Home Thangboi Haokip Dongma-nei nahileh

Dongma-nei nahileh

118
0

KHANGDONG LAMHIL

Narrator – Thangboi Haokip
June 2021

Arrange by : Ngul Kipgen

Mihem hinkhoa khangdon-lai “Sanakhang Mantam” kiti hi mijousen ahet vangin atamjon akimang-khel thou thou jin ahi! Vai-khonunga ikisih-ji vang’un akichaisa, aphachom-ji tapon, khangdong tampi hinkho alamvai thou thou-jin ahi.

Ipidia ki-kisihji ham? Koiho khu kisih-jiu ham? Khonunga kisihlou nadia khangdon lai hinkhonom itiman ding ham chomcha anasim ute.

Masanglai eimi Pop Singer Pu, Tilthang (Lover Voice) Anasapa chun ala khat’ah hitin anaseiye. “Chate kilungsetna chung’ah Nute pandau hen, iya Careoff bon hingal lou” anatin ahi. Amahin kholaiya nuteho anatheida jeh a anaseijong hinte. Ajeh chu nungah gollhang kingaiho chu nute hon kihoulim nopna-a ananei-ji dan u ahi.

Amavang ikiphatlam uva ijachatji vanguvin adihtah a chu kilungsetpi dongma ihin-nei teng’u leh eima nulepa vang phatah a hetsah teitei joh ngaiyah ahi. Ajeh chu Pathen bantah a igolpha pen leh lampi phaa eipui ding chu i-loi ipai ho ahipon, inu leh ipa bou ahiye.

Khangdong ho hinkho manding thu hi akisei teng leh nule pate jong minphah tei angaiyin ahi. Ajeh chu mihem kiti hi koima acham’a um ahiloule thingko songko’a pat hungpeng doh kiumlou ahi.

Pathenin inu ipateu anasem’a amahoa konna eiho hung’um ihiuvin; I-hung kondoh nau donlouva eima cham chama hinkho ihinman-ji teng uleh khonunga lolhinna sanga losapna, lhilonna leh kisihna tamjoji ahi.

Nungah gollhan laiya nulepa thu ngai jeh a kisih a hinkho setlo vang tuni chan’in kahekha pon, nuthu pathu ngailou jeh a khonunga kisih a ahinkho setlo vang tampi kahen ahi.

Pathenin chate chunga nule pate hi ngailutna neitah-a tahsa le lhagaova vekol dingle khoukhah dia mopohna apeh ahi. “Nulepa-te dia Chate hi goulupen ahi” tin bible in jong aseiye. Hijeh a chu nu le paten chate man-na ding him him gel ngailou, seingailou ahiuve. Hisanga chu i-tileh micha sangin keicha achingjon, athemjon, ahoijon ahatjo dem? tia inu ipateu kitetjou ahibouve.

Khangdongte dia lolhinna le pachanna, phattheina ho jouse hi Pathenin inu ipateu koma eikoipeh sau ahitai. Nu le pa lungto kiti hi Pathen lunglhaina le phatthei channa ahiye.

Tunia khangthah ten ahet teitei diu khat chu.. Ijat’in hetna neijongle chun khangdong hinkho anamang khalou lai nahi jeh-in khonunga nakisih louna din; Sele pha hesa, khangdong hinkho anamangsa “Nanu napa thu ngaiyin, hichu thutep le thupeh jong ahi,” tin bible’in aseiye.

Nungah gollhanlai hinkho’a kilungsetpi ahilou le dongma kiti hi aneilou ki-um behseh lou ding ahi. Lungset kiti i-hin hetdohna (I-first love) nu/pa chu akingaiji dan dan chu agamlang u ham, ahiloule a uicha agancha hou jeng jong akimu le kimoh lungset jengji, thi ding hin ding jong gellou leuva hinkho anakimangji ahi.

Hijeh chun “Dongma-nei nahileh” phate chan anasimin..

Miching mithem hon love/ Lungset kiti hi alou medicine umlou, kichat umpen natna ahe, anatiuvin ahi. Adih monge, lungset kiti hin mihem hinkho tampi analah ahitai.

Hijeh chun kilungsetpi/ dongma neihon kichen masanga nabol loubeh diu thil ni (2) aum’e.

