Home N Lhungdim BIBLE: PATHEN LEKHABU THENG

BIBLE: PATHEN LEKHABU THENG

79
0

Na Bible hi ichan nahet chen em?

Asun
N.Lhungdim
Thangting House
Molnom-West

n lhungdim
N-Lhungdim

27th November, 2022

Akihet dan in Bible Pathen Lekhabu Theng amasa pen in Greek pao in ana kisun in hichu Latin pao a kileson Latin version akiti in chukitleh athah leh alui tin akikhen kit e.

  1. Old Latin: Latin Bible lui Old Latin version hu A.D 105 vel lai a Greek Bible SEPTUAGINT a kipat a Latin Pao a ana ledoh uh ahi. Amin chom chu ahileh VETUS ITALA (TALALU) akitin ahi. Africa lhum lam a ana kiledoh ahi. Ajehchu Latin pao hi Africa Ihum lang a cheng hon Rome mi, Goul leh Spain gam a cheng ho pao man pen ana hi. Tu in Latin Bible lui (Old Latin Version) chu muding aum tapoi akitin ahi. Tuchan a mu thei alui pen chu Bu 5 keo keo aum in hiche ho chu 1st and 2nd Makabia, Solomon thuchih, Siraka leh Baruka lekhabu ho hi ahi. Hiche lekhabu ho hi protestant Bible a um lou Apokrifa ho ngen ahi.
  2. Vulgate: Latin Bible lui Old Latin Version chu deibang ahilou jeh leh ahung lui tah jehin Rome khopi a Pope Damascus chun AD 384 phat lai chun mithem Jerome kitipa chu hin thah le kit in tin thu ape in ahi. Jerome chun Bethlehem kho ah atoupha in Hebrew pao aga jil in kum 390-405 sung chun Hebrew pao a kon in Latin Bible chu athah beh in ahin ledoh in ahi. Amin chu Vulgate tichu jalhang ahilou leh kholhang tina ahi. Kitepna thah leh kitepna lui ani ni in ana ledoh in ahi. Hiche Vulgate Bible hi deibang hihih jong leh Hebrew Bible a kipat a ledoh ahijeh in Hebrew Bible chedan leh alim amel akimu thei in Bible ki hil ho ding a poimo tah ahi. Abul til in Vulgate Bible hi mi seiset na ana toh jongleh kum jabi 7 lai a kipat chun Latin Bible lui tobang a kibang in ana kipom tan ahi. Roman Catholic Houbung in
    Vulgate Bible chu (Council of Trent) Trent khoppi len AD 1546 chun jah ding in ana pom tan ahi. Vulgate Bible hi Roman Catholic Houbung hon ledoh dang jang lou beh in kum 1000 val lang ahin mang uvin pao dang dang a kile Bible ho jong jah ding ana phal pouvin kum ija ham nung in Vulgate chu English pao in ahin ledoh uvin hiche jou chun English a kiledoh DOUAY version anei toupeh taovin ahi. Vulgate Bible hi Roman Catholic hon nasatah in jana ape uvin ahi.

EGYPT TE PAO IN COPTIC BIBLE: Coptic pao hi Egypt te pao bah khat ahi. Christian te phat kipat til lai chun Greek pao tam tah amang uvin a thucheng alphabet ujong Greek te a ngen amang
uvin Egypt gam a Coptic pao mang in KITEPNA THAH kiledoh ni aum in khat chu SAHIDIC akiti in adang khat chu MEMPHIS leh DELTA VELA lah a aman uh ahi. MEMPHIS leh DELTA vel a ana man uh BOHAIRIC ahi. Hiche Coptic Bible ho hi Greek Bible SEPTUAGINT(LXX) a kipan a
kiledoh ahi.

