Home Chaga Thusim BOI, NANU HOIYA UM HAM?

BOI, NANU HOIYA UM HAM?

267
0
BOI, NANU HOIYA UM HAM?
BOI, NANU HOIYA UM HAM?

Lungset um Thusim

Story and Narrated by
Crosby Haokip

Crosby Haokip kwc
Crosby Haokip kwc

Nikhat kachanun bukong ah an athuhin ahileh, achunnu a ding to gomin kong thum jen athuh tan ahi. Chuin kenjong kachanu Neopi koma, “Boi, ibola kong thum jen nathuh ham?” katileh kachanun kajah a, “Hepa, kanu ding jongla?” atin ahile, keijong kalhisoh tan ahi. Kachanun anu angaival jeh chun anu thi jong asumil leo tan ahi. Chuin kenjong ajah a,
KEIMA: “Boi, nanun eidalhah lhon tah chula,” katileh amajong akap tan ahi. Chuin Kachanun kajaha,
NEOPI: “Hepa, kanu hoiya um ham?”
KEIMA: “Boi, nanun vangam a eingah jing lhon e.”
NEOPI: “Hepa, kaloihon nu neilou, tin eikou kou jeng uve,” atin alhisohin ahile, kapona valin, keijong kakap leotan ahi.

Chuin kachanun anu thusim eidongin ahile, kenjong laina tahin kaseipeh tan ahi. Keiho insung thusim chu hiti ahi…….

Tun kisemthah ta jong leng kajinu damlai chun jule sa kana nen; sunle jan um louvin kana kham jing tan ahi. Janseh leh kana vo jingin, kana ka sah sah jeng jin ahi. Chuleh keini kideiya kicheng jong kahi lhon pon, kanule kapan adeisah jeha kana kichen khah lhon ahi. Kenvang kanule kapa het louvin dongma kana neiyin amanu chu toh kana kilungset lheh lhon e. Chutia kalungset nu toh kakichen ding kanule kapa anop lou jehin kadongmanu kakhenin kanule kapa deitah Themchan toh kakicheng lhon tan ahi. Kakichen lhon vangin kalungset pon; kadongmanu bou kangaiyin ahi. Hitichun janseh leh kakihou jing lhonin, kajinu kana lung himo sah sah jenge. Ahinlah kajinun eilungset lheh jengin kadalhah ding anom pon ahi. Office kikhen a in kakile tengleh bus parking a eina ngah jin, eimu mu phatleh akipah lheh jeng jin ahi.

Nikhat jong hi office kikhenin inlam jon dingin bus a kahung tou tan ahi. Chuin bus parking kalhunin kajinun einangahin, kakum lhah lhah chun kakhut teni atuhin kajaha,
THEMCHAN: “Heu, na natohna nom nom hinam? In-a kahin taopeh jinge,” atin ahinlah iman jong kagelpeh pon, chuin kenjong ajaha,
KEIMA: “Ibola neina nga ham? Tukal neingah louvin in-a anaumin lang toh thei thei anatong jin,” katin kahouse tan ahi. Chuin alhisohin kajah a

THEMCHAN: “Heu, kahin ngaiji chula! In nahung lhun ding kal kingah lel keiji a.”
KEIMA: “Neina nga kitle kalung hang ding ahi,” katin kagih tan ahileh ajinga patin einangah tapon ahi. Ahinlah ajing kit a patin einangah kit jin iti kapho a kahouset vangin anom pon eingah jing tan ahi. Chuphatin ima sei talouvin kaumin aman jong nisehleh eingah jing tan ahi.