  1. Nupa hinkho man masat.
  2. Kitepna/Kihahselna bol.

Idongma khat phatah a hin ngai, hin lungset kiti hi angol akibang jengjin thile hinjong akigel phaji pon; inu ipa sangin jong akingaijo jin ahi. I-ngaival ji jeh chun leisetna amabanga i-ngai ding le ilungset ding umtalou, amatoh kicheng teitei ding danin aki-kigel jin; Itahsa jeng jong ana ki-itji tapon, nupa hinkho ana kimang masajin, bollou beh ding tijat umtah kitepna/kihahselna ajat-jat jong anakibol doh jin ahi.

Tekahnan “nangtoh i-kichen louleh kadam sungin chale nao neilouvin um inge” tihovel anakibolkha jie. Hinlah, adongma, a first love toh kicheng hi som lah’a khat jong hiponte. Akingai, akilungset jouse kicheng teitei ding tina umdehlou ahi.

  1. Sex before marriage :
    Kichen masanga nupa hinkho man kiti hi phamo cheh jongle pasal sanga numei dinga phamo chung nung ahi.

Hiche topic hi ahi khangdong phalai tampi ana vallhum’a manmo lah lou anasoji chu. Hijeh chun nungah hon anangaiyun: Nalungset pan nalhep lhah a, nangin natahsa napeh khah tah a ahile nao nahin vop teiding ahitai. Nao nahin-vop teng!

(a) Molphou masanga nangdia option masapen chu, agangthei pena kichen ding ti hung hinte. Hinlah, nalungset pan nopsahna mai maiya nalungset anahi khah le vang kichen ding hung nompontin, nao suhlhah (abortion) bol’in, ahin tiding ahitai.

Abortion nabol le tolthat nahi ding, tolthat kiti chu bible’in, vangam lut louhel ding, ati ahi. Abortion nabol lou leh nungah laitah a naovop vannoi hetna namolphou kitding ahitai. Chuteng kisih a nalunggel vanle lei kikah’ah hung leng intin, najinei jouteng damsunga najitoh nupa hinkho noptah a mang ding pichu nakimalopa na advance khah a namolphou ngei ngei le ‘numei phalou’ tin koiman nadei taponte.

Chomkhat nopsah ding de jeh a nadamsunga nakisih ding nahitai, na nu le na pa jeng jong ahing changa athi nabah sah jeng lhon ding ahiye.

Natahsa na na-it lou jeh chun na-hinkho jeng jong hin-it tapon natin, nangle nang hinkho nahin kilahnom’a suicide changei nahinbol nom ding ahitai. Hichu ahi akikicha pen, aphat louva khangdong tampi hinkho tahsa le lhagaova anaval lhum ji-ah.

Hinlah, Deuteronomy 21:23 khun kicheh tah-in aseiye! “Mihem koi hile ama le ama hinkho kilah tapou chu Pathen gaosap chang ahitan vangam lut lou ding ahi” ati.

(b) Nungah hon nahet tei tei diu khat chu, Pasal atamjon kichenpi ding leh jiding mong monga alungset khat chung’ah lungthim se agel ngaipoi. I-ham tia na dongma pan ki kicheng thou thou ding tia muhthem selsula natahsa ahinthum khah le nopsahna ding mai maiya eilungset ahi ti kihet jengin. Akhuti louleh achunga kisei khu nato tei ding ahi.

  1. Kitepna/Kihahselna :

Aval jouse songmantam ahipoi” kiti banga nahin hel jouse’n nahin lungset ahideh pon, nahin lungset jouse jong hinkho’a ding ahideh poi.

Hijeh chun ijat’in ngaiyin lang ngolpi jeng jongle chun nakichenpi masangsen naji hiloulai nadongma din natahsa phal jeng hih-in lang kitepna/Kihahselna kiti jong mohbol jeng lhon hih-in. Khonunga nakipal-na nakisihna le navangset-na lentah hung hithei ahi.

I-hamtin nakitep-pi nadongma nu/pa hilou midangkhat toh hung kicheng kha tale chun, nakitepna lhon chun na hinkho’a najui jing ding ahitai.

Alang khatna nadalhah nadongma nu/pa jong chun thohjou louva nachunga lhase’a ahinkho setlo teiding ahitai. Gelphah lou pia kingaise a suicide changei anabol khah deh deh levang nangdia pap lentah hiding ahi.

Nadongma toh phatah-in kilungset’in, kingai lhonin lang Pathen angah kijato tah-in thenna hinkho mang jing lhonin, Pathen alunglhai tengle ima ahimo aum poi. Ahin, naji na-angkoi mong mong ahi masangsen kitepna/kihahselna kiti hi boltei tei angaipoi.

