2020 VALENTINES DAY
based on true love story
。，。，。，。，。，。，。，。，。，。，。，。，。，。，。，。
somasa banjom
LHINGCHA: “Heu, kahinkho thusim chu hiti hi ahi,” ahin ti chun, “Heu” ati nalai tah chu kahung kijapi kit in ahi. Ajeh chu ama hi kei sanga jong hatah a tah ahi’n kakum alhom joh jong kasei doh lou ahi.
Hiti chun neh thei kane’n donthei kadon in ahoulim kangai tai.
LHINGCHA: “2012 kum chun golhang khat in eijol in ama chu amin GINNEO ahi. Kei jong chapang cha kahin, nungah hinkho hin mang kigu pan bep kahi. Chule insunga jong mi unu kahi kit e. Chapang cha kahi jeh chun kanu le kapa’n ka dongma nei ding chu ana jahda lhon e. Chule ka u Ginneo vin chubang’a ei jol vang chun kana mu nom pon ahi. Ama’n vang ei lungset lheh e. Nilhah seh le ahung kholai leng ji’n, nehthei tamtah tah ahin cho jin ahinlah kaneh peh ji pon ahi. Nikhat sun in kachang a kaum pat in ahung in, ka munom lou jeh chun houpi ding jong ka gopon ahi. Chutia muh boh let lut a kaum jing laiyin eihin hou in kajah a, “Nao, henu le hepa hoiya che lhon hm?” tin eihin dong in, ahinlah ka donbut poi. Thuchom chom in eihou kit in ahinlah kadonbut chom poi. Ama vang miphatah ahi. Min chubang’a eilungset a lungset mit a kamu theilou chu kei le kei jong kakidat mah’e.
Hiti chun phat achal chal in kum thum lang ache tai. Ahinlah ka u Ginneo vin eilungset na adai chom deh pon masang’a eijol bang bep chun eijol jing nalaiye. Kei jong themkhat nungah lungel kahin nei jep tan, khatvei vei kahin houpi ji tai.
kakho’u hi kol ho toh kachen hal u ahin, velkhat hi kakhouva kol golhang khat in eihin deicha tan ahi. hiche thu chu ka u Ginneo kom alhung kit tan nilhah khat hi aloi ho toh kitho’n ahin vo taovin ahi. Athu kajah doh chun kalung jong ahang thei pon lhaset na in kadim in kamoh ka tan ahi. Ajeh chu kakigel le nungah khat kihi a koima’n ei hel thei lou ding chu hahsa kasa lheh e, ken jong kaloi kagol ho banga hinkho kaman nom ji ahin, ahinlah ka u Ginneo jeh chun gollhang koima’n ei kivop pi nom pon, ka u Ginneo in eihel ahijeh chun golhang dang ei deicha hon jong koima’n ei hel nomlou ahitai. Hiche ho jeh hin kamuda na akibe cheh kit tan ahi.
Nilhah khat hi in a kachang a kaum pet hin ahung in insung’a bench khat a chun ahung kijam e. Kei jong kalunghan thim jeh chun ajah a, “Heu Ginneo, nilhah khat a kol pa chu ebol’a na voh uham? katin lunghang thimtah in kasei in ahile, ei donbut pon thipchet in aum in kei jong kakigel le kalung ahang cheh cheh in, “Pasal nakisah lheh ham, hat nakisah lheh ham, nei lungset a nei dei ahile kalungset nathei ding in um tang ama na voh vang’a chu kalungset ding na kihisah ham, miphalou,” katin ahile in donbut in kajah a, “Lhingcha, kan lungset val jeh le midang chang ding’a ka it val jeh a kabol ahi nei ngaidam in, kan lungset e ibol’a hibang a nakijol a lungset mit a neimu thei mong mong lou hm? ole kalungset na hi alhinglel uma ham? Seiyin ipi bol leng nalungset na kachan thei ding ham nei seipeh in,” atin ken jong ka donbut in, “Heu Ginneo, nei lungset e kahethem e hijong le vel ejat lungthengsel a kalungset poi nei mil jing tan, laidang leng tan kati ham, iti nei jol jong le chun kalungset lou chu kalungset e nati thei ponge. Lungset tah in nei mil jing tan na phat pamai sah bep ahi,” katile ahung lunghang in, “Kum ijat kajol nahi tam, tuni geiya kalungset e nati theilou hi, ole asei hah nahisah ham” kin jong ka donbut pei in, “asei hah poi ahivang in kalungsed lou chu kalungsed e nati thei ponge, etih chan nei jol jong le chun kalungsed lou chu kalungsed lou nahi jinge kihet o.”_ katile ahungding doh in, _”mi ejat in najol jong le kei a nahi thou thou ding ahi, etihchan hijong le na dalha ponge nanup tokah a kajol ding nahi.”_ atin ei dalha tai.
asei ma bang in, aman jong anga deh pon, kei jong kanom chom deh pon ahi. koi lungsed malah kamuda na akibe cheh cheh jotan ahi.
