Lelen Kipgen
7629033890
Jinei chanei nunga i-nunlui, i-lungset tah khat toh kimuto to hi ahahsa lheh jengin, akoi dingin jong nom deh ponte, ngailutna asangin lungsetna jong asang deh jin ahi. Ahinlah phat kipel nungsang ahitah jeh in thoh dan ahahsan, lonlhi tailou emadang bolthei aum deh ji tapon ahi. Chate naote kilungset na hi nu leh pa deilam ahiding chu thilpha ahi. Ahinlah khangdong tamtah lhilon naleh hinkho set lo jong asodoh sah theijin ahi.
Ji kanei tan cha thum kanei tan ahi. Jingkal nilhah, sun nilhumin ka-ji kacha neh le chah ding holnan ka kisu lungim lheh jin, nilhah ka vailhun teng ka in-neipin kamdam o-nem hiu cha eina vailhun a, ka chaten “hepa,hepa,” tia kipahtah a eina vailhun ji teng kagimna kacholna ho jouse kasumil ji tan ahi.
Chavang ahung hitan, thinglhang’a gamlen phat, Nga hol phat jong ahung hitan ahi. Nikhat hi kaloihon thinglhang langa gamlenga che dingin eitem uvin, kei jong katha anom lheh in che dingin ka kigellha tai. Ka jinun kavon ho eigut peh in, taona eiman pen in, chujouvin kahung kipatdoh taovin ahi. Mol le lhang ho kaven, kalung ahel lheh jengin ahi. Ajeh chu thinglhang’a hung seilen akihi jeh in. Thingna louna ahing set set in, Ju ham Va ham ho chun neolai khankho lui cheng athah in eigel dohsah in kalung ahel lheh in ahi.
Nilhah lang nidan thum vel hin loukon ho kapha pa taovin, amaho toh chun kahung kilhon taovin ahi. Amasang langa chun numei khat hin bengkong’a thing apon ahi. Hitichun kache che taovin ahile kemdo kapha taovin, hiche kemdo a chun kichol ding ka kisa taovin, alhung masa ho chun athil hou akoijuvin atou taovin ahi. bengkong’a thing po nu chu kaven ahile munkhat a hin abeng poh chu anga tan, ahung kiheiyin ahile kasen golngai Chinnu toh kilou kasa lheh tan, phatah in kaven ahile keilam ahin ven kalungset Chinnu ahi kahet phat chun Song tum bangin chat louvin kading den tan ahi. Aman jong kei eimu mu chun amai moldeh jengin, akihei mang in achom lang ave tan ahi.
Chutia ka din den phat chun kaloi ho khat in, “Len, hung tou loi tango, nalel lou ham? na chuti din din jeng,” tia ahinsei chu kahung kin dot in, chuphat in kei jong ema sei louvin katou tan ahi. Kum som jou nung sanga Chinnu kamu chu kalung akidang lheh in, kalha jong asen, kalung jong ase lheh in ahi. Ka sengolngai Chinnu toh kilungset hinkho kana man dan lhon ho kalunga ahung kilangin, “O, he chun le Jo singsung miten lungset mantam agil ji dan hethem leu chun, sengol kilungset keini dingin setlei lunghel hi um ponte.” tin kalungsung akap kap tan ahi.
Chomkhat set pi katou jou uvin, kahung kipat doh kit taovin, ahinlah kei vang chu ham lou beh in kaum tan ahi. Kaloipan, “Len, nalel thim khat hitam, naham tahih beh e,” atin ken jong, “thinglhang lam kijot kha talou, alel thim dan kihi hitahi.” tin kadonbut in ahi. Hitichun sot thim khat kahin jot taovin ahile khosung kalhung taovin ahi. Khosung kalhun uvin lhun nading kahung kihom taovin ahile kei toh kaloiho khat chu housate in a kalhung lhonin ahi.
