Moral Story
Written By: Naocy Haokip
Story hi mikhat’in asei banga ijih le aboina atamjin hijeh chun keima tah-in ka thusim kasei banga kahin jih lhah ahin, asim jousen inahet them diuvin kahin temuve.
Kaneu laiyin kanu toh thinglhang kho khat’ah kana cheng lhonin, kakho uchu thinglhang ahivangin inn 70 val cheng ahi jeh-in khopi abangtan thinglhang khoa dinga alen loi ahitai.
Kanu hi avangset jeh-in kaneu lai lhani hobep kahi laiyin kapan ana beisan tan, hichea kona chu meithaiya anaum ahitai, kanu hi hinkho genthei tah a anaman jing jeh-in alunggel jong ahat jou tapon, kei khankho ding anagel khoh ji lheh jenge.
Kei chu school kai jou louvin class 5 chanin kana nga tan kanu natoh ho kakithopi jin, kum 20 kahung hitai, nungah kahung hi phat’in golhang eihin hel jong atam lheh tai, hijongle meithaicha kahi kakihet jeh-in koima jong kalungset na kachan ngampoi.
Kanu in vang senneuva pat genthei akihi jeh-in ama lunggela chun mihao minomsa khat toh kichengle eina ti jinge, hijongle ken vang mihao ho koma sum gathum sangin meithaipi koma khutdo anomjoi, ti kahen ka genthei ka chagat kibahpi bou kalungin kahol jin ahi.
Golhang tampi eihin hel ho lah a chun kenjong khosung vengsunga sin thei pen le alungthengsel a Pathen ngailumi Haopu chu kahin lungset dohtan, hijongle nopna vang kape nai pon ahi.
Haopu jong kei banga sen chaga ahin apa toh genthei tah a khosa ahin, apa jong Pathen hetah mi ahin, genthei lheh lhon jongle akingailut lhondan le Pathena kingai jing ahilhon jalin kangailu dehset in, kalungsetna jouse kapetan ahi, aman vang mi eihin hel jiho officer jong khat le ni aumjin amelhoi tah tah le lamchom choma boltheina nei mi ho jalin akisong lel jin ahi.
Nikhat kenjong Uhaopu le apa chu kagavilin ainlhona kholai kaga che leh Uhaopu chun apa von ho anasop kagatoh in kenjong Uhaopu ken sop inge katile akiphalamin anompon,
Kenjong ada sasan kalahpeh in kasop in ahi, chuin kasop chaiyin apa chun eihin kou lut lhonin cha kadon khomun hitin ahin seiyin ahi
Apa Naocy na-Uhaopu toh kicheng dingin kahin deisah lheh jenge, genthei naho jeh-in vang nom mo san nate, hijongle ven, leiset’a hin haosatna le loupina ho hi aumden dingle vangama poh lut ding aumpoi, leiset’a vaicha tah a Pathen toh hinkhoma tonsot’a kipana chulthei louva lenkhom ding joh athupi joi, hijeh chun Christian insung khat semkhom utin chengkhom tau hite, chutile genthei vaicha lheh jongleu hen ahahsatna chana ikivet to theiyu ahi, ahin ti tai. Hichun kenjong ka donbut in.
Kei: Hepa lungset chandia kilomlou kei neilungset lhon kakipah lheh jenge, ahi nagel chu kadeiyin kapome, hepa kenjong Uhaopu koma kalungset na thu seipeh dinga hung kahi, genthei jeh-a kisonlel na ding aumpon, chule HAOSATNAN JONG EINGAILU DEH POI damna jong eipe theipontin kahinkho jong ajopsaube theipoi, tin ka donbut in ahile akipah lheh lhonin ahi.
Chomkhat kaki houlim jouvun Uhaopu pa chun
Naocy Nahin lungset, nahin ngailu ho lah a genthei pen keini toh cheng khom dia nakigel lhah theihi Pathen na ngailu e ti kamun kakipah lheh jenge, hitin nikhat le keini pacha kahung kholai len lhon ding ahin, nanu toh kihoutoh utin vannoi kikhom jou hih jongle insung mite chengse het theiya kichenna kin kasempeh lhon ding ahi, atin kakipah lheh in ahi.
