Home Crosby Haokip HENO NEIHOL DA TAN, KEI NENGBOI KOMA KACHE TAI

HENO NEIHOL DA TAN, KEI NENGBOI KOMA KACHE TAI

82
2
HENO NEIHOL DA TAN, KEI NENGBOI KOMA KACHE TAI
HENO NEIHOL DA TAN, KEI NENGBOI KOMA KACHE TAI

Lungset um Thusim

Story and Narrated by
Crosby Haokip

(Contact number 7085168510)

Crosby Haokip kwc
Crosby Haokip kwc

Hiche thusim akipat pat in kei le ka-upa hi nilhah langin gamlah a loi chunga kahung tou lhonin inlang kahin jon tauvin ahi. Kanunga ka-upa atouvin kei amasanga katouvin kihoulim toh thon insungthu kasei lhon tan ahi. Ka-upa min Helun akitin, hiche lai chu 2003 ahitan keiho kholang a phaicham thingnoiho aumlai tah u ahi. Kei chu chapang cha kana hina laiyin ka-upa vang gollhang anahitan ahi. Keihi ama noichet a kahin kei noiyah numei khat aumin amin Boikim ahi. Kakhomin u Aigejang akitin thinglhang mong mong chu ahitan ahi.

Hiti chun ka-upa toh loi chunga kahung tou lhon a inlam kajot lai lhon chun ka-upa’n kajah a,
HELUN: “Nao, janhia chu keihol a na-u Nengboi hung kha em?” atin eihin dongin kenjong lungnommo tahin,
KEIMA: “Ahunge, ahivanga henu le hepan na…..,” katin aban kaseibe thei tapon, chuin ka-u in kajah a,
HELUN: “Nao, aban iti ham? Seiyo kichat angaipoi,” atin ahinlah ka-u jah a chun,
KEIMA: “Heu, nang koma kathusei hepan jadoh leh mol a eivei kit ding!”
HELUN: “Nao, seitang, hepan hehih veh ta,” ati phat’in ka-upa koma kaseidoh jengin kaseitai,
KEIMA: “Heu, janhia ka-u Nengboi nahol a hungin tin, hepan anodoh a, ‘Kinung chen, nang ho mivaicha le meithai chaten kachapa hung hol hih uvin, kamou dingin jong kahin dei pouve,’ atin anahouse e,” kati ajah phat chun ka-upa jong lhase tahin akun lhan alhisoh tan ahi. Ka-upa le ka-u Nengboi hi hatah a kilungset lhon ahin, ahinla Nengboi chu mivaicha le meithai cha ahi jeh chun kapan anamu da tan ahi. Hijeh a chu akingai lhon ding anamah ahi. Chule kapa jong mikhoh le milungtong, milung chom ahikit in, hiche laiya chu ma neh le chah, sil le chen, chule gancha kana hou jeh uva jong kiletsah thim himai thei anahi.

Ka-u teni ichan a akilungset lhon vangin kainkote chu amani dinga ling le khao abang tan ahi. Ka ute ni hinkho kaven aguh in kalhisoh soh tan ahi. Nikhat insunga kikim a kaum khom pet un kapan ka-upa ahousen, Nengboi toh akingai jeh a chu lunghang ahin, akinthei lama akhen louleh insung achot lut thei tah lou ding, tin gih e tin agih tan ahi. Chuphat in ka-upa jong alunghang in kapa toh akinel sang go lhon tan ahile kanun ka-upa chu kapa lungdam kah a kholaiya potdoh din asoldoh tan ahi. Anungin kanun kapa ahousen ahileh amani jong akinah lo lhon tai.

