Home Crosby Haokip HENO! ANENG NEIPUI PEH O

HENO! ANENG NEIPUI PEH O

92
0
HENO! ANENG NEIPUI PEH O
HENO! ANENG NEIPUI PEH O

Lungset um Thusim

Story and Narrated by
Crosby Haokip

(Contact number 7085168510)

Crosby Haokip kwc
Crosby Haokip kwc

Covid-19 lockdown laitah ahijeh in keijong kakho lang uva kache tan ahi. Thinglhang lang ahin kakhomin u chu Aigejang akitin, Chandel Distt hop sunga um, Kana area sunga dia khokhat ahi. Kanun khosah langa lou neokhat abolin chang le anme phabep atun ahi. Kapa umta hih jongleh kanun genthei tahin ama jo kham kham a lou neo khat abol ahi. In kalhunni ajingin kanun kajah a, “Minlal, tunile louvah che hitin jing nikho leh gamasa a toding changmai galou hite,” atin kanucha lhonin lou langa kache lhon tan ahi.

Lou kalhun lhon chun changmai tampi kalou lhonin houin a to ding kati lhonin ahoilai lai phabep kachom khen lhonin ahi. Chuin kanutoh lhemlhung chunga katou lhonin changmai kane lhon tan ahi. Chuin kanun kajah a,
KANU: “Boi, nalekhasim ho nahet thei hinam?” eitin chuin kadonbut in,
KEIMA: “Kahetthei nah chu henu. Ahahsa hih e; previous year question ho isim jongleh phaset ahitai,” katin,
KANU: “Nang behin service mudoh le chun nom kisa jep ding hiya; napan la sot a eina dalha lhon taa, tua igenthei na lhon ho hi muleh laina lheh inte,” atin kanu thusei chu kapona lhah jengin, chuin kenjong kanu kalhamonin,
KEIMA: “Henu, chutia lunggim angai hih e. Pathen phatsah ahileh natohna khatbeh kahin kimu nah lou ding ham?”
KANU: “Hina chu. Pathen a ikingaiya chule nang jong nakihambol pouva ahileh namu thou thou ding ahinai. Ole nungah thu nasei pan hitam?” atin eihin daiyin kenjong, kanu chu kale nuisat in,
KEIMA: “Henu, ajat jat vodoh ji hih o; nungah kahou ngam hih beh e,” katileh kanu jong ajet lama akihei mangin, changmai anen, kajah a,
KANU: “Amoh a ikitotna lhon hichu me; ahinla phatah in kigel inlang dongma vang nei hih lai tang o,” atin chuin keini jong kakipat doh lhonin inlang kahin jon lhon tan ahi.

Hiche kum chu Youth chairman kapoh lai ahi. Nilhah in kaloipa Mamang ahungin kajah a,
MAMANG: “Minlal, ipi nabol ham? Naboi louleh programme khat draft bol khom hite,” ahungtin keini jong amaho in ah kache lhon tan ahi. Chuin khanglaiho tour programme draft kabol lhon tan ahi. Chuin kaloipan kajah a, “Minlal, tuchung khanglai tour programme a hi tulaitah a gospel lasa, aminche pen nungah Kimneineng jong lasa dinga invitation kipe ahin hung ding ahiye.”
KEIMA: “Phachu o. Alasah kingainom keiya, amajong munom aume,” kagah tileh ahung nuiyin,
MAMANG: “Akidoi thim nah leh ihen den leh kichai chula,” atin kanui lhon tan ahi.
KEIMA: “Kihel tahbah jongleh eiho tobang koiyin eidei lhon nah ding ham? Amaho mihet hiuva, gahou mai mai ding jong jachat aumbouve.”
MAMANG: “Eini la ikhouva alengkul pen ihi lhontan, akinthei lama ikihol lhon louleh ihinkho a youth lamkai ipoh khah lhon ding ahi,” kakiti lhonin kanui nui lhontan ahi.

