Home Lahkhom GUILHUNG JOULOU-II

GUILHUNG JOULOU-II

201
0

Love Story

(Part-2)

By: William Lhonga Madrid.

william kwc writers
william kwc writers

Chuin amani nucha jong alup lhon’a cheh-a konin, khangjing ahungthou lhontai.

Phat chomkhat jouvin alhonkhompi ding ho jong ahung tauvin, chuin anun Lulun jah-a “boi, sum dang la kaneipon, jani bou kaneiyin, nangin jakhat kipoh-in lang, keiman jakhat kikoiyinge” atin, sum jakhat chu apetan ahi. Chuin Lulunin anu jah-a, “henu, sum angai hih-e; nangin kikoi jengo” atin ahile anun adonbut kit’in, “kahlah a nachohnom jong hung um maithei, chuteng dammo veisetnan jong nachunga na ahintoh thei ahi. Kipoh-in” atiphat’in, Lulunin jong akilahtai. Chuin Lulunin “henu, keijong chetange; kaloihon eingahlel tauve. Anadamsel tan” atin, anu chu chibai abol jouvin, amajong akipatdoh in, aloiho nung chu ajuitai. Mitin chu kipah le thanomin asalah lah jengun, ahinla a-itih a Lulunin anu le avangkho adalha khahlou jehchun, alunghel lheh jengin ahi. Amaho jong ache che jengun, acholval phatleu lampam dunga chun phat chomkhat atoupa jiuvin, chuteng achekit jiuvin ahile amaho jong nilhah lang nidan ni(2pm) vel’a hin ajotnau Damphai vangkho chu alhung tauve. Chuin amahon jong lamkaiho koma chun min pehlutna aneiyun, lamkai hon jong aumna diu in akomupeh tauve.

Aloi apaiho chu kholaileng loi, nehthei kichoh a cheloi, lasa loi, achuti lha jengun, Lulun vang achunnu khankho ding gelnan angui jengtai. Mikhat le ni chun adaiyun, “Lulun, koipul nadouva, nanguichet jeng ham? Ole nadarlingnu Chongbem pul nadou ham?” atiuvin, a-eng engin adaiyun ahi. Lulunin vang lunghannan jong agelpon, hitia adaichavai hochu kamcheng khatchan jong adonbut poi. Nungah khenkhat chu Lulun koma aga touvun, “heu, nehthei nekhom’u hite” atiuvin, anehthei choh hou chu nehkhompi dingin agatem’un ahi. Nungah khenkhat ma chun kholaileng dingin atem’uvin, ahinla Lulun vang apotdoh nompoi. Phat chomkhat jouvin aloihon kisil’a chekhompi dingin ahung tem’un, Lulun jong akigongin aloiho nung chu ajuitai. Luikhuh agalhun leu nungah thumin von anasop’un, ana chohthet jengun ahi. Lulun loiho chun nungah mithum hochu agah houvun, “naote ho, nangho hoilai khoa kona nahungu ham? Ole akhonei ho joh nahiu ham?” atiuvin ahile khat hon jong akhonei ho ahiu chu aseipeh tauve.

Nungah mithum ho chun thipchet’a um Lulun chu athimvet jiuvin, “hichepa khu ahoival’e, kadeival jenge” atiuvin, ana ngolpi deh deh kit tauve. Lulunin la kho hephalou, nungah hon ahinvetji tengu chule jachatnan anadimset jin ahi. Phat chomkhat jouvin nungah holah a ahoipennu chun Lulun jah-a, “heu, lungset tah in twibel hi, kaluchunga neihung domdoh peh-o” atin, aloiho jouse lah a chun gal langa um Lulun chu agah kouvin ahi. Lulun jong ahungin, nungahnu chu twi apattai. Chuin aloiho chun ahin daiyun “Lulun, jalah a deilhen atiuhou chu, nang nahi kit hitante na? Nangbon otchat naumjie; kilom jong nakilom lhon’e” atiuvin ahile numeinu chu anuiyin, Lulun vang jachatnan adim jengin, amai asandoh leuve. Chuin nungahnu chun Lulun jah-a, “heu, kakipah-e; nilhah teng kholaiyin hungo” atin ahile aloiho chun ahadai cheh-un, “Lulun, thilkhat vang aum’e na? Kihoudan chu asangcheh cheh jengtai” atiuvin achohlha jenguve. Lulunin vang ima aseipon, aloiho anuiman chun agahme tettut’in, alungsung vang jachatnan akhujol jenge.

