By Shonkhogin (Hegin) Haokip
Maranatha Cottage Hebron Veng
Phaipijang Langol Imphal West
9774096152
Leiset chunga Christian insung nomtah semdoh na ding in, eisem pao Pathen in athupha a konin chena lhongpi phatah leh kitup tah a ei koipeh u ahitan, koikoi hijongleh hiche chena lhongpiho chepi jousen Insung nomtah kitichu aman u ahitan, achepilou laiho jousen ichepithei na ding uvin, athahbeh in itah lang nom kit uvin, hiche thu hi alhangpia.
Eph. 5:22-33. Col. 3: 18-25 sung ah kichen tahin akimutheije
Amasapentah in, Pathen thun, Christian Insung nomtah a chenna dingin Numei/Minu ho koma thupeh khohtah aneijin, Numeiho nangho Pakai thunoiya bangin na inneipu chengu thu noija umun. Eph.5:22. Minute koma kipe akin nu chu ahileh ajipa thunoiya auma ajipa ajabol dinghi ama tohding kin len pentah chu ahi. Ijeh in em itileh Christa Houbung luchang ahibanga chu inneipu jong numei luchang ahi. Houbung Christa thunoi ja aumbanga chu numei ho jong imalam jouse a ainneipu thunoija um cheh hen. Bible in numei ho koma ajipa alungset na dingin thupeh aum pon, ahinla numei ajipa ajabola ajipa thunoija aum kitihi numeijin aji alungsetne tia kisim ahi. Hijeh chun, numei aji ja louleh athunoija umnom lou kiti chu aji alungset lou ahi tia kila ahi. Hijeh chun, numeihon, Pakai nungjui kahi, ahilouleh Pakai nungjui ding kahi itiuva ahileh ji thunoija umding ji jabol ding kitihi Pathen lunglam ahi. Hiche neilouvin, insung noma chenna dingin eimale eima kilhep lhah da mai ju hite. Chuleh ipi dinga Bible in pasalpa koma thupeh pemasale kiloma numei nu koma ki pe masa ham tia ivetleh, numeihin Pathen thupeh dungjuija abolding dol hi phatechan kibol leh Pasal in jong ama kinhi akiboljel dingdan in akilange. Pasal tamtah kipalna hi ivetna ahileh numeijin akin akibolji loujeh a insunga nupa kikah a boi na sohjin akilange.
Anichan na a Christian insung nomtah semna dinga ngaija chu, Pateho ahilouleh Inneipu teho koma thupeh chu ahileh, Christan Houbung angai lut bangle, ajeh a ama aki pehdoh jeng bangtah chun nangho jong na in neipite chengu ngailuvin. Eph.5:25. Mipateho koma thupeh chu ipiham itileh Ji lungset ding, iti lungset ding ham itileh Christan a houbung angalut banga ngailut ding tina ahi. Christan a houbung iti angailut ham itileh, Christan a houbung angailut danhi ahoubung mite umchan khanchan jeh hilou, alangkhatna amite ama melma a apan laitah uva Ama ho dinga anathi ahi. Hichu Pakai Jesun ahoubung mite angailutna level chu ahi. Hijeh a chu, patehon ijiteu hi amaho phatle phatloujeh thu hilou vin Christan eiho eingailut banguva eihon jong ijiteu hi un-conditional love a ingailut dingu ahi tihi Pathen thu a konin imu doh thei juve. Hijeh a chu Pasalhon jong ijiteu hi tabang level a ingailut tokah uva chu insung nom tah a chengdinga lomlou chu ihijenguve. Eima ikingailut banga ji ngailut ding ahi tihi mipate koma thupeh lenpen tah chu ahi. Hiche jaolouva Insung nom semdoh dingin eimale eima kilheplhah da maiju hite. Ajeh chu Insung kitihi minu, mipa, chate jouse a hijongleh aneipa chu mipa ahi. Hijeh a chu Insung anopjongle mipa minpha intin, anoplou jongleh mipa minseji ahi.
Insung nomtah a chenna dingin, chaten jong part lentah aneijuve. Amaho jaolouvin, insung nopna ding imacha aum poi. Chate koma thupeh lentah chu ahileh, Chate ho, nanghon Pakaija na nule napa thun nungun, nanu napa jabol un, ti tenihi chate kipe mopoh na chu ahi. Eph.6:1-2. Chate hohin akhandon lai juvin, kipa thanop kitiho hi amahon adeipen tah u chu ahin, ahinla iti kipah jinga umdingham ti thu thutepsa aumjeng vangin ahethei pouve. Chate kipana pipenhi nuleh pa thupeh phate cha a nit a anule apa ajabolleh hichu amaho dinga hamphatnale kipana lentah chu hintin, nule padinga jong kipana chuleh Pathen a ding jong kipana hiding ahi. Hijeh achu chate a dinga hinkho saona le phatthei boh changdiu ahinalaiye. Chateho nanghon nuleh pa thuthu najui uva, naja bolbol u hinam ? nang hon nakinu nabollou uleh insung nomtah a cheng dingin kinepda maijuvin.
Hijeh chun, Christian insung nomtah manna dingin achunga kisei thu hohi angaijin, Ahinla Jesu jaona louvin vang thilbai ahipoi. Hijehchun, Jesu neina dinga kihabol pumleh, Jesu neipumin, eima eima kincheh ibolphat uleh insung nom chu ineidiu ahibouve. Hichehi ima jouse sempa nangle kei sempa, eisem pau Pathen thupeh CHU ahi. Hichehi thilsem hon athilsem ho iti man dingham tia a Manual Book asodoh banguva eisempaovin, eiseipeh u ah. Pathenin asimho jouse asempa thupeh dungjuija ajotheina din chih nale hetna eipe taohen.
