Home Crosby Haokip DINGPI LHANG’A KALUNGSET PAHJEM-III

DINGPI LHANG’A KALUNGSET PAHJEM-III

72
0
DINGPI LHANG’A KALUNGSET PAHJEM
DINGPI LHANG’A KALUNGSET PAHJEM

Lungset um Thusim

Story and Narrated by
Crosby Haokip

(Contact number 7085168510)

Crosby Haokip kwc
Crosby Haokip kwc

EPISODE 4

Thinglhang a hung seilen kahin, phaitol hindan kahepon; koima akichihsah, akithupi sah umlouvin, alen aneo kakiloi khom jiuvin ahi. Hiti chun hinkho man anom lheh jenge. Hiche ni chun kaleitol uvah thingkeh tampi akisen hiche ho chu inbangin sangtahin kase sang-un achung a katouvun, kakihot un anom lheh jenge.
Hiche lai chun Pu Richard in asah: “KHIVUI LE LETTER” kiti la ache laitah ahi. Hiche la chu thingchung’ah kaloipa toh kasa lhonin, kainuva guitar khat um chu kasai sai lhonin Dingpi lhang kaven, kalungset Pahjem melmu ding kanom lheh jengin ahi.
Hiche ni chun nisa vah akimupon, asat adap anop lheh jenge. Amol alhang ivetleh lunghel hel aumin ahi. Nilhah lamin ni dangsan ahung kaiyin; keiho langa nisa lep tajongle Dingpi lhang chu nisan akhon, nisa vah asanin ahi. Chutah chun Pahjemin phelep lepin Dingpi lhanga konin eihin kho kitin kipanan kadimin ahi. Amel mu ding kanomin ahi. Chuin insunga kalutin guiter kakilahin leitol a mitlhi long chut chutin Dingpi lhang lam kaven, Pahjem ngainan Khuvui le Letter la kasan ahi.

Ahin phat sottah Dingpi lhanga kona hungvah ji, Pahjemin abel to a kona phelep lep a ahinkho sah ji vah chu kamu tapon ahi. Hiche jeh chun kalung anop mo lheh jenge. Pahjem iti ahita dem, tin lunggimnan eibomin ahi. Hiti chun anle twi don nomlou vin kaum tan ahi. Jingkhovah katho tengle Dingpi lhang kaven; nilhah nidang san tengle kaven, ahinla avelin vah kamu tapon ahi. Ahiloule Pahjem jinei hintan te, katin lungthim nop mo nan kadim tan ahi.

Nikhat khosung lentol a nungah gollhang hon chang kasu’uvin; khopi golnop kabolun, nomtahin hinkho kamangun ahi. Khosung a chu changkhat pi, tehsepi khat vengto langa cheng ahin, nilhah khojin in akoma kacheuvin vaiju kachep tauvin ahi. Athem lheh jenge. Vaiju kachep le masanga Pahjem te ina kanachep chu kageldohin kadu cheh cheh tan ahi. Vaiju chep khalou kahin, hiche nia vaiju kachep chu eimu jouse alungdong ui. Chuleh tehspi jong atija lheh jenge.

Chuin kahung kham tan ahi. Chuin angol bangin “Khivui le Letter” la kasan ahi. Chutah chun kaloipa Gogou ahungin eihung kaidoh thon kajah a, “Mang, Pahjemin letter le Jangdumpon nahin thot e,” atin, chuin ahin ladohin eipe tan ahi. Chuin Pahjemin eihin thot thilte ni chu kaven kalhisoh tan ahi. Chuin letter chu kasimin ahile, Pahjemin hitin aseiyin: “Heu, lungtup molso na dinga kahin peh Saheipah chu pah lou laiya ham? Keiya vang apahin ajem akai tai. Nahung kile kit ding ham, tin kinemin kanangah jingin; ahinla gol, nangvang nasilung mol vale. Hung kile lou ding nahi tah jongle kamcheng khatbeh a neivailhah thei lou ham? Golin kahin ngaiyin, kaban jetin kahin sang jinge. Hinla gol, nang vang nagam vangla taiye. Ven, hiche pondum hi, kiengnei ding kahitah jehin gol, hiche pon hi lhahna thilpeh din kahin thot e. Nomin hinkho hin mangin lang keijong angdanga chul tange,” tin, ahinseiyin ahile kakap tan ahi. Kap pum pumin inlam kajon tan ahile eimu ho alungdong ui. Ahinla akim khatin, “Vaiju kham hikhu,” eitiuvin ahi. Chuin jan ihmu louvin kahah khovah tan ahi. Chuleh jingle Pahjem koma che dingin kakigel lhan, jingkho vah ding kangahlel lheh tan ahi.