Jan ahiphat’in aloiho chu kholai alengun, anopsah thei lheh jengun ahi. Lulun vang silpon akikhukhumin, ajalna mun’a konin achunnu bou ageljingin ahi. “Tuhin kanun ipi abol dem? Nomin samang ajalta dem? Ole selunghel’in, samang jalmon hinkho amang jengdem?” tia achunnu kimanchah ding dan ho lunga angaito chun, achunnu alhangai lheh jenge. Chavang golnop kipan nailouvin, akichai kalbou angahlel kittai. Anun jakhat apeh chu abag sakhaovah akikoitup chet’in, nehthei thilho chohnaa mandingin vang aphalpoi. Eiho hileu hen vang “jakhat seh ipia kipansah ding ham? Sangkhat beh neipeh loule, hithei ponte” kitia, jakhat chu lhunkim nia kisumang chai kit ding ahitai. Lulun vang genthei tah a sumlepai, neh le chah holjing ahi jehchun, moh manlou chohnaa chengkhat suhmang ding jong anompoi. Phat chomkhat jouvin aloiho jong ahung kile kit tauvin ahile loikhat chu anamlah lah jengun ahu. Aumdan chu asanchi/akangchi kiti ho chu aga bolchah kit dan’u ahitai. Aloiho umchan jouse chu ahesoh-in, athilbol hou jong ahaipoi. Ahinla Lulun chun akihetmo sah in, henasan helou bangin aum jenge. Aluplhah leu a-ihmu pai tauvin, Lulunin vang aloiho nam chu athipi deh deh jenge. Aloiho chula akhangmang paoloi, anah hamloi achuti lha jengun, Lulunin vang achunnun availhahna kamcheng hochu alunga agel’in, angaito jinge. Jan asot val phat’in Lulun jong ahahjou tapon, ahetlou kah in ana ihmu miltai.

A-ihmu geipen’a apan vangin, athou masapenin jong apang kittai. Athodoh doh in taona amangin, damsel’a hinkho aman’a, kin kichaigeiya kituptah a pan alah a, kipah le thanom’a anutoh akimu kit na dingin ataovin ahi. Taona aman jouvin kisuhtheng to gom’a twikhaiya chedingin, luikhuh lang ajontai. Luikhuh alhun le janhia ana um nungah hole nupi phabep anaum’un, Lulun ahinmu phat’un, nungah hochu akisihto sao sao kit tauve. Janhia twi neipat’in tinu chu Lulun koma ahungin ajah-a, “heu, nang vang nakilet sah val’e” atin, nuiheuvin agah houpin ahi. Chuin Lulunin jong adonbut in, ajah-a
LULUN: “Kakiletsah hih beh jenge; ajehchu kei migenthei kahin, lekha simlou jong kahi. Hiti ahi jehchun keiman kiletsahpi ding imacha jong kaneipoi.”
NUNGAHNU: “Janteng kholaiya hungin kitia, nahunglou chula.”
LULUN: “Kaboi behseh a, kahung manlou hita chuo. Amonga hungding tijong leng, na-in’u la kihe lou, chuteng namin jong kihe kit lou, iti kan holdoh ding ham?”

