DINGPI LHANGA KALUNGSET PAHJEM(1)

-Crosby Haokip (7085168510)

PART 1

Kapenna thinglhang gam, apah hoina jutin, vatinin abome. Amol alhang akichoi siu seuvin; kakho gal uvah chun Dingpi lhang aumin, kalunghel tengleh hiche Dingpi Mol chu kavejin kaseiyin, “O he! Khuche lhanga khun che ding kanome,” katijin, che ding chu kanom lheh jenge. Chuleh Dingpi vum a chun ipi ham khat kamu jin, hoitah’a kavet tengleh, ahshi bangin avahin aphe lep lep jin ahi.

Nikhat jong lunghel tah’a Dingpi lhang kanavet laiyin kaloipa Gogou ahungin kajah a,

GOGOU: “Mang, ibol’a Dingpi lhang chu navet vet jeng hitam?” atin chuin kanuiyin ajah a,

KEIMA: “Gou, khuche Dingpi lhang vum’a thilkhat kamu jin, ahshi bangin avahin aphe lep lep jie. Gakiche leh nungah hoitah tah tamin te.”

GOGOU: “Khuche Dingpi molpang lang’a khun khoneo khat, DONGKOT kiti aume. Amavang Burma’n ahop ahitai. Akhoa chun nungah hoitah khat aumin amin jong PAHJEM akiti. Eimi kol(Burmese) nungah ahi,” atin kaloipa thusei chu katha anom lheh jenge. Chuin kaloipa koma kaseiyin,

KEIMA: “Gou, katha anome. Nakihet pi um ham?”

GOGOU: “Aume. Kapute aumin, sun tengleh lomvai kon’a kache jiu ahi. Chuleh Pahjem’in shitwi agadom jin kabon-un kalel tengu leh kadon khom jiuve.”

KEIMA: “Gou, chetei tei hite. Chuleh Pahjem chu keiya dia ihel ding ahi,” katin kanui lhonin, Dongkot a che din kakigong lhon tan ahi.

Nithum lhingset kakigong lhonin, chuin Dingpi lhang jot dingin kakipatdoh lhon tan ahi. Lampi lamsao kajot lhonin, lampi ahah jehin ni ni lhingset kajot lhonin ahi. Kakhouva patʼa akivetleh naichan alangin, ahinlah keng’a iche leh, ni ni lhingset kijot ahi. Kache lhonin nilhah masangin Selkot a kageh lhonin, ajing jingkah matahin kakipatdoh lhonin, nilhah nilhang kaiyin kaga lhung lhon tan ahi.

Khosung kalhun lhon chun nungah hon twibel apuʼuvin, twi akhaiyun, gollhang hon tiding thing a-eh un, chuleh kensuh’a chun chapang ho kangtalaiyin akitol uvin ahi. Akhochen-u chu thinglhang hin danin akhosauvin, 1990s vel laiya kakhou umdan kageldohin kalung ahel lheh jenge. Chuin kenjong kaloipa kadong peiyin ajah a, “Pahjem te in hoilai ham?” tia kadoh leh, amanjong a-in u eiko pehin, nilhah leh kholai leng dingin kakitem lhon tan ahi.

Chuin kaloipa pute in kajot lhon laiyin nungah hoitah khat hin kongin thing ahin pon, namponve ahin kive’a ahung chu kamun ahile, hoi kasa valin kangol leo tan ahi. Chuin kenjong kaloipa kadong loichelin ajah a, “Gou, imasang lhona eini lam hin jon’a hung nu khu koiham?”

GOGOU: “Kasei Pahjem chu ahiye. Tuchun houpi tan,” atin ahinlah kajah achan kaloipa koma,

KEIMA: “Kajah acha bouve. Nangin houpi o,” katin chuin Pahjem jong kakom lhon ahung lhung pei pei tan ahi. Chuin Pahjem’in kaloipa ahin houvin,

PAHJEM: “U Gou, itih a nahung ham?” atin chibai akibol lhonin, chuin kaloipan jong amanu jah a,

GOGOU: “Jem, tua chu kahung lhun pan lhon ahi nalaiye,” atin chuin keilam ahinven kaloipa jah a,

PAHJEM: “U Gou, naloipa hila koiham?”

GOGOU: “Amin Mamang, nungah hel ding’a hung ahi,” atin atotin ahile, anui lhonin, chuin Pahjem’in chibai eihin bolin eitotin kajah a,

PAHJEM: “Heu, nungah hoitah tah nakimu ding ahiye,” atin me heu chan eihin ven ahile, kalung ala mang jengin ahi. Chuin keini koma aseiyin, “Heu, tunilhah leh kholai lengin hung lhon o. Changlhah kihon ute. Chuleh changlhah isuh khom diu ahin hung mahung lhon o,” atin chuin keini jong kaloipa pute in kajon lhon tan ahi.