Nikhat Nengboiyin ka-u ahin kouvin lhanmol koma School sunga chun akimuto lhonin ahile kihouthei louvin akika lhon tan ahi. Hijongleh ka-upa chu pasal jep tin Nengboi angong koiyin ajah a,
HELUN: “Nao, eini hinkho hi lhaset set aume, hijongle thohhat tahin pang jing hite. Ithoh hat lhon pouleh van a ni le lhan jong eikithopi lhon nante. Kap hih’in,” atin laina tah a kap a kinuh jeng Nengboi chu alhamon tan ahi. Hichun Nengboiyin alhi akithehin ka-u jah a,
NENGBOI: “Heu, keivang kakisong lel cheh cheh jenge. Itobang in kingai lheh lhon jongle hen, eini hinkho vang kipani umdeh ponte. Kei meithai le genthei cha kahi jeh a napan eimuda ahijeh in kajah acha vale. Ahilou le kikhen tahite.”
HELUN: “Gentheina ho hi moh seh a ilen mangsah ding ham? Tunia ilhi lonna cheng hi mohseha tollaiya long kang dinga naphal mong mong ham? Neikhenin kenvang nakhen jou ponge,” ati kit phat in Nengboiyin jong ka-u chu laina tahin akoiyin akap jengin,
NENGBOI: “Heu, chuti chu ahipoi. Kalungset na asan val jeh a ikingai na lhonhi duthusam tobang ahijeh a kasei ahibouve. Kenjong nakhen jou ponge. Ikikhenni lhon chu katahsa monni hijeng hen.”
HELUN: “Ven nao, ni le lha leh ahsi hon eimu lhon e. Amaho lonlhi jong long teiyin te. Eini hinkho hi khonung teng ateh akhangin mangmo thusim a ahin chin tei diu ahi. Ithohgimna lhon hi moh hisah po hite ong,” atin akika lhon tan ahi. Ka-upa hung kile vah lou chu kapa alunghang tan, kajah a, “Kin chelin na-upa gakou doh in, khojin masanga nahung lhun khom lhon louleh nathoh na lhon kibang ding ahi,” atin kapa kakichat val jeh chun ka-upa holdin School lam kajon tan ahi.

Chuin ka-upa kom kalhunin ajah a, “Heu, hepan eihung kousah e, hung lhon o khosunga lut taute,” katin ka-ute ni hinkho chu kapona lheh jengin ahi. Chuin Nengboiyin jong ain u ajonin kei le ka-u in jong inlam kajon lhon tan ahi. In kalhun lhon chun kapan mol lentah khat hi anakisuiyin banga anangaiyin ahi. Keini eimu lhon chun kapan mol chu ahin kimat jengin eihin vei lhon tan ahi. Kei kakap tai, kanu ahung kipatdoh in kapa chu akham lha nah nahin, chuphatin ka-upa jong lhase tahin achemang tan ahi. Hitichun nithum lhinni geiyin jong ahung kile tapon ahile kapa tailou adangse kalung u agim tan ahi. Ka-upa hi hoilam a che ahita dem, tin kahol hol jengin, chule Nengboiyin jong aguhin eikimupi jin ka-upa alungset dan le angaidan ho asei sei jengin kalhi apot pot jeng tan ahi. Amani vala kingai ding kahe tapoi. Nengboi alunggim lheh tan, ka-upa hol a chedin eitem tan ahi.

Ka-upa ahung kile lou phatin Nengboi toh ka-upa holin loujao lah kachon lhon tan ahi. Lou chul lah kahol lhonin ahinla kamu jou lhon tapon ahi. Chuin kalel val lhon phatin mun khat a kakichol lhonin ahile Nengboiyin kajah a,
NENGBOI: “Nao, na-upa la kalungset ma ma jengin, lungset ingting kap in ngai ngai jongleng napan aphatsah lou laisea keini hinkho hi Ngambom le Khupting thusim kisei tobang ahiye,” atin akunin alhi akitheh tan ahi.
KEIMA: “Heu Nengboi, kap hih o. Lhase hih o. Kapan ima ahet them lou ahibouvin ahin hetthem tengleh kap tapon nate.”
NENGBOI: “Minlal, kakilungset na lhon hichan gei ahi muna sasa bon hichan geiya napan eihiti suhgenthei lhon hi itih in jong alung kikhel ponte. Kei le na-upa hin leiset hinkho khel a lhagao hinkho a kalungtup lhon kamolso bep lhon ding ahibouve.”
KEIMA: “Heu, lungneo hih o. Kei kaumnai. Thohhat pou pouvin, chutileh nalunggel guilhung ding ahi. Hungin, che jom kitta te,” katin kakipat doh lhonin kache lhon tai. Hichun Nengboiyin kakoma,
NENGBOI: “Nao, na-u hi aumna mun ding mun khat kaging mo e. Aphatmo leh nalou uva buhsunga um himaithei ahi,” atin chuphatin hoima lama che talouvin kalou chul u kajon lhon tan ahi. Kalhun lhonin ka-u Nengboiyin kajah a, “Nao, na-u um em, tin nangin buh gave tadi o, ken hilaiyah nanangah tange,” atin chuin kenjong buhlam chu kajon tan ahi. Buh kalhunin buh kot kahon leh buhsunga ka-u analum tah bah in, aihmut jeh chun sukhang chom louvin ka-u Nengboi kakouvin ahileh amajong ahung tai. Buhsunga alut chun ka-upa chu akoi paiyin akap den tan ahi. Kei pamlama kakap in amani buhsunga akika lhon tan ahi.

