By Shonkhogin (Hegin) Haokip Maranatha Cottage Hebron Veng Phaipijang Langol Imphal
# 9774096152
Nangman honsunga thingga jouse nanop nopa naneh thei cheh ahin, amavang sele pha hetna thingga khu naneh lou helding ahi, ijeh in em itileh hiche thingga khu naneh ni nileh nathi tei tei ding ahi, ati. Genesis.2: 17-18.
Pathen thupeh thengsel chu ahileh, hon sunga um theiga jouse neh thei soh kei ahin, amavang sele pha hetna thingga khu naneh louhel ding ahi; ijeh in em itileh hiche khu naneh nini leh nathi teitei ding ahi ati. Ahinla Pathenin naneh ni ni nathi tei tei ding ahi atipeh chu, satan in ne jongle chun nathi louhel ding ahi. Koi thi tahsanga namit lhon hunghah doh in tin,Pathen toh nabah lhonding ahi ati. Gulin numei nu jah a asei chu numei nun atahsanin, theiga chu akilon anetan ahi, chuin aman ajipa jong apen, amanjong anetai. Hiche a Pathen thupeh apalkeh jeh lhona hi ama nihi athilhon ngai ahitai. Athilhon louva ahileh Pathen kitahna chu umlouding ahitai. Amani athilouleh akhella koiham khat chu thiteitei ding ahi. Hiche jeh a chu, Pathenin amani thiding chu ageltheitapon, amani thisangin keima thitang kate, atiphatna thu chu kichai ahibouve.
Hitabang chun,tunin jong Pathen leh asemsa thilho akinel jingin, ihet jing diu khat chu ahileh thilsem le asempa kinel na aumpoupouleh asem pa thu ngaiteitei ding ahi. Nasempa Pathenin nang dinga aseihi adih ahijeng in, nasempan bolhihin atikhat chu, athilsem khat’in bolin imacha tiponte atiteng asempa thu ingaiyetyet diu ahi. Tunin jong Pathen in nangma hi nagahchah kheh dan in kingai to dan, Aman aseijin, nabol nom nom bolin, nache na nom nom ah chen, navet nom nom vejengin, amavang nikhatleh nathilbol ho chengse chung thu hung kikhol ding ahi ti kihet them in, hiche ni chuleh nathil bol dungjuija na chung thu hung kitan ding ahi. Chutia nachung thu hung kikhol ding ahileh tunia nangma iti nachon dingdol ham itileh ? nasempa thupeh dungjuija nachon angai ye, achutilouleh themmo nachan ding ahi.
Sopiteho, tunin jong satan in malai pile pu Adam le Eve alhep bang bangin nangle kei jong eilhem lhem jenguve. Pathen in adeilou thil tamtah hi satan in ima tiponte atin ahileh mi tamtah hin chonset tamtah hi chonset dan in agel tapouve. Pathen thun adeilou thil tamtah hi satan in nejongle chun thiponate, vejongle chun thiponate, boljongle chun thiponate, thitah sanga chihna a naneiloding ahi ati phatleh mitamtah aki jol lhah jitai.
Pathen thun adeilou, aphallou thil tamtah hi asemsa mihemten iki phal nop seluvin, inop tah uva hinkho iman pum pum uvin vangam kalut ding ahi ikiti nopsel nalai juve. Ahinla sopi, Pathen in nangma hi ase apha hetkhenna napehsa ahi tai, hiche ho chu nang man jong nahet ding ka tahsanin, hiche lungthim sungnung pena kona hichehi apha ahi, hichehi ase ahi kitichu suhthip’a nanop nop boldin gotdan, nikhat teng nahung khah doh ding amavang gei sang behseh ding ahitai. Pathen thun asei bang banga hi hahsa henlang nom jongleh jotei ding got hi mihem te kin ahi. Ingaplal man a aphanai aphapoi ti ding hilouvin, pathen thu toh kitoh lou chu adih lou ahijengin, Pathen thutoh kitoh chu adih ahijenge. Pathenhi akitah Pathen ahijeh in aman athengle atheng lou, aphale ase kitihi compromise abolthei himhimpoi. Atheng chu atheng ahin, aboh chu aboh ahijenge. Pathenin asimho jouse ase apha hekhen theina petahen.
