Home Lahkhom Naocy Haokip FOOTBALLER KAHUNG HI TENG-II

FOOTBALLER KAHUNG HI TENG-II

80
0
FOOTBALLER KAHUNG HI TENG
FOOTBALLER KAHUNG HI TENG

(Tupna le thohhatna galjo)

(Short moral story)

Written By:- Naocy Haokip

Gal muna sepai kikaptoji ho jong anungchon le gal ajou ngaipon, amano cheh cheh tengle bou gal ajo hilou ham? Tin kei le kei kakihouvin chujouvin ka meiti twi kachap khumin kavon ho kahetup’in ka-unu natohnan kachetan ahi.

Phat le ni ache jingin college kai phat ahikit tan, niseh-in college kachejin nilhah seh le ball kakichem jingin ahi.
Midang bangjn kithem gun hih jongle mihet khat kahung hitan ahi.

Nilhah khat hi KSO lamkai phabep le MLA mikhat ka in’uva ahung vah lut jeng tauvin, jachat kiphatlam umtah pumin kagalemin, ka-unu mecho dinga achedoh kah ahijeh chun ka-unu umlou pet’a mi hung chu vailhunje, lemje kahepon touna kapen kamoh um jengin ahi.

Ka-unu ahung lhun phat’in amatoh akihoulim’uvin cha adonsah-in, ka-unu vang imalam jousea perfect atiu chu ahijenge, tulai numei jouse ka-unu tobang hisoh kei theile vannoi hi chamleng dominte, tipou kalungin kanasei jin ahi.

MLA pan hitin aseiye.
Bethsy Nanao Boilen hi tudinmuna football thempena lhendoh ahitan, eiho manipur state min’a lhakit le Pune a kichema che ding ahitai, hichea avat jouse keiman kapohdoh peh ding ahi, Tahchapa khat state min’a akalson ding hi kithang-at um mama ahi, CM pan jong ahin kou tei ding, akoulou jongle apanpi tei ding ahi, najahda daji thuho jong mi jousen ahen hijeh a chu tunia hi keimatah-in kahung kimupi nahi, atitan ahi.

Insunga konin ka-ngaiyin kakipa thanop dan chu seije kahepoi, adang jouse sangin kalunga kagelpen chu.
FOOTBALLER KAHUNG HI TENG,” ka-unu hi agentheina ho kakilesah tei ding, nomtah a kaumsah ding ahi, hichebou chu ka-ngahlel penin ahi.

Ka-unu Bethsy in ahung ho koma chun
Lamkai jaumtah ho, neihung hetsah-u hi thupha le kipa umtah ahinai, hinla kaseinom chu ka-insung hi namu nauve, sana dangka jong kaneipoi, Ulenao sopi khel jong kaneipoi, kanao Ngamboilen tailou keidia kinepna le hinkho manpi d adang imacha umlou ahi, football akichel’a kisuhkhahna, dammona anei leh keibou agim ding kinepna bei kahi ding jeh-in hinsol da jeng tange, football hi achep’in kichepda le kati ahi.
Hichan asei chun kamit asandoh jengin, numei lunglhom le lungneo….

Ehh! Ka-unu Bethsy hi lunglhom le lungneo ahipoi, eilungset val jeh joh ahibouve, ipi sei jongle kache thou thou ding, kalungtup kamolso ding, Pathen nangin jong neilolhin sah ding kakinemin, ka-unun eiphalna din alunggel hinkhelpeh-o, tin kalungthimin kei le kei kaboilha jenge.

KSO lamkai hon jong houlimna amangun, jochana eikithopi diu le eipanpi diu, natlesatnaa jong amahon eivet diu ahidan aseiyun chule team manager pa tailouva coaching ho changeiya KSO lamkai hon eiboipi diu ahidan aseiyun, chutia ka-unu apumno jeng phat’un aman jong kei eihin kouvin hitin eihin donge.

Ka-unu: Boilen ahile tua nakounao Pune a state min’a kichem dinga hi nache ding ham?
Kei: He-u ahahsa laisea kihinpal galkaiya tua mipi le lamkai ho deilhen kahung hi phat’a iti kacheda ding ham? Henge! Iti iti jongle che ding kahi.

