Home Chaga Thusim GENTHEI SANGGA KAHINKHO

GENTHEI SANGGA KAHINKHO

435
0

By-Dolly Kim

Chandel district, 1994 september, naga/kuki gal hin ka khosungva pasal jouse ana kithat in hiva chun ka pa ngaitah chu ana jao tan ahi. Kei kum khat bep kahi jih in ka pa mel jong kana mu man pon,ucha mi Li kahiu vin inn le lou khosung mei a aki hal phat in kanu in eina galjam pi vin ahi.

Lamka bijang a kahung cheng vin ka nu jng nupi te lamkai a apang in kei ho jng sunday school hoa jng k na kai pontho vin pachan na jng kumlhun le prize kana kilah jin ahi. School ei kaisah vin kanu in hinlah genthei te aki jih chun fee peh lou jih in ei kinung nodoh jing jing un ahi , Chujou in thadoule paite kah a kihet themlouna ahunv um kit in hiva chun sugnu tribal venga a kana kichon kitvin. Kum khat jou in lamka Bijang mama kahung lhung kit vin ahi. Kum ahung chal to lhonin mihem lunggel kikhel to lhon in vangset um tah in kanu in ei hin dalha vin keiho chu ka palen te kho sugnu langa ka um tavin ahi.

Kana chaga lheh vin hinlah thinglhang natoh hi kana bol thei povin ka na kikoi jivin kana kap jiuvin genthei kana kisalheh vin ahi. Kum ahungchal in ka unu chu nagaland langa asol doh uvin ka upa jong ka paneo te kom a aum in ka nao jng ka nu unu kom a aum tan kei hi kapalen te inn a chun ka um dan in, cha tamnei te ahi jih vin achate abon cha kahin poh kahin don jing ahi. Chuleh thinglhang a kivah napen cu hol lhut ahin. Chapang cha kahi vangin ama ho lunghol le eipho ding kichat na inn hol bag khat lal sasan kahin po jin thinglhang toh inn kigamla ahijih in kichat man in jo lou sasan kapo jin ahi.

Ama ho thinglhang apot teng ule inn a kaum in naodon toh an hon tuikhai thingpoh toh honlhou kakop jin ahi. Hiche va jong chun oimo nale houset na ka chang jing nalai in, Kapalen te jong neilou te ahi jih vin school kana kai pon. Hol ka lhut lou leh an me hol a thinglhanga ka che jivin, nilha teng khosung khokom te kom a kaga joh jin ahi. Khosung miten ei lngset ji lheh vangin ema asei ngam ji povin, kah lah a ka loi ka pai hon ei kithopi ji teng u jong le ei ki house bep jin ahi. Tulai toh te din masang lai a chaga te kimusit na asang dan chu mihem jingcha ajong ana kigel lou ahi. Chapang cha ka nahi vangin insung natoh lou natoh ho kana bol thei soh in. Neilou te hijih in kah le an neh ding umlou teng gilkel pum in lupna ka jon jiuvin ahi. Kana genthei lheh vangin ema kana sei ngampon katahsa damlou teng jongle kan im mang jin, jan emutmo hi kana bol jin pung 2/3 langle bou kana emulha panbep jin ahi.

Chapang kum som jong lhinglou kihi vang in gentheina sang val jih in lunggel jatjat kanei jin ka tahsa ka lunggel akichol kha moong mong pon ahi. Ka palen chanu tahpen jong chu kei dingin ana pha pon eina musit lheh in natoh di jouse kei ei nagnse jin ka complain lou ding ahet jih in kholai lah a ajong kei minset na di ngan ana sei jin ahi. Kaneo apat in mito kinah jong kahin bol pon kichat kiphatlam var jih in mitoh kinah kinel tiho jong kana bol ngam jipon ahi. Ka chennao kho chu kapu te kho ahijih in kanu hi kahlah le kum khat a khatvei ham ahungjin ahung di kahet teng kakipa jidan chu kanu kom a von kadei ho kasei di tin jan emu mo hel in thanom tah in ka um jin. Jingkho ahung vah in kholai moh vadoh thei kahi lou jih in naosen kapodoh/tuikhai a ka kilep loule kei din kanu toh kimuto na ahah sa jin ahi.

