|| ••HINKHO LAMHIL•• ||
Sl.no. 1016
18th April 2020
CHATE HINA A NU LE PA ADIA PANLAH DING DAN
–Ngul Kipgen (7005411106)
_______________________________
Chanu, chapa deitah nangman iti lam dola leiset a nanu, napa le Pathen lungdei hinkho naman ji hinam? Khangdong nahi le navaigei masangin hiche hi anasim chai teiyin.
● Phattheiboh channa din gamlatah a phatthei gahol angaipon, insunga nanu, napa thu ngai tah’a naum chu phatthei konna lenpen khat ahi.
● Sum le pai holna nei naihih jongle chun nanu napa hahsatna hetpeh inlang aholdohsa lhon chu chingthei tah in mangin.
● Nanu, napa chun thepna, hetna aneilou jeh in mihon muset lheh jongleu nangdia leiset a na Pathen ahi ti sumil hih hel’in.
● Nadei nangaichat ho bolpeh ding ati lhona nabolpeh ji lhon lou chu ajou aseilhon ahipon amani dinga sangval nana tup ji jeh ahijoi ti hethem tan.
● Go le dai kai henlang, tahsa dammona neilhon jongle nalekhasim na a nathaset nalou dinga sum le pai hol jing nanu, napa pan lahna hethem louva lekhasim nathaset chu nanu, napa kinepna nalah mang peh tina ahitai.
● Nanu napa tha lhahsam langa sum le pai holthei nahi jou nung kisana nomtah a uma ima bolding nagotlou chu naki oi mong hinam?
● Insung hahsat dan la namu ngal in ipi dinga von mantam tam, smartphone man tam tam ho nanu, napa koma nasei ngam jing nahlai ham?
● Nanu napan nang chunga akinepna lhon van chan aphahsah jing laiya nang idia kingaipi ding hol’a kisaboi jing nalai nahim? Nanu napa kipana ding nabol masat joh ding chu thupi jo nasah lou ham?
● Nanu, napa a dinga mitlhi longa Pakai koma natao ji hinam? Bolthei nei naihih jongleng taona beh in kanu kapa kithopi inge nati phat hitalou ham?
● Nanu, napa lungset lou khangdong nangin hoiya kona vang leh ham kilah inge tia kigel nahim?
● Leiset hi kikhenna gam ahin, nanu, napan jong nikho khatle nahin dalhah tei ding ahi. Mihing hinkho hi ikipa le dam jong akidamsot jep in, hijeh chun nanu napa damsot ding nanop le kipasah jing lhonin.
Vo Khangdong, nanu, napa umlou nunga nalolhin nikho le kipah tahtah dinga kingaito nahim? tun kipantan. Nang ding gelna a mitlhi long jing, nanu, napa mitlhi chu kipana mitlhi joh nasosah ding hilou ham?
_______________________________
Published by HINKHO LAMHIL
WhatsApp Group
