Home Crosby Haokip BOI, KHAMKIT TAPONGE

BOI, KHAMKIT TAPONGE

100
0
BOI, KHAMKIT TAPONGE
BOI, KHAMKIT TAPONGE

Lungset um Thusim

Story and Narrated by
Crosby Haokip

Crosby Haokip kwc
Crosby Haokip kwc

Bible in, “Khamna thei kiti hi midai chaveiya pang ahin, koihileh khamna theiya lop chu miching ahipoi,” tia asei hi adih lheh jenge. Ajeh chu kachanu Boitheng apen masangin khamna theiya kanalop pan tai. Khamna thei jehin kajinu jong kajen dam jou tapon, bat le thamin kainsung anachup mang hel e. Hichan geiya kanachona bat le tham kahao val jeha kajinu lungthim natna jat khat a anathi ahi. Tununga kagelle kapona lheh jenge kanachonna ho! Jukham hon ahet diu ahin, akikham pet laitah le khun Satanin phat agomkom alah a i-ji icha kivo a inei igou chunga kichu ahi. Ahinlah hiche ho chu ilim doh tengleh akihe kit jipoi. Hiche kah chun nakham jehin naji chunga hem mangkha tale chun avangsea napan jeng ding ahi. Hichan geiya hinkho kanaman chu tun kakisih lheh jengin pasal kahi vangin kadoujou jipoi.

Chutia kakham jing laiyin kachanu Boithengin kajaha, “Hepa, lungset tahin ju don don tahih o. Nakham tengleh kahin kicha ji vale,” atin kapona lheh jenge. Chuin kalhamonin, “Boi, lunggim hih’in. Khamkit taponge. Avelin judon taponge,” katin kachanu akipah lheh jenge. Chujouvin lupna a ka-imu lhon tan, ahinlah kajinu kalhangai valin kamitlhi along long tan ahi. Kajinu thikal kum 1 bou ache nalaiyin, kei dingin aol dom nan kachanu ding kagelle achunnu beiya hinkho aman kagelle kalai anan lonlhin kalong jinge. Nilhang kai tengleh achunnu ahol jin, “Papa, kei mama kangaiye. Kaloi dangho anu le patoh kikim sela Christmas mang khom tading uva, kei mama aumlou hi kakap kap ji e hepa,” atin kalai ana valin kalunga kakap tai. Chuin dukan a kachen nehthei kachoh pehin ahileh akipah valin, “Papa, kakipahe,” atin aloinu toh kichem dingin apot lhon tan ahi. Kachanu umchan kavet ji tengleh lainat nan kadimin, kasenji kageldoh kitin kamai lonlhin achup tan ahi.

Chujouvin insunga kalut in banga kajinu lim kitah chu kamun kakap tan ahi. Laina tahin alim chu kajutin, “Boinu nu, hung loiyo. Nanao hinkho man kave jou poi. Niseh leh nang nahol jin akap kap e. Agentheina nikho asot lheh tai. Hung kilen lang Boinu kichep khompi tang em?” katin kangai valin hakan kakap tan ahi. Chutia kinuh puma ka-ka laiyin kachanu ahungin kajaha, “Hepa, ibola naka ka ham? Kap tahih o hepa. Nang naka leh keijong kakap e,” atin kachanu jong akap tan ahi. Kachanu ka kamu phatin kalhemin, “Boi, papa alungneo vale na? Nang naum laisea papa kap talou ding ahi,” katin, chuin aman kajaha, “Hepa, kei hoiya kachea kadalhah ding ham? Kan ngaichu papa,” atin, chuin kakoiyin insunga kalut lhon tan ahi. Tunvang kachanu jalin kalung amonge.

Insunga minu umlou vang ahah lheh jengin alang bei kihi ahitai. Kalunggim hesohna ho a-ol domna dingin nilhah kon le kaloiho toh ju kadon jiuve. Chutia ju a ngol pei dinga kaum jehin ka-u nun eihoupin kajaha, _“Ibola ju nadon don nah lai ham? Naju don jeha nainchen gep lo a na jinu kisan jong jen manlouva nalhaso hilou? Nahiti jingpeh leh akhoh cheh jo nato thei ahi nalaiye,”_ atin, chuin kenjong ajaha, _“Heu, ipiba kasei ding ham? Avangse kahi meiye. Insunga nanaonu umlou hi ichan a kagenthei hitam? Kholjin mi ahung jongle alamto ding koima aum pon, ivailhun ivaikon tengleh eina lem ding la aum pon, hitia hinkho kaman hi keiya dia thima phachom jolou ham?”_ katin chuin ka-u nun kajaha, _“Ahinai boi, hita jongle tua ipi ibolthei nah lai ding ham? Nachanu hi phatahin kisinin lang hin. Najudon ngan lang nainchen kisemphatin,”_ atin ahinla kahinkho man dan ho kagelle lainat nan kadime.

