Writer: S.Lien.
Arrange: Naocy Haokip
(Part – III)
Recap:
Kamai ka phet’in Nenei letter chu ka sim tai.
Heu, Amasan, Nang leh Lalam chunga kabol khel na ho jeh in Ngaidam kahin thum e🙏
Ima jouse kei thepmo ahibouve, kholchen louva lungset kahin chan leh, kei dia kisonlel naleh lonlhi lon nading bep asoh tai,
Chomkhat ka khongaiyin🙄 ipi ahide o….! katin aban chu sim lou dila ipi thu ahi kihelou, sim jou dila het ngam umbeh kit lou, Lalama kona thu khat vang chu ajah hitei ding ahin…
Cont… Kamkhat cha a jong nei Lungset na thu seihih jong lechun, keiman Kalungset na kahinpe man tan, Nang banga Lungsetna hi kichepna a nei hileng chu, von bangin khel lele jongleng, vainunga mit-lhilon na leh puldou na umpon te, hijong leh kei lunggel leh kami hina a chetobang chu um theilou ahi jeh in, agen thei ding leh avangse chu keibou kahitai, Iba kilo dingham ka ngol man chu kakipoh di himai tante,..
Guhthima na lungset Lalam toh nomin hinkho hin mang maitan, akisei kajah danin, Lha nga jou leh Lalam akonin Vonchoi dei umtah mel namu di ahitan, Na lungsetna lhem bou changjou, kei vang eihin mil tan na tin, hijongleh Kenvang nangngai puldou nan hinkho hin mang mai tange
Achai na din, Na Lungset na lhem mai mai hijongleh atah tah banga phat chomcha, nei napeh jeh in na chung’ah kipa thu ka seiye🙏
Milmo jongleng hin mil mai tang e, Mangpha leh Chibai damsunga din🤝
Che kasim chai phat chun, koi pasal tilouvin chapang ka a kaa doh jeng ding chu ka nom jeng tai, Lalam in nilhah khat a, thu khat aumin nang koma kaseidoh louding, mikama kona nahin het ding ahi ati chu, ahi kahedoh tan, kalung han toh ka jachat toh um ding dan jong ka hai leuvin ahi
Asei dan chu lha li lang naovop dan ahitan, vop pon nate, ti a pan ngam chula hi naisai kit lou, ipi dinga nao navop jeng ham ti dinga la ki kiman keo kou kit 🤭 thuchih khat in, Ngalpeng pop louvah thou a chu poi, ati banga chu😂
Kei le kei chu hiti hin kahung ki hankhum tai,” Chepi hi ka maikhah nom a ana hiti lip thithe hiveh tang , kahiti lou nah leh kahiti dingham, Tua chu Ka Ngaipen nu’n la ei khen ta, ka min jong hi S,Lien sanga Chaan Lien a khel doh ngap di hija hi 😂 katin, koima mulou kah chun ka jachat toh umding dan jong helou, ka lungdon nalangin ka Tuike nui tet tut in ahi.
A thu chu kholaiya jong ahung ki sei ging jap jap tan, ka Nu leh kaPan jong ana jah-u hitei ding ahin
A nilhah mama a ga pui doh jeng ding atiuvin, jinei gah hijeng ding chu kagel leh kajah jong achan, chuleh, Nenei chunga kalung gel jouse aum jeh chun, kanom pon ahi, Kanun, nang na noplou leh keihon gapui nauvinge ahin tin, angaipoi jachat sah a ka gah ti leh, Che najachat sanga kholai mi hon houlim na a aneiyu khu ahi e kei ka jachat, ahin tileh ka Pan, apha e leh aman ol leh gakipui tante koi hetlou la hitalou ahin tileh, thu mu kisa deuvin, Hijeng titoh lupna room langa lut katho tai.