Hitichun Youth Tour programme nikho ahung lhing tan ahi. Keiho kho jong nungah gollhang, asi asen kabonun ahung kholjin ho sipa bolin kakhu cheng tauvin ahi. Nungah hon twi akhaiyun gollhang hon an kahon un kaboilha jeng tauvin ahi. Hichun kaloipa ahungin kajah a, “Minlal, hung o. Artiste nu le aloiho jong ahung lhung tauvin eini beh lamkai hinan galamto hite,” ahung tin keini jong kache lhon tan ahi.

Houin maiyah chun kading lhonin ahile car khat ahung tou lhaiyin, chuin ahung kingan car kot ahung kihongin car sunga kona [email protected] ahung kumlhah chun kamai chu amachamin ame lah lah jeng tan ahi. Chuin Aneng le aloiho ahung un chibai kakibol un guest house a kalut tauvin ahi. Aneng kamu a pat chun akengtoa pat alu chan gei chu ajeh beiyin kamoh vet nom nom tan ahi. Alasah hon eilhim ngol den jengin, chule a-aw ngeitoh amelhoi toh ahile kei chu kakimoh pa pa jeng tan ahi. Chuin nungahho ahungun Aneng le aloiho ahung boipi tauvin, nungah ho hung phat chun kei le kaloipa jong kapotdoh lhon tan ahi.

Pot langa kapot lhon chun kaloipan eihin hih in kajah a,
MAMANG: “Aneng chu ipiti nam? Nagel toh bang nam?”
KEIMA: “Seihih o, amel kamu chun seiding jong kahe hih e. A-aw sangin amel kadei cheh e,” katileh kaloipa jong anuija val in,
MAMANG: “Chuti ahileh Programme kichai masanga ihoupi ngaiveh ta.”
KEIMA: “Nangin hin houpi masa tang o. Keila akoma kaum teng kakithing den jin,” katileh anuiyin,
MAMANG: “Akeiya ding hingap lou, nang johin hoitahin kihoupi tang; ipi miphamo vang hipon tin, amel kavet leh mi-frank vang hitei ding ahi,” atin chuin ahung ho pha pha hinam, tin kaloipa toh kakhol le le lhon tan ahi.

Nilhah kaikhom kichaiyin Aneng le aloiho phabep keiho in ah ahungun, kanun jong amaho chu phatahin alemin, touna apen, don ding jong apen ahileh kakoma Anengin ol chan,
ANENG: “Heu, henu chu apha tave. Amel jong hi lungset set aume,” ahintin ahileh kakipah valin,
KEIMA: “Henge, henu phat jala hi miho ngailutna kichang ahibouve,” katileh amajong touna a atouvin, cha asungin, mei atih phan ama in a um bangin akiseimo den tan ahi. Chuin kenjong Aneng jah a, “Aneng, nahin kilhonpi ho hi koi koi ba ham?” tia kadoh leh bannei chan ahin phongin,
ANENG: “Amateni hi keiho Houbung a youth lamkaiteni ahilhon in, hilanga tou teni khu keidia kapenpi ka-u Caroline le ka-u Hoipi ahilhon e.”
KEIMA: “O, na-ucha’vin nakilou theiyuve. Ale nangho ucha lah a nang aneo pen na?” tia kadoh leh nui pumin,
ANENG: “Henge heu, kei aneo pen kahi. Iti ham? Neo neisah val ham?” atin chuin kenjong kadaiyin,
KEIMA: “Hiloupi, aneopen ame lot pen e, kiti banga amani la eo kha lou, nang o bou kija ja jeng,” katin ahile a-ucha’vin anuiyun,
ANENG: “Keima ngeina ahibouve,” atin kanuiyun sottah katou khom un ahi. Katou khom sung uvin jong kei le Aneng kithim vetto ji dan chu ginmo thei khopset chu kahi lhon tai.