Jingkho vah in matahin kathouvin leitol a kavah le len ahile haiphunga Saheipah, Pahjemin einapeh katu chu kamun, ven, apah in apah lha mong mong tai. Pahjem kakipui phat alhing tai, avaigei bon kahitai, katin, Sahei chu anapah lhatan, apah apul lhah kon anahijo tan ahi. Chuin alah a apah hoi pen pen chu kalouvin Pahjem dingin kakoi tan ahi. Chuin kakigong loiyin kaloipa jong kou man talouvin Dingpi lhang kajon tan ahi.

Lamkim kaphah chun gamnoiya jule va hamgin ho kangaiyin lunghel nan kadime. Chuin thingchung kaven ahile, jule va aham un, vacha ho akop kop a aum’u chu kamun Pahjem kangai cheh cheh tan ahi. Chuin lhisoh pum pumin ajah uvah kamao maovin ahi. Hiti chun nithum lampi chu Pahjem kamu nom val jeh chun ni ni lhin nin kagalhung tan ahi.

Khosung kalhun chun ananom chom e. Ajeh chu injong atam chomin, chuleh khosung mi jong atam chom tan ahi. Koima dang kahet lou phat chun kaloipa, Gogou pute inah kache tan ahi. Amahon eihin mu chun kidang asalheh jenguve. Chuin inneipan kajah a, “Mangboi, nachanga nahung ham?” tin, eidongin, kenjong lungnommo tahin ajah a,
KEIMA: “Henge, hepu. Kachanga kahung ahiye.”
INNEIPA: “Ibola naloipa Gogou toh nahung kilhon lou ham?”
KEIMA: “Hepu, kin khohtah khat kanei jeh-a kino taha kahungle kahin kou man tah lou ahi.”
INNEIPA: “Ipi thu a nahung hitam boi?”
KEIMA: “Hepu, Pahjem kipuiya kahung ahiye.”
INNEIPA: “Boi, jing nikho hung lhung le Pahjem sanakhang lhahna golnop um tadinga iti nakipui thei ding ham?” atin ahile kakap tai. Chuin kajah a, “Boi, navaigei tai. Pahjemin sottah nanga a nahung kile lou phat-a ainkoten ama nople da umlouva anite insunga lut sah ding agot u ahitai.”
KEIMA: “Ahipoi hepu, amasan Pahjem toh kakimu nome.”

EPISODE 5

Nilhahin nungah gollhang phabep ahungun Pahjem sanakhang lhahna dingin anchang sel 5 cheh ainsonin ahung dong un ahi. Chuin amahon eimu phat un, “Mamang jong ahunge,” atiuvin eipui pei pei tauvin ahi. Pahjem te in kalhun chun aleitol uvah changpol le chahna mang chan hall anakisan ahi. Hall sunga chun thaomei tampi tampi akikhaiyin ahi. Chuin Pahjem sanakhang lhahna dingin miho aboi thei lheh un ahi. Chuleh lentola chun sel ni anakihen in ahi.

Chuin mipi kikhopna phat ahung lhing tan ahi. Chuin keijong hall sunga chun kalutin mipi laha chun pulpit lam kave tan ahi. Chutah chun ahin sam-un, “Mounu le moulang hung lut ding ahitai,” atiuvin ahile kakihot tan ahi. Kaven ahile hall sunga Pahjem le ajiding pa ahin puilut un, chua kalungset Pahjem kamu chun lainat nan kadime.

Mihon vang nom asauvin, akham thei akham un, alamthei chan alamun, polanga chun mipa themkhat in vaiju achep un ahi. Chule leitola tehse hon pula pala asauvin ahi. Chutia Pahjem kavet jou lou phat chun polanga kapotdoh in vaiju chep ho vaiju kalah pehin kachep tai. Hachep in kachep in ahile akham tobangin kahung um tan, ahin kalip thet nalaiye. Chuin hall sunga konin ahin samun, “Pahjem lhah na dinga jaila khat oi dingin gollhang lasathem khat akingai chai,” ahintiuvin ahile, kakipat dohin hall sunga kalut tai.