Nom leng daleng jinei chu kamasang ahitan, gel khat’a kagel leh Lalam jong kalungset kit thouvin hijong leh Nenei ka deijo kit in, iti kijol kit jong lela nom talou ding kajah lou ding jouse kajah be di la kihe kit, Nenei kangai na chu akhoh cheh cheh jeng tan, ka gel jongleh ka thajung ham ka ipi ham khat hi a kham jenjun jengin ahi 🤣
Lalam suh lhaset behseh ding chula ka nom kit pon, Nenei miljou lou sa sa chun, ga pui jengding chun ka hung kigel lha tan ahi,
Ajing nilhah in Lalam te inlang chu kajon tai, ka galut leh koima jong eihou umlou, Lalam chu khip bih beh in ana kitung in, pot kit jeng di chula hithei jep lou ka dangchah lou hel pichu tui khon len khat kadon chaiyin, ipi ham khat vangchu ana seiyu hitei din ka mongmo in, hitia thip behbuh a um soh kei sangin katin, ka jachat sa sa chun, Henu tuni hiilang na phah ham, natoh na khop lheh khat uha na ngui chit chet uvin, kagah ti leh a Nun, Louva kaga cheu ahe, nangla hoilang naphah hamo? eihin ti vanglah in themkhat anom dom e, Keijong louvah kache e katin tapphou lang chu kanai touvin ka toutai, Lamboi nangla che a chu nilhum a natou hiveh ta na tia kagah daileh, ahung me chup in anaute ahung nui sao sauvu leh Kanuija hih e, Henge che a hi katou tou jeng ahe, ahin tin, chechun kahung paodoh sao sao uvin thu chom choma chomkhat a nu le pa toh kahou lim uleh 9:00pm lang ahiphat in Anun anaote jah ah, Cheuvo lum taute ati leh thumang tah in room lang’ah akijot lut sao sao uvin apao vin jong a jui lut nul nul in ahi.
Keinibou kahi lhon phat chun chomkhat a-eng eng’in kaki dai lhonin….. Ahileh Lamboi thu kajah hi atah ahi leh ipi dia keikom a nasei lou ham, min he mong mong leh nati ha? kati leh, aman na umchan kadeilou jeh a mikoma kaseidoh hichula, nang koma seileng ima a nagel lou ding ahin, na cho nah chu, ahin tin chuti chu ahileh neijui jenga phalou ham na? Ka ti leh nom bihbeh talou, ipi jeh a nanop lou hamo, jachat hoi sana che ahi na um um leh, minjong iti eigel tadem, mijousen la hesoh ta kati jong leh, nom mong mong lou, ka lunggel ahung kikal lah lah jeng tai, ipi ahin bol got ahi dem, ajeh khat vang chu umtei di ahi tichu kahin gel tan, Aleh apha e nanop lou leh I Nu I Pa te leh Tu leh Be ho kihou tauvin tena, kati leh, ipi ham lung nop lou na khat nei hileh kilom tah in, Eini kihou naite ol jep leh ati phat in keijong ka hung kile tai.
Ajingin a loiho lah a Chichin kiti khat kei dinga ka pute chanu khat kom’ah ka che in,
Kei: Chinboi, Lalam khun ipi lung agel ham kivop pi inlang guh thim chan ana he go teiyo, janni lhah a chu pui kagot leh nom lou ahin ipi jeh ham, kati leh,
Chinboi: Anui tet tut’in, Kasei doh tade o ahin tin,
Kei: Ipi ham seiyo Boi kati leh, ama chu milung theng tah ngol thit thet khat ahin,
Chinboi: Heu Lien, koima kom a naseidoh lou di o, Nang nahin ngai val jeh ahi, Nenei toh na umchan lhon chu na asa valin seidingdan jong helouva aum phat’a na kikhen thei nadiuva a bol ahi, na lung jong selou ham, min hibanga hin ngaiya, Nauvop ahipoi, lungthim bol ahin, tua ahin jui nom lou jongchu eihe doh khante ati jeh ahi, hiti hin jong aseiye He U, ka ki damlou sah ding, ka nao ase ahi kati ding ahi, jong ati e, ahin ti chu,…. ……
Kalung han toh ka jachat toh, seidi jong kahepoi, Tulai banga mobile phone ana um hileh apet pet’a Nenei gah hil jeng chu ka nomin, ahinla ahet na dinga chu akoma ga che ngai, ana tahsan kit lou ding, Gel khat’a kagel kit leh Chichin seibanga Lalam jong Lungset jong um ngapsah kit, heiha, 🙄achalak vang asang thouve,
Ama koma che in ga phul leng la Chichin bolchah kit ding chuleh, kei mo a ahinsei doh kit thou thou ding, ama chalak asan leh ken jong bol thei dan khat kahet angaiye, ti chu ka lunggel ahitai…..
To be cont……..
Lunglut tah a simchai jouse chunga kakipah lhone, aban hi ol’in anasim kit taute🙏
