AW! SENKHAN LEKIT THEI LOU

✍ Minlien Khongsai, Guwahati Date:06.05.2020

Nilhangkai nidan 2:30 CN vel hin kei jong kino tah a kanei sun Bolero katol a hattah a kalhai chu lampi a hoilou jeh in vutvai khu akitung jeng in Sorkar(Govt.) in eidonlou u lampi asem lou u pou chu kagel leh kalung ahang lheh e. Chavang lai ahin huilhi nem hiuheu anung in nikho vang alum lheh na lai e. Mitin in Disctrict level chavang Kut galdot a aum laitah ahie. Kino cheng a kalhai lai chun, Saijang le Msei Veng kikah Munkhat a lampam a thingphung lim noi a numei chapang kum 6 vel khat ana tou chu kamu jap in ken jong kakhel pai vang chun nom mo kasan kagari themkhat kanung tolin kavet le akoma nao sen khat aum chu kamu in ken jong,”boinu hoi a che ding nahiu hija nang ni ucha chang hilai a chu ipi nabol lhon ham? Tin ama ni kom lam jot to kakop e. Anao chu akipom chah kheh in ei kichat ahi kahe tai. Hijeh chun amun kalhun phat chun neh thei kapen amin kadong in koikho ahiu chu kadong in chapangnun jong seingam lou sasan asei e. School nakai nam kati le kakhouva kakai je class 1 kasim tai ati e. Hilai a ipi nabol lhonham tia kadoh le “Uncle, mummy khulang a lou a khun me ding anche ho aga lou in ken kanao kaumpi ahi. Mummy kanga lhon ahi” ,atin anu umna lam chu agah koh e.
Me di alo jiuva nilhah le bazar a atoupi a ajohji dan u ahin sei doh e. Na pa la boi ipi bol ham chule hoi a um ham tia kadoh le, ” Papa in a aum e. Kei papa apha mo val e, nunu avoh ji. Kei jong lekha eichoh peh nom jipoi” tin lhasetah in chapangchun asei in, apet tah chun kalung atong khalheh e.Ahinla ima bolpeh thei kanei pon, kalha mon’in, sum 100 kapen lekha anakichoh in katileh akilah nompoi. Mummy in eivoh di he uncle tin asei in alanompoi.
Ka kino lheh vang chun chite nucha ho kenga bazar chan ahung diu chu kagel thei pon anu hung chan ngadoh a kilhonpi din kagel tai. Ajehchu hiche meding apoh uva bazar a aga joh uva ahung kile lam teng ule kho jing ding ahitai.
Minute 30 tobang ka nga jou in nupi nu chun meding tampi ahin pon ahung tai. Naosen jong chu aka ka jeh chun kana pome. Ahung lhun a ei mu chun aking dot in nao cha chu ahung kipome. Amel chu kavet le kahet khah to akilou thimin hi nla kahe chen poi. “He o, hoi lang che ding nahi a hilai a na na um ham kipa ume” tin ahin sei in ken jong ” Chapang kahibou e he u neigah tin, nang ho chu ba hoi a cheding nahiu ham ” tin kagah le doh e.
Amai ahin kiphet ngim phat chun amel kahin he doh tai hinla agong valin a upat toh jeh chu katahsan beh poi. Confirm nadin amin kagah doh le ahin sei chu aw he!! Lungset masa nunlui ana hidan ahi. Kei la ka khamul toh kane mul toh kathao thim jeh chule sun glass kakibeh jeh a chu eihet lou dan ahi tai.
Nunlui hita jong le a hinkho chu kapona valin seibe ding jong kahetapoi.Phatchesa kagel doh a munkhat kavet a chatloh louva lung kagel lai in, “He o nangla hoilai Gammi nahi ham koikho nahi hm kamukha ji mo na e. Niseh le hilai lampia kenga bazar kache ji ahi.Keiho hi thing lhang mi genthei tah kahiuve” ahin ti chu kamin jong kasei nom tapoi. Hinla kei hi Hilai a Chavang Kut mang ding a hung kaji bouve tin kamin leh kahi na seipeh lou in kaumtai.
