Paotinlun@Lunn’ Vaiphei
Sunthip Nisa sat pet laitah a Ka Inn leitol uva Haithei (Mango) phung lim noiya kana imut chu, Kahung khahdoh leh Chungtuo Nisa Muolpang lepding kon chu ana hitai.
Alim noiya ka imut na Haithei phunga Sim Ngengchal ngui jinjen a haam2 chun Kaselung ahel sah chom lheh jenge.
Hichun chomlou kah in Thangvan sanga Chungtuo Nisa jong Muolpang ana lep loi tan,
Lomlhang kon ho leh Phai che Zou che ho jong Inn lam juon in ahung Vailhung gam tauve.
Hichun angaima bangin Khosung chu Mihem a ulthet kit jengtan ahi.
Chutia Khosung mihon nomsa tah a hinkho aman uva a ulthet jeng vang uvin, Keivang kipa na ding chang helou khopin kalung kagel2 tan ahi.
Mi gentheiya kahung pen a Gol le Pai ho Otcha/Thangse gunset a Hinkho kaman chu Kei le Kei kaki lhaset in Vangse kaki sa ma2 jeng ji in, achai2 na le kalung jong ahung hang doh jin Pathen kasapset lou cha bou akivat ji e.
Kapa’n adam laiya kadei2 eina choh peh a, eina poh le2 ji a, Lungkham lungdon umlou hel a nui hiu2 cha hinkho kana man a Kaki phin nomphat jongle kana kiphin ji na Lhakeh tasa Kapa/Kajopa ngaina’n koukit thei hitalou phat chesa ho kagah lha ngai ma2 jengin, kipah a kalen lai niu kageldoh kom le tahmel in jong kahung nui lha ji E. Ahinlah phat chesa ahitai ti kahin hetdoh ji tengle Kaki pasal sah lheh vangin kamitlhi ahungpul lhah chu kana heman ji poi.
Achesa 1998 kum chu ahitan, Ka chen nau kho chu (akhomin ki im) Inn 50 vel ahin, Ka insung uva chun Kanu leh Kapa chuleh Kei le kanao khatbou kahi nalai uvin, Keijong Class 1 simlai bep kana hi nalai E.
Kanu leh Kapan gam a Meihol (Chalcoal) aga lhut ji lhon in, Phailanga aga joh kit ji lhon in Sum le pai tampi2 ahin po ji lhon in ahi.
Hiti chun Keiho insung chu nomsa tah in koima nei otcha louvin Hinkho kahin mang uvin ahi.
Ahinlah Nikhat hi Kapa’n Loi le gol phalou ahin pol khatan Vangset umtah in Ju le Sa ne’n hinkho ahin mang tai.
Nilhah seh le Jukham pum in inn ahung ki loi lut jing tan ahi.
Chubanga insung nom te chu tunvang nilhah seh le kaa le mao awgin akithong jing tan ahi.
Nilhah seh le Kapa’n Kanu chu avo jing tan, Numei Nang tobang kadei le atam nai na in a kiche tan tipouvin ahoujin, Ahin la Kanu in Kei le Kanao te khankho ding gelna jal in taona toh thon apang haam2 jin ahi.
Insunga kahusan u angei val behseh ji tengle kholai miho ahung jiuvin, Kapa chu apho uva thu ahil ji ule, Kapan adonbut ji’n ka insung kathu2 ahi nangho kin emacha aumpoi atipeh ji leh Kholai miho jong ahung ji tapouve.
Ka inchen u alhasam cheh2 jengtan, ajo2 na’n nehding kisan neilou khop in kahung hahsa pan tauve…
Kapa’n la ajudon anga/hai deh pon hijeh chun atahsa jong apom pan tai..
Phat le nikho achal jingin Kei jong Gollhang tithei thim2 chu kahitai. Summer Vacation suty sung ahijeh chun, nikhat hi sumlo in mi natong in kakon in ahileh kana toh khoh laitah uvin Ka Phone call ahungin kagah vet le Kapalen ana hi’n kagah pick in..
Kei~ Hello, Hepalen ipi thu hitam?
Kapalen~ Hello Thangboi, agang theipen in inlang hin jon loijin Napa’n anat na athoh lel lheh jengtai.. ahin ti chun Kei jong kaking dot jengin, Gangtah in kaki gong in kana tohna mun a kon in inlang kajon tai..
