KHAAL TWI THENG
Note: Hiche thusim hi love story toh nampi ngailut nathua hung kibol ahi in,adeh deh a nampi natong or nampi ngailu a pan lahon sim leu hen, elung gel u athah be a kitil khou na a apan ding ekinem uve…
Written by ~S.Nehmang haokip( Zalenphai)
Arrange by ~St kuki
(7085383639)
(Part-2)
~where love story begins ….
CHIKIM NAM MITE DING A PATHEN THILGON ( Amang leh Nengboi hung pen)
…..Noi-lhumlam khopi Tuivai achun pathen ging tah le pathen lungtoh tah Rev.Kunga le aloinu pi Mawii kitite nupa insungah, chapa melhoitah khat le chanu melhoitah chuleh chingtah ucha ni Pathenin ahin petan ahi. A-upa chu Lienjamang akitin, anaonu chu Lhingjoujam akitie. Amani ucha chu aneolai lhonna kipat nungah gollhang ahunghi lhon geijin themjilna lam le nun le khan lam’a akhang gol chanpi lhon jouse ahin khokhel peh lhonin ahi. Anu le apan amani ucha chu pakai maiya chingthei tah in ahin khoukhah lhonin ahi. Tuivai khopi sunga School phadom dom ho a chun Bu som gei ahinsim lhonin, a-upa Amang in class X asim chun anaonu Lhingcha chun Class V111 asim’e. Chuti chun class ni kikah in ahung kilhonpeh lhonin ahi.
A-upan Bu som them vetna a chun 1st Division in pachanna ahin neiyin, chujouvin anu le apan St.Rokunga College, Aijawl khopi a chun ahin kaisah lhontan ahi. Anaonu Lhingcha jong chu kumni jouvin Bu som themvetna a 2nd Division in ahung pachang kit tai. Chujouvin a upa Amang kaina St.Rokunga College ma ma a chun akai khom kit lhon tai. Chuche college achun Amang chu B.A. political science a 1st Division 2nd Division in ahung pass kittai. Chujouvin anu le apan gam lailung khopi kholmun a um Chikim University kiti mun’a chun M.A. simho lah a chun M.A. 1st Class 1st position in lolhinna ahin nei kit tan ahi. Anaonu Lhingcha jong chun St.Rokunga College a simlai ho lah-a B.Com. themvetna a chun 2nd class in pachanna ahin nei kit tai. Hiche kum chun Chikim simlai ho jong M.A., B.A. themvetna a mi phachom thimtah in pachanna ahin neiyuve. Amangte ucha pachanna kipana jal’in anu le apan Pakai vahchoina la asahlhon toh kilhon in heng le kom jouse toh kipana le pathen thangvahna ankong asem lhonin chuti chun gamsung mite jouse hetdoh in ahung um lhon tan ahi.
NAMPI LAMKAI DING A KINEP NA
Hiche phat le nikho ho toh kitoh chet chun Jangmol khopi a inpipu Pu Tunglun le aloinu Pi Nemjavei kiti te nupa chu khanglui laiya Map gam lengte anakiti ahiuve. Ahin tukhang hin athanei nau abeitan, pakaiya hinna dihtah neiya khosa joh ahilhon tai. Amani nupa insunga chun pakai lunglhai na aum kit tan hijeh chun pathenin chanu kisuhtah Jingvalpa tobang a homtho um le dei umtah Lanu Lhangpineng kitinu le anaopa Thongjathang kiti son umtah le monpi umtah chule melhoitah amani ucha chu ahin pensah kit tan ahi. Amani ucha jong chu Amangte ucha banga anu le apan chingthei tah le itcha tah a ahin khoukhah lhon ahiye. Chuti chun chih naleh themna to kithon pakai mitmun ahung khang tou tou lhonin, akhou jangmol khopi sunga um St. Ngulhao memorial Mission high school a chun ClassX geiyin a hung kai lhonin ahi. Bu som themvet na a chun lanu Lhingpineng(Nengboi) chun 1st division in pachanna ahin neitan, Anaopa Thongjathang (Thangboi) chun a unun busom achai chun class V111 asim nalai e . Class ni a kikhepeh lhon ahi. A unun busom achai jouvin anu le apan Chahsat khopi sunga pu Nehlam Memorial College a chun P.U. Arts asimsah lhon in ahi. Kumli jouvin Lanu Nengboi chun hiche College a chun B.A. History Honours 1st Class a pachanna ahin nei kit tan ahi. Anaopa Thangboi jong chun St.Ngulhao Memorial Mission High School a Class X themvetna a chun 2nd Division in pachanna ahin neikit in, chujouvin a unu kaina Pu Nehlam Memorial Colleg, Chahsat khopi a chun P.U (Sc) asim panne.