Jingkho vah in amaho jong kaikhom kichaiyin akho lang uva kile dingin akigong tauvin ahi. Ahinla kei chu kalung angui pantan ahi. Kamit in Aneng kom lang bou chu ave ve jeng tan ahi. Aman ahet lou vangin Aneng kamoh lungset doh tan, kanun dongma nanei nailou ding ahi, eiti vangin kanu thusei chu kanasumil del tan ahi. Ajeh chu Aneng, alasah ho ngei kasan, a-aw angeiyin amel jong dei dei aume. Kalungin kanun dongma kanei ding ajah da vangin Aneng hi kipuilut leh kipah maithei ahi, kati tan keima le keima chu kakilhem maitan ahi. Chuin kaloipa toh Aneng le aloiho kalhadoh un, ache konun jahcha sasan, Aneng koma,
KEIMA: “Aneng, nangho la che ding nahitauvin, keiho hi lunghel tah a kaum diu hita hila,” katile ahung nuiyin,
ANENG: “Heu, ikimu ji ji diu chu me; avel a ikimu teng uleh lhakhat beh kaum ding ahiye, nakhou hi nom kasa e,” atin kenjong,
KEIMA: “Ale damsel in che tauvo,” katin ache ding konun ka-phone no kapen amaho jong akipatdoh tauve.

Amaho ache nungun kaum thei tapoi. Kaloipan jong kalunggel ahe them tan ahi. Hitichun kaloipa toh chun Aneng phat dan le hoidan thu ho bou jan khovah deh dehin kasei lhon tan ahi. Itih leh eihin text dem, tin kangah ngah jeng tan ahi. Chuin jan laiyin message ahungin kaven ahile unknown number a kon ahin message kasimin ahile, “Heu, damsel in kalhung tauve,” tin eihung kithot in, koima dang hilouvin Aneng ahiding chu kahe pai tan ahi. Chuin kenjong,
KEIMA: “Nao, damsel a nalhun u chu kipa aume.”
ANENG: “Heu, keivang kalung ahel dan, nikhat nini beh kium nalai leh pha ding hiya.”
KEIMA: “Hichu o, keijong kalung ahel dan hi, lunghel tah a kaloipa toh lupnaa kakijam thangdeh lhon tahi,” katile anuijan,
ANENG: “Aban tengle vang lhakhat beh kaum ding ahiye,” atin eitot in,
KEIMA: “Nao, nakho min u ipi ham?”
ANENG: “Kakho min u Janglenphai akiti e. Koite toh kinai ta chu.”
KEIMA: “Keijong Ccpur college a kakai hiya kahung teng kimuto ji hite ong?”
ANENG: “Aya heu! Ccpur a nakai lam kima het leh kikimuto ji dinga, nahung tengleh nin hetsah tang o,” atin sottah pi kakihou lhonin, ahin lungsetna thu seiding vang kangam naihih in ahi.

Kalungin Lamka langa chedin eitum tum jeng tan ahi. Keima le keima jong kakitheida leo tan chuphatin kanu koma,
KEIMA: “Henu, kaloihon assignment kibol gam tauva, keijong lamka langa cheng ting gakibol vah tange.”
KANU: “Ahile, sum ijat napoimo ding ham?”
KEIMA: “Tamlut ponte. Sangkhat neigot peh le chun lhingset tante,” katin kakigong in kagari neovin Lamka lang jondin kakipandoh tan ahi. Sugnu kalhun in Aneng message kagah thot in, “Nao, Lamka lang kahung e. Tun Sugnu kahin pha pan e,” katile eihin reply paiyin,
ANENG: “Heu, apha e. Damsel in hung lhung o,” atin ahileh kakipah valin,
KEIMA: “Kahung lhun tengleh ikimu thei ding ham?”
ANENG: “Phat hinveng katin, ahithei ding leh kimuto nahite,” ati chun Lamka lang jonin speed in kahung lhaitai.

Lamka kalhunin Aneng call kabolin amajong keitoh kimuto din ahung tan ahi. Hiti chun Tuibong Sasang Fast food a katou khom lhonin nehthei kane lhon tan ahi. Chuin Anengin maingui tahin kajah a,
ANENG: “Heu, nalel lou ham gam hichan a hung a?”
KEIMA: “Kalel hih e, kahung lhun lam jong kahe poi,” katileh anuiyin,
ANENG: “Hiche vang hi thilkhat vang um hita veh ta?” atin eihin phin tan ahi.
KEIMA: “Ipi um ong? Aum nahet leh pha chula,” kale tin kagah daiyin,
ANENG: “Heu, keihi Pathenin aw eipeh sun sun a hi Ama natong dia kalsong jing kahi jeh a hi ka on man jilou ahiye. Tunjong mun chom chom a kouna lekha kamun, hahsa lheh jongleh kakalson tei tei ji angaiye.”
KEIMA: “Apha e. Naloi napai ho toh hinkho nom naman sanga hitia Pathen na natoh hi kahin kipapi mong mong ahiye,” katin hitichun phat sottah pi kakihou lhonin athupia lut ding katile kalut thei mong mong pon ahi.