Nilhahin kaloipa toh Pahjem te in langa kache lhonin ahile, Pahjem’in chang anasep in, keini eimu lhon phatin insung’a touna thum agalan, chuin katou khom tauvin ahi. Chuleh Pahjem te honsung kaven ahileh gancha tampi kivul kamun, chuleh anme lei lentah jong alhou’uvin ahi. Pahjem chu insunga numei thum lah’a alhum pen ahin, achunga pasal ni aumin chuleh achunga numei ho ajinei soh tauvin ahi. Pasal teni jong ajinei lhonin aneojo pa Old Samtal langa achengin, alenjo pan in angahin ahi. Chuin Pahjemin eihin houvin kajah a, “Heu, twi kahin so peh ding ham?” atin ahileh kanom peiyin, chuin insunga alutin leibel sunga kide twivot jen kadon dingin eihinso pehin kadon leh kadam hut hut jengin ahi. Chuleh leitol’a chun Rose 🌹 pah hoitah apahin ahi.

Nilhah khojin’in Pahjem’in changman de sa ahin ladohin, chuin sum’in kasu tauvin ahi. Chuin suh kakilahin changman kasun, Pahjem’in meila ade in ahile, kaloipan eitot lhonin aseiyin, “Nungah chang su, gollhang meide,” atin chujouvin aseikitin, “Hilou, hilou; gollhang changsu, nungah meide,” atin kaloipa tot chun kanuiyuvin ahi.

Chujouvin nachang na sat din Pahjem toh kache lhonin, chuin kenjong Pahjem koma kaseiyin,

KEIMA: “Jem, nakhou anom vale. Hilai muna kahung khah hi kavang apha e,” katileh amajong akipahin kajah a,

PAHJEM: “Heu, chutia nop nasah leh cheng den kom tang o.”

KEIMA: “Eilungset thei ding nungah khat um hen lang, kichenpi den tale nom ding hiya,” katin katotin, chuin nachang na kasatin, chuin amanjong kajah a,

PAHJEM: “Heu, nungah atam a tam ahiye. Jingleh lomvai konin hung le chun,” atin katha anom lheh jenge. Chuin nachang na kasat jou lhonin kakile lhonin, changlhah kasem tauvin ahi.

Janin Pahjem piʼn vaiju kakom lhon’a ahin tung lutin kajah lhona, “Gollhang te ni chep lhon o,” atin kaloipa toh kakiveto lhonin achep masa ding kakisemo lhon tan ahi. Chuin kenjong agolong chu vaiju sunga chun kasun lutin kachep tan ahi. Kachep khah nailou ahijehin kahe them pon, ahinla kachep chep leh kadu tan kanga thei tapon ahi. Kaloipan vang ahet them jehin chomkhat achep-in anga tan akham pon ahi. Ahinlah keivang chu kachep masat ni ahijehin khamna thei ahilam chu kahe pon atwi um chanin kachep chep tan ahi. Kaval behseh phat chun kaloipan eilah peh tan, ahinlah kahe tapon ahi.

Kakham val phatin kalunga thu kisel guh jouse kahin phongdoh tai. Ahinlah kenvang kahe poi. Jingkah a kaloipan ahin sei chun kajah acha lheh jenge. Nilhah chun kakham pet’in kalung sunga um Pahjem kalungsetna jouse kaseidoh kha tan ahi. Chuin kachen leitol’a rose pah chu kalouvin kachoiyin Pahjem jah a, “Jem, hiche pahcha hin kalungset na avetsah ahi. Kahin mua pat chun kalung laiya nadim jenge,” katileh Pahjem jong ajahchan, chuleh aning langa kaum chan kaloipan aven, anui nui jeng tan ahi. Chutia kalungset na thu kaseiya rose pah kapeh phat chun kaloipan jong Pahjem koma, “Kilah tang, kilah tang,” atin ajol in, chuin Pahjem’in jong jahcha pum pumin akilah tan ahi. Chuin kenjong Pahjem koma,

KEIMA: “Jem, kahin lungset banga hi nangin jong neilungset hinam?”

PAHJEM: “Heu, neilungset dihtah ahileh kanom e. Ahivanga nakham jeh mei mei ahile vang kanom poi.”