  1. AQUILA VERSION: Rome leng Hadrian leng let hilai AD 117- 138 a AQULA in ana ledoh ahi. Amahi Juda mi Ponto gam mi ahi. Amahin Hebrew pao thumal chu Greek pao chedan a lalou in Hebrew lam dungjui in Greek thu mal a ana koi jom in ahi. Hiche kiledoh hi abul abal a kiledoh kiti ho tobang khu ahi. Hijeh chun Hebrew pao alam ledoh thei pon Greek pao gil tah tah aki jeplut jon ahi Jew ho leh Christian ho kinil na hung pendoh na Isiah 15:7-14 na a, “Nungah theng kiti chu, PARTHENOS” ti ahi. Hebrew pao in ALMA “ti akigel in ahi. Hiche chu numei nao nei nailou jong hithei, nungah theng tijong ahop thei, Hebrew pao a nungah theng tina thucheng chu “BETULA” ahi. AQUILA chun SEPTUAGINT in ajah PERTHENOS mang lou in NEANIS ana mang jon ahi. Hichu numei nao nei thei chan nungah chapang tina ahi. Apao jah hin SEPTUAGINT Bible sang in HEBREW lang akoh jon ahi.

Tuhin AQUILA Bible kile doh chu muding aum tapoi akimudoh thei akile doh ho lah a them khat muthei houbung lamkai kim khat in a lekhabu sut naova ana lahson hou chu asodoh akimun ahi.

Bible kile doh masa dang a popular ho chung a isei uh banah Bible kile masa dang tam tah ana um in chuche ho lah a milah a kilang pen chu ETHIOPIC version, PERSIA leh SOGDIA Version, ARABIC version, GOTHIC version, GEORGIA Version, ARMENIA Version, SLAVONIC Version,
THEODATION Version, SYMMACHUS version leh adang tam tah aum in ahi.

Tulai a mi in aha man pen leh akilang pen chu King James Version kiti khu ahi. England gam a King James let lai in aki sei dan in miching mithem tamtah achom khom in Bible kiledoh chom chom ho chu ale sah in hiche Bible kiledoh chom chom ho a kon a akito na pen uh kiledoh chu ama leng hilai a ana so doh uh ahi. Hiche chu 1611 A.D lai chu ahi tan ahi.

Tutu in English ah Living Bible Version, Recovery
version, New Revised Edition, American Version, New International Version ti in jat chom chom tam tah ahung umdoh in ahi. Eiho North East a eiho Kuki Chin group lah a Lushei pao in aum masapen 1959 in aban a Kuki Bible 1971 in tutu in vang tribe jouse in ama pao cheh in Bible akiledoh tan ahi.

Churachandpur a tribe ho lah a Bible version tam nei pen chu Hmar pao in 5 tobang aum in amaho chu BSI Version, L. Keivom Version, Bible for the World (Rochhunga Pudaite) Version, Common language Version (Hrilrokhum Thiek) Version, John Lalrosiem Version leh Vaiphei ho hinte. Zou hon jong version ni anei uvin, Paite pao ho a jong version 2 leh 3 aum in hiti chun houbung ahung machal in sum leh pai a akiha bol in tribe jouse Bible le ding ahin gon uchu ahin mu uvin ahi. Masang kum 40 masang chun Bible Society hon acho ding lhom leh asut na ding sum podoh lou ho ana ta doh peh nom lou jehin Zou pao tho ho lah a kiboina ana soh doh in ahi ajehchu Catholic hon amaho Bible a jao APOCRIPHA jao na a khat ata peh uleh houbung keh ni kiso na ana sohdoh tan Kuki pao in jong version 3 tobang ni chu Reference Edition leh CL. Reference version with cartoon picture ahi. Khat pen chu ahileh Thadou Baptist Association hon aledoh uh khat ahi.

Bible hi kei geldan in Pathen thu gil ahin, Pathen thu a kithemchuh Theology sim hon a bol ding in kagel in ahinlah tuthah in sum nei leh English them kahe ti hon amaho thanopna jehin a ledoh un, Bible kisutna pao Hebrew leh Greek he lou a aledoh uhi dih kasa pon ahi. L. Keivom IFS (Retd) in Hmar pao in khat ale doh in Delhi version atiu, K. Vaiphei IDAS (Retd.) in jong Vaiphei pao in aledoh in ipi version ati ham vang kahepon ahi. Vaiphei pao in version 3 um in kahen ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleWebsite That Writes Essays For You On-line
Next articleKUKI CHIN ETHNIC FAMILY HOLEH NAGA HOLEH MEILHEI HOTOH KIKHEHNA LENPEN CHU HAOSA NEI ENGLISH A CHIEFSHIP KITI HI AHIPEN IN AHI.

LEAVE A REPLY

Please enter your comment!
Please enter your name here