Sen Neo lungset …Aw! Tin lung kagel den jeng tai.
[Hichun aman jong a nao vah toh akop in kiveto lou in kaki hou hou lhon in ken jong gansung thule la ho kadoh in ahet kham kham eiseipeh e. Amahi ka lungset masat pen anahin chapang cha a kana kingai lhon ahitan mun chom chom a school kana kai jeh uva chuleh ama jog numei chapang ana hi nahlai jeh a ana pang det joulou ba hitan tin a school kaina a midang toh ana kingai jeh a ken jong kana kikhenpi a hitia chu ka lekha sim ban jom dia gampam kana jot a kum sot pi in phalou a kaum ahitai. Class 11 a kon Graduation chan chu Guwahati a kana sim a PG hi Delhi a coaching kana chai ahin kalekha sim sung a hin inlam hi kaphah khah lou ahi. Chuleh genthei na tampi umjongle officer khat hi tei tei ding ka gamsung le ka Nampi a ding miphachom khat hitei na dia gunchu tah a Delhi University noi a Masters kajo jou a a JNU a M.Phil bolleh civil service bol kakop a Pathen lungset a UPSC anivei channa a ka hung lolhin a IAS a dia qualified kahung hi a chuleh Training kahin chai a tule tua hi Guwahati, Assam mun a posting kahi pet tah ahi. Munjousea Kipapina thuthot le chief guest a dia kouna kana mu vang in ka pen na Gam kahung kon doh na Gam a KSO Karbi Anglong le District level Chavang Kut Committee hon Jingun a pangdia temna eihin neijeh uva keijong hiche kin a dia hi hungdoh kahi e. Chuleh tua Kuki Munpi, Sukhanjan mun a khu In kakichoh a a hilai a chu ka pan sat pet ahi.]
Nao avah jou chun ahileh keijong kakino in nang hojong nakhojin diu ahin iche tahlou diu ham tia kadoh le kiphalam tah in “He O, nang che jeng o keiho nucha hi ka kisop lha jeng un ol a keng a hung taoving e, na gari kasuh pol deh duh kholo diu ahi” ahintin ahileh achanu in “mama gari a katou nom e uncle in eipui diu le che ute” tin gari um na lam a alhai jel tai. Anu in akou vang in akijah mo sah jeng tan ahi. Hichun ken jong “ Kiphalam hih o hiche gari pou enet le asop theng hahsa jong ahipoi chen kino ute” tin a A mepoh bang chu ka gari a kahengdoh in akiphatlam sa sa chun kahung kitol taove.
