Home L Seikholen Khongsai GULPI LHUNGPIA NEIPA THUSIM

GULPI LHUNGPIA NEIPA THUSIM

80
0
GULPI
GULPI

Gel lou a khoh

By- L. Seikholen Khongsai,
Tuibong Churachandpur, Manipur
Nisim 12th Nov, GVC2017 (Sunday

Oct nisim 3, 2017 nikhoa Eimitimes a Thinggai neipa thusim tia kanasut ban joma kahinsuh theng nomchu, athusim chu kaneo laiya kapi kaputen ein seipeh u kanachin ho kahinsut doh ahi. Athusimla ei Kukite thusim ahichula kana hemchen mama in hinlah amun aohol holeh pute homin le gamkai ho kana sumilkha in neolai thuchin ahijeh in amoh manthah ding kadei loujeh a kahin sut doh ahi. Hinlah athusim kahinkhol jingtoh kilhon in tuhin athusim dihtah chu mudoh leh hetdoh in ahung umtan keidia kipana tah khat ahitai. Athusim chu noiya bangin anasim kit ute.

Akum leh alha kihejou tahih jongleh Masang laiyin Burma le Manipur gamchin Twivai kiti vadung khat ana ume. Hiche twivai kiti hi tuchan a jong umjing nalai vadung len khat ahi. Hiche Twivai kiti vadung panga chu Songphel (Songphel Kholen tia jojg kihe) khopi khat ana ume. Chulai khanga Songphel kho a Haosa chu Pu Thangneikhup Lenthang anahiye. Ajinu chu Vaite chanu Pi Dimlhai ahi. Amahi kholhingtah leh haosatah a anakhocheng ahi tin akiseije.

Aman jong inthah lentah khat sahding agongtan ahi. Hitichun nikhat Pu Thangneikhup Lenthang jong inthing jongdingin anakon doh in ahi. Thing atam vangin hiche nikho chun Lhungpia manthei ding thing anahol mo keijin ahi. Achainan twinahsi kun’ah Lhungpia pangthei Thing hoitah kitung jangkei khat agalmu tan ahi. Aman jong thingphung chu ajonphei in ahileh thingchu akon deh duh tan ahi. Aman jong itidan a gal akona kavetchunla ajangkei in tua konchet chut ham tin akile kit in avet masatna muna konchun agavet kit le ajangkeijin ahoidan dan chu seiding ahepon ahi. Hichun amun achun ahung kit in avet le akoncheh chuh kit in alung don man in inlangah ahung kile tai. Ama jong ajingin ache kit in anamu ngaibangin amuleu kit tan ahi. Anithum lhin nichun amajong akonpha kit in heicha chempong akipoh in thingphung chu ajonlut jel tan ahi. Itimong mong ham tin achemponga agasat leh thingphunga konchun thisan ahung longdoh in ahi. Hiphat chun amajong kidang asah in ahetkhah lou ahijeh in jieh inte tin kiphatlam sasan apaipeh a aju um chu aladoh in ju chu aphikhum in lungdong leh kicha tah in ahindalha tai.

Anilhah janchun Pu Thangneikhup Lenthang in janmang aneijin, amangin hitin ahung kiseitan ahi. “Lhungpi dinga avel vel a neihung vetchu jing nikho mamaleh neihung phun unlang, nalhungpi adin neihung potauvin tin chule neiput ding danchu ponlou naki o uva neiput diu ahi tia aseipeh bangin ajing nikho in khosunga pasal mit jouse upa gollhang ahatcheh leh nungah ho jouse apuiyin thingphung aphuh tauve. Hitichun ajan manga kiseibangin abol in thinglong chu inmun ah ahinpolhung taove.

Hiti chun aman jong akho avengho akitep in a inpi chu ahin kisah chaitan ahi. In asah jou nichom khat jouvin alhungpi chu asun ajan in ahungvah in akhomite jousen kidang asauvin hichu amaho dia thanop umtah ahijeh in janteng leh khosung upa hochun them metnop nan amanguvin ahi.

GULPI

Phat ahungche che in phat khat jouvin hiche Lhungpi a konchun thil khaina thei aka (hanger) sangkhol toka khaina thei ahung dondoh in aban in thilkhaina seh hitalouvin Haosa te chun hiche ahungdon doh aka achun Khongpi le Dahpi akhaijun hichun Khongpi Dahpi khainan amangden tauve. Hijeh chun kum tamthim pi imacha boilou hel a ahin mantah jeh un tehse hochun hiche LHUNGPI chu LHUNG-ON PA ahilouleh LHANGNELTE tin jong anaminvou vin ahi.

Hitobanga insunga dinga mantam tah leh hahsat gentheina beihel a kumlhung lhalhunga insunga vahjing ahijeh chun Pu Thangneikhup Lenthang in hiche Lhungpi chu ahin hou khat bangin ahin hou tan ahi. Hiche Lhungpichu houva ahin neija kipat in Pheisam/Maltong Hou kisei bangin anei agou ani anin apungtul tul in akhangtou tul tul in akho aveng jong inlap 100 ahungval tan Khopi lentah le lhingtah ahung hitai. Hitia akho aveng Khopi lhingkhat ahung hitoh kilhon in khosunga konin ahat apao, ahoi aching athem ahung kisep tauvin ahi. Gamleng hat, sakap them jong chule louna tonga chang le mim jong apuntoh kikhon in Songphel Kholen khosunga kon in Chon hinbol, Sa-ai Chang-ai ahin bol tauvin chule Lomjuneh ne a Ningju aisa nehkhomna khopi khat leh minthanna nathei khopi khat ahung hitai.