Kei hi insung’a mi unu kahi jih chun toh le tham, cha le din chu kei’a dan in kakigel jing in ka naote jong ka eng ngei pon ahi. hijih chun ka Chun le jo homtho kachang in, ka naote lungsed kachang e. hiti chun insung’a mi nei bang kanei jou lou vang uvi’n, kipahtah le kingailu tah in kachengkhom uvin ahi. ka naote school akai soh kei uvin, kei vang natoh in kanu le kapa ka kitho pi ji e. hiti chun ka chunnu le ka jopan ei ngailu lheh hon e. nikhat hi kapan, *Kenbo, 125,* khat eichoh pih chu ka kipah lheh jing’n ka kipana mitlhi along liu e, hicheni’a kipat tuni chan a kamit a kon kipa na mitlhi long khalou ahitai. hiti chun kaloiho toh nomtah in nungah hinkho chu kahin mang uve. hiche nikho ho chu kou kit thei hile kanom lheh jing e. kaloiho’n dongma anei ji uvin ahinlah kei vang ka u *Ginneo* jih in koima’n ei jol nom tapon koiman lungsed mit in eimu ji poi. hiche hi kanungah lai a hah kasah pen le kagenthei na pen chu ahitai.
Hiti chun *2015 Christmass,* ahung lhung tan mijouse kilungtoh tah in nikho ho anup nathei chan in kamang uve. nilhah khat lenkom kabol pat uvin, ka golnu’n a inlang uva thilkhat la dingin ei tem in kache lhon tai. kache lhon le lampi ahin ka u *Ginneo* le aloiho ana um uvin, kei jong ka kichat jih chun kagolnu kom ah nungche tate, ka kicha e katile amaho jong kakom lhon ahung lhung pei taove. chu’in ka u *Ginneo* in kajah a, _”*Lhingcha*, nang kipui dinga hung kahitai,”_ atin kakhut ahin tuh tai. kakhut lah doh ding kagut vang in atuh chah kheh tan, ka golnu kavet le eidalha tai, chuphat in ka ka golnu kakou in, _”Boishi, khongai o, kei jong nei ngah o,”_ tia kap pum a kasei vang in akijah mosah tan, ahile ka golnu chung’a kalha ase val in ka kap tai.
Chuti’a kap pum pum a kithopi ding ei huhdoh ding kakou vang in koiman ei jah pih tapoi. hiti chun ka dasa sa’n gari sunga ei kailut uvin. ei puimang taove. lam lhung kei in kakap in einung thah diuva ka tao vang in, koima’n kathusei ei ngai pih tapove. ka kigel in ahile gancha tha ding’a ki kai ka bang jing e. ka nu le kapa kangai in, ka naote kangai val in ka kap kap tai. kahinkho’a kalungsed lou khat kom a um ding chu ka gelthei him him pon ahi. hiti chun mun chom lang peh ah ei pui doh tan, nom leng da leng ajinei chu kahi mei tai.
Kei lungel chun Pu le pa custom dungjui a ki inlut a akiche phat le hung kinung le lou dingin ka kigel lha tai. ahinlah lhani lang lhing ding ahitan, ki inlut ding in eipui tapovin ahi. lungmong a kaum thei lou jih in ki inlut in kipui le hung kinungle nom ponte tia agel u ahiding kahet jih chun. lunglhai lousa sa’n, alunglhai bang le alungmong sel dan in kaum tan. ahinlah aguh in ka lonlhi atang thei pon ahi. hiti’a kahung um lhani jou hin ki inlut ding ahin ti taove. kei chu aguh in kipana’n kadim e, ajih chu hung kinung le tah lou ding ti chu kei lungel ahitai.