Ken la ama koi ahi kahetan, hinla aman kei eihet doh lou jeh chun kakisei doh deh poi.Kiseidoh ding chu hahsa kasha lheh jeng in ahi. Lampi in kakihou peh-un ken jong a insung thu le la o lol in kadong in ahi. Ahileh hoilai kho pen a na chen u ham chuleh na jipa hin ipiaboljia nang ho nucha hitia me ding pou najoh uva nao sen toh kikopmo tah a nahung ham kati leh seinom behseh lousa san hitihin eihin donbut e. “Kei ho hi tua Saijang kho a kachen u ahin cha thum kanei tan a lenpen nu le aneo pen hi ken kahin kipui a alai a pa hi apa toh in a kahin dalhah ji ahie. Saijang a jong dukan kabol lhon in kaloipan anga ji ahi.Chuleh kaloipa hi kakichen til lhon chun aphanan ka inchen lhon jong ana hoi jin chomkhat jou a kon in Ju le sa ahin ne pan in tua hi inchen jong gep deh ahitan jing le nilhah a an neh ding kiki hol thua ahijeng e. kei ho nucha hi hitia hi bolthei thei kibol a kakivah jeng u ahi e. Dukan jong kabol lhn in ahivang a ken kangalou le ima cha alap aum doh ji poi. Kakinepna hi nikhat le masang a bang a kajipa ahinkho ahung kikhel a inchen louchen jong masang a bang a ahung kile doh a chapang ho jong ading bang a kahin vet thei lhon ding hi katao ahijeng e . Ipi kiseile tua Numei akihin khatvei ijot kal chu genthei hahsat jong thoh dia kiche ahitan tia ha pan a kapan ahi.” kenjong kalha mon in “ Olmo hih o Pathen in na kinepna na molso sah tei ding ahi” kati peh e. Ahileh tua me ding hi hoilai a najoh diu ham tia kadoh le, “Hidipi bazar ni ahin khulai a khu mahajon khat in apun a alah ji ahin amakom a chu kaga joh a kahung kile pai diu ahitai” tin eihin donbut e. Ken jong kagel in hahsa sa khulang peh ache sang un kikichoh tante katin “ ahipoi, ken jong meding hi kadei in abon a ken kichoh tang a ijat man di ham?” tin kagah dong ngal in ahileh “ipi jong tam di ham he o, 900 man ho bou hinte” atin, ken jong ahileh “ken sang khat in kilah tang e katin sang khat chu ama kapen achanu chu “boi lekha nakichoh na ding din Rs.500/- kapen Karbi ho kho,Kanya Bey a chun a kum un Auto khat saijang a din kasol peh tai. Kaki sah boi cheng chung u chu mikhat in eive ve jeng un kakichai u chun kejong Sukhanjan lang a hung pai ding kati leh amachun eihin nai in “he o kei jong Sukhanjan che ding kahin ikilhon thei di ham Auto kanga nga jeng vang in kamu joupoi” ahin tin “kenjong aphajeng e kachanga kache sang in kilhon nate” tin kahung lhon tai.
Upa khat ahi tah jeh chun heo eiti jeng vang chun kaki oi pon a in ho ka doh a a kum kadoh le vo katei, ami chula ka neo lai uva kho khat a kana chen khom uva kum 12 lang kimuto lou kahi tah jeh ule ama ma ama jinei jeh leh lou na atoh toh na a gep lhajeng da ahin hia chun ken jog kadong in kei nei het em kati leh “ Kahe hih beh e koi nahi ham eiho gam a kamu kha mo e atin, Ken jong “Jongsan nahi jeng e na loipa Mimin chu kahi e. Ineo lai uva ikhouva He pute hon a thei I guh jiuva mol a eise ji u chu nahet lou ta” tia kagah seipeh chu alungjong adong in, seiding jong ahe vah tapoi. “Ash! Bhai Nangvang lungmonpi naum val jeng tai, Nang thu chu akija jap jap ji in namel mulouna asotval tan kahin hetlou nahi e. Eiti lah kigep lhajeng ta a, iji icha te vah na dia kilungkham a ahi, tunia gel phah lou a ikimu to hi kakipah val e. Pathen thilgon hinte” atin Bokajan a Jinu naonei ding a aum thu asei in ken jong apha e keijong hung nang in tin kakihoupeh lhon e. Hiche a chun ken jong kadong in” Bhai ajoa gari a kahin pohnu chu nahet chuna katileh “ henge kahe e na first love nu chu ahie” ahin tin ahung tot ngal in ahi. Ki go lhansah til lai a chu nungah hel a kana che khom jiuva ima jouse kana share jiu ahin lunghel bon aum jeng e. Ahileh ain chen akhosah u itobang em tia kadoh le “Katei seida jeng o lungset aum lheh e. A school kaina a anakingai pi pa chu ahin lekha jong class 12 chan vang ajou in hin la ima a man thei ahipoi. Ju aha don lheh jeng in aji ach ate din monpi a um mo lheh e” atin ken jong ipi khoh em hichan chu ahileh service ama kivah na kham bol peh thei ahi katileh. “Na ha khohsah na e. khutia nangai to peh thei leh hin ngai to peh o ahin tin” ahi.