Haisa the thu pum a inn kagah lhun chet leh, Leiset chunga kaki sonpi pen Kapa ngaitah chu Alaicha toh akitoh chet tan, thucheng khat jong seiman louvin eidalha tauvin ahi.
Kanu le kanao te Kaa na awgin chu kangai ngam tapoi.. katahsa chat thei louvin ka kon den in, Kapan adam laiya chubanga eina suh genthei lheh vang uvin eidalhah phat uchun, kachung uva thilpha ana bol na ho leh eina tilkhouna ho le aphatna ho cha2 joh chu kagel doh in, chuphat in Kei jong koima lhepbi jouhoi hilou dingin Kapa luongdamsa chunga chun Naosen kaa in kakap lhajah jengtai… Aw he kajopa tah chu ka it nalom2 me.. hiche Leiset kikhen na gam hi koidin jong thoh nop chom ponte hijongle keiho insung dingin thoh hah kasa deh ji e.
Hiti chun phatle nikho jong achal jing bangin Kapa aumlou kal kum 5 alhingtan, Keijong chapang cha kahi nahlai vang in Mipa dinmun chu alou theilou vin kahin tuh tai..
“Gulchuh khah louvin Gul gu ahepoi” kiti bangin Mipa umlouna insung vang iti hah a hahsa hitam ti hi ahelou lai jong kitam ding ahi.
Hiche pet chun Kanu jong akum khangdong cha ahinalai bou vin ahinlah Na aha toh jeh le alung gel2 na in Tehse mel apu leu tai. Kanu chu kavet2 ji le kalai ana val in, Lekha aban simbe nom nalai lheh jong leng Kanu natoh joh kithopi a kanao te joh phate a simsah ding ti chu kalung gel ahitai.
Hiti chun School kahai jin Kanu toh kei ni’n na katong ji lhon in Kanao te joh chu Lekha kasim jom sah tai.. Aw he ada pa chu kahi jenge….
Ka Hinkho a ka thilto ho chu vangphatna sangin vangset na joh in eiha lhunkhum joh dan in kagel in, kana toh na a ka gim val jiteng kamoh lhaset2 ji in, kaloi kagol ho kaven ka thang ase ma2 jeng ji e. Ema lam jousea minung phajou talou ding chu kahi tai.
Kahinkho chu jachat naleh kisonlel nan kadim in milah a jong lhadoh ngam ta louvin lhaset na ngen in hinkho kamangin angol doh pai ding chu kahitai…
Nikhat hi kadam mo thim jeh chun inn a kaum in,
(aban hi abul lang banjom ahitai)
____abul langa, kamitlhi ahung pul lhah chu kana heman poi__ kitina ban jom ahitai.
Kumlhun ding kon Chavang lai ahung lhung kit tan, Khosunga Houbung Lamkai ho a kon in Khosunga Youth Camp umdingin thu ahung ging tan ahe..
Hiche thu kajah doh chun kei chu kanui aja bepseu vin, Pathen2 nati vang uvin Pathen aumpoi tin kalungthim in kagel in ahe. Pathen aum tahbeh le hitobang genthei nahi kachunga lhung jong lhung ponte tin kagel in Pathen jong katahsan theipoi. Camp a jong jaolou dingin kaki gel lha tai.
Chuti dinga kaki gellhah tah vangin, Kanu in Camp a jao dinga kap leuva eijol phat a chun nomthei kasa pon amin mai2 a gajao ding kati tai.
Youth Camp chu akipan tai.
Keijong amin a gajao mai2 dingin kache tan ahile, Vangphat um tidi ham Pathen in eikou tidi ham.. Speaker pu Thusei chu Pathen in ahin mangcha’n, Athusei doh ho chun Kalungthim eitongkha val jeng tan ahe.
Phat chesa a ka hinkho mandan ho chu kavel gel2 leh kaki sih val in kakap lha tai. (Pathen thangvah in umhen)
Chuin kadil su’n kisih ngoi2 pum in ka chonset na jouse Ama kom a ngaidam kathum in kap pum2 in katao tan ahi. “Aw Pakai, Na ngaidamna changdia lom jong kahi tapoi. Nangma douna leh Van dounan Hinkho kamangin seijou huoi hilou chonsetna kokhuh thuh tah sunga chun kana lha lut tai, hijongle lungset in nei ngaidam teijin” ti’n mitlhi long chut2 pum in Ngaidam kathum tan ahi.