Nikhat kadongmanu koma kachen ahile, kajah a kajinu kakhen a amatoh kakichen dingin eihin thumop tan ahile, kanom lheh jengin, ahinlah kanu thusei palkeh a kajinu khen jeng ding chu kanom kit pon ahi. Chuin lunggel khintoh je hahsa kasa lheh jengin ahi. Chuphatin phat khat kakitem lhonin, nikhatleh kicheng dingin kakitem lhon tan ahi. Hiche nia pat chun keijong kajinu eng hot hotin kakisa tan kasu genthei lheh tan ahi. Chutia kajinu kasuh genthei phat chun kanun eihouse tan ahi. Chuin keijong kanu chunga kalung hang tan ajaha, “Kalungset lou toh neikichen sah jeha tua hi genthei taha hinkho kaman ahi nahet lou?” katin kanu kahouse tan ahi. Chuphatin kanu jong alunggim lheh tan kajah a,
KANU: “Boi, ibola najinu nalungset lou ham?”
KEIMA: “Keini kingai kha jong kahi lhon poi. Ken kalungset numei dang kaneiye,” katileh kanu jong alunggim lheh tan, chuin kajah a,
KANU: “Boi, Themcha sanga hoijo le phajo numei dang mu tapon nate.”
KEIMA: “Henu, aum nai. Tua kakingaipi nutoh neikichen sah lhon o,” katileh kanu alunghang valin kangeiphe khatvei eibeh pehin kajah a,
KANU: “Nanopleh kipuiyin, amavang mun chom cheh-a ichen diu ahi. Keima Themchan toh nom tahin cheng khom lhon nange,” atin, insunga alut tan ahi. Chuin keijong kalung hang valin kapotdohin kadongmanu Junie koma kachen ju kijohna muna kaum lhon tan ahi. Chuin aman ju a-order in kadon khom lhonin kakham lhon tan ahi. Chutia kakham lhon phatin kho helouvin amuna kalum den tan ahi. Kahung khah doh chun kaloipa Lelen te in-a kana umin, chuin kenjong kaloipa Lelen koma,
KEIMA: “Len, itia nakoma kalup khah ham?”
LELEN: “Junie in phone eihin bola eihin kou chula. Kahungleh kho helouva nanalup a.”
KEIMA: “Len, ahileh Junie lah em?”
LELEN: “Amajong kham vala aloite numei hon apuidoh tau chu,” atin, chuin kajah a, “Min, ahipoi. Jinei nahitah leh numei lama kikangse jengin. Ajole numei jehin kipal khan nate.”
KEIMA: “Len, nasei chu adih nai. Kanule kapan kalungset lou khattoh ikichen sah jeha hiti chon kahi.”
LELEN: “Chutia najinu nalungset louleh nanu koma seiyin lang da jengin, chuleh nalungset pen toh chun kicheng lhonin; hijongleh thule la kicheh louvin naji angsunga jol sai hih’in.”
KEIMA: “Len, ipi kati mong mong ding ham kalungset thei hih beh jenge.”
LELEN: “Chuti ahile, najinu koma seiyin lang kikhen lhonin; tunvang amasanga hitin chon hih’in; ajeh chu nangdin nop jongleh najinu dinga nom lou ding ahi,” atin, chuin kaloipa thusei bangin kajinu khen dingin kagellha tan ahi.

Chuin keijong in kache tan ahile, insunga kanu anakapin, chuin kajinun eihin mu phatin eikoiyin akapin kajah a,
THEMCHAN: “Heu, hoilanga gachea janlhah a hung kile lou nahim? Henun naholmo a lunggim vala kap ahi,” atin ahile, kalung ahangin kajinu jaha,
KEIMA: “Nangni kei chunga nalunggim lhon angaipoi,” katin, chuin kajinun kajah a,
THEMCHAN: “Heu, ibola em? Hibanga kahin ngaiji a,” atin, chuin kalung hangin kajinu jah a,
KEIMA: “Thil jouse hi nang jeha ahi,” katin kajinu thu ima helou nu chu kahouse tan ahile, amajong atija valin akapin kajah a,
THEMCHAN: “Heu, ipi suhkhelna kanei um ham? Bolkhel kanei jongleh lungset tahin neingaidam o.”
KEIMA: “Tunileh na-in a kile tan, kakoma naum sot behseh tai,” katileh akapin eikoiyin kajah a,
THEMCHAN: “Heu, kanom poi. Naji kahi lou ham? Hoiya che dinga neisol ham? Hilai hi ka-in ahibouve,” atin akap kap tan ahi.
KEIMA: “Tuchan a kaji nahi vangin kahin lungset poi. Eini kicheng thei ihilhon poi,” katileh akapin anom mong mong pon kajah a,
THEMCHAN: “Heu, nang koma kona potdoh dingin neisol hih beh o. Kahin ngaiye. Chapang cha hijong leng kasuhkhelna ho neingaidam o,” atin akapin chuin keijong insunga kalut tan ahile, eihin dellutin kachunga akikhai leovin akap kap tan ahi. Chuphatin nommo kasan alungmonna dingin kalhamon mei mei tan ahi. Hiche nilhah chun eikoiyin alhisoh khovah keiyin ahi.