Buhsunga chun eihin kou lhonin keijong kalutin ahileh Nengboiyin ka-u akipom sah in, amani kilungset chu gil kasan, hinkho nom aman thei lhon lou chu kakapi kit tan ahi. Chuin Ka-u in Nengboi jah a,
HELUN: “Nao, ibola neihung hol nah nah lhon ham? Nagim bep lhon e,” atin ahile Nengboiyin laina tahin ka-u aven,
NENGBOI: “Heu, napot doh chu kalunggel jong khosunga aumthei tapoi. Katahsa alhah lou vangin kalungin nahin jui jinge. Hijeh a chu kalung umna muna chu keijong kaum nom chula heu.”
HELUN: “Kagel teng ihinkho lhon hi lhaset set aume. Hitia hinkho iman lhon sangin thidoh le hen nom jonte,” ahinti chun kalung ahang in, ka-upa kahousen,
KEIMA: “Heu, pasal dingin nalungneo nalom lom e. Akingai jouse koi agenthei lou um ham? Akicheng jouse koi nomtah a hung kingai um ham? Hitia lung nagel chu nanaopa keijeng jong neipha jou poi. Ka-u Nengboi lungsung kahin suhlet a kahin lhamon ahibouve, achuti louva ahileh napul adouva thilo maithei ahi. Hiti chun lunggel hih in,” kati chun ka-u Nengboiyin nuithim pumin kajah a,
NENGBOI: “Minlal, lunghang hih tang, na-upa hin eilungset behseh jeh a asei hibou chu. Koi athinom umding ham? Ithi sang uva ihinkhomna diu lampi ikihol u chu phajo ahi,” atin hiti chun amani jong kilha lel tahin aum lhon tan ahi. Ka-upa kakou lhon vangin ahung kile nom tapon ahi. Nengboiyin, ken naumpi tange, atikit vangin anom kit pon, hiti chun kakihou toh uvin kei le Nengboiyin jong inlang kahin jon lhon tai.

Ka-upa inlang ahung nomlou jeh chun kei le Nengboiyin aguhin bu le me kapoh peh ji lhonin, chule thingnoi sepai hon dal le ahlu tuitah tah a ahon jiu jong kapoh peh jin ahi. Nengboi toh anthah in kache ji lhonin amani nomtahin atou khom lhonin, anui khom lhonin akidai lhom lhonin, kei chun gophel kakichoi jin amani kimuto kahin gamlah a vacha kap in kache jin ahi. Phatante, tia kahung kile teng leh kakikhen kit jiuvin kei le Nengboiyin jong inlang kache ji lhon tan ahi. Chuin kapan ka-upa umna eihin dongin kajah a, “Na-upa hoilanga um ham? Itih leh inlang hung kile go ham?” atin eihin dongin kenjong kapa jah a, “Hepa, ka-upa umna kahe hih e. Kahol le le vangin kamu poiye,” kati phatin ima seibe louvin insunga aluttan ahi. Hiti chun loichin togomin ka-upa umna langa chun kache jin, chule Nengboiyin jong kanung ahin juijin niseh leh loiching dana kilep in ka-upa koma kache jing lhon tan ahi. Amani akimuto teng ken gamlah a loi kaga ching jin, nilhah lang tengleh Nengboi toh loi chunga kahung tou ji lhonin inlang kache ji lhonin ahi.