Nikhat kachanun kajaha, “Papa, ahsa me kadu cha e,” atin, chuin khosunga ahcha kahol in kachon nilhah in tuitahin kane lhonin ahi. Nilhah seh leh kakichem ji lhonin kachanu kipana ding kabol pehin ama akipa poule kakipah jengin ahi. Kachanu hetlou kah leh ju kadon jin ahinlah ahedoh thou thouvin ahi. Ju kanam nileh kachanu maiso alhei ji tapon, chuin kachen ajaha, “Boi, hung o. Ibola nanuh ham?” katin chuin aman laina tahin, “Papa, avelin ju don taponge nati hilou ham?” atin, chuin kenjong, “Boi, themcha kate ahibouve. Khamna thei jong ahipoi,” katin, chuin kajaha, “Papa, avelin don tahih o. Nakham tengleh kahin kicha ji e,” atin, anu damlaiya kakham a insunga kakitom ji ho tuchan’a akichatpi ahi kahen kakisih lheh jenge.

Nilhah khat kaloiho toh ju kadon kit tauvin ahileh kadon valin hakhamin kakham tai. Kahet lou vangin insunga kakitom tan kachanu akicha lheh jenge. Abangle chemcha kamanin, abangleh thingkhon bang le kot kavei poh lah lahin, chuin kainkoten eiman uvin kalimna dingin theithuh eineh sah uve. Chujouvin kaimu mil del tai. Kahung lim doha kahung khah chun amasapenin kachanu kahol masan, kaven ahileh ani angsunga mitlhi vachut chuta kicha taha eivet chu kamun kalai ana lheh jenge. Chuin amalam kasangin, “Boi, papa koma hung o,” katileh kap pum pumin aninu kom langa akihei mang tan ahi. Chuin kalai anan akoma kachen, “Boi, ibola papa nakichat ham? Papan nangbou alungset hilou?” katin, chuin akichepna ho akohin kavet leh kakham pet a akichepna ho kanasuhset peh kamu dohin kalai ana valin, “Boi, neingaidam tang o. Jingleh athah kachoh peh ding chu o,” katin chuin kakom lam ahin sangin eikoiyin kapomin ahileh chomkhat amu pei pei tan ahi.

Sum lo a thinglhang langa chomkhat gaum ding chu kanom lheh tan, ahinla kachanu toh kikhen kang ding chu kanom hih beh jenge. Hijongle school kaivah ding ahitah jehin a tuition fee ding sum hola kache tei angaitai. Chuin kachanu koma, “Boi, nang nani koma anaum inlang kei sum hola kache ding chu o,” katileh anom mong mong tapon akap tan ahi. Chuin kalhemin ahinlah kadalhah ding chu anom hih beh jenge. Jingkah khat matahin kalhim lhahin aninu koma kadalhah tan ahi. Chuin kapot kakigotin kache tai. Lam kajot laiyin kachanu ahung kithoa kei eiholmoa aka ding kagelle kalung ase valin lampia kakap peh tan ahi. Kanatohna ding mun kalhun nailou vangin kile a kachanu mel mu ding kal kangahlal lheh jenge.

Nikhat ka-u nu phone kabolin kachanu kahoupin ahileh akap tai. Chuin kalhamonin, “Boi, ibola naka ham? Kahung tengle nehthei tampi kahin choh peh ding nahiye,” katin, chuin aman kajah a, “Papa, hung kile loiyo. Kahin ngaiye,” atin, kachanun eingaidan kagelle amelmu ding kangahlal lheh jenge. Lhakhat lhingset ache tan keijong inlama kile dingin kaum tai. In kalhun chun kachanun eihin del pheiyin kakom ahung lhunin eikoiyin akipah lheh jenge.

Insunga minu umlou chu aboilheh jengin jinei ding lunggel kahin neitai. Ahinla koima koma kaseinom pon aguhin nungah anom dinga kaginchat chat ho kahel tai. Ahinlah jukham tin koiman einop peh tapoi. Hijeh chun kalung ana lheh jengin kamoh lunghan han jeng tan ahi. Ajo jo nan koiman jong eihoupi thei tapon kachanun jong eikicha lheh jeng tan ahi. Insung maicham sem ding jong kalung a aum tapon ; Houin kaijong kathase tai. Kachanun Houin kai dingin eijol jol jengin ahinlah thou joulouvin lupna a kalum lum tan ahi. Hitia hinkho kaman chu chapang cha ahivangin kachanun apona lheh jenge. Hiti chun alung hang hang jeng bangin hinkho kamang mang tan ahi.