NUNGAHNU: “Keijong ba kahi chuo; kamin beh kana seipeh ding dol hiya, kana suhmil hichuo. Heu, kei kamin Kimnu ahi; nangmin Lulun hina lou ham?”
LULUN: “Henge keimin Lulun ahinai; Kimnu kiti chu minngei tah ahiye.”
KIMNU: “Heu Lun, tuni teng ka-in’uva, khatvei beh hungo na?”
LULUN: “Kahe hih beh-e; phat umthei ding hinam? Ka-on le hung nange.”
KIMNU: “Na-on le hungtei teiyo na? Ikimelmu na channa kihoujing hite o?”
LULUN: “Henge neihin houjile chun, hin houpi jing nange.”
KIMNU: “As nang jong vang, ken kahoule bou neihou ding, naseidan chu ken kahou masat loule neihou louding tina hita chula na?”
LULUN: “Min eihou masat loule, kahoungam jilou chuo. Amonga seiding jong kiheji louva.” Hitia akihou pet lhon chun, aloiho jong luikhuh lang jonin ahung kit tauvin ahi. Aloiho chun hite ni umchan amudoh kit phah’un, ahin daipan kit tauve. “Kamohtot tot vanguva nangni hi, nahung kingaidoh tei lhon ding ahi” atiuvin ahile Kimnun jong aletot kit’in, “kaki ngaidoh lhon le pha chula; ole nei-otchat’u ham?” atin, agah khalah kei kit’in ahi. Aloiho chula angoltheiyu toh, akamtam theiyu toh “keiya lou din napamaiye” atiuvin, achohlha jengun ahi. Kimnun jong atheichim val phat’in, Lulun jah a “heu Lun, keiho ana chemasa tauvinge” ati jouvin aloite ni toh lhonkhomin, akile tauve. Aloiho umchan le thusei jiho chu Lulunin ajachatpi ji lheh in, ahinla ima vang asei jipoi.

Jingkah buneh jouvin, kichep golseh jong akipan tan ahi. Chavang golnop chu aman tengu le, sun chu kitetnaa aman’uva, jan chu houin kaina le lenkhomna a amanjiu ahi. Numei ho achom’a akitetsah jiuvin, pasal ho jong achomin akitetsah jiuve. Numei ho kichep teng pasal hole kichem’a jaolou hochu avea panguva, pasal ho akichep kit teng chutobang maa chu numei hole kichem’a panglou ho chun avetkit jiu ahi. Mikhat chu kichepna nga a bou jaothei, kichepna jousea jaothei lou ahi. Amasapenin pasal ho kilhaitetna abol tauvin ahi. Commentator pan minphonna ahin neiyin, “Monglen vangkhoa kona Lalboi” tia aban banna ahin simlhah chun Kimnu lungsung chu kipanan ana lodim jengtai. Chuin kilhaitet’a jaodinga aminchongse chu ahung kigol’un, kigosa demin aum tauve.

Khong thumvei agin le, lhaipan jeng diu ahi. Mitampi lhai dinga akigol vangun, Kimnun vang mikhat bou anave e. Koi ahikit tadem na? Khong khatvei ahung gin phat’in akigongun, nivei agin phat’in adingdoh cheh-un, thumvei agintah chun Sakol lhaipet abang jeng tauve. Akipatnaa konin Lulun chu amasapen’a apangin, akichaina geiyin jong amasapenin, ahatpenin apangtai. Amelhoina le adonghoina bou ana ngolpi ahin, tunvang ahatna jong angolpi kittai. Koi ahi hetsa hichula na? Kimnun eilungset’e tivang, Lulunin ana gelpha him him poi. Ahouji jeh a bou adonbutji ahin, lungset mel’a jong ana mulou ahi. Ajehchu Lulunin lungset ipi ham jong ahetthem nailou, alunga anu bou ageljing jeng nalai ahi. Mijouse chun Lulun lhaihat dan chu aseicheh-un, kidang asathei lheh jenguve.

Sun langa hin Kimnu chun aloikhat ahin kipuiyin, Lulun koma chun ahung lhontai. Chuin Kimnun Lulun jah-a aseiyin
KIMNU: “Heu Lun, nangvang lhai nahatval’e; nalhaihat dan chu Sakol nabange.”
LULUN: “Nangma ma nakamthem jie. Keichun la Sumkong(Tortoise) tobang kahi ham katin” atin, agah tot’in ahi. Chuin Kimnun adonbut kit’in, ajah-a
KIMNU: “Sumkong toh nabang hih beh-e; Dahdeng(Snail) tobang joh nahi” atin, agah letot kit’in ahi. Kimnu thusei jehchun, Lulun jong anuipohlah lah jengin ahi.
LULUN: “Seiding jong nahe jie” atin, anuijingin ahi. Chuin Kimnun ajah-a
KIMNU: “Heu, hikoma namohtou tou sangin, hungo keiho in’a cheu hite.”
LULUN: “Kisonlel sah a keipentah na-in’uva hung dingin neitem tem jengin, kajah acha bouve.”
KIMNU: “Kisonlelna ding le jachatna ding aum hih beh-e; Kanu khu najachat ngal loule, numei dang jong aumpoi. Hungo cheu hite” atin, anop le adathu jong seitamsah louvin, apuitan ahi. Hitia Kimnun Lulun ahung puidoh jeng chu nungah tampin ana lunghan piuvin, chule Lulunin Kimnu ahin lhonkhompi muphachan gollhang jouse chun mithoi miphan Lulun chu anave pouve. Ajehchu gollhang tampin angolpiu chu Kimnu ahin, nungah tampin angolpi kit chu Lulun hikit’a ahi. Kimnun vang gollhang dang jouse sangin Lulun chu adeijon, angaisang lheh jenge. Ahinla Lulunin imacha ahepha pon, ama jeh a nungah ho kithadeh deh lam jong ana hephapoi.