Ka-upa ahung kile lou hel phatin kapan kanu koma, “Chenlang nachapa umna Nengboi gadongin lang in ah hinpui tauvin,” ati phatin kakipah lhon valin kei le kanu jong Nengboi koma kache lhon tan ahi. Hiti chun kathum uvin loi chunga katouvun, kipahtahin la kasauvin ka-upa umna langa chun kache tauve. Kanun ahsa ahon chu ka-upa din kachoi peh un ahi. Buh kalhun u chun keiho chun nom kasa lheh uve. Ajeh chu keiho gentheina hi kapa bou ahin, ahinla keiho bou kakisuhto teng uleh nom kasauvin ahi. Ajeh chu ka-uteni kingai chu kanun vang aphatsah ahi. Hijeh chun Nengboiyin jong kanu chung a alunggel asei jingin ahi. Buh kalhun u chun Nengboi alut masapenin achen ka-u chu khatvei kiss agah bolin, chuin kei le kanu jong kalut pai pai lhon tan ahi. Chuin Nengboiyin ka-upa an aneh sahin, ka-upan ama chang in akineh thei nai, hijongle akilungset val lhon jeh a chu Nengboiyin thihkhe a ka-upa chu an amop joh ahi. Keiho nucha chu nomtahin buhsunga kaum khom un, kanui khom un, kakidaiyun ahile kapa umna lam hepha kaum tapouve. Hiti chun nilhah langin kabon un loi chunga kahung touvun, ka-uteni loipi chunga atou khom lhonin kei le kanu jong loipi khat ma ma chung katou khom lhonin hiti chun kolla “Yeh Dosti, Hum Nahi Todenge” kiti la chu choh thet in kasauvin ka ao lah lah jeng uvin ahi. Ahinlah in kalhun u chun Nengboi upan eina lamtin un, chuin Nengboi chu loi chunga konin akailhan ada sasan ainlam uvah akipui tan ahi

Chutah chun chubanga kipah te chu kamaiyu amondeh jeng tan ahi. Keiho jong seiding he louvin thip chet in ka in uvah kalut tauvin ahi. Ahinlah Nengboi chu a-upa Thangboiyin ahousen avoh lo tan ahi.
THANGBOI: “Apan khubang namu da a ibola nangin achapa nadel le le ham? Jum le ja lam nahet lou ham ong?” atia ahouset phat chun, Nengboiyin jong a-upa keng khubul a,
NENGBOI: “Heu, nei hethem o heu. Kabol khel ahijongleh neingaidam in. Kenjong kanop a kajui le le ahipoi, kalungthim aman akipoh mang phat a alouthei louva kajui ngai ahitai.”
THANGBOI: “Ahamdoh seh uleh, ‘Meithaicha,’ hin vel seikit uleh koi upa tehse tin kive hih veh ta! Akamsoh ding juiya kabol chah ding ahi. Ama chapa ipia ipibeh hiya kachagat thu asei sei jeng ham?” atin Thangboi jong akitomin thingtouna khat apeh leh aleng mang jel tan ahi. Chuin lunghang tahin insung langa apot tan ahi.

Thangboi achedoh nungin anu ahungin Nengboi jah a,
ANU: “Boi, itia ba hiti vangset ji nahimmo! Akei kana vangset bon ipi ham kiti tua kei sanga nagenthei got hi kapona vale. Mihon meithaite eitiu leh adih hichu me, ipi koi ki-oimo chom ding ham? Mihem chu akamsung soh in anung ajui le le ji hiya amaho jong ichom hung hidiu ham?” atin ahinla Nengboiyin anu jah a,
NENGBOI: “Henu, apa khuti jongleh ka-u Helun vang, achunga thilse alhun ding kaphal poi. Ama hinkho khu keima hinkho banga kagel ahiye henu,” atin anu chunga alhisoh soh tan ahi.
ANU: “Boinu, dingin an nedoh taute,” atin Nengboi jong athouvin an ane tan ahi. Ahinla a-anneh atui thei tapoi.