Chule Songphel Kholen Haosapu Pu Thangneikhup Lenthang injong a insungah Dahpi Dahcha Lhungphei jolah gol 2 a kigol aneitanchule Selpi Selchal jong Kholaidung pal galkai jou lou khop in adim ajangin ananei jin ahi. Chule Khipi khichang jong Lelpi khat dimset ananeijin ahi. Hitia ahaosat laitah in a-in neipi Pi Dimlhai Vaite chanu chu asopite ahungun Pu Thangneikhup Lenthang komah kachanu u, najinu Dimlhai mandinga nalhungpi neipeh diu ahi tin anupaten ahung sei taove. Pu Thangneikhup Lenthangin jong “Kapute, lungset tah in ka inneipi mandingin vang kalhungpi neingeh peh hih beh un tin ama sang uvah ataotho jeng tan ahi. Hiche sangchun ka Selpi leh Ka Selchal, kadahpi le kadahcha chule kakhipi leh kakhi chang nadeijat jat hinphal nang kate tin ataove. Hinlah anupa ten anop peh tapouvin, nalhungpi neipeh lou uleh nupa pipu hijong lehen eini kikah a gal a ikidou ding ahi tin aseipeh tai.

Kihoulhahna umlouvin akiset khen tauvin nikho phabep jouvin Pu Thangneikhup Lenthang nupate Vaite te jong gollhang hatlai jouse ahung kon un Pu Thangneikhup injong anupate thupeh chu ating jou tapon a inchu aphelha tauve. Hichun lhungpi chu doplhah ding agot uleh adomlha jou tapouvin ahi. Vaite panjong Pu Thangneikhup jah ah, na lhungpi hi nasol loupeh lahlhah thei hilou ding ahijeh in thu penlang domlha taute. Chuti louleh eini kah a kisetkhan na umding, khonunga kithi khenna umding ahi atipeh tai.

Hichun Pu Thangneikhup Lenthang injong lhase tah leh lungna tah in alhungpi chu analha doh in analachoi tan ahi.

Cheto cheto kajo phei ka-it jou tapoi,
Nungteng navang lhaulhan neihin hol’o

Tia mitlhi pum inhiche lacheng a alhahdoh phat in lhungpi chu mipi hochun jangkhai tah in ponloiyah apu uvin ache mang tauve.

Pu Thangneikhup Lenthang pan lung natah leh itcha tah a alhahdoh alhungpi chu Twivai Vadung lailung aphah pet tah un lithuh lamah apeilut in lhungpi puho jouse chu hiche lilaiya chun athigam taove. Hiche apeilutna lilai chu tuhin TWITHIMLI akiti tai.

Aban in Pu Thangneikhup Lengthang khanga pat khangsom (10) jouvin hiche Lhung-on chun avel a ama ahou kit nadiuvin phatkhat khat le Gulpi lim leh Pheisam lim chule Meivah limin akom uvah ahung kilah jin ahi.

Pu Thangneikhup Lenthang acha atute, ason apah te lah a Pu Thangkhup khang lai, AD 1700 velchun Manipur leh Burma gal anakisat uvin Burma lengten Manipur lengte chu gal in anajotho tul tul taove. Hichun Manipur Meitei Ningthou Budhahandra Singh chu Pu Thangkhup Lenthang pa komah achen galsat ding mi neipen tin galpa anakithum e. Hichu Pu Thangkhup Lenthang injong agamsunga pasal hat tah cheh mi thum (3) anasol peh in ahi. Hiche galchu Meilhei hon AWA LAN anatiuvin ahi. Hiche Awa lan galjona ananei phat un Meilhei Lengpa Budhachandra Singh in Pu Thangkhokhup Lenthang chu anakijol pi in, chuleh kipa thilpeh in

  1. Khemachi pon
  2. Pinkang ponthel
  3. Sana mailangkong
  4. Chemcha
  5. Sum Selki
  6. Paigen thih donkai
  7. Sana go long
  8. Kelson galvon (Lum)
  9. Kidalna pho
  10. Longchang vuikhat, thil hijat hi anapen ahi.

Hitobang thu hohi asot val phat a thusim tia kisei ahivanga thilsoh tahbeh ahin thului lalui hohi mihemte dia History a kibulphuna ahi. Hijeh chun akichingdoh kham kham kisundoh hohi tukhang dia thuman tam tah ahitan semthu le kichang vahchoina dia kisun ahilou dan ihet uva, Kuki te lah a koi hijongleh thusim lui inei hou selmang ding golouva, aban khanga hung kiseilen ding khangthah te ipehson joh diu ahi.

Gam le go, nei le gou, chondan khankho khohsah kiti hi Pathen thutoh kitoh ahin ichon naleh ihina a Christian tahsan ipom diu chu iboldoh kaseuva Namkhat hina a Christa tahsan ipom naujong bukim lou ding ahi. Kakipah e.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleMANIPUR AUTONOMOUS (HILLS) DISTRICT COUNCIL (ADC) THU A MANIPUR GAMSUNG BOINA
Next articleKUKI TE CHOLDOL A LAM (CULTURAL DANCE) HO

LEAVE A REPLY

Please enter your comment!
Please enter your name here