Phat chomkhat jouvin amaho thum jong Kimnute in agalhung tauvin ahi. Kimnu chun sungkhat’a penkhompi pasal thum aneiyin, numei vang amabou ahi. Anu le apan chanu changkhat seh a aneilhon ahi jehchun, angailu lheh lhon jenge. Angailut lhon val jehchun alhaset khah ding jong anomji lhon pon, hijeh chun akipana hoa jong aphohsal ngamji lhon poi. Aumdan chu chanu homtho umtah le chapa homtho umtah gel hilhon dan ahi. Kimnute in alhun’uva chun, Kimnu nun achanu jah-a
KIMNU NU: “Kimnu, ama chu koiham? Ole Lulun alhaihat pa chu ham?” tin, adongtai. Chuin Kimnun anu adonbut in, ajah-a

KIMNU: “Henge henu, amahi Lulun chu ahi” ati jouvin, Lulun jah-a “heu, nangho anatouvuvo, keiman cha hinsem inge” atin, chasem dingin achetai. Chuin Kimnu nun Lunlun chu ahoupin, ajah-a
KIMNU NU: “Lulun, nangho mi ijat nahiu ham? Chule ipiti naki khosat’uva, neh le chah nakiholjiu hinam?”
LULUN: “Henu, ken sopi ule nao jong kaneipoi. Ajehchu kapan kanu oisunga kaum laiya eina dalhah lhon’a, jidang ananei ahitai. Tuni chanin kapa mel jong kamukha pon, kapa koiham jong kahepoi. Kanu le kei genthei tah a kakivah lhon’a, kakihinso ham ham lhon ahi” atin ahile Kimnu nu chun akhoto lheh jenge. Ahinla Kimnu pa maiso vang ajatchom tai. Chuin Kimnu nun aseikit’in, ajah-a
KIMNU NU: “Lulun, naseilou vangin nagenthei lhon ding dan kahen, kahin khoto lheh jenge. Nanu jong nangaiyin, lhalengvai kisa lheh tante. Chingthei tah in hinkho mangin lang, nanu kipana din hinkho puithem’in” atilaitah in Kimnu pan ajinu chu ahin donbut in, “mi insung thua, nangma kisah lunggimna ding aumpoi. Nachate bon kichintup jou louva, ahidan danin mi nagah hil’in” atin, ajinu chu ahin oimo paiyin ahi. Chuin Kimnu nun ajipa chu adonbut in, “keiho kaphauve kati hilou chuo, ngailut jal’a katilkhou joh ahi. Kamcheng khat’a mi katilkhou chu asetna ipi um ham? Pao le ham kibang, chi le nam thakhat, hungkona jong thakhat, ilim imel’u jong kibang, sopi khat le laijon khat cheh ihiu him’e. Nang le kei tin kikhentelji jongleu hen, koihi akikhen thei ding ium’uva, koihi achanga phathei ding ium’u vem?” atin, ajipa chu adonbut in ahile ajipa chu athipchet tai. Lulunin vang ima aseibe tapon, amani jicha kihoulimna chu Radio ngaiyin amohngai jengtai.

