-Milham ho hetthei dinga-
N Lhungdim,
Thangting House,
MolnomWest.
CITIZENSHIP AMMENDMENT BILL(CAB) hi akiha seitan thu le la atam in newspaper hihenlang TV channel hihenlang social media hijongleh akiha seilheh jeng in chukitleh India sunga adeh a North East India a um Meghalaya, Assam, Nagaland, Manipur, Arunachal Pradesh, Tripura, Mizoram ho ahin akiha doulheh jeng in, political party ho hihen NGO ho hijongleh imajouse sanga hiche thu joh hi akiboipi tan ahi. Ahinlah ipi mong mong ham? Aphatna ipiham, aphatlouna ipiham tiho hi milham(layman) hodinga hetthei ding in hitihin kahin sun e ajehchu mi phabep khat in nang lekhasun ngai nahi in lungset tah in hinsun in tia tepna einei uh ahi. Kahetna hi keima deibang leh miho deibang in lhinghih jongleh kahetdan anoiya hohi ahi.
Khatna ah Indian Citizenship Act khat 1950 in ana um in, hiche dungjui achu India citizenship hi kinei ahi ahilouleh kimu ahi ahinlah tukah kum 70 sung in gamchom choma um Buddhists, Jains, Sikhs leh Christians ho hi India a dan dihbeh sehloua hunglut a hungchen den hi mi 20 lakhs val lang ahung umtan ahi. Hiche Indian Citizenships pehding ahi ti ahi.
Hiche toh kimat achu tua Govt. po BJP hin amaho vot mu nading chu hitei inte ahilouleh ipi khohtah a ahiti bolsat lenglung diuham? Election masanga hi hiche Bill hi pass dinga kin le bonga Lok Sabha a amaho majority hina ahijeh a ahin passed uh ahi. Hiche India dan khat chu Rajya Sabha a jong pass ngai, Rajya Sabha achu BJP majority ahilou jeh uva chelha theiloua umchu athusim ahunghin ahi.
Hiche CITIZENSHIP AMMENDMENT BILL(CAB) hi 2016 in NE India a political party jouse tobang in phatah a avet uva khonungleh NE India hi hiche citizenship kipethah ho koilut nadinga kibol ahi tia hi adeilou nao aphon uva party jatchom chom in bandh leh blockade jong abol uva chukitleh Delhi a jong Home Minister leh political party dang dangho koma thulhut aganei uh ahi.
Ahinlah BJP lamkaina cental Govt. a kon in imacha lungmonna dingleh kipana ding thucheng khatcha amupon ahi. Nangho NE ho imacha tongkha ponte ti ho mai mai a ahinlhep uh ahi. NE State a Assam, Manipur leh Arunachal Pradesh CM’s hon atounao chair amansah thei uh ahijeh in ami hinao kichenlou tobang in aum uvin, hiche jonghi vangset umtah ahi. Tripura a BJP Govt. hi a CM pao hi Bangladesh a immigrants hung jamlut ho ahi akiti jeh ham thuchang khatcha aseipon ahi.
Anukhahpen in tuchung Rajya Sabha session a agenda list ah aumpoi ti ahung kisei in ahi ahinlah tujing kah in BJP Gen.Secy. Ram Madhav in supplementary bill a hungki polut ding ahi tin aseikit in ahi.
Hitiho hi ivetleh BJP Govt. in tuchunga hi pass sah tei teiding tihi alunggot uh ahi chukitleh itobang ham a Rajya Sabha a Opposition party hon aphasahlou jong uleh joint session of Parliament
Lok Sabha leh Rajya Sabha kigoma hicheva chu BJP ho majority ahiding jeh a pass teiding agot uh hitei ding ahi.
Hichehi miho lungthima hi English a APPREHENSION kiti kichatna, moh kichat hiloua thil kisel khat amudoh jeh uva kicha ahiuvin, tulaia political leaders hojong miching mithem ngen ahitaovin, hita kichatna thei anei uvang hi mohmai mai hiponte. Kichat thei ahijeh a kicha hiding uh ahi. Kichat ding aumlou leh miching mithem hon ipidinga akichat uva atha ajung, asum apai uh asendiu ham?
BJP hohin a Govt. a anatoh houhi aban bana ahinvet uleh mipi deilam hiloua amaho deilam adeh a Hindu ho let le lal nading joh hi akhohsah uva abol u ngen tobang joh hi akhohsah uva abol u ngen tobang ahi in akale langa seidinga akivuina ding uva ko(cave) akicho uva kipeitoh akilou uvin ahi. Amaho mitmo jeh a hi Congress Party Lok Sabha a mipi 40 val neibep jong tuahi election aumleh member 100 val mutei dinga kisei ah ahitai. Amaho jeng jong asunglanga thil gongtoh aching athem ho in tuchung in vang mipi 200 val kimujou taponte tia asei uh ahitai.
CITIZENSHIP AMMENDMENT BILL(CAB) kitihi kichatna thei hitei teiding ahi tin kenjong kagingchan ahi. Adou leh adal dinga hi milham in ima bolthei tohthei kinei hih jongleh aphalou a kichat thei vangchu ikichat uva pha ahi.
Achaina in CITIZENSHIP AMMENDMENT BILL(CAB) 2016 hi ivetleh ichate dalbol a mi chate angkoi ti tobang ahi in, ipi jeh hiding ham tivang BJP hon henao vinte.
-06.02.2019-
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