Kanu toh kakimuto ahin von ei hin pohpeh in kei jong kipah tah in inn a ka kichoi in ahile eina phoh honin kanulen le kapalen chun, nanun bon nalungset lou na dalha’a ebol a naga kimupi ham. Tukal inn nakhal thei lou ding nakimu to thei lou ding ahi, tin ei phoh hontan ahi. Kanu ei hingnu toh kimuto a epi setna lomlom soh di ham tia ei kigal jing hi tin kana lhisoh in ema la kasei ngam jipon lhiso bou chu kanabol thei bep jin ahi. Ni khat honsung lhou din ei nganse hon in, hon chula alet a len ahin kei jong sun le naodon to kop a hichu ka lhou/kakal jin ahileh ka paneo chapa ahung in ei house in, pi dinga kamchang khat jong seijilou nahim. Hiche hi najo mong mong di hinam, min nabol bol in na um in naki le thoh ngei poi. Chujeh a achate ti henulen le hepalen tin nanoise u ahi atin, hon chu ei kithopin ahileh Nilhah lang ahin sun a hon lhou dia nang ka nganse pibol a mi nakithopi sah ham tin ei house kit lhonin ahi.

Thoh hat galjona ahi kiti bang in kanathoh jing hamlou pao lou a kana thoh ka napan jih in phat le kum jong ahung chal in kanulen jong, kei din ahung pha tan achanu sanga ei man thei joh ahi phat in kalung ahin hol pan tan songkhol khat ei choh peh in chuin nanu ahung teng kimu pi inlang nadei nangai kisei jin. Kenla ema ka choh peh joupon ei tin, Kei jong ka lungthim akipah lheh jing in ahi. Kana genthei hahsat var jih chun ka paneo in saikul langa napaneo te inna ga um tan cheva hin um sotsot lechun na hin lou di ahi atin. Ka palen kom a chun asei in ahile kapalen chu anom pon ama ni akinah lo honin ahi. Chujou in kapaneo chun ucha kah a gal aso doh sangin kei ho imphal lam a kichou ding kahi tauve, eham tia buina naneina nahahsat behseh le nei hin hetsah in tin ahcha nou khat ei pin che hi napa keiman kapeh thei sun ahi nana kivah ding alet teng nakijoh a nadei tah von naana kichoh di ahi.

Hichun kapaneo te jong imphal lam a acheng tavin ei peh ahcha jong pilhing loulai in ei johdoh peh kit hon tan ahi. Kum 4/5 hitan ka u nu la adam ham athi ham kihe lou In ucha chubang kingailu te chu umna hetlou limle mel kimuto louin kana kikhen thang gam tavin ahi. Chujou in kanu in gamdank a children home a um din ei hin gonpeh in sumle pai apodoh in kapute ahung ha sei phatvin anah nah in kapalen in eisol in ka chi ding chun kanu len amitlhi asoh in damsel in chen ei tin ei vailhah in ahi. Kum khat gampam a home a ka um in chujou in kahung potdoh in kapalen te inn lam jon talou in ka unu in ei hung pui doh in neolai a ka na kikhenpisa ka unu toh kakimuto tan chujou in kapate kom a ka unu chu aga chen “kaneo va nei hin vetkol jih vin kakipah e kei jong ka pilhing tan kaneo te ken kivet tange, agenthei nao kave jou poi kei toh umkhom ta vinge” atin ahile.

Kapate chu alunghang un thina man na nanei ujongle kadon lou diu nahi tin touna ahin sekhum un ka unu jong mitlhi longpum in ahungkile in ahi. 2008 achun ka upa jong golhang ahi phat in ahung jam doh in khensa insung/ucha ho chu pathen lungset in insung khat a ka hung khom tavin ahin. Kanu in eina dalhah jing vangun school ei kaisah un ei ve kol jing un ahi. Kanu in edinga eina dalhah u ham tia kana lhaset jing vang in khonunga kei ho ding gel na a athilbol ho joh anahi jih in kanu chunga jong kakipah in alungtup bang bolpeh jou hih jongleng tin mipi japi hetna kakipana ka phondoh in jaila in ka vahchoi in ahi. Chaga genthei te taona lolhinsah pathen ahi, khensa kehsa sempha kit jong ama ahi tin pathen kom a kipa thu kasei jing in ahi.

Agomlam achom lama kahin jih ahin jihkhel seikhel aum le nei ngaidam un.

KAKIPAH E!

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleFREEDOM FIGHTER KITI HI IPI TINA HAM?
Next articleKALAICHA GEIYIN KAHIN LHANGAI JING’E BOI