KEIMA: “Nao, kakham jeh vang ahipoi. Kahin lungset tah tah nahiye.”

PAHJEM: “Heu, kenjong kahin lungset e,” atin kahet lou vang chun Pahjem kiss kanabol manin ahi. Chuin kham pum pumin changlhah kanen aban vang kahe kit tapon ahi.

Jingkahin kaloipan eihin thouvin, chuin an kane lhonin ahileh kaloipan eiven anui nui jeng tan ahi. Chuin kenjong kaloipa jah a,

KEIMA: “Gou, ibola nanui nui jeng hitam?”

GOGOU: “Mang, janlhah chun nabol hoi mong monge. Baicha khenin Pahjem najol doh jenge ong?” atin anuiyin kaloipa thusei ho chu kakijapi lheh jenge. Hijongleh Pahjem kana jol doh tah jehin kakipahin ahi. Chuin an kaneh jou lhonin lomvai kon dingin kakigong lhon tan ahi.

Chuin miphabep toh Dingpi lhanga kakaltou tauvin ahi. Chua chun Kolbu lei lentah akilhouvin, lou laiya chun buh lentah akisan ahi. Chuin buh kalhun un buh a konin Pahjem keini lamto dingin ahung lhai dohin ahile, amai aselin kenjong kamu ngam tapon ahi. Ahinlah Pahjem ahungin keini jaha, “Heu, tunileh eiho bung khom ute,” atin buh sunga kalut tauvin ahi. Ju le va ham gin ngeitah tah akijan kalung ahel lheh jenge. Chuin na katong un kabung tauve. Pahjem vang natong ho don ding cha om a apan tah jehin buh sunga cha a-omin adang sen ma nei tahin tucha’n leiset kakal un kolbu katu’vin ahi.

Sun matou phatin kakho lang lhang u kagaven ahile, kakhou hoitahin akimun, chuleh kemcha chunga lunghel tah’a katouva Dingpi lhang kavetna ji mun kamun ahile, kalung ahel lheh jenge. Chutia lunghel tah’a kakho langu kanavet laiyin Pahjem shi’a twithal dingin ahungin kei eimu phatin kakoma ahung touvin kajah a,

PAHJEM: “Heu, nakho langu navet leh nalunghel hitam?”

KEIMA: “Jem, kalung ahel thouve. Hijongle hilaiya kaum leh anom chome,” katin, chuin molvum a katou lhonin nom tahin kakihoulim lhonin ahi.

Chuin Pahjem ahung kiheiyin kajah a,

PAHJEM: “Heu, janlhah’a nathusei chu atah tah ham?” atin eidongin ahile, kajah acha’n, hijongle kalungset ahijehin ajah a,

KEIMA: “Henge Jem, nangin gelle chun kakham jeh’a katot danin ngaiton nate. Kenvang kalungthim sunga um kahin lungsetna ka-im jou tahlou jeh a kahin moh sei jeng ahiye.”

PAHJEM: “Heu, chutin kagel chompoi. Kenjong kahin lungset e. Tua itouna mun lhon’a hi nidangleh kachanga katou jia nakho langu kahin vet vet ji ahi,” atin chuin kenjong ajah a,

KEIMA: “Jem, kenjong kalunghel sehleh kahin vet jing ahiye. Kahin vet tengleh hiche mol’a hin ahshi tobang vahset a phe lep lep khat kamu ji e, ipi hintem?”

PAHJEM: “Heu, nalungset keima kahiye,” atin anuiyin, chuin shitwiya eipuiyin, chuin nisa vah neocha khatin shitwi chung ahin kho namun’a chun abel to akoiyin ahile, avel jouse asal am jeng tan ahi. Chuin avah chu kakho langu angat sahin kajah a, “Heu, nahin mu ji ahshi banga vah’a phe lep lep chu hiche kabel hi ahiye,” atin ahileh kidang kasan, chuin kenjong ajah a,

KEIMA: “Jem, chuti ahileh namel kamu masanga na-emvah kamu masat chula na?” katin kadaiyin ahileh twi eihin the khumin, chuin twi kakithe to lhonin shitwi panga chun kakisun tot lhonin ahi.

