KHAAL TWI THENG
presents
(Thriller and love story)
~St kuki
(7085383639)
(Part—1)
Hiche black mail kiti hi alam lou khat a aguh a mi suh kichat/gim bol a thil khat ngaichat, deichat jeh a engbol na tina ahi, hitobang hi gamchom titahlouvin eiho gam jeng a jong thilsoh khat chu asoh jeng sa chu ahitai, kihil nathei ding le kijildoh thei nadia lunggel thuh tah a kahinjih hi anasim tei u hite.
Hiche black mail kiti hi alam lou khat a aguh a mi suh kichat/gim bol a thil khat ngaichat, deichat jeh a engbol na tina ahi, hitobang hi gamchom titahlouvin eiho gam jeng a jong thilsoh khat chu asoh jeng sa chu ahitai, kihil nathei ding le kijildoh thei nadia lunggel thuh tah a kahinjih hi anasim tei u hite.
………(Love Story)………
Koima hetphah behseh louna thinglhang gam Joumol kiti khoneo cha akon pa Lunkam le a inn neipi hekim akon pathen goupeh chanu melhoi tah Lanu Chongpi chu amani insung a chanu tahpen ding chun ahin Pelhon e, ama nin jong chanu changkhat seh ati lhon in, Chongpi chu a themjil nalam a ema boi loubeh in ahin sun sah lhon e, Chongpi jong chu anu le apa ang a seingai tah in aum jeng in, khosung mi insung mi kineppi theitah khat in ahung umdoh tai. Aum namun thinglhang hijong le Pathen phatthei boh pum chun damsel chan a themjil na lam a class Xll chan chu apen namun kho school, “Vumhao memorial School” achun ahin chai e. Class Xll a themvet na achun first division ahin kijihdoh in thinglhang a hitobang chanvou changjou lou atam jeh chun kipa na maicham in anu le apan Chongpi chu bong khat in alop peh lhon in khosung mi insung kikim in ankong sokhom na leh maicham sempeh na ananei peh lhon e.
THEMJIL NAMUN DING AVETPEH U
Hitichun phat le ni achal in kumlhun kon chavang lai ni jong akichai tan, mijouse natoh kipat phat ahung hikit tai,hijeh chun School kai hihen lang office kai ho ahin, natong mi hijong leh ama ama tohmun lang kijot cheh phat chu ahitai.Kumbul,lhabul ahijeh chun School, College, office jouse akihong sou sou tan, Chongpi jong aban B.A sim ding ahijeh chun alou thei louva College hoi kivet ding chu ahung khoh tai,hiche phat chun anu leh apan hoilai hoilai vetpeh ding ham?tin alung gim pilheh jeng lhon e. Hita lunggim a aum jeng lai uvin Chongpi apaneo chu ahung vahlut kha in lunggim tah a anatou uchu amuphat chun ama jong alung anommo lheh in aseitai—
Apaneo: Heu!! Epi eti a lunggim tah a ana umjeng u nahiu tam?
A upa: Kathei tahih e! “Chanu Chongpi hin aban B.A sim tading a tuchan a hoilai kaiding ham jong kivet peh loulai, aloi agol hola mun chuom² a College hoi College pha a kai gam ding in aki satauvin, eila koima kihetpi umlou e kitiding ham kalung adong e”. Atin lunggim tah chun ahinsei e, hichun Chongpi paneo in chun nommo asatan aseiye—
A paneo: (Heu!! Eti na sopi na u nanao umlou bang a hita1 lunggim tah a nadeh kisot jeng nahim?nanao te eitih a nagenthei’u thoh khompi dia kaum jeng uhi nahet lou ham?a pass lop nia patchun hinsei hilechun sot a admission jong bol chai a umding ahitan, tunia ken kahin kihol lut tho vang in olmo nading aumpoi keiman Chanu Chongpi hi phate cha midang sang a hoijo a mun chuom a College kakai sah thou2 ding ahije)
Atin houlim toh nommo asah nathu asei e. Apaneo chu Sepoy anapang sa pension ahijeh chun amun mun a mi akihetpi chu aum sou sou in akho uva dia chu mibol thei loi khat chu ahi, hijeh chun amun hoipen,akhang tou dompen India lailung a kaisah ding atitan, apaneo chun Delhi a aloi akihetpi khat aumjeh chun amachu apet pet in phone abol pei ngal in akihoupi leh line semthei ding dinmun chun ahung umthei tan ahile, Chongpi nule pa chun kipathu achuti seilhon tai. Phat kino ahitah jeh chun amaho jong agan nathei pen din asei uvin ahile St.Brigade College a simthei ding dinmun chun ahung umtai, hijeh chun Chongpi injong athil apot ho akigut in jeng a kupatdoh peiding ahiphat chun anilhah in anu leh apa in Chongpi chu ahcha khat atha peh lhon in maicham asem peh lhon in anu chun tilkhou na anei in aseipeh e—
Anu: Boinu, jeng a cheding nahi tahjeh in nanu keiman nache masang a kaseipeh nom chu emadang jong ahipoi, naum sung a phate cha Pathen song pum a nahung kimanchah a BIBLE toh jong naki lhakang louding ahije, kol leh vai holah a umding nahijeh chun chondan khandan kisin sah tiho vel a phate cha nahung kiman chah ding sil leh chen ho jong mi vet theidol tah a naum ding, midang in nei leh gou ejat neijong leh kei vang insung genthei akon kahi tihi nageldoh jeng a tomngai tah a na lekha nahin sim a insung a lolhin na nahin pohlut a nanu leh napa keinin kangalel pen lhon khat chu ahi ti nasuhmil louding in nache masang a nageldoh jeng ding a kathu mop nom chu nahi.