Janin Thangboi jong kholai ava na muna Helun (ka-upa) toh akisuto kha lhonin, chuin Thangboiyin lunghang tahin ka-upa ahin kouvin,
THANGBOI: “Khongai tih!” ahintin ahile ka-upan jong,
HELUN: “Ipithu ham u-Thangboi?” atileh Thangboiyin jong akoh in,
THANGBOI: “Avel a kachung uva kam phalou nahin lhakit ngei ngeiyu leh khosung a vuivai khu kitung di chu o. Napa chu ankipho thip tang, ibola ahamdoh seh leh, ‘Meithaicha, meithaicha’ ati gunset ham?”
HELUN: “U-Thangboi, lunghang hih o, kapa thusei ho chu iman gel hih in. Nalunghan ding kahe them e. Kapa khu amahi na mong mong ahibouve,” atin ahileh Thangboi jong alunghang valin, “Amihina na?” atin Helun chu voh kitin avoh lo tan ahi.

Helun le Nengboi hinkho a kichat umpen chu kapa keoseh ahitapon, kapa jeh in Thangboi le ka-upa kikah a jong kimuda na le kihotna ahung umtai. Ahinla ka-upan Nengboi alungset jeh chun akineo sah nah nahin kile thuh louvin mi noiya akun kun tan ahi. Amagel a chu Nengboi toh kakichen thei pou pouleh thoh ding jouse thoh mai tange, ati ahitai. Hiti chun lungset umtah ka-uteni hinkho chu lhasetnan avuh vuh jeng tan ahi. Chule alang khat a Thangboiyin jong anaonu le ka-upa kingai chu ahin ma cheh cheh tan ahi. Anaonu Nengboi chu thading matding ahingo pantan ahile Nengboi jong agenthei ma ma jeng tan ahi.

Nikhat Helun le Nengboi jong phat danga bangin lhanmol a chun akimuto kit lhon tan ahi. Chuin Nengboiyin jong Helun koma chun,
NENGBOI: “Heu, igenthei lhon vale. Ka-upan jong ikingai lhon ama kittan, napan jong ama kit in, ipi iti ding hitam?” atin lhisoh pumin aseitan ahi.
HELUN: “Nao, koiyin ipi bol hen, koiyin ipi seijongleh kakicha poi. Kapa la thivah tantin, kapa thi jou teng nom isah ding ahitai,” atin apa chunga alungnat val jeh chun amoh ham ham tan ahi. Ahinla hichu Nengboiyin aphoh paiyin,
NENGBOI: “Heu, hitobang chu kisei ngailou ahi. Pha le se leh napa chu nahingpa ahin, phahen lang phamo jongleh hitia chu ipa kimuset ngailou ahi.”
HELUN: “Kalungnat val jeh a kasei ahibouve. Ahilouva ahile ikichen jeng ding tam? Kimoh chen le hen thu ahung phajo dem, tin kagel ji e.”
NENGBOI: “Heu, athu ahung phat leh phanantin, ijemtin hungpha tahih leh ipi iti ding ham? Hoiya ium ding ham?”
HELUN: “I-um khom pou pouva ahileh hoilai muna kium jongleh gentheina thoh hah ponte. Lungkhamna ding ima aumpoi,” ati tan ahi. Chuphat in hitia gentheina thoh thoh sangin, ati lhonin ka-uteni jong akijam lhon tan ahi. Ahinla anungin kapan kei le kanu eivoh lo lhon tan ahi. Chule Nengboi upa jong kain uvah ahung kitom jengin kapatoh akinah lo lhon tan ahi. Aboina khat chu Thangboiyin suhkhen tei ding atin ka-uteni chu ahol hol jeng tan ahi.