Pahjemin eihin mu chun amai ahei mang tan ahi. Alhiso kamun, chuin guiter kakilah in Pu Richard in asah KHIVUI le LETTER chu kasa tan ahi.

“Kaden kaden, anai anai kathoh joupoi.
Lenpi beiyin vangkho khothip noiya,
CL lanu, CL lanu, hethem kanom ngei neilungset na.
Nachenna gama hung ding katile goldei…..”

Chuti chun laina tahin Pahjem a dingin jaila khat kaoi lhan ahi. La kasah pet chun kahunglo na hethem akum han langhon apona lheh uve. Ahin ahethem lou hon golnop danin agelun athanom lheh uve. La kasah chaiyin polanga kapot pei pei tan ahi. Kalungset Pahjem jinei ding chu kagelle lainat nan kadimin, mipi ao gin ngai ngam talouvin kaumna mun kajon tan ahi. Jingkho vah le la kagoldeiyin eidalhaa jinei tading kagelle, mitlhi hul man louvin kakap kap tan ahi.

Jingkhovah in matahin kathouvin masanga Pahjem toh lomvai kakonna mun u kajon tai. Alhang chu, Dingpi lhang akitin, masanga Pahjem toh kanatou na mun lhon; chuleh Pahjemin phe lep lep a abel a eihin kho namun chu ahi. Hiche lhanga chun kadingin kasuh vet in ahile kakhou kamun, kakiheiyin kanung lam kaven ahile Pahjem te kho kamun, chule Pahjem jinei na dinga mipi golnop awgin akijan ahi.

Ipi hile Pahjem toh khatvei beh kikimu hen, katin khosung lam kajon tan ahi. Khosung kalut chun mipa hon siel sa ahin pouvin, an hon’a pang din eipuiyun ahi.
Chuin keijong an honin kapang tan ahi. Chutia an kahon jing laiyin kakomah mikhat ahungin kajah a, “Pahjemin nakouve hungin,” ahung tin, ahinla kalhaset jeh chun che louvin kaum tan ahi. Avel velin mi eihung kou sah in ahile kakioimo tan ahi. Chuin keijong kachen ahile Pahjemin lhanmol’ah einangah in ahi. Amel kamu chun kipa le lhaset kakop in ahi. Ahinla amel kamu chun kipanan kadim kit e. Akom kalhun masangin Pahjemin eihin mun kakoma ahung lhaiyin eikoiyin akap tan ahi.
Chuin Pahjemin kajah a,
PAHJEM: “Heu, ibola nahung kile talou ham? Nang ngaiyin kakap e tun?”
KEIMA: “Jem, keima themmona ahi. Hung ding kakisonlel jeh ahiye. Ven, Saheipah, nasei chu ahi,” katin, kahin poh Saheipah chu akhut’ah kape tan ahi. Kakhut a konin akisanin akap tan ahi.
PAHJEM: “Heu, nahung vaigei nalom lom e. Kei nang koma konin gamlan potthei ponge.”
KEIMA: “Jem, neingai lheh jongle chun mun choma jinei ding nahitan lung mongin kile mei tan.”
PAHJEM: “Heu, idia nangkoma kona che mang dinga neisol ngam ham? Hithei ponte. Kalungset nangbou nahiye. Phat hitih chan kananga hi tun avaigei bang jongleh nungah kahi nalaiyin, ahimona ding lampi aumhih laiye.”
KEIMA: “Chutile khosung mi le nainsung min ipi asei diu ham?”
PAHJEM: “Nangtoh kikhen sangin thi ma leng kanom joi.”

Chutia Pahjem toh kakihou laiyin ainkote phabep ahungun ajah a, “Boi, hung tan. Phat lhing ding ahitai,” ahung tiuvin ahi. Chuin Pahjemin hoitahin eiven lhisoh pumin ahung kou ho nung ajui tan ahi. Anungin kei nao bangin kakap tan ahi. Chutia laina tah-a kanaka laiyin kaloipa Gogou ahungin kajah a, “Mang, ibola nache doh ding jeng jong nei seipeh lou ham? Nache doh kahet phat a nanung kahin jui ahi,” atin, thu ima seithei louvin kakap lhon tan ahi.