Aneng kalungsetna asang cheh cheh jeng tan, kanun la dongma kanei ding apum phal naihih in kalung akham lheh tan ahi. Kachagat hinkho kile doh ding deina jala kanun lekha eisim sah ahin, ijemtia kasuh bulhit kha hih leh kanu lungnommo ding ahichu kahen kalung akham lheh tan ahi. Nilhah seh leh kanun eihin phone jingin, eitilkhou jin, lekha hasim a kasim dingin eihil jingin ahi. Chule alang khat a Aneng toh jong kakihou jing kit lhon tan ahi. Akingai chat kahi lhon lou vangin nikhat jong kihou louvin kaum thei lhon tapoi. Hijeh chun lungset nan eikan chah cheh cheh tan, kakihat sah lheh vangin lungsetna vang alona je kahe tapoi. Amajoh in eijo hitante.

Nikhat Tuibong a pat’in Kaprang kajonin ahile Janglenphai kaphah in lampia Aneng ache chu kamun, akoma kakingan ajah a,
KEIMA: “Nao, hung tou doh o, munkhat a che hite, na koma thu seinom kaneiye,” katileh amajong alungkham lheh jengin,
ANENG: “Heu, hoiya che ding nati ham? Ajole min eimuse kha lhonin te.”
KEIMA: “Ase ding ahipoi, chomkhat gakihou vah tadi hite, kati ahibouve. Hung toudoh in,” tia kajol jol phat in amajong atijat manin ahung toudoh in hiti chun L Molvom lampi koma katou lhon tan ahi. Chuin Anengin kajah a,
ANENG: “Heu, ipithu nasei got ham? Umsot po hite ajeh chu kahung pot hi kanu kahet sah lou ahi.”
KEIMA: “Nao, kaseinom aum jeh a kahin puidoh nahin kasei nom chu ahile, gollhang khat in asei ding dol kilungset na thu ahiye. Nangin iti nagel em? Kenvang kahin lungset e.”
ANENG: “Heu, kalung agim bep e nathusei chu. Kum 20 kilhing go pan bep a tua dongma gahnei ding chu kati aja e.”
KEIMA: “Kichatna ding aumpoi. Ase bol ding ihipoi. Khat le khat lungthim nopna ikipeh to lhon ding thu abou ahiye. Kenvang kahin lungset valin touje umje kahet lou phat a Lamka kahung moh hung jeng ahi.”
ANENG: “Heu, nadei ding ahileh tujan kigelna phat neipe tang o. Ajeh chu dongma neikha jong kahi naipon, eihel midang um ji jongleh nang vang koima dang nahi lou jehin hin gelkhoh nange.”
KEIMA: “Achuti leh chen lang phaten hung kigel tang o. Tunilhah ma ma leh neihin hetsah ding chu o,” katin kakitep sah in akho chan u kagale thah tan ahi.

Nilhah in phone eihin bol in jingleh kimuto dingin kakitem kit lhon tan ahi. Ajingin peace ground a kakimuto lhon tan ahi. Chuin aman eihin hou masa penin,
ANENG: “Heu, kikingai jongleh akeibon ki-ong man jilouva, muntina eikikouna muna Pathen vahchoila sa dinga kakal son jing ding ahin nadei banga kahin kimupi thei jilou ding ahibouve.”
KEIMA: “Hiche ho a chu lungkham angai hih e. Hitia nahinkho Pathen natohna a namanchah ji jeh a hi kahin dei chom chom nahibouve. Kimuto chu apoimo ahipon hoilai muna che jongle hen ikigeldoh jing ding poimo jo ahi.”
ANENG: “Chutia neihet them ding ahile nom tange heu. Ahin nalung kato jou ding hinam?”
KEIMA: “Pathen lung hol khom le hen eini din jong kilungtona umjing nante,” katin hichenia kon chun lungset hinkho kahin mang khom lhon tai.