Chuche kum’a College le University simlaite them lhenna result chu local paper Sumkon, Thinglhang Post, Simlemal Thujahna, Gosem, Zalen Banner, Lamka Express kiti thuso ho-a chun ahung kiso tan ahi. Lanu Lhingpineng (Nengboi) chun pathen ni nIlhah lamin hiche local paper hochu bannei chan anasimin ahileh anam sunguva gol le pai phachom thim tah in B.A. M.A. a lolhinna le pachanna ahin neihou chu asimdoh tan hiche holah a chun a Lienjamang kiti gollhang hoitah leh kineppi umtah Rev.Rokunga le aloinu Pi Mawii kitite nia konna pengdoh ama le anaonu Lanu Lhingjoujam (Lhingcha) kitite ni uchan anam sunga akhang gol chanpi lhon jouse chunga chule chidang namdang te jouse chungvum a pachanna ahin neilhon chu ahin simdoh kittan ahileh nampi thalheng in akithang atpi lheh jeng in ahi. Ama geldan chu anam sunguva simlai ten B.A. M.A. themlhenna a pachanna hinnei sao sao jongleu 3rd class pou ahilouleh atheptah ule 2nd class bep in pachang bep unte tia ana ngaito ahiye.
Hijeh chun Amangte ucha akihetpi khah le akimupi khah jong hilou amani uchan mijouse chungvum a pachanna ahin neilhon chu angaito leh, anampi sunguva simlaite lah a akithopi theiding chun amani ucha bou amudoh tan ahi. Jan khovah hel in akingaiton, “Amang hi kipa pina lekha kithot tei tei leh phabouvinte” tin akingaito tan ahi. Hinla lim le mel jeng jong kikimu khalou laiya jachat umlou ding ham tin aki negation ahi.
Ahin amani akihet lhon lou vang in hiche Chikim nam mite abulput nauva konna lhadoh a aum theina ding uva achung lhonna Pathen khutngap a um jeh chun, jingkho ahung vah phatchun Lanu Nengboi chun ahinkho’a, tha dinga kihen kelngoi banga achi le anam mite dinga akihen khompi dingle thi geiya athi khompi dingpa homtho le lungset umtahAmang ding chun lekha asuntan ahi.
“Ohe, koima che ponte, amani khel’in, achang lhonna bou che lhon ding ahi“. Hitichun lekha asunin ahileh adeimo jep in athah jih kit’in, alunglhai joujep kit pon , athumvei channan hiti hin asun e.—
Kaki sonpi pen Hemang
Nalim le namel kamu masanga kaki sonpi tah Hemang, amasan ngaidam kahin thum e. Hiche lekha kahinthot na a sei dinga lomlou chule ngolhoi thu ajao khah tah jongle neingaidam din kataove. Kahin seinom penchu ahile, vannoi leisetna phat hung kitol na kum sang tampi le phat le nikho phalai tampi kichai nungsang chule lungset na khang kichai kon na chitin le namtin hetdoh hijou talou eiho nam sunga kidang tah a nangman M.A.Political Science them lhenna a 1st Class 1st Position nahin mu chu Local paper ho a konin kana simdoh in ahileh machining kaki thang at behseh jengin amasan Pa pathen chu thangvah na le vahchoina sangpen kape masai. Hemang inam’u le igam’u dinmun kageldoh chanin kalungthim akicholdo thei tapoi. Gam le nam neilou nam mite ebang jeng tauve. Namthi kitiho dinmun igei tauve. Itobanga gam le nam chule pethen le igam sung diuva kalung sunga pohnat na kanei jeng vangin numeiya pengkha kahitah jeh in imacha jong kapodoh joupoi. Hijong le nangman hitobang tah a chidang namdang ho le nam khangtou ho chate ho jouse chung vum a pachanna sangtah nahin mu chu kagel leh numei kahivangin gam le nam thalhengin pachat nale kithang atpina lekha hi sunlou theijin ka umjoupoi. Ijem tia Pa pathenin igam le inam diuva nachunga khutngap anei khat toule, chuche ni le chun keijong neihin geldoh in ong? Hemang ven, kahinkho chule ven igam le inam, Achaina in, keijong mi themna kaphahjou lou vangin B.A. History Honours a pachanna kamu nai.
Dam in, khatvei kimaito a ikihoulim ding kinem in many an jinge. Lim le mel nahetkhahlou nagolnu.
Keima — Nengboi
Hiche Nengboi lekhathot chu ninga jouvin Amangin Goucha kiti Postman pu a konin anamu tai. Lekha bom chung chu avetleh From kitina a nungah min ngeitah Nengboi kiti amuphat chun alungthim akipah behseh jengin alham loiyin asim leh a-itih a anakihetpi khah jong hilou Lanu Nengboi kiti nun chubang tah a akithang atpi a, hinlai khankho a suhmil thei hitalou thucheng lungset umtah tah ho le manlutah ho ahinthot chu asimdoh tan ahije…..
Upcoming(Part-3 ): Amang in Nengboi donbut na lekha ale thot chuleh NOPLEN te Insung…
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