EPISODE 6

Chujouvin khosung kahin jon lhon tan ahi. Khosung kalut lhon chun mipi anneh phat laitah ahin, khosung nungah gollhang hon kada sasan eipui lhonin lentola mipi chujat lah-a chun an ne din eitou sah lhon tan ahi. An kaneh sung lhon chun kaloipa toh akihou jo sang umlouvin kakimoh vetto lhon tan ahi. Chuin kaloipa koma, “Gou, hiche an hi ken nengam ponge,” katin, kapotdoh tan ahi. Kanungin amajong ahung pei peiyin apute inlam kajon lhon tan ahi. Chuin thu umdan jouse kaloipa koma kaseiyin ahi.

Mipi anneh phat kichaiyin aniten Pahjem akipuiyun che dingin aum tauve. Ahin Pahjemin anu akol chah in akap tan ahi. Amaho gel dana chu anu le apa angai val hinte, atiuvin alhamon un ahi. Chuin Pahjemin anu koma, “Henu, kei che da tange. Kagol ngai ahung tai,” atin, ahile anu alunggim lheh tai. Ahin alona je ahe chom pon, anite koma che tei dingin atem tan ahi. Chuin ada sasan Pahjem apui tauvin ahi. Chuin keile kaloipan jong anung kajui lhon tai.

Ahin lamkim in kakitim jou tapon ahi. Chuphat chun kaloipan mipi ho ding den dingin asamin ahile, ipi thu um hitam, tin mipi ading den tan ahi. Chutah chun Pahjem kom kajonin ahile, mipi jouse ahung kiheiyun, chuin aman jong hoitahin eiven alhisoh in ahi. Akom kalhun chun mipi ho athip chet un keini um chan chu amoh vet tauve. Chuin akom kanaiyin ajah a,
KEIMA: “Jem, ang dang koi ding hita jongle chun tunin lhahna thilpeh khat kahin nei nome,” katin, aman eipeh ma ma Jangdumpon chu kaladohin alengkouvah kakoipeh in ahile akap tai.
PAHJEM: “Heu, nang dinga athi tobang kahi hitam?”
KEIMA: “Jem, ven, Dingpi galkai ding nahitan lungtup molso jou lou ding ihitai. Ven, hiche pon hi, keima melin hin kichin meiyin. Tunia pat in athisa tobang ihilhon tai.”
PAHJEM: “Heu, thoh jou lou ding hinkho hi ibola chung Pathenin ahinsem ba ham? Tunia hi athi tobang kahitan, kahinkho jong kadei tapoi.”
KEIMA: “Jem, phaimit kasin a lha kakeh tengle hiche kahin peh Jangdumpon hi kei khu nan hin mang tei teiyin o.”
PAHJEM: “Lungtup molso joulou Sangga hinkho bang hi hoiya eini chunga hung chamba ham? Kenjong thilni napenge,” atin, chuin kajah a, “Heu, hiche khichang teni hi kamit a nachin dingin kipohin,” atin, eipen ahi. Chuin eikoiyin ahile hui ahung langin keini dingin kikhenni asoh tan ahi. Chuin eitemin kajah a, “Heu, kasomaiya namu jing dingin Sahei pah kapeh chu hoitahin anajem in,” eitin, chuin akiheiyin kap pum pumin malam ajon tan amaho jong ache tauve. Ahin keivang phat sotpi amun’ah kakap denin nilhah lamin kakile lhon tan ahi.

Hiche nia pat chun Dingpi lhanga kona phelep lep a hung vah ji jong avah tapon, aphat seh le Dingpi lhang chu meibolin atomin ahi. Chule keiya din Phatvet katun jong apha chom tapon, kaladohin chang sal sung’ah kakoi lut tan ahi. Kum 10 jouvin Pahjemin thu khat ahin poh sahin kajah a, “Heu, einin lungtup molso jouhih jongle hen ichate ni beh kichen sah tei tei hite,” atin, ahile lunghel le kipanan kadimin ahi.

Pahjem le Mamang kilungset na thusim hichanin akichai tai.

Hiche thusim hi kapan ama hinkho thusim keima koma akama anasei tho ahi. Ama tun umtahih jongle ama geldohna a kahin jih ahiye.

The End

©2019, Crosby Haokip, All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articlePU PAOTHANG KHONGSAI, GELNAL THUSIM CHOMCHA
Next articlePATHEN MIN PAN A TOLTHA BOL HO LOLHING THEILOU DING AHI.

LEAVE A REPLY

Please enter your comment!
Please enter your name here