Ka-unu: Aphai, chutia che ding thou thou nahileh tuban ima sei taponge! Boilen pasal nahin nalungtup hin molso maitan, ahin tunia napanpi dinga hung nalamkai ho le mipi dei banga hinkho naman ding, nang jal’a igamsungu minphatna lentah nahin boldoh ding ahi, coaching hoitah-in lan lang, nadei nangai aumjongle hinseiji tan.

Lamkaiho, tunia kakoma nakitepnau bangin kagou lah a ka it pen sana dangka sim joulou sanga man tamjoa kanei kanao Ngamboilen hi phaten hin vetup tauvin, Pathenin nalolhinsah maiyuhen, atin kihou khomna jong akichaiyin ahung ho jong akile tauvin ahi.

Ka-unun kakichep ding eiphalpeh phat’in katha anom chomin, jingkah matah le PT kalhaijin, coaching phat chu ka-ngahlel lheh jenge.

Guwahati a coaching kalah ding jeh chun aphat ahiphat’in ka-unu Bethsy in maicham eisempeh-in kaumchan ding, kahoulim ding dan le loilah a kalhat ding dan ima jouse eihilin, chule janseh le pungkah khat ahiloule pungkeh beh Bible kasim jing din eihil’in, english Bible neocha khat eikipoh sah-in ahi.

Hiti chun lha khat val coaching kalah jouvin Guwahati a konin lamkai cheng toh players dang dang ho toh Pune kajon tauve, mipi tamdan dan chu umna mun kahai leujin ahi, chule ground jong chu athupi valin ka first day nichun ka nervous thimin ahi,,,,, hehe

Pathen panpina jalin keiho chu ginchat loupin kahung hat jeng tauvin ahile ka leaders hou chu anuimo hel jong aumda pouve, keivang ka-unu toh kimukal bou kapum ngalelin kahat thu ka-unun ajah tei ding ahin, kimutoa seikal ka-ngahlel lheh jenge.

Eimi Tahchaoa kei bou kahin kaloiho chu kol le vai ngen ahiuvin, manipur a kona eilhonpi KSO lamkai mini tailou eimi adang kahet umlou ahi, atamjo chu english ngena kihoulim jeng ahin ka-unun lekha einasim sah ga chu kahin nepan tan, kakiheisuh kakihei tou chanin ka-unu bou kagel gel jeng tan ahi.

Lolhing tahle kipana dimset pumin inlang kahinjon tan, sum jong players jouse eihoppeh sohkeiyuvin manipur akon eilhonpi KSO lamkai mini toh manipur kahinjon tauvin ahi.

Imphal Airport a CM le MLA hon jong eina lam touvin, ka-unu hung jeng dem o? Tia kavet lele vangin kamudoh poi, state min’a kikalsong ahijeh chun eina vailhun le eikipapi mipi adimset’in, kajotpanau kho tinin mipi chu akigol dimset uvin ahi.

KSO lamkai ho, chule kiloikhomna chom choma kon lamkai tampin an eineh khom piuvin, hinla ka-unu mel kamulou jeh chun eikipapi lou ahidem katin kalha aseleu tan ahi.

Chuin ka-in langa eihung thah tauvin in leitol hoa jong mi adimset’in, khosung mi jouse aumin insung kalut le ka-unu mel mukal hibang ki-ngalel a anaum kit poi,

He-u, He-u, tia kakou le nupi khat’in.
Boilen kei napi kahi, nanu sopipa jinu kahin na-U Bethsy chu hapta masa langa konin adampon district hospital a aume, hung damloi tante, lungmong sel’in kicholdon, eitin imajong seilouvin eihungthah kaloiho komin hospital a cheute, ka-unu ka-ngai vale, katin hospital kadel tauvin ahi.

