Hoitah injong kahe behseh poi,ajeh chu akanlou ding ahijeh in donse injong kaneipoi,ahin amin chu Hekhup ahi e.
Mangboi..hoilang a kon ham
Hoineo..aumna vang kahepoi
Mangboi in jong Alim lemel put dan asei chun hoineo injong henge ati tai,hichun asei kit in,nao tua Pat a hi kalhinlal na leh kamitmo na jeng najah ding ahitai hijong leh Ken nangho komin emacha thu ka impoi hijeh chun ase hihen apha hileh imjong ka im louding ahi in keima kamcheng tailou thudang tahsan hih in,chuti louleh neilungset najouse nahin lhaso a nei dalhah ding ahi…
Hoineo jong akigel2 in,heo Epi nasei naham,oleh naki het uham tin adong kit e,
Mangboi.…nao nasei pa chu khokhat kahiu vin,chuleh ekimuto masat nipen a kachagat jeh leh kagenthei jeh a nang kachan louding thu seinu chu anu ahi e,chukit leh kanu jeng tohjong koi mou hiding ham tia kinel pan ahitai,hijeh chun mithusei jouse vang tahsan hih in,njoleh Heno le hepa injong ana tahsan khalhon leh einikah boiding ahijeh in ana hetthem sah in tin akihoulim peh lhon leh bazaar ana lhung lhontai…Mangboi injong thil umding dan hoitah a aseijeh chun lungmong selin ahin dalha kittan inlam akile tai..
Nikho phabep jouvin Hekhup nu jong Hoineo te in a chun aga chetan ahileh Hoineo nuchu aloiho ana hijeh chun a kingailu chom lheh uvin ahi..Hekhup nu injong aloinu komchun Hekhup le Hoineo kichensah dingthu chu tot tabang tah tabang in aseiyin hinlah Hoineo nulepa invang adonbut lhon pon ahi..Hiche nia konchun Hekhup teni nucha jong a chejing lhon in hinlah amani kinep nabang leh deibang tah in hiche thu a chun akihou thei pouvin chuleh Hoineo injong Mangboi toh khokhat ahi ahet jeh chun hoitah a houpi ding jong anom tapon,anulepa jong khokhat ahi thu uchu aseipeh in,hijeh chun amaho kah chu kihoutoh na aum thei pon ahi..
Hekhup nu injong Hoineo nulepa komchun Mangboi chaga ahi keu hilou vin,koima toh jong kivoptheilou chuleh genthei tah a hing ham2 ahi bouve,Hoineo in Epi nehding atia,hoia ge ding atia ana kilungset pi ham,hisangchun Hekhup toh kichensah leuhen kenjong kachanu bang2 a kagel a kakisin ding adei angai lhingset a kapeh ding ahi tin asei tai.Hoineo nulepa invang phatecha injong adonbut nom lhon tapon,chuleh Hekhup nu thusei a konchun mipha ahiding atahsan loujeh chun tohding kaneiye ana kihoulim2 uvin tin akilepdoh tai.Hekhup nu injong Hoineo pa umlou kah atikit in agolnu komchun Mangboi techu aseise kittan ahileh,Hoineo nu injong golnu echate hijong leh anoplou nabehseh in akisol nompon,akigellhah na a jong akikham nompoi,chuleh mihem hi neilegou nehlechah jengseh a kipah ahipoi,lungthim kipana joh thupi ahi atipeh tai,Hekhup nu injong Hoineo nu thusei chu nommo asah jeh chun a dalha tai..
Nilhah khat hi Mangboi teni nucha jong Hoineo te ina agache lhontan ahileh phatah in ana liem uvin,chuleh anneh jong hoitah in asempeh uvin,Hoineo pa injong Mangboi teni chu jangeh lhonin lang kihoulim2 uhite Mangboi nujong hungkhalou hija ati in akham tan ahi..Nilhah in Mangboi leh Hoineo jong ainkote utoh akihoulim taovin ahileh,Mangboi nu injong Mangboi pa damlai a Pat ahinkho thusim uchu aseitan ahileh Hoineo nulepa injong angailu chom lheh lhonin ahi..Hoineo nu injong Hekhup nu thusei jouse chu Mangboi teni aseipeh in,hinlah kon Epi seijongleh eiho kikah thu ahi in aseidiu mong ahi,eiho kihetthemto bou thupi ahijeh in nommo esah loudiu ahi ti in kihoulim toh kidai toh akop uvin TV chu ave uve…
Ajing in Mangboi teni jong akile lhontan ahileh,anu jong Hekhup nu thusei chu alunghang lheh in gabolchah ding anomlheh jeng in hinlah Mangboi in akham in nache leh eini ethepmo ding ahi Hoineo nulepa thusei ho sumil hih in tin akham tai…Hinlah Mangboi injong alungthim in jachat toh pohnat akop in ahi..Lang khat a Hekhup jong Hoineo koma aga cheleh anu thusei jeh chun Hoineo injong ahoupi tapon ahileh Hekhup jong lunghang tah in ahungkile in anu koma aseichun Hekhup nu in jong Mangboi nu chu aga house in,meithai chaga nahi lhon kihet lhon lou,Hoineo te koma epi naga seilhon ham,jachat nahet lhonlou ham,jingkah nilhah nehding ban kimujou lhon louva mikoma nei ga seiset uham,koimachan emacha ding nati lhon hih inte nangni tabang inle Lou neilou,gotwi vat na insung a Cheng teni tin aga house tan ahi..