Ahinla ajingin Thangboi le anu ache lhonin ka-ute ni chu ahin sukhen lhonin Nengboi ahin kipuidoh lhon tan ahi. Nengboi kamu chun aman jong eihin ven akap in ahi. Kapona behseh in kathang atom tun tun jeng tan ahi. Chuin kachen kaupan eihin mu chun keini jong buhsunga kakap lhon tan ahi. Chuin ka-upan lhase tahin kajah a,
KA-U: “Nao, kahin nom tahih e. Hepan eibolna hi kalha ase mong mong e,” atin chuin kalhamonin,
KEIMA: “Heu, lungneo hih o, nanao kei kaum hila. Keiman alampi pi hin gong nange,” katin ahi.
KA-U: “Nao, kile ta o. Nanghon hinkho noptahin hin mang jeng uvin. Hepan hitia eibol mong mong ahileh kivet ta hen, kathi nungleh kihet them maihen.”
KEIMA: “Heu, chuti seihih o, hungin inlanga che hite. Keiman ka-u Nengboi toh nakichen theina ding lampi agomkom hol nange,” kati vangin anom pon chuphat in mitlhi long pumin inlang kajon tan ahi.

In kalhunin Nengboi kakimupin, chuin a-upa le anu koma kagatao tan ahi.
KEIMA: “Henu, chule heu Thangboi, nakom lhon a katao tho jeng ahiye. Kapa khuti deh duh jongleh lungset tahin ka-uteni vang hethem lhon o. Agenthei val lhon e. Kapa phatlou jeh a ka-upa jong namu da lhon leh kapan la ima hepha pontin, kho helou ka-uteni ma ma genthei bep lhon ahibouve. Hijeh chun lungset tahin kapan ipi bol jongleh ka-uteni vang suhkhen ding go lhon hih in o,” katin mitlhi long pumin hataovin katao tan ahi. Ahinla Thangboiyin lunghang tahin eihin houvin,
THANGBOI: “Hilaiya hi ipi nahung kibol ham? Nathi nom ham? Napa ahin akoi hijongleu chun thakhat nahiu hi me. Kamitmun potdoh in,” ahintin asuhtoh apeh toh eihin tho tan ahileh chupet tah chun Nengboi ahung lhailut jengin a-u Thangboi kong a akikhai jengin kap pum pumin,
NENGBOI: “Heu, nga ta o, ngatan. Lungset tahin Minlal chunga nakhut lha hih in. Nakhut nalha nom leh nanaonu kei chunga nanop chanin lha jengin, Minlal in ipi suhkhel aneiya navoh ham ong?” atin achuti ka tan ahi. Chuin a-upan ale phokit in,
THANGBOI: “Min khubang namu da a, thu ngeimo ijat ham naseikhum ta a, itia tuchan a lunglha louva naum ham? Vetang, kicheng lhon jongle chun nagenthei bep ding ahi. Khonungleh boina ito louna diuva tua nakikhen lhon phajeng hilou ham?” atitan, ahinla Nengboiyin vang aupa atuh jengin,
NENGBOI: “Ahipoi heu, gentheina jouse thoh khompi dingleh, thina chan geiya chen khompi dinga kakilhen ahitai. Ka-u Helun nasuhgenthei chu kei neisuhgenthei tina ahijenge,” atin anaonu chutia aka ka phatin, mitlhi pumin anaonu lu ajutin,
THANGBOI: “Nao, kathilbol hi insunga aphajo hiding ham, tia kabol ahibouvin nang le Helun khen ding jong kanom deh poi. Ahin kicheng lhon le chun nagenthei khah ding ham, kati joh ahi. Chutia nakigellhah mong monga ahile akom jon kit maitan,” ahinti chu kaja manpon kakipah val jengtan ahi. Nengboi jong akipah val jengin chuin ka-upa koma kache tauvin ahi.