Jule sa kaneh keo hilouvin nungah-gollhang ho golnopna a kathanom panin kigollhan sah tahin golnop a kajao pan tan ahi. Nom tahin Junie toh kaleng khom lhonin; kajinei he hon eihin doh tengleh kajinu toh kikhen danin kakiseiyin Junie toh kahung kingai jing lhonin ahi. Junie toh kakingai sung lhonin neh phalou lou tampi kahin nedoh tan ahi. Talab, Shikhar, Jalda khaini kiti ho kahin ne pan pan tan ahi. Junie in abona aneh soh kei ahin, aman keijong eineh doh sah tan ahi. Hitichun jule sa kane lhonin, nilhah langin in kahin jon tan ahi. Chuin keijong insunga kalutin ahileh Themcha insunga ana dingin kei eimu mu chun lhisoh pum pumin kajah a,
THEMCHAN: “Heu, nasenji neimil hitam?”
KEIMA: “Kaji nahipoi. Nommo salouvin che tan,” katileh apona valin eikoiyin akap tan ahi. Chuin kap pum pumin kajah a,
THEMCHAN: “Heu, kachung agihin lhagup kalhing tai,” atin ahileh kalung ahangin, chuleh ka-engbol nom jeh leh kakichenpi nomlou jeh chun ajaha,
KEIMA: “Koitoh nasem ham? Amakoma chen lang hilaiyah hung kinung thah tahihin,” katileh apona valin tola atou lhan amoh ka tan ahi. Chuin kanu ahungin eihousen, ahinlah keivang kanom tapon, kikhenpi ding bou kanom tan ahi. Keiman kikhenpi ding katia kalungset lou vangin jankim le athouvin kakikhen lhon louna dingin mitlhi longin taona amang jin ahi. Nilhah ihmut kon tengleh kajaha, “Heu, nakeng nasilpeh inge,” atijin ahinlah kanom jipon ahi. Chutengleh alhase jin alhiso jin ahi.

Phat asot chanin Junie in kichen ding angahlel tan ahi. Hijehchun nikhat hi Themchan ahin kinahpin ahin house tan ahi. Chuin keikoma ahungin kajah a,
THEMCHAN: “Heu, chutia neilungset tah louva ahile, keijong kile tange. Ahinlah henu vang kadalha joupoi,” atin alhisoh tan ahi. Chuin kenjong ajaha,
KEIMA: “Nommo sa hih’in. Keiman kanu hoitahin kisin nange.”
THEMCHAN: “Heu, itiham a tua nadongmanu toh nakikhen khah leh neihung kipui kit tang o, kananga jing ding nahi,” atin, chuin amajong ache tan ahi.

Themchan jong ache tan ahile, kanu louva kona hung kile a inlang ahin jot ahin, lampia akimuto lhon chun akikoi lhonin akap lhon tan ahi. Chuin kanun Themchan jaha,
KANU: “Boi, che ding nahi tam?”
THEMCHAN: “Kache nom poi. Hijongleh kajipan eilungset talouva ipi kabol nah lai ding ham?”
KANU: “Boi, che thei pon nate. Ken na-u koma hoitahin sei nange.”
THEMCHAN: “Henu, ka-u Minlal in adei bangtah numei khat pui peh tauvo. Chutileh ka-upa kipahin tin; ama akipa pouleh keijong kipah kahi jenge.”
KANU: “Chuti ahileh hung damsel tang o boi,” atin akapin Themchan aka tan ahi. Chuin Themchanin kanu jaha,
THEMCHAN: “Henu, itiham a ahung kikhen khah lhonleh namounu kei neihung kipui kit tango. Itihchan hijongleh namounu dinga neihung kipui kananga jing ding ahi,” atin, amani jong lunghel tahin akikhen lhon tan ahi. Ahinlah kanu vang kachunga alung nom tapon; ase apha jong sei chom louvin aumin janseh leh Themchan ngaiyin akap kap tan ahi. Themchan toh kakikhen tah vangin phone ahin bol bol jengin kanu koma akap kap jeng tan ahi. Kei eihoupi nom jeh chun kanun phone eihin pen, chuin Themchanin kajah a, “Heu, kahin ngaivale. Hung kile tange heu. Kamong jou mong mong poi,” atin eingaiyin kap tan ahi. Ahinlah iman kagelpon kanu phone kapen kapotdoh tan ahi.