Kenjong kaloipa kom a Nangla ijat chan nana sim hinam katileh “Keijong 12 chu anah nah in kana pass e “ ati. Hichun kadon but in ahipoi bhai Chavang kut nileh ama jong chu hinpui in lang na document lhon hin kichoi lhon in lang hung tei tei lhon o Programme kichai le kakimu pi nom e tin kaseipeh in Bokajan Hospital a aloinu umna a chunk ache pa lhon in chomkhat katou in kale thim jeh chun inlam kachen sum jong kithopi nan neo khat kape e.
In kalhun in kakisutheng in ka inkoten an neh jou in maicham asem un kakichol taove.
Jan khovah imu mo hel in kalung kagel in sun a kakimu pi nucha chu kagel gel jeng tai. Keini hi chapang cha kingai ana kihi jong le kana kitepna lhon chu Phatea Lekha sim cheh a Nikhat le lolhinna inei teng le bou kichen ding tihi ahi. Nu le Pa ten jong ahesoh kei un eina phatsah soh kei nao ve. Khochom chom ana kihin ei sang a amaho chu inchen jong anahoijep un aneo a kon munchom a school ana kai u ahitan, eiti chu khosung a gep bet but a ana ki kai mai mai ahie. Hijeh chun akikimu kha lou a ahi. Class 10 kahin sim kum in kiki gollhan sah tillai ahijeh chun akhouva Christmas le New year kikah a Students meet aman diu kahet jeh chun ka golpa toh kaga che lhon in akinman nao a kaga lha lhon in hiche lai a chu ama class 7 bep ahinalai in ahi. Chule Kei jong chu Laa khatbeh sa din eitem un kenjong “Gollhang hnkho mang in kabolna sadar hills dalhan” tite khu choh thet in kahin sa e. Traditional Fashion parade ahin bol nao va kana mudoh in hoi kasah dan dan chu kangai na aum paijeng in ahi.Love at first sight atiu chu ahitai. Amelput dan le atahsa poh dan jong adong hoi lheh jeng in kalunggel a chun ama bou kanagel tan koiman vang eihet peh poi. Proramme kichai in ain uva kholai a kaga chelhon in uva k ache pa lhon in chomkhat katou lhon e.Kagah dai in “ Fashion parade a jao lah a ahoipen nu chu nahi chuna” kagah tile jahcha tah in “ Heo hoilah kahoi pen hih e. Nang joh chu nahe lasah them. Nungah ho chun nang bou na star uve” tin ahung tot pai jeng in ahi. Hichun kamin hou kakiheto un kei ni jong ajan jan in kahung kile lhontai. Lamlhung kei in kaloipa khop leu in ama thu chu kahin seipi tan ahi. Ka loipan “ Bhai, nadei le jol pou pou jeng o ajole midang in ana kijol khante. Tulai pahcha ho chu mijousen adei ahin ajole na chaan lo di he” tia ahin sei chun kalung gel akichom dot dot jeng in. Ka itna asang cheh cheh jeng tai. Ahinla kaseipeh kit in “ Bhai keivang Class 10 kajo tokah a dongma neilou ding kati ahi e” kati leh a eujah in “hichula, Kon Nang class 10 jo chu ngah ngah jeng veh tachun, khongai ngai le chun chang veh ta chun” tin ahin sei e.