Buhsung kalhun u chun ka-upa jong lhisoh pumin anatouvin amani akimu lhon chun akikoi lhonin akap lhon tan ahi. Chujou chun Thangboi jong buhsunga ahung lut in ahile ka-upa jong akiphat lamin Nengboi chu alhatan ahi. Ahin Thangboiyin ahin houvin,
THANGBOI: “Lun, kathilbol hi kanaonu kalungset jeh a kabol ahin, ahinla kanaonu gentheina kabol doh lon, chule kanaovin nahin dalhah theilou phat a nakoma kahung thah ahitai,” atin ahileh ka-upa jong akipah behseh in mitlhi long pumin, Thangboi jah a chun,
HELUN: “Heu, kakipah vale. Eihingpan bon imaa eigel louva nangin hichan geiya neihetthem hi kakipah vale.”
THANGBOI: “Lungkham hih in, na-u lhon kei kaum hila em? Kanao ahin nang nahin keima kaum pouleh lungkham lhon hih in,” ati chun Nengboi jong akipah valin,
NENGBOI: “Heu, anaonu hethem u-pha tah kanei hi kakipah vale,” atin ahile aupan,
THANGBOI: “Nao, nachung lhon a kasuh khel ho jouse neingaidam lhon o,” atin ahinla amanin,
HELUN LE NENGBOI: “Heu, kachung lhona bolkhel nanei poi. Nang jala keini joh hi kahung inchen doh lhon ding ahibouve,” ati lhonin chuin kakihou lim un kipanan eivuh dim jeng tauvin ahi. Chuin amani kahin dalha lhonin kei le Thangboiyin inlang kajon lhon tan ahi.

Ka-uteni in a puilut ding kati vangin kapa anom mong mong pon, “In ahung lhon pou pouleh katha lhon ding ahi,” atin akitom tom jeng tan ahi. Chuphatin ka-uteni jong buhsunga chun aumden lhonin hahsa lheh jongleh kipahtahin hinkho amang khom lhon tan ahi. Ahinla lhakhat jouvin Nengboi malaria natna jeh in hatahin ahung dammo tan ahi. Chuphatin ka-u jong apotthei tapon ahi. Ka-u Nengboi chu dammo sot lou ahi. Hiti chun genthei tahin aum lhon tan ahi. Chuin Helun in Nengboi jah a,
HELUN: “Ahipoi nao, nadammo na akhoh cheh cheh tan, kei inlanga cheng ting henu le hepa teho gakou tange,” ati vangin chomkhat adalhah ding jong anom tapon ahi.
NENGBOI: “Heu, lungset tahin neidalha hih o, neikoi lum o dap kasa e. Kakho asih vale. Kahin ngaiyin neidalhah ding kanom poi,” ati tan chuphatin dalha louvin buhsunga chun hithei dan danin akijen lhon tai. Nengboi chu malaria avei lam kaupan jong ahet phah lou ahi. Ama geldan a chu natgol mai mai dana agel ahi. Ahinla Nengboi chu akhoh cheh cheh tan ahi. Ka-upa jong alunggim lheh jengin Nengboi chu alhiso pi pi tan ahi.
HELUN: “Nao, hung o in ah che tahite,” ati ti vangin Nengboi anom deh tapoi.
NENGBOI: “Heu, in ah che le hen igenthei cheh lhon ding ahibouve. Hisangin hilaiyah nop le hah leh um den tahite.”
HELUN: “Nao, nalel cheh cheh chula.”
NENGBOI: “Heu, lunggim hih o. Nilhah langleh kaphat dom ding ahitai,” atin hiti chun Helun in leltah a lum Nengboi chu atoupi pi tan ahi. Ahinla Nengboi alel cheh alel cheh tan ahile akhon nan thu jong asei thei tapoi. Ajipa avet leh amoh lhiso so tai. Anat thoh gim chu akihet in adamjou louding jong akihet jehin ka-upa alhalel lheh jenge. Tun thileng kajipan ichanin hinkho ahin mang tadem, agenthei dem, anop sa dem, tin ajipa hinkho ding gel’in alhisoh soh tan ahi. Chule Helunin jong ajinu Nengboi lhiso chu amun alhi atheh pehin alhamon mon tan ahi. Ahin nilhah langin Nengboi chu alel val tan amit jong ahah jou tapon ahi. Nengboiyin amit asin phat chun Helunin lungmonga ihmu hinte, aihmut kahin gamlah a damdawi hol in chenge, atin Nengboi chu pon asil pehin ama lou holdin apotdoh tan ahi.