Kanutoh phone a akihou jing lhonin, akingai lhonin akap kap jeng lhonin ahi. Ahinlah keivang doithua kibum ngol kabangin iman kagelpon ahi. Chutia kanu jong lunggim le lhase taha hinkho ahin man phat chun kum kichai kon langin aha dammo tan ahi. Chuleh Themchanin jong nao aneiyin numei khat ahing tan ahi. Ahinlah kachaʼn kasim nom pon, Junie toh nomtaha hinkho man ding kagel jeha kacha a jong kasim lou ahi. Chuleh naosen jong dei aum lheh jenge. Nikhat anun naosen kakoma ahin puiyin ahile, kanu jong akipah valin akap leovin ahi. Chuin kajinun kajah a,
THEMCHAN: “Heu, naomin Neopi kasah e. Nang henu min aput ahi. Naosen chagat louna dingin um khom kit ta hite. Kahin ngaivale heu,” atin ahileh kanom pon, chuin kenjong ajaha,
KEIMA: “Keile Junie jong kicheng lhon ding kahi tai. Ahithei tapoi.”
THEMCHAN: “Heu, itiham a nahung kikhen khah lhonleh kei neihin mil hih tang o.”
KEIMA: “Kikhen lhon ponge. Aman jong eilungset mong mong e.”
THEMCHAN: “Heu, chuti ahijongle Pathenin phattheina boh lhon hen lang naumpi jing lhon hen,” atin, chuin kakoma ataovin kajah a, “Heu, nanao hin amama angaivalin, hijeh chun keiman umpi tange. Naosen beha kakilhep lung mong louleh mong jou ponge,” atin, naosen kavetleh kalungset jeh chun kanomin,
KEIMA: “Henge, nangman naosen hoitahin kisin meiyin,” katileh akipah valin naosen kiss a bolin achopin mitlhi long pumin naosen jaha, “Kei nanao mama koma naum ding ahitai,” atin, naosen akoiyin akipah lheh jengin ahi.

Naosen in anu angaiyin koima dang adei pon ahi. Aka petʼa anu amu tengleh abi jeng jin, hijeh chun anutoh kakhen nom pon, adam sunga anun akisin dingin kaphal tan ahi. Naosen anu koma aumleh akipa dan seijou ahipon ahi. Kanu ahung ha dammo phatin hospital muntina kapuiyun ahinlah koiman anatna amandoh jou pouvin ahi. Chuphatin Junie toh kakitho khom lhonin kajen lhon tan ahi. Ahinlah Junie in vang kin kahouve, atin kanu dammona a ahung kithah nom jipon ahi. Hijeh chun nommo kasajin, ahinlah mimuh them ahijehin eijol lung dam kit jin ahi. Kasum neijouse ahung bei tan ahile, kenjong nikhat Junie koma kasei tan ahi. Chuin kenjong Junie koma, “Nao, henu damlou jenna dingin sum kangaichan ahithei dingleh neihin hol peh tang o.”
JUNIE: “Heu, lunggim hih o. Keiman hin hol nange,” atin ahileh kakipah valin kalungsetna asang chomin ahi. Chutah chun Themchan ahungin kajah a, “Heu, henu kijenna ding lungkham hih’in. Keiman hin ngaito nange,” atin ahileh Junie jong Themchan chunga alung himon; chuin doctor pa ahungin kajah a, “Nanu hi a-kidney teni fail ahitan, tua hi donor ngai ding ahitai,” ahintin ahile, lunggim nan kadimin kamoh ka tan ahi. Chuin Junie in kajah a, “Heu, lunggim hih o. Keiman sumle pai hin hol nange. Chuleh kidney donor ding jong hin hol nange,” atin, chuin keijong kakipah lheh jenge. Sumle pai ahahsat jeh chun sumpa hol dingin Motbung langa kachen, kapotdoh kaha kanu umpi dingin Junie kangensen kache tan ahi. Chuin kahung kile lamin numei khatin phone eihin bolin kajaha, “Kidney donor ding akimun, tun nanu adamselin atou thei tai,” ahintin ahileh kakipah valin chuin kenjong amanu jaha, “Kidney donor chu koiham?” tia kadohleh aman kajah a, “Kei kahiye,” atin ahile, kakipah valin, chuin kenjong akhomin le ama min kadohleh kajah a, “Heu, hospital a nom tahin kihou na hite,” atin, chuin keijong kipahtahin hospital kahin jonin, kanu dinga kidney donor a pangnu koma kipathu hoitaha sei ding kanom lheh jengin ahi.