Ki inlut dingin kahung uvin, in kalhung taovin ahile ka chunnu’n mitlhi pum’a eina lamto kamu chun kipana le lhaset nan kadim in, ka ngong koi in kamoh ka tan ahi. chuin ka chunnu’n insung langa room ah ei puilut in ei hin dong tai.
_*KANU:*_ _”Boi, nei ngai ji lou ham, hibang’a na kingai a ebola nei dalhah ham.”_ ahin ti chu lhaset nan kadim in thu jong seithei talou in ka kap kit tan ahi. ka inkote’n anagel dan uva chu kanup na tah a jinei dan a eina gel u ahi. ka chuti ka phat chun ama jong lungdong dan hitan tin eihin dong kit tai.
_*KANU:*_ _”Boi, ebola kap nahim, nangma nup a che nahim? ole.”_
_*KEIMA:*_ _”Henu, keima nup a che kahipoi, ka dasa sa a ei guh u ahibou’e. Henu, lungsed tah in ka pa kom ah sei inlang nei nung sol lhon hih beh in, kache nom poi, ka umden ding ahitai, Heno.”_ tin ka koi in ka kap tan ahile, ka Chunnu’n ka lonlhi ei thih pih in. _”Boi, kap tahih in, ka nungsol lou ding nahi,”_ atin, lunghang thimtah in ka pa agahetsah tan ahile, kapa jong alunghang tan, _”kachanu nang ho kichipna ding ham, nadei nangai u ahi jong le chabel nahin dop uva nahung thum mo uham.”_ tia akitom jah jah jing chu room a pat in ka ja tan ahi. ka u *Ginneo* in jong ei lungsed lheh e, a inkoten jong lungleng khante tin ahtui dip in eidem uve. hichan gei thu soh ahitah vang in lungsed mit in kave thei him him poi. thu a kibol ka bang jing e.
Sot thim akihou jou uvin, ka chunnu ahung in kajah ah. _”Boi, na pan nungche dinga nasol jong le nom hih beh in.”_ tin eihung thimsei pih tai, ka pa jong ahung lut pei in kajah ah. _”Boinu, hahsa lheh jong le na nungche angai tai.”_ ahin ti chu ka lhaset na akibe in ka kap kap tan ahi. chuin akengbul katuh in.
_*KEIMA:*_ _”Hepa, lungsed tah in nei nungsol hih beh in. kache nom poi. kalungsed poi.”_ tin kap pum in kasei in chu jou in ka chunnu ka koi in, _”Henu, lungsed tah in ka pa kom a sei inlang nei nungsol lhon hih beh in, kn ngai ji val uve, kache nom poi. Heno, nang in jong nei ngai ji hilou hm, ole nacha nei lungsed lou hitam. Heno, sei loi jo kapa kom a sei loi in nei nungsol lhon hih beh in, Heno.”_ tin kap pum pumin kanu kaloh jing tan ahile, ka Chunnu jong ka umchan avet jou lou jih chun akap kit tan, kapa jah a asei tai. _*KANU:*_ _”Ahipoi, Lhingcha pa, nungsol da jing hite mi hibanga da hi, khonung le eini themmo na hung hithei ahi. na gelthei ding le nungsol da jing ta hite.”_ tia kap pum a asei le, kapa jong chomkhat akigel in, kajah ah, _*KAPA:*_ _”Boinu, phaten kigel in, koi acha ngailu lou lungsed lou um ding ham, nang jong nom le chun da le chun ajinei chu nahitai. tua in a naumden ding chu mi vet dinga jong kilom lou, nang titah lou a kei le nanu dinga jong jachat um ding ahitai. phaten kigel in.”_
_*KEIMA:*_ _”Hepa, na cha nei lungsed le ebola kanup nalou a neisol gut hm, kache nom poi, kalungsed a ka kichen pi jong ahipoi, chuti a nei lungsed lou uva nei sol diu le nei that doh jing taovin, chuti lou’a nei sol tei tei uva ahi jong le ka kitha thou thou ding ahi.”_ tin ka kilhaset tan ahile aman jong upai aneilou hitan tin, eidalha tai. chomkhat jou hin eti hung kihou lhah u ham khat teho jong akinung le taovin ahi.
