Home Lahkhom CHAVANG KUT 2022

CHAVANG KUT 2022

73
0
CHAVANG KUT 2022
CHAVANG KUT 2022

Chavang Kut 2022 ahunglhungkit tai. Kipahtah in lem cheh uhite.

from the desk of Pu Sanchong Mangkholen Haokip (freelance writer)

31st October 2022

Itih kum a hungkimangpan ham?

Pi le pu ten, tonlaija ahinman pan ahitai. Hijongleh, hiche Kut golnop loupitah hi mimasaho Pu Holkhomang Haokip, Major Pagin Kipgen chuleh adangdangho hapannajalla 1990 kum chun Government recognised festival lenpen khat ahunghitai. Hijehchun every 1st November hi State holiday dingin eiphondohpeh uvin, loupitah in kumsehleh imangjingtauve. International level chan geijin jong akimange. Vannoi leiset kolkimvel ningli sunga Kuki chate jousen jong amangcheh uve. USA gam a Kuki chaten jong amangjinguve. Tunvang, Manipur Government hetpehna bouseh ahitapon, vannoijin ahetpeh festival lenpen khatnin aumdohtai. Pathen phatna jalla vannoimi chitin-namtin hetna hung umdoh thei ahi.

Koi te Kut ahidem?

Eihon lunglentah in, Chin-Kuki-Mizo te dinga Kut loupipen ahi itiuve. Pendol chun adihthounai. Ahinlah, Chin le Mizo hon eihetphahpeh pouvin, (lungneona thu hilouvin) amani min hi jaosahkhoh angaitapoi. Burma gamsung aboimasangin Chin tenjong kumhei loupitah aneijun, Mizo tenjong Chapchar Kut loupitah in amangjinguve. Amahon Chin-Kuki-Mizo atidehkitpouve. Eihephaloukhat hoptha teitei kitijonghi “konihel” tobangbep ahibouve.

Ipi Kut imajiu ham?

Tua iman u hi ipi kut ham? Chavang Kut ahi. Achutileh, ibolla “Chavang” kiti thuchang hi ijaosahjilou u ahidem? Mim Kut, Chang Kut, lhambuh Kut, lholhun kut chuleh kut dangdang tampi aume. Tua eihon every 1st November nikho a kimangpen hi “Chavang Kut” ahi. Kut kiti thuchang bouseh akimangtheipoi. Amin toh seitha angaije. State pumpia akimantengleh, (example) State Level Chavang Kut 2022 tidingdol tah ahi. Chavang kiti thuchang hi jaosahtha teitei ding tina ahi. Kut festival bouseh tia kichaijengthei ahipoi.

Kut hi demthei ahidem?

Mikonkhatnin Chavang Kut hi apumdemkitne. Jukham-sava atamji jeh a “Ju Kut” ahi tiloijong umdalou ahi. Jukham-sava ho vanga programme chelha mo jong ahidehpoi. Adon nompan donnintin, limsetna mangnompan kimantante. Judon mi chun, Christmas hijongleh adonthouthou ahi. Jesus Christ’s Birth Day bon jabolloumi chun, Chavang Kut nikho leh aloh-kikhap jongleh ipi kilommo dingham? Jukham ho naboipijeh a chavangkut chu nadem ahi. Demsangin thipbehchan gacheda jeng lechun apha ahitai. Kut kimanna value joh chu thupi ahi. Ipu-ipa teuvin eidalhahpeh u Kuki cultural items, songs, dances jouse tahlang nikho, chuleh Pathen thangvah nikho ahi. Kumbul til apatna ulsa longumma tunpi-nisa chuleh goledai noija hungkitongdoh chang le min, lhosohga muchi-chivo ho jouse 0khoptuptheidinga ahung umphatna, chuleh aphat jong chavanglai ahunghitoh lhonna, Pathen in phatthei eibohnau nikho ahijeh a, golnop loupitah kimang ahi. Jukham-sava miphabep hojeh pouva gahdemthei, gahseiset thei Kut ahipoi. Se le pha kicho halna leisetchung ahinahlaijeh in, akiboljouse taimo lou ding, kukal louding chuleh kichihsahlou ding ahi. Ase le apha chu nangma khutna kingam ahijoi. Hiche lhenkhentheina dinga lhohbu eikipeo ahi. Thiljouse chu nangma own choice ahitai. Miphabep in dem jongleh, kumseh leh program chelha thouthou ahi. Doudal inlang demjonglechun, bazaar dempa tobang nahibepding ahijechun, celebrate ding dan leh asemhoidingdan joh boipi angaije.

Itilamdolla conduct dingham?