Chujouvin buh lam kahin jon lhonin, tunvang kabung khom lhon tan ahi. Pahjem toh thakhat a kabun khom lhon chu kakipah valin, chuleh amelhoina kave chim thei pon ahi. Hitichun kaum sungin Pahjem toh ma khatin kabung khom jing lhonin, sun tengleh kakho langu kavet ji namun lhon hamhing chunga chun lungset thimthu kasut khom lhonin ahi. Chuleh shitwi panga kache ji lhonin, Pahjem twibel chun kakho langu kakho ji lhonin ahi. Kakilungset na lhon asang lheh tan, chuleh mihon jong eingai theiyuvin, kenjong nom kasa lheh jenge. Sun tengleh louva kabung khom lhonin, nilhah lang tengleh Pahjem toh in kajon khom lhonin ahi. Chuti chun kaloipa umna lam jong kahe ji tapon, Pahjem toh bou chun kakivop jing lhon tan ahi.

Nikhat in a kaum pat’in kaloipa het louvin kachangin Pahjem koma kache tan ahi. Chuin kalhunin Pahjem’in eina lamton, kakhut atuhin ahon sung uvah eipuilut in ahi. Ahon sung uvah chun pahcha jat tampi aumin vet nom nom aume. Chuin Pahjem’in kajah a, “Heu, hiche pahcha hi apah tengle kei puiya nahung ding, alah’a apah hoi pen pen ikichen lhon tengleh neipeh ding chu o,”atin SAHEI pahcha khat eipen ahi. Chuin kajah a aseiyin, “Heu, nakile tengleh hiche Sahei pah hi nahai phung a jamsahin lang kei puiya nahung tengleh apah hoi pen pen nahin choi ding ahi,” atin plastic khatin eichun pehin, chuin kiss eibolin ahi.

Keini jong kaum sot lheh lhon tan, Pahjem ngai lheh jong leng inlang che lou thei kahipon kaloipa toh kile dingin kaum lhon tan ahi. Hijeh chun kakile masangin nikhat Pahjem toh Dingpi molvuma katouna ji namun lhon a chun kache lhonin, achaina ding mong mongin kaga tou khom lhonin ahi. Chuin Pahjem kachunga akingaiyin kajah a,

PAHJEM: “Heu, nache nungleh hilaiya hung jing katin kimuto ji hite.”

KEIMA: “Jem, hilai itouna mun lhon hi kahin galdot jing ding ahi.”

PAHJEM: “Heu, kei puiyin nahung kit nadem?”

KEIMA: “Jem, nikhatleh Sahei pahcha ahoipen kahin choiya nang puiya kahung kit tei ding ahi.”

PAHJEM: “Heu, nahung tengleh phaigam nehthei, kol(Burmese) nungahnu kei dingin neihin poh peh o,” atin anuiyin chun kenjong ajah a,

KEIMA: “Henge, nangin jong kol lang nehthei neina sempeh o.”

PAHJEM: “Heu, in nalhun tengleh nangin jong ahshi banga vah thilkhat hilang hi hin kho sah ji tang o.”

KEIMA: “Henge, kalungset na jong ahshi banga vah jing ding ahi,” katin chuin Pahjem phei chung kakikhap in nom tahin kakihoulim lhonin ahi.

Che tei ding kahi phatin kaloipa toh kache lhon ding konin Pahjem’in khomol chan eihung thah lhonin ahi. Kakikhen lhon ding konin Pahjem’in eikoiyin alhisohin kajah a, “Heu, keiya dia nahung kile kit tei tei ding ahi. Nahung kile tengleh Sahei pah ahoi pen pen khat neihin poh peh o. Chuleh itouna lhon lhanga chu nangtoh kimutoa kahung kaltou ji ji ding ahi. Chutengleh ahshi banga vah phelep lep a kahin vah sah ji ding ahi,” atin kakikhen lhonin, keile kaloipan jong kakho lhon kahin jon lhon tan ahi.

In kalhunin katouna mun kemchunga kaga chen kabel khat u kalan avah chu Dingpi mol kakho sah tan ahile, apat pat’in Pahjem’in jong phelep lep a ahinvah sah chu kamun kalungset lhehin kangai lheh jenge. Hitichun niseh le bel vahin kakikho to jing lhonin ahi.

Nikho tampi ahung che tan keila Pahjem koma kakile thei mong mong tapon ahi. Chuleh eipeh Sahei pah jong akhangin alen tan, apah ho ahoilheh jenge. Pahjem koma kakile phat alhing tan chuleh Dingpi mola ahshi banga vah Pahjem’in eikouna vah kamu jingin ahi. Chuin kenjong nikhat Sugnu Bazaar a phatvet lentah kachon, hichun Pahjem umna lang chu nisa vah kakho sah tan ahi. Chuin kalungthimin Pahjem molvuma adin kamun me siu seuvin flying kiss eihin bol e.

——To be continued ——

©️2020, Crosby Haokip, All Rights Reserved

Published by KWC WhatsApp Group