Kenjong henge hepa kakipah e, keijong che tange, kanu toh ana kihou toh inge, tin kahung pot tai, Uhaopu chun lamkim gei eihung thah in Naocy kei neihin lungset kakipah e, genthei lheh jongle hen kenvang nahinkhoa lhaset sah ponge, henu jong eini koma umsah ding genthei kathoh sah lou ding ahi, tin thu tampi kasei lhonin akilungset sa chu kana hilhon tan, hiti chun masang hinkho ding ho changei kaseikhom lhontan ahi, chule kanu chun aphatsah tei dinga kana gel cheh uchu ahi kit’e.
Nikhat kanu in Boinu Haopu toh akingaiye atiuvin thu tah ham? Tin eidongtan, kenjong henge henu sot’a pat kana lungset ahitai, katile kanu chu alungnom mo tan,,
Nasen natuiya kona genthei hijat nathoh a nachim nailou ham? Kenba officer milen tah tah mihaosa hotoh nakichen ding kati bouve, Haopu teni khubang genthei niseh a natoh natoh hijeng niseh a natong dinga kaphal takei di nahim? Tua natoh gimna hojong nachol nailou ham? Tin ka chunnu chun aseitan kalung kagel’a kangaito leh, eingailut val jeh-a kei dinga gentheina khohjo agondoh ding chu kamutan, hijeh chun
Henu, neingailut neikhoto naho hi aloupi e, hijongle ven, tun ngla nateh tan natha alhasam tan, mihao minomsa toh kicheng leng katahsa nomsa nante, hijongle kalungthim vang nomsatah a umlou hel ding ahi, kei meithaicha kahin mihao ho anga hinkho nom mangthei kahipoi, lekha them tohmun phatah nei hileng vang umthei nange hinla tun ikibahpi joh kilhen ding hi keidia nopsahna le kipana pen ahi, mihem hi tahsa gim jongle lungthim akipa poule akidam jinge, hinla tahsa nomsatah in umhen lunggel kipah jou tahih le hichu ahi gentheina dihtah chu, “tin ka donbut in ahile,
Kanu chu anompon, Boinu Haosapu chapa Hegin toh kicheng dia kasei ahitai, thu tampi seita hih-in, amakhu sepoy ahin nahinkhoa nom nasah nadinga kagel jeh-a kichengdia kaseipeh ahitai, ahin tichun kalhase valin guhthimin kamitlhi kakitheh tan ahi.
Kanu koma Henu Ugin chu kadeimo poi, mise jong ahipoi, hijongle ama sepoy ahin munchoma posting che jing ding ahi, a insung mite lunglhaina kahilou ding, chutengle ka genthei ding ahi, ngla neive thei tapon natin, amaho nulepa sopi Ulenao neiya kei kachang kahin neigimpi naho banga kenjong kagimpi theina din igenthei kibahpi Uhaopu to joh neikichensah tan, mihao ho koma genthei cha keiman nopsahna ding mun kaneipoi, tin kathumin hinla kathusei chu ngaisah in eineipeh tapon,
Nanu kahi ken nasen natuiya pat kagentheipi nahin nahinkhoa nanopsah na dingle na gentheina ding mun kahaipoi, kathu nangailoule henu jong neiti datan tichan aseiphat in kangai ngam tapon, henu neingaidamin nang tailou “Henu” Tiding dang kaneipoi tin kanu thu chu nop le da umlouva ngai ding kahimaitai.
Hiti chun kanu lunglhaina ding gelnan Kalungset penle ka nopsahna ding Uhaopu dalhan Hegin toh kakicheng tai, Kajipa Ugin in eilungset jinai, hinla achunnu in lekha helou kahijeh le meithaicha kahi naho jalin eihot bol tan kajipa la ina um manlou insunga chun kiphalam pumle jahcha tah in hinkho kahin mang jingtan ahi.
Kajipa sepoy ahia lhalo salary tampi pi amu jivangin kadu kane khapon, kadeitah in sum le pai kamang kha poi, chule asumsan ho jeng jong kakhut in ahunglut kha poi, hijongle itehpi itehpu damlai sunga insunga vaihom ahiuvin amaho thu thun kanungjo jitan, kajipa lhangaiyin hinkho kamangin, ka tehpi ka insung miten tohdoh boldoh neilou ina kinungle tan, tiho pouvin eihou ji uvin kanitin hinkho chu gentheina le kana bouvin kamang jingtan ahi,
Nikhat ka chunnu damlou thu eihil uvin, ken jong ka insung mite koma kinepna lentah nei pumin kaseitan ahile, katehpin kate tutah a sum le pai hoiya kila ta ding haimo? Sum le pai hah toh chenlang gavetan tin eidonbut in, kachena ding sum la eipe pon, kanu jen na a gah peh ding imacha jongla eingaito peh pon, kalunggim le lhaset kakop kop nan kalim kamel akikhel in, ahpul thigo toh kabang tan ahi.