Hiche nikho tengleh, programme compere hon sappao, kolpao, meilhei pao kitihojong naltahtah a athodiu mong ahi. Ajehchu, State Level ahiphatna milen-milal, mithupi, jaboldinga kilom chidang-namdang jong kikouji ahi. Amaho hetdinga paodangjong manlou khoh ahi. Ahinlah hetdingkhat vangchu ahileh, thinglhang langa patna hungkalsong minu-mipa, nungah-gollhang, numei-chapang lekha helou ho jong jabolding, ngailutding, importance pehding, amahojouse hettheidinga eipao (kuki pao) hi 100% man teitei ngai ahi. English bouva kimanchahna aumtengleh, English helou ho dinga kut kimanna value umtheijilou ahitai. Nangin English, Manipuri, Hindi nahet vanga mijousen ahet ahidehpoi, tihi suhmillouvin aphai.

Nungah mel-hoi kitetna

Nungah melhoi kitetna (beauty contest) kitijonghi seiset thei, demthei ahipoi. Mikonkhat chun, jatdangmi jaosahlouding ahi. Jatdangmiho chu Miss Kut title pehlouding ahi, tia seiloijong adimsetkitne. Koihileh ajaonomchan dinga kot honpehdingjoh ahi. Kut neite chu eihohi ihitauvin, jatdang namdang hon jong pan ahunglah uchu iloupinau ilungletnau kiphondohna joh ahibouve. Beauty contest lampanga hetgilna neiho michomcheh judge ahisahjiu ahijehchun, sihnei-langneina aumtheijipoi. Judge ho mark jouse kigomkhomma, mark mutampen hobou chu loupina lallukhuh akhuhpehjiu ahi. Chuleh, achandiu kipaman sumlepai ho jong hi tulaikhanga dingin alhomvaltai. Miss Kut, 1st Runner up, 2nd Runner up kitiho chun themkhatbeh inchen akisemdohna thei diu sumlepai gonpeh ngai ahi. Title imacha changjoutalou consolation prize hojong alhompenna 20,000 tihovel beh peh ngai ahi. Dress & make-up man maimaijong sum tampi asuhlutjiu ahi. State Level Chavang Kut fund hi tamthou ahi. Manipur Government (Culture department) injong kithopina apeh ahi. Milen-milal akikoujousen jong sum tamtahtah apehjiu ahi. Fund lui hojong hungkikhol khom jing thou ahi. Cultural troupe hoding kipaman jong tamsahthimdeo angaije.

Malaija nungah melhoija kisei minthang khupting, Selneng, Jonlhing, Ahsijolneng, Moltinchan, Malkhawm, Jollhing le Jolphal, chuleh adangdangho jong chu ipu-ipa teuvin nasatah a ana ngaisanguva, vannoija anaminthan sah u ahi. Tulaikhang banga beauty contest mongchet chu ana umlou vanga “Amasangin amanu chu ahoijoi” tia kitetna tobangkhat chu masanglaija patna hung um jingsa ahitai. Vannoi khantouna ahungsan toh lhonna tulaija lhangphonga hoi kitetna hungkiboldoh ahitai. Hiche hi thilse ahipon, Pathen loupi kiphonna joh ahi. Ajehchu, hoikitetna akitengleh, amelhoi sehseh avetjiu ahipon lhohbu chihna toh avetkopjiu ahi.

Kut lamkai hohi khel lele thei ahidem?

Kut Committee hojong ahungpangsot thimtauvin, seiset thei aumpouvin kipapi aumlheh uve. Hijongleh, term khat sempeh a kikhelji ji dingin aphai. Ipikiloikhomna hijongleh, mikhatchun lamkai apohsotval tengleh kikhelna (changes) alhasamnomjie. Kut committee mongmong kaseina ahipon, ipikiloikhomna hijongleh lamkai hi kikhel lele jiding angaije, tithu ahibouve.

Conclusion

Ipi Kut chu hitajongleh, mikhat chun ama lungdeilam tah a, aman dingmong ahi. Hijongleh, eihonvang malaija pi-le-pu te hon kingailutah leh kilungtohtah a kut anaman banguvin mangcheh uhite. Pu le pa te ho chun Kut anamangjiuvin, koima akina, akidel, jukham-eltol, kiletsah hoitho, jonthanhoi kitiho anabol ngaipouve. Amaho banga Kut chu ahinadingdol tah a, mancheh ding angaije.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleHaokip-Veng hung kisemdohlona thusim
Next articleKUKI CHILHAH HON KUMSEH A KIMANG TIL A CHAVANG KUT KITI TUA KUT TIA IMINSAH UHI JING NOVEMBER 1st LEH HUNGLHUNG DING AHITAI.