Nikhat hi kalung nopmo na tah aum tan ju kadon in kakham kit tan ahi. Hiche ni jan chun kachanu kakoma akiphin phin jengin ahile kalung ahang doh tan mol khat kalan kavei tai. Chuin hakan akap in ahileh kachuti kham vang chun kachanu ka chu kave joupon kajinu chunga kalung hang tan kakitom tan ahi. Insunga poh chei chuiya kakitom phat chun kainkoten eihung kham kit tauvin, chuin ka-u nun kajaha, “Nao, ipi lungnop mona naneiya insunga kitom kit nahim? Avelin judon tahih in kati nahilou ham?” atin, chuin kenjong ka-u nu jaha, “Heu, vetang! Nanao nun hibanga eisuh gentheiya, tua kachang seh a eidalhah a ama pul kahiti dou dou chu! Nanaonu hi ki-oi hichu,” katin laina tahin kaseiyin, chuin kajaha, “aman nahin muda a nadalhaha nagel ham? Tun vana konin hin ve le aji le acha hinkho man apohnat lheh ding nahet lou!” atin chuin ka jukham husan chun kamoh ham ham tan, chuin kameipum kalan, “Heu, keijong kajinu koma kache ding ahitai,” katin thal long chu keima lam kangat sahin ahile kachanun kap pum pumin eihin dellut in kachunga akikhaiyin akap tan ahi. Chuin kachanu jaha, “Boi, nadam dam hinam? Vetang! Nanun eibolna hi,” katin kalha ase lheh jenge. Kathusei chu kachanu alaina lheh jengin kap pum pumin kajah a, “Papa, chutin ham hih beh o. Kei kaum nai. Nahinkhon nakasah ponge,” atin chuin kakikoi lhonin ahi.

Phat le nikho ahung chalin nikhat keijong kaloiho birthday mang dingin kache tan ahi. Kalhun chun kaloipan ju tampi achon donsah ding eitiuvin ahinla kanom pon ahi. Hijongle eiha jol jehu chun achaina mong mong ding katin kadon tai. Ahinla kadon chanin kanga thei tapon hiche ni chun kakam sunga khoiju lhumin alhum e. Kadon vala katha abei phat chun kaloihon eilah pehun lam kajot thei tahlou jehin amuna eige den sah tauve. Kakham val jeh chun kho kahe tapon jingkah in vaigei tahin kakhang tan ahi. Kakhah chun kain a lum danin kakigelin kachanu kaholin, “Naosen, naosen,” tin kakouvin ahinla eidonbut lou jeh chun kathouvin ahileh vetan kalupna mun chu mundang anahi! Hiche phat chun kachanu kangai valin kain lamu kadel tai.

In kalhun chun insunga kalutin ahileh koima anaum pon, von ho athang deh duh jengin, chuin kainkomte koma kachen ahileh kachanu hospital a apuiyu ahidan eiseipeh in ahileh kakindot jenge. Chuin apet petin hospital lam kadelin, chua chun kachanu chat theilouva anaum chu kamun naingam talouvin kakap tai. Chuin akoma kachen ahileh mitlhi long chut chutin eiven akihei mange. Chuin amai kei lama kaheiyin ajah a, “Boi, kakhelna jouse ngaidamin,” katin ahin ama aham thei tapon, chuin ka-u nu ahungin athu umdan eiseipeh tai. Kakham jeha janlhah a in kakile tahlou phat a chu munkhata tosetna kato ahisah a kachanun eihung hola, chua chu vangset umtah a garin asuhkhah ahidan aseiyin kalai ana lheh jenge. Chuin kachanu koma kakiheiyin, “BOI, KHAMKIT TAPONGE, kham mong mong kit taponge,” katin laina tahin kakap kap tai. Chuin nurse ho ahungun operation theatre a dingin ahung toldoh tauve.

Hiti chun kicha pum pumin kangah tauvin adam teina dingin aguhin katao taove. Pungkal khat jouvin doctor pa ahung potdohin che pei ding agon, ahinla akoma, “Sir, kachanu dinmun iti hitam?” tia kadoh leh lungnom mo tahin kajah a, “Chomkhat ngah tadin hin toldoh pei tauvin te,” atin ache tai. Ache jou jou chun kakiheiyin ahileh kainkote ka kaja tai. Chuin kachen kaven ahileh kachanu athisa a ahintol doh u chu kamun laina tahin kakap e. Chuin kainkoten doctor ho chu case bol khum a heh ding atiuvin ahinla kanom pon kainkote jah a, “Tunia kachanun hitobang vangsetna ato a ahinkho achanlo hi kei julop jeh ahibouve. Athemmo chu keijoh kahibouve. Kham hih leng kachanun hichan geiyin vangsetna toh ponte. Hiche jeh chun hungin inlanga che taute,” katin kachanu longdamsa kakipohin inlam kajon tai. Kaju du jehin kaji jong kachan lon, tun jong kachanu kachan lo kit e. Kangah louleh abana ipi thilsoh hung um ding ham? Keima hinkho bou kivat ahitai. Tunvang ju phatmona kahe tan, he jong leng avaigei chu kahitai. Hiche jeh chun nang jong judon nahileh navaigei masang, nachunga thilse achuh masangin nga jengin. Chuti leh nang dingin vangphatna hipen inte.

THE END

Kakipahe asim jouse Pathen in phatthei boh tahen.

©️2019, Crosby Haokip, All Rights Reserved

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleKAKINEPNA JOUSE ABEI NUNGIN-V
Next articleMIHEM HINKHO A BOL KHELTHEI TAMTAH LAH A PATHEN HOU KHEL KHOH PEN AHI.

LEAVE A REPLY

Please enter your comment!
Please enter your name here