Kenjong ka chunnu damlou chu kagaven ahile ana ol dom tan houlimpi theiyin anaum tan, kakipah lheh jenge, chuin hospital bill kagavet le akijen na man chun sang som le sangni lang alut’in chujat pi chu paid ahitan, kalungdongin athu kakhol leh
Uhaopu le apa in apohdoh ahidan kahen, sei dingle gel ding helouvin kakap tan ahi, Uhaopu kamu chun Uhaopu ibola ka chunnu dinga hibang loma khotona naneiya hichan genthei tah a pan nalah hitam? Ipia kalesah ding ham? Tin kakap tan ahile
Naocy ibola naka ham kap hih-in, nakoma kasei sa hilou ham? Na chunnu jong genthei sah ponge, kati chula m, atin kipathu sei tilou kei dinga sei ding umlou ahijeh chun Uhaopu kakipah e, neikhoto naho lethuh nading kaneipoi, Pathenin tonsot’in phatthei naboh jong lhonhen, tin kakile tan ahi.
Kanu kom kalut chun Boinu nom nasah hinam? Nang jipa sepoy ahijeh a tunia hospital kalhun thei ahi ahin tin, ka chunnu lungmol dan hi kalha amoh set set jenge,
Kenjong Henu HAOSATNAN EINGAILU DEH POI Haosat nan nopsahna eipe kha poi, kajipa sepoy pan vanga hinga nahim? Ven Kalungset masa vaicha genthei Uhaopu le apa in najen ahibouve, kana kilungset lai lhonin neikichenpi le henu le hepa genthei sah ponge, nang jong nalhaset sah ponge eina tin, tun ken nangthu pel ding kanop lou jeh-a angdan kasan den vangin akitepna ho ahin molso tai,
Henu, ichangeiya lungmol nahitam? Ven tunin building sunga kachengin kajipa lhalo tampi aneiyin hinla na laigilga keiman kadu le kangai kane khapon, dulengai neh malah in, kiphatlam val jeh-a an nelou twi donlouva kaumna hi atamjo tai, tunin mihao insunga nei chensah vangin nakijen nadin siki makhai beh jong ahung kisep doh pon, twi vat khat nadon nading sum le pai ahunglut poi, ahinla vaicha genthei tia nathet bolsa ten nahinkho khelin ahinkho aphal ngam uvin, aneisun nangdin ahin peuve, ipia nasah ding ham? Tin lhase tah in kakap tan ahi.
Hichun ka chunnu chun thil umdan ijakai ahin hetthem phat’in akisih lheh jengin hijongle haosatna ho ana ngaisang val jeh-in angailutpen alaigilga changkhat keija din hinkhoa gentheina chu akhel thei tapon ahi.
Uhaopu le apa komin ka chunnu in kisih in ngaidam athumin numei lunglhom ahijeh a agel khel danho aseiyin kiphalam tah in aumin ahile amanin jong angaidam lhonin Pathen thilgon joh ahi tin agel lhonin ahi.
Uhaopu le apa in kanu chu jo chanin avekol lhontan keijong kakipah lheh jengin ahi, hijongle genthei cha keidin mihao anga nopsahna alhom lheh jengin ahi.
MORAL: Hiche thusima kona ijildoh nomu chu, mihemin chungnun ichu val tengle gentheina phatah akikisem doh lo jin, mihem hi itahsa gim lheh jongle lungthim akipa laichana nom kisa pou pouji ahi, amavang tahsa chu nomsa tah in chol le nan hepha louvin umjongle lungthim akipa lou laisea nopsahna um deh lou ahi, hijeh chun tahsa nopsahna sanga lungthim kipana hi giljo ahi, mihaosa mi nomsa Pathen helou kom bel sanga vaicha lheh jongle Pathen ngailumi toh hinkhom hi hinkhoa hamphatna phapen chu ahi.
Hiche thusim chomcha lunggel suhtoa kahin jih hi asimdoh jouse chunga kakipah-e, apha lah thei lai kilah-utin, kihilnan neiyute, jih themlou kahin jihkhel tampi uminte hijongle Christa minin kingaidam’u hite.
©️Copyright
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