Nilhah bu kaneh jou uvin, kho jong ajing pei tan kaloipan “i-loiho kom a gache hite,” atin keini jong kahung doh lhon tai. In khat a kalut lhonin ahile kaloi teni anaum lhonin, in-neipa chu kaven ahile ka golhan lai thing lhanga kana chen laiuva kaloipa “Thangneo” toh chun kilou kasa lheh in, aman jong hoitah in eiven, chuin ken jong “Thangneo,” kagah ti le aman jong “Len, koi bep khat ham kiti nang nahi hamo, ass… na nathao lheh tabouve,” atin chibai eibolin ken jong, “katei, kidangsan a hilanga na nachen hitamo?” katin ahile “henge, nangho na che doh jou uchun ka jineiyin hilanga kachen ahitai. nang la Ji nanei hitam?” ken jong “henge, kanei tai,” katin keini golcha ka kimuto lhon chu ka kingailu lheh lhonin ahi.
Hitichun nomtah in ka kihoulim lim uvin ahile, in-sung langa konin Chinnu ahung pot doh in chibai eihung bol uvin ahile lungdon nan kadim tan ahi. Chinnu, kana hel a jong chu kaloipa “Thangneo” toh kana hel lhon ahi. kei toh ka kikhan lhon phat a chu amani ana kicheng lhon dan ahitai. Midang toh akichen sanga kaloipa toh akichen chu ken jong pha kasa lheh in ahi. ahinlah hiche thu ho chu seiging talouvin, thuchom chomin ka kihoulim uvin ahi. Thuchom chom kasei vang’u chun kalungsung vang akap jingin ahi. Jinei chanei nung sanga ki kimuto vang chu kalungset na asang cheh in, kangailut na asang deh in ahi. Hithei henlang Jinei chanei nung hijong leh ki kichenpi jeng le kalunga aumie, ahinlah kalungel chu ahithei lou ding thu ahitai.
Jan jong asot tan, keini jong samang jal dingin kalhun na lhon in-kajon lhon tan ahi. Ahinlah kei vang emu lhu thei louvin ka kijan gel tan ahi. Chinnu toh kilungset hinkho kaman lai lhon ho lungmit in alangin, sun teng lom kakon ji hou, chule jao-lam pi a nuiheu cha a thimthu kalel ji lhon ho kalungmit in ahung kilangin, aguh in kalhisoh soh tan ahi.
Hitichun ajingin gamgeh dingin kache taovin, hapta ni jen gam ah kahung vaitham uvin ahi. Sakhi, Sagol ngalchang, jong ejat hamkhat kahin kap uvin, in-lam jon dingin kahung kile taovin ahi. Khosung kahung lhun uvin ka kisutheng uvin, an kane uvin, kaneh chai uvin kholai kavah le taovin ahi.
Jingkho hung vah le keiho jong in-lang, Lamka lang hung ding kahitah jeh uvin Chinnu mel kamu nom lheh tan, hijeh chun Jinei Chanei nung hijong le kalungset Chinnu mel munom najal chun a-in uva kache kit tan ahi. Kaga lut in ahile anupa lhonin anaum lhonin, Kagolpa Thangneo in jong keini kilungset chu hoitah a ahet ahijeh chun, Chomkhat katou jou uvin kholai leng dingin ache doh tan ahi.
Keini bou kahi lhon phat chun akihou joh sang umlouvin, katou lhon tan ahi. Chomkhat beh hijongle phat chesa ho kou kit kanom lheh e, Kalungset na asang e, kangailut na asang e, kahinkho chesa lhon kagelin, lhaset nan kadim e, ka mitlhi kasel vangin kasel jou tapon kamai alhop jou tan ahi. Ama jong alhisoh in ahi. Hitichun seiding beiyin, kaa tilou chu keini dingin adang aum tapon ahi.
Khankho lui-cheng lungmit in ahung langin,
Khosung khat le vengsung khat hinajal chun, jingkal nilhah, kumlhung lhalhung kahung kivop jing phat lhon chun lungset nan eina kan khom lhon tan ahi. Jan teng kagolpa Thangboi toh guitar ka kipoh lhonin Chinnu te in-a kaga tou ji lhonin ahi. Sun teng lom khat a kabung khom jiuvin, lou laiya chun ka kitot nilhum lhum jiuvin ahi. Nilhah lam vai che phat ahung lhin teng, Jao lhang a chun ka kisamto jiuvin in-lam kahinjon jiuvin ahi.