Hichun anu chun chanu Chongpi chu alujang a akhot angam in taona aman peh tai. Jeng matah a kipatdoh ding ahijeh chun jan choldo kon in Chongpi chu emuthei louvin a jalkhun chung a akingaito jeng in, “anu leh apa lunghel ding dan, leh ama potdoh kah a kon avet suiding ham tiho agel leh angai ma2 kit in, hiche agel sung chun amitlhin ana lonkhum mantai.
Ama jong ahetman loukah chun ana emu lhutan, jingkah matah in anu in ahung thoudoh in amajong amit,amai akiphet in akisuh theng jouchet leh ahung thah dingpa apaneo jong ahung lhung chet in akipat masang lhon chun anu chun cha ana om min man in Chongpi toh apaneo chu adonsah lhon in, Chongpi chun anu amu le apotdoh kah a etiding ham tiho agel jiteng alha ngai ma2 jeng in gari a alut kon chun anu toh chun aki angkoi lhon in Chongpi chun—
Henu, kapotdoh kah in ana dam silsel lhon inlang kapa toh kipah tah in ana um jengji lhon in, nacha keiman kahung kile kit teng nana dam silsel lhon a neina vailhun lhon ding kakinem e”
Atin, mitlhi vachut chut chun asei e. Anu chun achanu chu lungneo khante ati in amajoh ahung kilunglen sah in aseiye—
Anu: Katee!! boinu, ngol hih in epidia chu kap nahim? Keini jong kahat nalai lhon hime, kathusei peh hochu nalung a kichin jeng inlang hile chun ema aboi umtapon te. Chen, napa neo in nangalel ding ahitai,” atin achanu chu lunglen tah in alhadoh in Chongpi jong a paneo gari chung a atoudoh tan window apat chun akhot in mangpha achuti thot tai, anu injong amit a amuphah chan mangpha athot in alhum mang phat chun alhin achup tan lunghel tah chun a dilkop in alhi ahin kitheh in ahung phei tai, hichun Chongpi pan amuphat chun, “Katee!! Chongpi nu, hagel behseh datan aw! mi nang sang a lunggel theijo ta a..kahe tahih e, numei ho mong mong nache nachan uva nalhiu along thei in,toilet chelou kah seh bou hi nalhiu along poi atin ale tot in,(numei ho lungneo dan ahet jeh chun aloinu chu atot e)
Amaho umna thinglhang apat Imphal (Tulihal) airport jot nading chu 60/km vel ahijeh chun Chongpi toh apaneo chun chomkhat setpi ajot lhon in pung 6:30 am a kipat lhon chu pung 10:45 am vel in aga lhung nah nah lhon in a flight chu pung 11:30 ading a aum jeh chun vangphat pin neokhat amalhun lhon in waiting seat lang a atou lhon in apaneo jong chun Chongpi chu phaten ahoulim pi in aseiye—
Boi, ema lungkham angaipoi, flight a’hi nalhun lhun chu kaloi ho khat nang nang adia na pu te ahin amachun nahung pui ding ahin ema lunggim ngailou ong! Na college na um nading mun, na room hou abon cha aman nagon peh diu ahin phatea seingai tah a nahung um a nanu in nasei peh thucheng ho nagel doh jeng ding ahi, atin pung lhin kon chun waiting seat a chomkhat ahoulimpi in a flight timing alhin ding phat chun lut ding in aseitai, Chongpi jong a huikong tou nading lang jon in achetan a seat aga kihol tai,amadia lengna atou masat pen ding jong ahijeh chun hoilai a touding ham tichu a seat akihol buoi cheng in ave lele in ahile seat khat a chun pasal khat bou anatou in adang a ong mong mong louphat chun last upai in agamoh toutan ahile pasal pa chun ahin hou in seat ejat nahi ham? Nao, ahin tichun Chongpi chu akin dot jeng e(jatdang ho hidia anagel ahi) hinla eimi ahi ahetphat chun alung anom dom in aning akah ahet suhsah loujeh chun a ticket chu avetsah in ahile, “aw!! Dih nahila, adih ne! Ahin tipeh in, namin epi hija onk? Tia ahin doh peileh Chongpi jong chun kihet to nading chun maeseu seu chun, “kei kamin Chongpi ahie, heu” ahinti chun pasal pa chun kei, gogou kamin Gogou! Nanop leh heu gou nei tithei ahe atin ale tot in, flight kipat ding ahiphat chun air hostess hochun epi pi kibol uvin ati hitam agin set jeh chun koima thusei jong akijah pi tothei tapouve..
Flight atou sung chun Chongpi chu a emu mantan ahet loukah chun gogou lengkou chung achun ana kingai in gogou jong chun a emut nop dan chu aven hijeh chun genthei jong leh aman jong lungset umtah alengkou chung ana kikhop sah e, ahet lou kah chun flight chun ajot nau Delhi toulpi chu alhut tauvin, Chongpi jong mi a eu sou-sou jeh chun ahung khang doh tan akom a tou gogou lengkou kho helou khop a ana kikhop chu ahin gel doh in jachat toh kiphatlam akop in hinla gogou chun akiphatlam ahet peh jeh chun, ” namut chim hinam?”ahinti in Chongpi jong ema dang sei thei talouvin ahung moh nui lhah tan, amani jong akiveto lhon in amoh nui lhon tai….Atou nau huikong jong akingah jou phat in amani jong athil ahin kilah doh lhon in ahung pot lhon tan……
Part-1 chu hichan hin ana kichaisah utin, abanteng: Chongpi Delhi aum nading mun alhun a College ho akaipan a athil toho….enasim diu ahitai.koi hile aban kijom a sim jeng ding nom hon Contact number achung lang akipe pen akhu kiphatlam loubeh a neihin houpi thei u ahie…Comming Soon…
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
