Home Shonkhogin Haokip CHRISTA JALLA HINKHO DIHTAH MANGHO IMA CHA VATLOU DING AHI

CHRISTA JALLA HINKHO DIHTAH MANGHO IMA CHA VATLOU DING AHI

125
0

By Shonkhogin (Hegin) Haokip
Maranatha Cottage Hebron Veng
Phaipijang Langol Imphal West
9774096152

Shonkhogin
Shonkhogin

Adihtah a lamjot a, adih dih a thuseipa, bol gentheina kona phat chomna kimu ho dei loupa, Nehguh kilahna dinga akhut thinglha jengpa,THISAN SONA THU KISEI NGAILOUPA, AGILOU THIL VETNA DINGA AMIT HASAH LOUPA, Ama chu chung sanga cheng ding, akihuhna ding kulpi kikai ho jong songpi jeng hija, A AN NEH DING KIPE JING DING, ATWI DON DING JONG BEIMO A UMDING AHI.

Isaiah.33:15-16.

Pathen ginna le Ama deibanga hinkho man kiti hi adihtah a hinkho kimang (right living) tichu adihtah a lam kijot a, adih dih a thu seiding, adihlou athenglouva phatchomna ngaichat louding, chuleh NEHGUH CHAHGUH lahlouding chuleh PEHLOU DING tihohi hinkho adih a mana dinga Pathenin eidei peh hou phabep chu ahi. Pathen tahsan jalla hitobanga hinkho naman thei ja ahileh Pathenin navetup jing ding, anneh twidon aphat cha cha a napeh jing ding ahi ati.

Anichan a iseinomu khohtah khat chu ahileh, hichehi tulai khang dong ho dinga WARNING LEN TAH chu ahi. THISAN SONA THU KISEI NGAI LOUPA, AGILOU THIL VETNA DINGA AMIT HAHSAH LOUPA amaho jong chu, Pathenin avet tup jing ding, a anneh atwidon aphat phat cha apehjing ding ahi akiti.. Hiche thuhi khoh kasa lheh jengin, tulai khang dong tamtah hi ngailou lou dingpou angainom uvin, vetlouloupou ding avenom uvin, hichetah tah jeh hin achandiuva lom tamtah achaan lojiu vin ahi.

Ajeh chu anakol uva laphalou lou angaiju va, amituva milimchavai pou avetvet uva, kithaki mat thusimho avetuva angaijeh uva kona mi ijatham khat hi ihetlou vanguva lhagaoboh or lhagao phalou changthei ahiuve. Hijeh a chu, mi tamtah hi, Alungthim normal theita lou tamtah akimun ahi, hicheho pichu Pathen lhagao theng in iti akithopia itih ahuhding ham gellin, nangma tahin jong gelthei ponate. Hijeh a chu, Pathenin nahuhdoh noma anneh twidon vatlouhela naum nomleh Pathen thupehho phate cha a chepi angai ye. Achutilou a eiman ikin bollouva Pathen phatthei bohna sehseh ngading kitihi eima le eima kikilhemlha akihibouve.

Hitobanga kichepna phalou kitiho hihenlang vetnom ngainom tamtah jonghi lhagaova dinga thina thei tamtah umah ahi. Hicheho a Kona jong kichih thei angaije. Lasa them lamthem tah Michael Jackson chu ahinkho satanah akijoh doha leiset chunga minthanna chu anakimu ahitai. Amachu Kum 150 hinna dinga imajouse anagontup ahitai. Ahinla hinkho chu Pathen khut na um ahijehin ama Kum 150 hingdinga akigot vangin, Kum 50 alhinin athitai akiti.

Chuleh athinunga Vangam le damun meidil gamuhon aseinao vachun, Michael Jackson langaijeh a damun meidila um Jong agamuvin ahi. Laphalou ngaisehseh a jong damun kijonjengthei ahibangin, milimphalou vetnasehseh a jong damun meidil kijonthei ahi tihi hetthei ahijenge. Hijeh a chu, games a kitha kimatna kitiho poupouhi Pathen chate din phal ahipoi, eihon imacha a ingaito louvang uvin, thilphalou tamtah hungsoh dohthei ahi.

Hitabang bang chun, milim phalou vetjehleh jonthanhoina hinkho a Kona jonghi hinkho chatvainathei tamtah sohthei ahi ti sumilpou hite. Hichehi isunga imelmapa kilutsah tabang ahi. Namelmapa chu nainsunga ahunglut poupouleh nangman nop nasah louhel ding ahi. Tekahin, juchu nasunga naluhsah poupouleh nalungsung chu akaleh akalou nahingeldoh jeng ding ahi hitobang chu ahi. Hijehchun, sopiteho, chonsetna a hinkho manhi aphatna himhim aumpoi. Hichea Kona chu hunamma kinah kibao, lunghan lungsat lungthimse, lungphalou, angaito nom jiuve chuleh achaina leh mental problem chuthei nalai ahi. Hijeh Chun, aphalou kiphot chu kichemnan neidau hite. Pathenin asimho jouse phatthei boh tahen.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Previous articleNAKINEP NA JOUSE ABEI NUNG IN JONG
Next articleJI KAVEL NEI NOM TAPOI-III