Hospital kagalhun leu ka-unu ngaitah chu ICU ward a khohe louvin analumin, kamu chun kalaina valin naosen ka in kakap tan ahi, doctor pa komin ipi tia khutia um ham? Tia kadohle alu a typhoid chukha ahin lungkham hih-in jochana pan ilahdiu ahi, atin ka-unu damlouva ipi dinga neiseipeh louvu ham? Tia akatoh kisen kakop leh ka-u Bethsy anaumpi nungah melhoitah khat’in eihung lhemin,
He-u Boilen kap hih-in, nidang sanga normal ahung hitai, houpi thei hivah tante, adamlou kipat masanga kahung lhun ahitan adammo kipat chun phone a hinsei ding katile anom mong mongpon hijeh a chu kahin hetsah lou ahi, atin

Kenjong: Nang koi nahi ham?
Ama: Kei kamin Hoinu ahin Delhi a kaumin nurse natong jing lai kahi.
Kei: Ka-u Bethsy toh iti nakihet’uham?
Hoinu: Uboilen eiho ikihet to lou vangun nanu leh kapa hi sopi ahilhone, kani beiya jong kapa le kanu in phat sotpi nana umpiu ahi, kei ka-u pasal khat aumin amajong Delhi a tohmun nei ahi, tun ajinei tai.
Kei: Ohh! Hoinu ahile kapute chanu nahi bou hila na?
Hoinu: Ummm kahiye Uboilen, insung khat ihiuve.
Kei: Hoinu kakipah-e! Khankho neite nahiuvin kanu thi nunga jong natuteo nahin geldoh jing jeh-un kakipah val’e, nei ngailutnau lethuhna ding kanei poi, hijongle Pathenin navangboh maiyu hen.

Hiti chun Hoinu toh ka-unu kaumpi lhonin kei chu in le hospital kikah alhaile (up/down) kahi jengin, Pathen lungset’in ka-unu jong ICU a konin kaladoh tauvin ahi.

Alung ahung lima houpi thei ahi phat’in kenjong ol olin kalhamon jin, Hoinun jong jochanin eiboipi jing lhonin ahile ka-unu jong adam tobang ahung hi phat’in inlang kahinjon tauvin ahi.

In kalhunin kapu le kapin damna maicham eisempeh lhonin ahi.

Ka-unun Boilen nahung lolhin hinam? Nang kagel le ka-ngai val jeh a kaka ka le phot louva kadammo lo ahi.
Kei: He-u kahung lolhing mama jenge, tua hi National players kahi ding ahitai, ibol’a kipah a jong neina vailhun lou ham he-u, kenla mi ijat’in eina vailhun vangin nang nei vailhun ding bou kana ngahlelin, tia mitlhi kakitheh leh ka-unun eikol’in ngaidam athumin ahi.

Kapute jong lha khat lhingset eiumpiuvin kile dingin aum tauvin ahile kalunghel lheh jenge, chule ka-unu jong atha lhasam nalai ahijeh-in Hoinu chu chomkhat umdia kakithum leh eiphalpeh lhonin kapi le kapu akiletan Hoinu vang aumdenin ahi.

Hoinu umjeh chun toh le tham akilel chetjin, niseh a ka inu chu mi hung jing ahijeh chun Hoinu umlou hile kaboi lheh lhon ding ahi, ka-unu le Hoinu jong golcha bangin ki-ngailu tah-in akivopji lhonin Hoinu chu chapang cha hijongle ka-unu loi ahijeh-in jana sangtah kaneiyin ka-ngam sung beh pon ahi.

Ka-unu jong ahung damtheng tan, nikhat natong dingin akigo kit’in, kei kanom tapoi, hijeh chun hitin kaseiye.
Kei: He-u, footballer kahung hiteng na gentheina ho kilesah nange kanati hilou ham? Tun footballer minthang tah kahitan natong tahih-in, ven phaiya inmun in pumin kachon, phailei jong lentah kachodoh tan, nomtah a ium ding ahitai.

Ka-unu: Boilen pasal nahin nalungtup namolso hi kakipah-e! Boi ahinla hichelai in mun hi henu le hepa kivuina mun ahin, chule eini khanletna ahi, hijeh chun khosung jong hi eini jal’a mihet ahung hinadin mundanga kichon louvin hilai joh hi jemhoi hite.