Hiche ni a kipat chun Vannoiya miching mithem chule Mi haosa hon jong anei joulou CHRISTA JESU chu ka huhhing pu le Ka Lengpa din kana kisan tai.
Lungset hinkho kana mandan chomcha😊:
Kapenthah masang chu ahi tan, Inchen genthei le vaicha kahi jeh leh Loi le guol phajoulou minem nung pen kahi kaki het jeh in kisonlel na’n kadim in, Nungah kadei jong kahel ngam ji poi.
Ahinla nikhat chu kaloipa Lulun hi kakom a ahungin…
Lulun: Thangboi Bhai, Nungah no. khat kan peh d ahe ana kihoupi ji in.
Kei: Assh.. Lun bhai, kajah acha e neipeh da tan.
Lulun: Nop betbut ji hih o no. chun kan thot ahi tai. Amin Boicy (min kipat thu) ahi, phaten ana kihou phat inlang ana kijol in, atin eidalha tai.
Kaloipa chedoh nungin kaki gel2 jeng tan, kakom a nungah thu ahung kiphah poh jeh chun kati akithing sep sup jenge 😊. Ajeh chu kavai chat ka genthei jeh a kaki sonlel nachu thuchom hita leh, kajachat set dan jong chu ngahkheh kahi jeng ahe 😊, Nungah khat komma kahin lungset e gah ti sanga thingphung sangtah khat a kaldoh a hung kile choplhah di kadat thei joh ahi 😊.
Kaloipa Lulun in no. eipeh nu Boicy chu koi ahijong kahe khapon alim le amel jong kamu khah mi ahipoi. Hinlah kalungthim in alim leh amel kagah kisemthu ji in nilhah seh leh kagel2 jeng pan tai 😊. Kalunggel a chun kana kicheng ji lhon in Cha le nao jong kana neipi ji E 😊😊😊.
Alim cha jong kamu khah lou ahivangin Boicy chu kahin moh lungset jengtan.
Thi le thi Dam le dam katin nilhah khat hi kati kithing pum2 in phone kabol tai…
Tring.. tring… tia ring ahung gin deh2 chu kati aha kithin cheh2 jenge 😊😊, Tua isei le nuijat aum thu ahin apet a chu ka ulchim in eichup jeng ahe 😊😊.
Hiti chun Aman jong ka call chu ahin pick tan…..
Boicy: Hello, Nang koi ?
Kei: (chomkhat set sei masat d pen helouva kathip chet) Aaa…. Kei Thangboi kahe Kaloipa Lulun in na no. eipeh a…..
Boicy: Aw.. kahet tah chu.. ipi seinom nanei ham?
Kei: Boicy, ahipoi jachat na jouse kihetmo sah pum in hinsei jeng leng, Kahin Lungset chu o.. Kalungset na hi neisan peh thei le chun kati val e.. neisan peh jeng o na???
Boicy: Nommo sa hih o Kahin lunset thei mong2 poi, Nungah dang ana kivet tan,, atin lunghangthim tah in Phone jong eitha khum tai.
Kahin lungset thei mong2 poi ati jeh chun, thukhat umtei jinte katin Kaloipa Lulun koma kaga che in….
Kei: Bhai, Boicy chu kajol le alunghang thim tobangin aum in ipi ti ahidem?
Lulun: Bhai ken kana sei masat ahi taije nang dinga.
Kei: Aw.. ipi asei hinam bhai.. kalungset mong2 taije.
Lulun: Bhai, nang thu eiha doh thim jeh a chun Ken jong Nalim khat kathot in chuleh Na inchen khosah dan thu alhangpi kasei le ahung lunghang jah in hitin ahin sei je, “Amel hoilou2 toh Vaicha kit nalai, ABC cha jong helou toh chun kaki chen a epi eineh sah ding ham” ati e.
Chuphat in kei jong ngui deh in ka inlam kajon tan ahi.
Hiche ni jaan a chun imu louvin kaki ngaito khovah hel tan ahi. Kaloipan kakom a Boicy thusei ho asei chu kalunga aging2 jengtan ahile kajah acha’n chuleh kei le kei jong them mo kaki chan in, ka matik lou2 kabol doh kha jeng tai tin them mo kaki chan e.