Kimnun jong cha a-omin phat’in, acha-om chu ahin domtai. Amasapenin Lulun chu apen, “heu Lun, chadon’o” atin, khonkhat chu apetai. Lulunin jong thipchet’in akilah in, adontai. Kimnun achadop ahopchai phat’in, amanjong konkhat ahin kidop in, Lulun koma chun agatou tai. Hitia achanun Lulun akhoto bol chu Kimnu pan ana lunghanpi lheh jenge. Ahinla mi umpet ahijeh le achanu lhaset ding anoplou jehchun imavang aseideh poi. Hijongle akilungset lhon ding chu aphallou ahi. Ajehchu Kimnu pahi mibolthei ahina ban’a, migin le ja jong hia ahi. Chanu changkhat seh a anei, achate jouse lah a akhotopen Kimnu chun pasal bolthei dom kimun hen lang, anopsahna theiyin ji jong neile ati ahi. Kimnu chunnu vang Pathen’a kingaijing mi ahina ban’a jong aneolaiya gentheina tampi anathoh naho jal’a chu genthei chaga ho akhoto them ahi. Chuti louva jong achanu angailut val jeh a, Kimnu kipana ding ahipou le tia Kimnu kipana chu amoh phatsah jeng ahi. Nilhah lang ahiphat’in Kimnun Lulun jah a “heu, hungo cheta hite; keiman hungthah inge” atin, Lulunte ho ngahmun lang chu ajon lhontai.

Kichep golsehnaa ajaona jousea chun, Lulunin pachanna jong aneijing ahi. Hiche Chavang golnop’a chun Lulun chu aminche lheh jengin ahile ahelou koima behseh aum tapoi. Phattinin Kimnun Lulun chu ahung holdoh jingin, akivoppi jing jengin ahile miho chun akingaiya ahisah tauve. Kimnun jong kakoma lungset thimthu lel le ati jehchun chance apejingin, ahinla Lulunin lungset thu him him aseidoh khapoi. Gel jong ana gelphahlou jeng ahi. Kimnun vang Lulun alungset val jehchun akoma umjing ding bou anomin, akoma phat chomkhat aumlou kom jongle ahinkho lhingjou lou bangin agel jitai. Gollhang tampin Kimnu chu ahel’un, ahinla Kimnun khohepha lou Lulun bou adeiphenin ahi.

Akoma aumlou teng jongle alunga Lulun bou ageljingin ahile ahagel val jehchun ajanmanga jong Lulun bou amujingin ahi. Ajanmanga amu jiteng lungset hinkho jong ana mangkhomji lhonin, kipahtah in hinkho jong anamangji lhon’e. Khangjing ahung thodoh teng kinepna thon janmang bep ahi chu ahin kihetdoh jin ahile koima hetpeh louvin ana lunghang lheh jengjie. Chubanga Kimnun Lulun angolpia, ajanmanga jong Lulun bou amujing jeng vang chun Lulunin vang anu bou ageljingin ahile ajanmangin jong anu bou amujingin ahi. Akitoh hih beh jenge na? Itih tah le Lulunin kakoma lungset thu ahin seiyin, lungset lamsao kajotkhom lhon tadem tia Kimnun angajing chu athon deh deh kittai. Ajehchu jing nikho hunglhung le, kikhenna ni jong hikit ding ahitai.

Hichan alenkhom lhon vang chun, lungset thu him him kamcheng khat beh jong Lulunin aseidoh khapoi. Kimnun seijeng ding ati jongle numei ahi jehchun jachatnan alodim kit jin ahile aseidoh ngam kit jipon ahi. Janteng Concert boltoh gom’a prize hopdohna kin anei diu, hichu kivailhahna programme jong hipai paiding ahitai. Lungset thimthu kamcheng khat jong seiman louva akikhen lhon jeng ding chu Kimnun agelle apona val’in, an jeng jong anehnom tapoi. Lulunin la ama jeh a Kimnun hichanna gentheina athoh hochu ahetpeh him him pon, jing kho hungvah loihen lang, kanutoh kipahtah in kikimuto loile tin jing kho hungvah kal bou chu angahlel lheh jengtai. Akho nungah honla Kimnu toh kingaiya ahettah jeh-u chun, Lulun chu hou jong ahounom tapouvin, chule Chavang golnop’a anapuiyu jong chu akisih lheh jeng tauve.

Aban simjom kit dingin, lungneng tah in anangah kit taute. Lunglut tah a sim jouse chunga kipathu kaseiye. Kakipah-e. Thusim chunga dohnom le seinom neihon kiphalam louvin, anoiya number kipe hin neihin houpi jengin.
William 8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleMolvailup Vangkho (village)
Next articlePHAT NANEI PETHIN KIGEL PHAN