Hiche pettah chu Mangboi natong a achepet ahi in anubou ina um ahi..Mangboi nujong alunghan lheh vangchun adonbut nom pon,hinlah Hekhup nu thusei chu aphohnat behseh jeh chun,seiding helouvin amoh katai..Hekhup nu injong anop2 akiseilhah phat chun a dalha tai.Nilhah in Mangboi hunglhun in anu maiso avet leh nidang toh abang tapon,adammo a hisah jongleh hikitlou Epi thu umham tia adoh jongleh seilouvin kipah tah dan in aum in ahi..Hekhup nu in hitia Mangboi nu aina aga delbulu chu Hoineo nulepa komin Mangboi nu in eihung delbulu e tin agaseikittan ahileh Hoineo nulepa invang atahsan behseh lhon pon,hinlah khatvei chu Hekhup nu thusei ho aseipeh lhon jeh a chu aga houset hi dhm tin agel kitlhon in ahi.Nikhat Mangboi agache leh Hoineo nu in thil umdan aseichun Mangboi jong alungdong lheh in anu hitia umding chunla atahsan pon ahi .
Mangboi in alhun in anu chu ahouse kit in epidia mikoma chu khat nasei set ham ina kiumthim2 ji in atipeh tai.Anu invang emacha seilou vin boi nikhat leh thudih chu achamin hung kiphong nante atipeh e..Mangboi injong thu naki doh le emala seilou a,tua hitia thu gingkit,ole Hoineo toh hin kichensah louding neiti ham,hitia thu agin jingleh kon eingailut lhon a achanu eipeh lhon ding ham tin lunghang tah in room akijot tai….
Lhakhat jouhin Hekhup jong Hoineo ahajol cheh2 phat in Hoineo injong Mangboi komchun kichen ding ahin seitan,Mangboi vang hahsa asa lheh e,hijong leh thu umdan hethem anu in akouin,
Mangboi che inlang Hoineo chu ga kipui tan,chutilouleh eini nucha ding in lhepna ahat Val tai tin asol tai ..Mangboi injong Hoineo ahin kipui tan ahileh hiche nilhah chun Hekhup jong aloiho atem in hiti chun ajum husan chun ju adon uvin achuti kitom tan Mangboi te chu thading matding in achuti saptan hinlah Mangboi te invang a lim teng kihoulim pi ding in angah uvin ahi …Hoineo injong Hekhup nu in Mangboi nu jouthu a angoh ho chu ana het ahi in,chuleh anulehpa injong Hekhup nu thusei chu atah ahileh Mangboi toh kichensah louding tigei a ana seilhon chu ahet jeh a jinei loidinga Mangboi ana no ahi…
Mangboi nu injong achapa leh Hoineo kichen nilhah chun maicham semding agong in hinlah Hekhup umchan jeh chun ema abolthei tapouvin,hinlah jingkah ahi phat in hoitah in Hekhup nu thusei holeh ama angoh naho chu ahilou dan asei tai.Chuleh Mangboi ana lunghan najong chu ana pohnat jeh chun ana sumil pon,achapajah a boipu Ken vang kamcheng ngaimo khattou kilha khaleh Hoineo nulepa lunghang intin meithai chaga ehia,naneo a kona nakipana ding leh nalunglhai nading kibol dohjouloua tua nalungset pen beh nakichenpi thei le nakipana lentah hidingham tia kagel jeh in Hekhup nu thusei ho kana donbut pon,chuleh Hoineo nulepa kasei set najong aum khapoi,hinlah meithai lunglhom leh lhasam kahijeh in min anop2 eisei khum in hinlah nang ding gelna jeh a kana thoh nah2 ahi e,hijeh chun kachunga nalunghan nachu nei ngaidam in, keima laigil a nahung pen a deilengai lhasam tahleh loile gol otcha jingkei a hinkho naman hi navangse nalom2 e meithai tha lhasam in eti kangailut vangin nangdin neokhat behjong achamkim na umjou ponte,hijongle kabolthei sun tia lonlhi puma kathoh hi ahimaiye tia kappum a ahoulim lai chun Hoineo jong alhi along in,Mangboi jong alhi akitheh in,heno nei ngaidam in,keijoh in thu kana hetthem loujoh ahi bouve,keijeh a min anop agot a nahouset a nadu nangaijong seilou a naum naho jouse kana hetthem lou jeh a kana lunghan sah nahi e.Chuleh kaloi kagol lah a kalhat thei nadinga neingailut naleh keiding gelna a nalhilon na tampi jong kahenai hinlah ken epia kalesah ding hitam “HENO NEINGAILUT NA KAHECHEN TAI” tin achuti ka lhon tai..
Hoineo injong alhembi lhon in,hichenia konchun amani nupa jalin anu lhonjong nomsatah in a umtan,chuleh anu lhaset nading leh lunghan nading him2 abollhon pon ahi…..
Mihem hinkho a hin ngailut ding thil tampi akineiyin,hinlah CHUNNU in acha angailut navang atepi bei ahi…
Enu leh pa in loilegol banga lungmong tah leh bukim sel a ekimanchah thei nading in abolthei kalval in abol in,chate ding gelna jeh in amading asumil in,eiho ding in mia sanga sangjo enei lou leh eilainat pi uvin lonlhi in along kit uvin ahi…
Chunlejo ngailut na asahjou ji aum poi,hinlah jalai lah a ekipasah jinga ahileh emacha avat umlou tabang liuvin agel uvin,hijeh chun eima dei lampi seh juilou vin nulepa in eigonpeh na lampi joh jui leuhen kipana mun eilhut diu ahi….
Mi set holna a thuse seite din lunggel lolhinna aumpoi…Hijeh chun thohhat tah in thupha deljing lechun nainsunga dinga lolhinna hiding ahi…
BEITA
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