Ka jite’n chubang a eilungsed uva kalungmon theilou chu kei le kei jong ka kidetmo lheh e. abang kum le kei le kei jong themmo ka kichan na kan jong aum ji e. hiti chun lhani kah bep kicheng kahi lhon vang chun nao kana vop man tai. eji umlou a nao vop chu ahahsa lheh jing e. abang kum le kakigel ji in, nao hung kinei jong le echa la kichang pontin, echa pul hindou kit ding, naosen ahung let teng le achunnu ahin holmo ding. aloi agol anu apa toh nom a alenkhom u ahin mu ji teng le alungel thomhao ding dan hole achunnu alhangai ding dan ho kagel jin, apen lou lai vang in apul kadou pan tan kalhiso pi pi tan ahi. abang kum le ka kigelset ji teng le, _”ebol’a hitabang hinkho hi kanei hitam, mi hinkho man bang a, hinkho mang lou ding ebola leiset mihem a hung kijil kahim. apen a jong kahung pen da jing a et ham.”_ tin ka kap ji tan ahi.
Hiti chun phat jong ahung chal chal in *Nov 2015* in naonei dingin kaum tan, *TAMU* Hospital kajon taovin ahi. Pathen lungsed in nao jong damsel in kanei thei in ahi. Nurse hon kakom ah naosen ahin domlut uvin kaven ahile pasal ahin, ka kipah lheh jing e. ahinlah kahet lou vang in, naosen kipui dinga ka jipa inkote’n polang’a anga lhih jing u ahikit e. naosen mel kamu chun ka genthei na ho jouse ka haimil jing e. hiti chun kakom ah kho hephalou in lungmong sel in a emu e. chomkhat jou in ka chunnu le ka tehpi le katehpu ahung lut uvin. naosen pui ding ahiu chu ka ginmo thim jih in ka naosen chu ka koichah kheh tai. chuin ka chunnun kajah ah. _”Boi, naosen pui dinga hung u ahitai. et lheh jong leu hen. eiho a ahilou jih in pedoh tao hite.”_ ahin ti chu, kanom tapon ka kap jah jing tai. ka nao nei jou til ahijih chun thou jong kathou doh thei nai pon hijih chun kalup mun in, _”kanom poi, kanao koima chang thei ponte, kacha ahi, kathisan a peng ahi”_ tin ka kap tan ahile naosen ka ang’a kon in eichu taovin, kei jong kacha kachan natei ding in ka jochan in kachu tan ahi. chuin kin jong, _”ahipoi lungsed tah in kacha toh nei khan hih uvin, ka kom a aum ding nanup lou u ahi jong le, anoi ngol kah beh in nei sin sah tei tei uvin”_ tia aka toh katho vang in eijah pih tapovin ahi. hiti a ka kichu lai tah uvin naosen ahung kap tan ahile aka gin chu ka doujou pon kanucha lhon in ka kika lhon tan ahi. chuin naosen eichudoh uvin akidop doh taove kithodoh a chudoh thou thou ding chu kanom lheh e. adop mang gei uvin kasang in ahivang in aphachom tapoi. ka thisan a peng kacha ahivang in custom dungjui a akisei le kei chan thei ahitah lou jih chun et lheh jong leng ka cha toh ka kikhan mei ngai ahitai.
Hiti’a ahoulim lai chun, athusim chu kalungsed val in, kei jong kalhi asoh liu e, ema kidon lou hile chun kijahcha ding ahin, Beer akikham thim jih chun koi jachat helou in kana lhi nat deh duh jing e. haahaha…….
Chuin phone ka gahvet le *05:30pm* ana val tan kho ana jing tan ahi. keini jong kahung pot kigu lhon tan, kaneh man lhon ka hisap ule *4700Rs* alhing in ka purse ka gahvet le *3000Rs* val bep ana um tan kahung kinjap jing in ahile ka Beer dondoh jouse chu huilah a changvai kithe bang in a kick aleng mang jou kei tan ka limset jing tai. hahaha…..
Chuin *Lhingcha* in ana hetthem hintin a sakhao neo a pat chun *5000Rs* ahin ladoh in ahin pe tan ahi. ka loiho kou ding katile ka story lhon akichai lou lai jih chun, kho jing tajong le vah nalai ding in ka gellha kit tan ahi. Chuin beer bottle ni kahin la kit in lamlen ah kahung vah phei phei kit lhon tai. aman ka kong akoi in kin angong ka koi in lamlen street light vah nui a chun ol ol in kahung kijot lhon tai.
*Part-III ol in sim kit taote*
*hiche thusim akon a nahet be nom nadoh nom aum le hiche No a hi na doh thei ahi*.9402985823
*Presented by*
*THUSIMBU WHATSAPP GROUP*