Ahinla ache nungin Nengboi chu aphat alhing tan, thi dingin ahung um tan ahi. Thilou natei dia iti apan vangin thina chu tuhtang jou ahilou phatin aman alel in thinan ajouvin ahinkho abei tan ahi. Chuin Helunin jong gamlah a chun louhing damdawi phabep ahin mun ahin choiyin buh lang ajon tan ahi. Ahinla buh alhun chun Nengboi athouvin, “Nao, thouvo nalel valin hiche lou hi beh donin,” atia alo lo vangin Nengboi athou tapoi. Chuphatin Helun jong atija valin Nengboi chu alo toh akou toh, ahung haikhat leh atin aop asot peh in, ahinla i-alo vangin apha chom tapoi. Lou hol a ache lan’a Nengboiyin anathisan ahichu ahet phatin Nengboi longdamsa chu apomin hakan akap tan ahi; “Nao, thouvo, ibola kachanga neidalhah got ham? Iti hinkho mang hen, neiti ham ong? Hinkho gentheina atamjo ihin thoh galkai hitalou ham? Tua ihung kipa pan pan lhon hilou ham ong? Nao, hung thouvo, nang beiyin hinkho mang jou ponge,” atin, “Nengboi, o nao,” atin akap kap tan ahi.

Hiche nilhah chun keiho inko jong kalung u among thei tapoi. Hiche phat chun kapan kei le kanu jan laiyin eihin thoudoh lhonin ahile kapan keini jah a, “Ahipoi, kamang anopmo lheh jenge. Boipu hi ipiti ahidem? Kahet nom lheh jenge. Kakisih val jeng e o. Mi hibang kilungset lhon a hinkho nopna kamusah lhon louhi apa kei themmona ahitai ong? Kabol khel lheh jeng e,” atin kapa jong amoh lhisoh tan ahi. Ahin kanun kapa alhamon in, “Nangpa, mang chu mang hichu me. Ipi boi ding ham? Helun le Nengboi jong ilou buh uva nomtah a umkhom lhon na chu. Jingleh ibon u cheutin in ah puilut taute,” atin jingkah khovah ding ngah lel tahin kakhovah tauvin ahi.

Jingkah in kabon un kakipat doh uvin loulam kajon tauvin ahi. Ahin buhsung kalut u chun Nengboiyin pon akisil a nomtah a ihmu bangin alumin, akom a chun Helun akhup in aumin Nengboi khut atuh chah kheh in ahi. Chuin kanun ka-upa chu athamin, “Boi, thouvin inlanga che taute,” atin ahinla ka-upan adonbut tapoi. Kanun jong phatah a ka-upa chu alo jeng leh athisa anahitai. Chuin Nengboi athou kit lhonin ahileh Nengboi jong athisa anahi kittan ahi. Chutah chun kabon un kakap tauve. Kanu le kapan ka-uteni aka ka lhon tan ahi. Kanu vang amuna akap chet in chule kapa jong athilbol chunga akisih behseh jengin ahi. Chuin buh thingjol a chun thucheng hitin anakijih in, “HENO NEIHOL DA TAN, KEI NENGBOI KOMA KACHE TAI,” akitin ka-upa jih chu ahi kahen hakan kakap lhatan ahi. Hiche nikho chu keiho insunga dia lungjin nikho le kana nikho chu ahitan ahi. Chuin khosung miho kakouvin hiche nikho mama chun Helun le Nengboi longdamsa chu hiche buhsung mama a chun aitih a kikhen talou din kavui khom tauvin ahi.

The End

©2021, Crosby Haokip, All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articlePATHEN MIN PAN A TOLTHA BOL HO LOLHING THEILOU DING AHI.
Next articleCHUNNU

2 COMMENTS

  1. Pohnat aum behset e 😭nule pa ten jong kacha ahinai kathu² a nung di ahinai tin lunggel nei pou hite chate lunggel ipi ham ti jong het angaiyin ahi

LEAVE A REPLY

Please enter your comment!
Please enter your name here