Boicy behchun ka genthei naho eisuh milsah dingham tia kana kinep ahin, hinlah kaki nepna cheng chu Huilah a changvai kithe abang jeng tai. Kei dingin kamit a kon a hung longlha ka lhi kitheh hul tilou bol ding dang umlou chu ahijenge.
Emut ding kati jongle ka emu thei tapon, ka hinkho mandan hochu kavel gel2 jengin ahile ka vangphat na sangin kavangset na ho kasim2 jengtan ahi.
Amasa pen in Kalung ngap na kapa’n eidalha in,
Ka lekha sim janglai jong insung hansat val jeh in kanop kada kibangin school kahai tan,
Mi nei2 kanei joupon kaloi kagol ho hinkho man thangse gunset in hinkho kamang in, chule kalim jong houna chang in einei jing uvin
Achaina a Lung ngap nading a Nungah kahel jongle, Ka mi hinan eihou seuvin keiya kon in ajam mang ji tauve…
Hitia lung kagel2 lai jin Keiya din Leiset chung hi Hin2 sangin Thi ma kanom jo jeng tai….
{Camp a Kapenthah na banjom}
___Christa Jesu chu kahuhhing pu le ka lengpa din kaki san tai__
“Aw Pakai hibang lom a nei ngailut na kidang tah hi ana hethem vah tave leng hibang lom in ana lungmol pong e”
Hitichun Camp kichai ni ahung hitan, Keiho jong kitepna eisem peh uvin, Khangdong nalai kahi jeh uchun Jinei masang se a Numei leh pasal kah a kitimatna (sex) neilou ding, Thengtah (virgin) a Hinkho mang din Pathen min a kaki tem uvin, Soi (signature) jong eibolsah uve, Chujouvin Pastor pa’n taona eiman peh uvin Camp jong Khumkha ahitai.
Kipah tah in inlang kahin jon in, ka insungmi ten jong kipah tah in eina welcome uvin, hichun insung maicham kasem uvin, Ka inko te chunga kana phatmo naho jouse ngaidam kaki thum in.. Kipa na mitlhi longtan thei talou vin Pathen thangvah na kanei tauve….
Ka hinkho chu masanga toh te din sun leh jaan abang jengtan,
Muthim lah a kon a khovah a hungvah lut chu kahitai.
Masanga Vangse kana kisah naho chu kana hetthem lou jeh ahi, tunvang kahe them tai.
Masanga Genthei kana kisah naho chu kana hetthem lou jeh a hi, tunvang kahe them tai.
Masanga Vaicha kana kisah a, Mi nei le gou kana thangset ji chu kana hetthem lou jeh ahi Tunvang amaho neijoulou CHRISTA chu ken kanei tai.
Masanga hoimo kana kisah na ho chu kana hetthem lou jeh ahi, tunvang kahethem tai, Mitcho, elbai chule nangong ho kamu jiteng Kei mit le mai tibah ki kim chet pa chu epi dinga ahoilou kahi thei ding ham, tin Pathen kathangvah thei tai.
Chule Nungah hon eina enghou naho chu tunvang kalbi phatah le Pan lahthah nan kanei tai.
AChan chunga ana lhase jing pa chu tunvang Ka CHAN CHUNGA LUNGLHAI je kahe tai.
Hatchungnung pen Pathen chu Loupi hen. AMEN.
THU CHAI NA:
Ka khanglai chan khompi ho katepna nom chu;
1. Midang toh eima ki tekah lou ding ahi, hichu lunggel genthei kipat na ahi.
2. Nungah Gollhang hinkho man sunga Numei leh Pasal kah a chonset na chu jamsan in, hichu Pathen deilam ahi.
3. Vaichat genthei jeh in kisonglel hih in, Ejakai bolthei Pathen chu tahsan in.
4. Chan chunga lung oi theilou nahi leh, Chan chunga lung oi je dan kijil in, Achan chunga lunglhai ho avangpha pen ahiuve.
Seikhel seival jouse Pathen min in kingaidam ute. Kaki pah e.
Chuleh Asim jouse Achan chunga lung oi thei dingin Pathen in phatthei boh tahen. AMen
Pha nasah na le phamo nasah na ho hiche no. 9774358807 a hin nei hin hilchen be in. kaki pah E.
—
This e-mail was sent from a contact form on THUSIMBU (https://www.thusimbu.com)