Kei: Ahile he-u, phai sunga inkhu ipi iloding hitam?
Ka-unu: Hilai khosunga ahahsa dom insaan kilah joulou lekhasim ho umji nante Boilen, jochana Pathen na itoh ding ahi, ati.

Hiche phat chun ima seibe louvin ka-unu sei bang bangin kaum lhonin ahi, sum hunglut kham kham kakhol khol lhonin ka inmun chu kasempha pha in in nomtah-in kasadoh-in, Pathen thilpeh football talent hoitah kanei chun inchen kasemdoh theitan ahi.

Alang khat’a footballer minthang kahung hijou kumni vel jouvin ka-unu chu khosunga pastor Helun toh kicheng ding ahidan thu kahinja tan, ka-u invang eiseipeh khapoi.

Nikhat kadoh tah tahle akicheng ding hilouvin akilungset kahi lhone, ama nulepa ten eihung ven tin alunglhai nahleu hepalen te hung diu chutengle bou thu kihe chen bep’inte, Boilen nang jong jinei thei nahitan, ken umpi pi jongleng keijong jinei thou thou ding kahin midang dang sanga pastor Helun toh kakichen ding chu pha kanasah ahitai.

Ahao avai thu hilouvin tahsa le lhagaova eipui hoithei dia kagel ahi, sen chaga ihijeh-in Pathen thua eipui thei ikivet angaiye.

Boilen nangin koi nadei pen ham? Nadei khat seiyo
Kei: He-u nang thu nel ding kanop lou jeh a tuchana hi dongma kanei khah loulai ahe, nungah hon jong eikijol thujiu ahe, ahivangin kanom jipoi, mit’a gahvet dinga hoi kasah khat um hichu o.

Khosunga Kimpi atiu Haosapu naopa chanu khu kahoisah-e, gah kiti chu ka-unu chun eihin vesal jap’in.

Ka-unu: Boilen koi hoisah-in lang, dei jongle chun genthei chaga ihilaiyin koiman amitsih a vetkham jong einasa lhonpoi, Kimpi teho lekhathem mihaocha, minomsa ahiuvin eini sen chaga ihibouve, numei dang seidatan.

Veteh, Hoinu hi nang dia kakoipeh nahitai.

Kei: He-u, Hoinu in kei eidei ding hina o? Ama nurse hija amelhoitoh kei eidei ponte.
Ka-unu: Ahile Boilen chen lang Hoinu komin Hoinu nei dei hinam? Gati temo, tin eihin daiyin kajachat toh Hoinu chu kanadei sa ahin hinla ka-unu toh golkhat banga akivopji lhon jeh chun jana neitah a kana koiya ji dia jong kanagel lou ahi.

Hiti chun genthei tincheng thoh pumin hinkho kahin mang lhonin ka-unu Bethsy chihna le nunnem jalin keijong mi eihinso tan, amajong nungah phatah a mi jouse het ahijeh-in, ahindei, ahin hel gollhang dimset jongle pastor Helun toh hinkhoa chengkhom dingin ajontan ahi.

Kapi le kapu in keijong lungset le khoto themtah-in achanu changkhat Hoinu eipe lhonin insung chu amangthah dingkon ahung kile kit’in insung lhingset kahung hidoh kit tauvin ahi.

Footballer kahi masangin lungneona le lhasetna tampi anathohji jongleng kalungtup lentah aumjeh chun thohhat tah-in kahin thoh-in tunvang FOOTBALLER KAHUNG HIDOH TAI.
(Tupna le thohhatna chun gal eijosah tan ahi)

THE END

NOTE:
Ngeitah-in kijih doh jou hih jongle lunglut tah a einasim chaipeh jouse chungin kakipah-e! Asim jousen tupna kicheh tah imudoh theina diu le thohhatna galjo chu ipi ham? ihetdoh theina diuvin Pathenin phatthei boh hen.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleMIHEM AJINEI A LUNGLHAI SEL A HAPPILY MARRIED KITIHI ATAMPON AHI
Next articleSANGGA HINKHO-I

LEAVE A REPLY

Please enter your comment!
Please enter your name here