Anengtoh kahung kilungset lhon a pat chun keijong kipahtah in kakho lang u kajon kittan ahi. Chuin kipahtahin kanu jah a,
KEIMA: “Henu, masanga ikhouva hung Aneng chu nahet nalaiyem?”
KANU: “Umm, kahet chu. Amachu iti ham?”
KEIMA: “Amanu chu pha nasah em?”
KANU: “Mipha hina lou ding ham? Pathen lasa mi chu ngaisang um jeng ahi.”
KEIMA: “Henu, thukhat kasei ding gelkhel hih tang o. Henu, amanu to chun kakingai lhon e,” kati chun kanun lunggim tahin,
KANU: “Boi, nalekhasim najo tengleh dongma neibep in nakitia, ajole gol nung phah lel nan neikhan nate.”
KEIMA: “Ashh henu, chutin gel jeng hih tang o. Dongma nei vanga chu chatvei jeng ding tina hiloupia, dongma nei vanga jinei phut ding tina jong hideh loupia. Kilungset na chu aitih a pat anaum jing sa hichu me.”
KANU: “Dongma nanei ahitah jongle iba isei ding ham? Phatea nakilungset pi ding tina hita chu,” atin hichenia kon chun kalung a Aneng bou alang lang tan ahi.

Hiti chun alasah ho ngaichim thei talouvin jan khovah vah in kangai ji tan ahi. Ahin kakingai lhon lhakhat bep bou aval nalaiyin kakikah lhona boina aum pan tan ahi. Nikhat aman phone eihin bol in, lhisoh pumin,
ANENG: “Heu, ikikhen tah ding ham?” ahinti chun kalung chang chom keh paidin aumtan ahi.
KEIMA: “Nao, ipi jeh a tua kikhen ding thu nasei ham? Kajah nom poi. Totna hijongle hitobang ho chu hinsei hih o.”
ANENG: “Heu, atah tah kasei ahiye. Thu nahet nomleh jing ma ma leh Lamka langa hung o naseipeh nange,” atitan ahi. Kalung agim lheh jengin ka-ihmu thei tapon ahi.

Anengin eihin kou bangin keijong Lamka langa kache tan ahi. Ahinla call kabol jongleh ala tapon, eihou tapon ahi. Chuphat keijong Janglenphai a kachen ain u kahet lou jehin ground sung a kavah le le tan ahi. Chuin lampia Aneng unu Hoipi kamu phatin kakou tan ahi. Amajong ahungin kenjong ajah a,
KEIMA: “Hoipi, nanaonu iti hiya tulah eihou talou ham? Ipi lungnop mona anei ham?”
HOIPI: “Heu, kenjong kahet them lou chula. Tulah kanu toh kiphun lhon a tujingkah a jong kap deh duh a.”
KEIMA: “Hoipi, ahipoi katao tho ahiye. Lungset tahin nanaonu neihinsol peh o, kimupi vah tadinge,” katileh anomin ache tan ken munthip khat-ah kangah tan ahi. Kho ahung jing go tan ahile Aneng ahung chu kamun ahi. Kakom ahung lhunin kajah a,
ANENG: “Heu, guhthim a kahung potdoh ahin hung o chepai tahite. Kanun eihin hedoh lhon leh phalou ding ahiye. Nakom kahin jot ahitai,” ati chun kalung akham behseh jeng in seiding kahe vah tapon ahi. Ahinlah kadonbut in,
KEIMA: “Ahipoi Aneng, kahin lungset lou jong nahipoi, tua ikichen lhon a ahileh iminset lhon val talou ding ham? Nangla Pathen vahchoila sa khat nahi kitin, tua jolguh a najam jeng ding chu kagelthei hih e.”
ANENG: “Heu, ahinai. Ahin lunggel ngahna dinga kahin jot nahibouve. Ajeh chu kaniten cha ahung dom tauve,” ati chun kamaichang a kolphe avah lap lap jeng tan ahi.
KEIMA: “Sei ding aum mo e na? Kenvang naminset na ding bol him him ponge. Kichen ding vang seinai da jeng hite.”
ANENG: “Tunia nei kipui louleh neichan tei tei ding ahitai.”
KEIMA: “Kahin chan ding? Henge, Pathen phatsah lou ahile ba iti guilhung ding ham? Amabou Pathen phatsah ihileh koiyin ipi sei jongleh ikisuhto thou thou lhon ding ahi.”
ANENG: “Ahipoi heu.”
KEIMA: “Ibola nasei tei tei ham? Nang ding kagel hilou ham? Hitia naminset ding chu kanop nahisah ham?” katin kalung ahang tan ahi.
ANENG: “Adan hi neilungset lou hibou hila na?” atin alhisoh soh tan ahi.
KEIMA: “Kahin lungset ngeihih ding ham? Amabou mihon nathu ahinsei diupa khu pha lou ding ahi, kati ahi.”
ANENG: “Tunvang nalungthim jouse kahe tai ong? Neikhen nom jeh a ajat jat a neihou ahi.”
KEIMA: “Tahbeh a seidin naminset sanga ikikhen dap veh lhon chu phajo ahi,” katileh alhase valin ainlanga alhaitou tan ahi.