Kum le lha jong achalin, ka kilungset nalhon kumkho jong kum gup lam alhing tan, lungset na jong apilhing lheh tan ahi. Kaneova pat nu leh pa thumang kahijeh chun itobang thu hijong leh kanu kapa thu nuiya kana nung jin ahi. Hitichun keini kilungset na jong Chun le Jo ten ahin phatsah tapovin, chuphat in sengol kilungset keini dingin nom a hinkho man ahung hahsa tan ahi.
ama jong achun le Jo ten eiphatsah kit pouvin ahi. Hijeh chun keini dingin alampi aumthei tapon kikhan mei ding chu ahitai, ahinlah keini vang ka kikhan jou lhon pon ahi.
Phat le ni jong achalin, keiho jong Lamka lama umding kahi tah jeh uchun, alou theilouva kikhan dingin aum tan ahi, Chun le Jo ten keini kilungset na asan dan, agil dan hethem tave leu kanom lheh jenge. Ahinlah Chun le Jo thu nuiya kun lou thei kahilou jeh chun Lamka lang kahin jut ding kon uvin, jingkho hung vah leh che ding kahi tah jeh chun Chinnu lha dingin Guitar ka kipoh in kache tan ahi.
Hitichun kilhalel tah in katou lhonin, jingkho hung vah leh kikhan ding kahi lhon tah jeh chun ka kingai nalhon jong asangin lonlhi tailou adang aum tapon ahi. Jan jong asot tan, kilhalel lheh lhon jong leng alou theilou ahi tah jeh chun, lhilong chut chutin lhah nadingin
Kamboi Kipgen in asah,
GOLNGAI NUN-NEM na in-a len kachim deh poi goldei, Sahei pah le Lily pah bang chan, senlai lungdei nu selung leng hih in.
Kikhan hite jankho asot ta’e, tou khovah jong lehen kichim deh ponte selungel athon ngeiye.
Kangai boinun eina ngah o i-jao lampi koma, lunghel naho thimthu khaobang sutkhom hite, nang ngaiya nilhum khovah jeng ding hi.
Chunnu lungmol, kadei pahcha kakhan tai nang jeh in, khonung thu ding jong gel domin lang, na vonchoi el-bai kabah jeng ding hi.
Hiche la hi lonlhi pumin kasan, jan jong asot tah jeh chun kahung kikhan lhon tan ahi. In kalhun kon in leitol a chun ka kap den tan ahi. Ajing in Lamka lam kahin jon taovin ahi.
Hitia chu keini kilungset louva kikhan jong kahi lhon pon, Chun le Jo lungmol jeh a khan na soh ahi. kahinkho chesa lhon ho kagelin, i-la kalo thei deh pon, lonlhi a kivailhah tailou adang aum pon ahi.
Hitichun kihou louva katou tou lhon le jankho jong ana sot lheh tan, nupthei kasah lou jeh chun, hung doh dingin ka kigel tan ahile, thil khat beh in kivai lhah leh tin kalunga aum in ahinlah lhah nading ema jong kanei pon, hiche pet a kanei sun, kahung vaikon kon a ka in-neipin dil khat eigonpeh chu kapen kahin lha tan ahi. kahung doh konin ka phone a, GOLNGAI NUN-NEM tila chu kalha kit tan ahile ama jong akap lha jeng tan ahi. Kei jong pasal kahi vangin ka ki-im jou tapon ka kaplha kit tai. Hitichun “kitou khovah jong le kichim deh ponte,” tin kahin dalha tan ahi.
Kalupna jalkhun kalhun in emu thei louvin, GOLNGAI NUN-NEM ti la hi kalha in, aguh in kalhisoh khovah tan ahi. Ajingin khovah vah in keiho jong Lamka lang jonin kahung taovin ahi.
BEITA.
PUBLISHED BY.
THUSIMBU WHATSAPP GROUP.