Chuin hospital kalhunin kanu koma kache tan ahile, anatou thei tan kakipah lheh jenge. Chuin Junie koma kipathu kaseiyin kalungsetna asang lheh jenge. Sumle pai tampi lut ding ahin, sumle pai ho Junie in eipoh doh peh jehin kakipah lheh jengin ahi. Chuin kanun kajah a “Boi, keidinga a kidney teni hin phal doh chu koiham?” atin, chuin kenjong kanu jaha, “Henu, anaum tang o. Ken amanu chu gapuiyinge,” katin kache tan ahi. Chuin kache tan ahile, hospital counter a tounun eihin kouvin bill receipt eihin pe tan ahi. Chuin kenjong kasim tan ahile, bill lekha a chun hitin akijihin, “Junie in dangka 1000/- apo dohin; Themchanin a-kidney teni ape dohin; Themchan nun dangka 10000/- apo dohe,” tia kijih chu kamu phat chun kakap lha tan ahi. Chuin keijong kalhai jelin kaven ahile, Themchan kho helouva alupa anu akoma mitlhi va chut chut a alhiso chu kamun ahileh kapona valin, chuin ajoulanga ihung ki call na number chu call kabol tan ahileh Themchan nun ahinlah chu kamu tan kapona valin kakap tan ahi. Chuin keijong kalutin ahileh Themchannu apotdohin, chuin Themchan khut kathamin ahileh masanga kanabolna ho kakisihin kakap tan ahi.

Chuin Themchanin kakhut ahin tuhin ahileh kakipah valin, chuin kenjong kap pum pumin ajaha,
KEIMA: “Nao, lungset tahin kathemmona neingaidam o,” katileh akipahin me heu heuvin eihinven, chuin aman kajah a,
THEMCHAN: “Heu, masanga kasei banga chu kei puiya nahung hitam?” atin ahileh na kasa valin kenjong,
KEIMA: “Henge nao, nang puiya kahung ahitai,” katileh akipahin, chuin kenjong ajah a, “Nao, ibola hitobang thil hi nabol ham ong?” tia kadohleh alhisohin kajaha,
THEMCHAN: “Heu, henu hinkho huhhing ngam aumlou phata keima kiphal kahi,” atin ahileh kanu alungset dan kahin he dohin chun kajah a, “Heu, kei hing jou ding kahi tapoi. Hijeh chun nalungset pen toh nomtahin hinkho hin mang lhon tan,” atin ahileh kanom mong mong pon, chuin kenjong ajah a,
KEIMA: “Nao, masanga kathusei chu neingaidam o. Kalungset pen nangbou nahi.”
THEMCHAN: “Heu, kenjong kahin lungset pen e,” atin, chuin akhut kamaiya konin akhailha suh tan kaven ahile, ahinkho abei phat chun kakap tan ahi. Chuin kajinu kakouvin, “Nao, kanom poi. Lungset tahin neidalha hih o. Kenjong kahin ngaiye. Neidalhahleh naosen koiyin avaha alhamon ding hitam?” katin nao kan kakap tan ahi. Chuin naosen ahin puiyun, kenjong naosen kamu phat chun kapomin ajaha kap pum pumin, “BOI, NANU HOIYA UM HAM?” katin ahile, naosen jong akap kap tan ahi. Naosen toh kikhen thei louva tua leiset a melmu talou dinga akikhen lhon kagelleh kapona valin kamoh kaka tan ahi. Chujouvin kanu koma kachen ahileh kanun kajah a, “Boi, koiham?” atin eihin dongin, kapohnat val jeh chun kanu masanga kabohkhupin ajaha ngaidam kathumin ahi. Chuin kanu jong akapin, kajinu jalin kanutoh kakingaidam lhonin ahi.

Chutia thusim mitlhi long puma kasei laiyin kachanu Neopi kaven ahileh alhisohin, chuin kenjong kachanu jaha, “Nao, papa lungmol lheh jongleh ngaidamin lang eini nom taha ichen khom ding ahi,” katileh kachanun kamitlhi eitheh pehin kajaha, “Hepa, mama um tahih jongle lung leng po hite,” atin chuin kajah a, “Papa anne ta hite,” atin, chuin lunghel tahin an kane lhon tan ahi. Keijong jinei talouvin kachanu Neopi toh kacheng khom lhonin ahi.

——THE END——

Kakipahe asim jouse Pathen in phatthei boh tahen.

©️2019, Crosby Haokip, All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleCHRISTA HUNG DING AHITAI KIGOSADEM’IN UM TAN
Next articleDAMNA HI GOU AHI