Hicheni janin ka-ihmu thei tapon ahi. Ajingkah in keijong lungnommo tahin kakho lang u kajon tan ahi. Chutia lungnop motah a hinkho kaman jinglaiyin, nikhat kaloipa Mamangin invitation card khat eihung pe tan ahi. Chuin kenjong kahongin kaven ahile Aneng send-off programme ding thu ahitan ahileh laina tahin kakap lha tan ahi. Chuin kanun ilhamonin kajah a,
KANU: “Boi, nalekha simchai kahin dongma neihin in kati hilou ham?”
KEIMA: “Henu, kabol khel ta e. Nathu kaman louna hoa neingaidam o.”
KANU: “Boi, hiche chu sei tahih in. Lekhasim nakithah pet kit mo ahipoi.”
KEIMA: “Henu, lekha jong kasim nom tapoi. Heno! Aneng neipui peh o, kangai vale,” katin kanu pheichunga kamoh ka tan ahi.

Send-off programme a jong jao louvin kaum tan ahi. Ahinla kaki oi tapon a-marriage masang behin kimu pinge, katin Lamka langa kache kittan ahi. Chutah chun Ccpur kom Valpakot kalhun in kamasanga gari tampi ahung kitol un gari maiyah “Marriage ceremony” tin akitah in ahi. Chuphat in kalaina behseh in kagari chu hattahin katol in ahileh Assam rifle ho gari toh kakiphutto tan ahile kho kahe tapon ahi. Chuin kho kahin het chun lam laiyah chun Anengin eina pomin akap in ahi. Chuin Anengin kap pum pumin,
ANENG: “Heu, namit hin hasah o. Neida lha hih o heu,” atin akap kap tan ahi. Chuin hahsa tahin kahah in seimo sasan,
KEIMA: “Nao, kahin lungset e. Ibola neidalhah got ham? Kahinnom tapoi.”
ANENG: “Heu, nadalha ponge. Ken nang nadalha thei ponge. Heu, nakoma kaseikhel ho neingaidam o. Kei lungneo jeh ahibouve.”
KEIMA: “Nao, kei henu mel kamu nome.”
ANENG: “Heu, neidalhah hih tang o, chutileh henu koma iche ding ahiye.”
ANENG: “Nao, kahin lungset e,” katin chuin ham jou lou sasan kanu kakouvin, “HENO! ANENG NEIPUI PEH O,” kati chun Anengin eikoiyin hakan akap tan ahi. Asangkhol bangleh chu kathisan in achup hel jeng tan ahi. Chuin Anengin akam le kakam asuhto a olcha a kiss eibol chan chu kahen adang imavang kahe tapoi.

——THE END——

©️2018, Crosby Haokip, All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleKhat le khat kijen touvin
Next articleHINKHO LAMLHAH THUCHIN PHABEP-XIII

LEAVE A REPLY

Please enter your comment!
Please enter your name here