COVID-19, CHRISTIAN SUGENTHEI HO LETHUHNA AHI

Thu, May 28, 2020
by Crosby Haokip

Pathen a kon Lethuhna

CORONAVIRUS hi Christian kisuh gentheina ho lethuhna dinga Pathenin vannoi pumpia akithe sah ahi, tin lekhajih hon laina tahin aseiyun ahi. 
Coronavirus (SARS-CoV-2) hi tu le tun vannoiya mihem million valin natna aneiyin athi jong asang sangin aum tai. Hichun khat le khat asukhenin in nisehin athi akibe jinge. 
Billy Prewitt, “The Coronavirus in Biblical prophecy” lekha jihpan atahsan chu, hiche natna hi Pathenin mihemte chunga phulahna dinga alansah ahi, ati. 

Lekhaa chun ajihpan tulai hiche natna le Bible a Egypt gama natna hise analang chu akibahna aume, ati. Egypt miten Israel te chu agamsung-uva soh-a anahen uva anasuh genthei jeh-uvin Pathenin natna hise jat som jen Egypt gamsunga analan sah e. 
Mr Prewitt in Pathenin Christian sugenthei ho chunga lethuhna dinga vannoiya hiche natna, Coronavirus hi ahin lansah ahi, ati. 

Aman ajih-in: “Boina ineiyu tuhin ihesoh kei tauve, ahileh hiche ho hi ipi jeh hintem? 

“Mi kimkhat tahsan chu Jesu thusei guilhunna ding jong ahi. Aseiyin, ni nunung leh natna hise jat chom chom hung umding ahi.”

(MATTHEW 24:7)

Exodus 9:13 naa chun, Mosen Pharaoh koma Israel mite asuhgenthei jeh a suhgamna kidang tah tahin Egypt gamsung asuhgam din anaseiye.
Mr Perwitt in 1 Samuel 5-6 sung mangchan aseikit in, Pathenin thungailou namdang ho chunga thina thei khop natna hise analansah ho akimui, ati. 
Aman aseikit in, tulaiya China a hungkon dohna natna leh Bible a Pathenin natna hise analansah hou akibahna tampi aume, ati.

Pathen deilhen mite anasuh genthei jeh-un Egypt mite chu anathoh gim lheh uve. 
Philistine te chu Pathenin natna hise tampin ana sugentheiyin ahi. Chukeo hilouvin Israel sugenthei Assyria mite chu natna kihe louvin jankhat kahin anasugam hel e. 
New Testament sunga jong Leng Herod chu lungin ananen anathi lon ahi. Amajong hi Solchahte khang laiya Christian sugenthei pen-a anapang ahijeh-in Vantilin adengin lungin anen anathi tan ahi.

THUCHAINA:

Hijeh chun thilsoh ho hi akivet leh Pakaiyin amite sugenthei ho nasatahin gamna hise jat chom chomin anasugam in ahi. Pakai phulahna ahung um tengleh mihemin ipi bol jongleh aphachom ji tapon ahi. Aphapen chu ichonsetnau ikisih uva, ilungu iheiyuva Pathen koma ngaidam ikithum diu bou avat tai. Eiho chunga jong ahung chuh hin ichonsetnau aletdan aphongdoh tan ahi.