Eimi film “Kumsom kilungset” khu nungah gollhang hodia kihilna thei thusim hoitah ahiye. Kumsom lhingset akilungset nunglhon in anumei nun akitepna apalkeh in midangtoh akicheng tan ahile; ajinei naa cha aneithei tapon ahi. Ngaidam agakithum lhona gollhangpan ahin ngaidam phat a bou cha ahin neithei bep ahiye. I-ham tin agollhangpa chu anadam tahih leh adamsunga akitepna chu umjing ding cha le nao aneilou meithei ahitai.

Eimi film actress nungah melhoi tah Thethem Haokip (Vincy them) thudoh aneinau khat a hitin anadonbut’e.

THUDOH : “Tua Beauty Parlour/Saloon nahon khu nadongmapan bol tahih-in ngatan hinti le nanga dem?”
THETHEM : “Nga pong’e! Ajeh chu kaji ahinai poi; Ahinlah, kajinei jouva kajin ahinsei ahile vang kangah ding ahi.” atin, aseidih lheh’e.

Hiche hin avetsah chu ahileh ijat-in kingaihen ki-kilungset jongle i-ji hiloulai i-dongma maimai khat chu 100 percent i-hinkho leh ilungthim pumpia kingapna thei ahinai poi ti ahi. Hijeh a chu ki-kingai lheh jongle ikichen masanga kitepna kiti bollou hel ding ahi.

Amavang kichen masang hilouva kichenjou teng leh phatah a kitepna neijoh ding angaiye. Hijeh a chu danthenga jinei ho khun Pathen leh mipi ang’a phatah a kitepna/kihahselna aneiyu ahi.

Pathen anga akitepna tuhdet jinga kitah tah a hinkho hinmang Minu/Mipa ho khun Pathen lunglhaina insungnom ahinsem doh theiyun ahi. Hitobang insungnom’a hung khanglen chate ho chu Pathenin khonung teng lam chom chom’in phatthei aboh-jin ahi.

I-ham tia neilou hahsat jeha danthenga jineijou louva nakijam-tho lhontah jongle hiche hi anasumil hihbeh lhonin.

Na sanakhang chulna le nadeipena nakilhen naji chutoh thina tailouva kikhen talou ding leh lungdang geltalou din khut kituh-in Pathen ang’ah dilsun kitepna nei lhonin lang naji’a din kitah tah-in hinkho mangin, chutileh amanjong adam kumkho’a kitahtah a hinkho nahin manpi ding ahi.

“Insungnom semdoh na din nupa kah a Kitahna leh Kitahsan tona apoimo pen’e.”

Insungnom semdoh minu/mipa lolhing hi-inge natile najinei masang na-nungah, na-gollhan laiya kona nakipat ngai ahitai.

Tulai mi lekha athemin, aching gamtan hiche to bang topic hohi angaibeh tapoi timaithei in nnate. Hinlah hiche (Love) Lungsetna masang ahin, miching mithem tah tah hojong janhi dunga hung peng naosen ngolthet ho abangji tauve.

Mihem hinkho’a dinga amantampen ‘SANAKHANG‘ Kiti Nungah/ Gollhanlai hinkho hi avel’a kimukit talou ding ahijeh-in, Pathen toh nanu napa deilam’in manggo tei teiyin. Khonunga nakisihlou hel ding ahi.

Hijeh chun vo khangdong, hiche hi hen :-

Hinkho kitihi chomcha bou, avel’a kimukit louding ahi jeh-in anopna theipena manding ahiye. Amavang tunia i-hinkho nop man chu khonunga i-lhagao hinkho’a dia kisihna ahilou na din, Chingthei tah le Pathen thu toh kitoh-in hinkho nomtah mang’u hite. Hiche a hin nopna tahbeh aum’e. Ajeh chu kisih leh khonung lim kiti-hi alou aum poi.

Jesu toh hinkhom anom’e.

NOTE

Khangthah te gelkhohna jala hung kisun ahin, sutkhel aum leh Pakai Pathen minin ngaidam kahin thum’e. Pathenin asimdoh jouse leh khangthah te phatthei eiboh cheh tauhen. Kakipah-e.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleJANMANG KILUNGSET HINKHO
Next articleKANGAI CHULLOU ZOUZAM-IV

LEAVE A REPLY

Please enter your comment!
Please enter your name here