Kum le lha phatle nikho a hung chal in class 10 final exam ding kahi jeh chunk a school kaina lam kana jon tan Class 10 jo a Nungah hel ding kal bou chu kana ngah lel tai. Phat tin a ama gel jing in chomkhat chu lekha sim thei lou leu in kaum tan ahi. Hijongle kakithah gel in ama kadei le lekha kahsaim angai e tin lekha ha bol in kahin bol tan March ahung kichai in April 2nd week a exam jouse kichai in Inlam kahung potdoh tai.Loiteho jong class 10 exam chai in ahung doh sao sao taove. Hiche laitah in Lhingboi hi Churachandpur a school akaipet ahin, summer vacation a ahungdoh kal chu kangah lel lheh jeng e. Phat ahung chen July 20 nin matric result apot in 1st division a kahung pachang tai. Lhing boi te ucha chu 15 July lah a hung potdoh ahitaovin hinla class 10 result pot jou chu kanga mong ahi. Result out jou in kaloipa toh keini jong ka pass lhon tah jeh chun kana gel bang chun Lhingboi a ding letter kajih lhon tai. Hinkho a amasa pen letter sunding akihijeh chun ahahsa lheh jeng e. Hinla kamcheng a sei jengding kangaplou jeh chun anoi a letter hi kana lhot tai-
“Hinkho a dia kalungset Lhingboi,
Amasan keima kamcheng khel a hiche letter hin sol thei ding a kaum jeh in phatpha eipea Pathen kathangvah e. Tahsa dam a naum ding kakinem in keijong kadam nai. Na phatle nalunggel jong pamai nasah maithei ahin hijongle hiche letter hi neina simpeh tei tei in tin kahung taove.
Tunia nakom a kahin seinom chu ahile, Ningkum a nakhouva Simlai hon programme naman jan uva kahung mudoh a kon chun kaselung a nangbou nacham jing tan, na melhoina le na phatna hon kalungsung alodim tan Nang ngainan ka hinkho agenthei lheh e.
Ka lungset na thu sei ding hi kana gel na asot tan hinla Genthei hahsa lhing joulou kahi jeh in kakisonglel lheh jeng e. Hinla Phat lel ni achal bang in kalungset na jong achal jing in tunin vang apilhing tan ka imjou tapon hijehchun kisonglel pum a kahin sei jeng ahitai.
I len nao mol le lhang mun chom chom ahijeh in phattin a kimu nom jongle kahung thei jipon kahin ngaina asang cheh cheh jeng e.
Lhingboi, Kalungset na kahin sei hi totnan neina gel peh hih in. Chpang hijongleng kumkhoa pahkhom pi dia kahin deilhen nahitai. Ahinla Ijemtia lungset dang nanei ahitah jongle neihin seipeh in lang ahinla nanei lou ahinah nah le vang kei din lung hingel tei in tin kahung taove.
Nalunggel hi tu lele vang katipoi, summer vacation kichai a nakile kah in neihin seipeh tei tei in Aw!
Kakipah e. Na donbut na ngah jing , nahin lungset keima,
~Mimin”

Chunga lekha hi ka choi lhon in Lhingboi te Kho a kaloipa toh Sunday khat kholai a kaga che lhon in aloinu Chichin kom a kape lhontai. Nilhah le kikhopna a jao lhon tang o na tin kikhom ding in eijol pai pailhon tai. Keini jong sun a loile pai dang dang ho kom a kholai kavah lhon in Nilhah hou in kakai lhon tai. Lhngboi le Chichin chun special number khat asa lhon in lasah jong ana them kit nalai in ahi. Chichin in kikhen a “He Min, hung lhon o Ka loinu te in a cheute” atin, keiho jong jahcha pum in kache phei uve. Kei ni kivet dan chu nidang abang tapon, kaki jachat to lhon dan chu lamjot jong ki nervous doh jeng ahitai. Kaja chat toh A in u bilha hap a a jol khat akoi uva chun ka dehpang tah kakita kit nahlaiset e.
A in u kagah lut leu anu in “kate Boi kipa aum lheh e in a nahung, na in uva hungdi kati leh kakiman hih a Nang ho kho a Nang ni hi Class ten hoitah in ahung pass e atiuvin kahin kipapi lhon e. Nahung pet pet lhon a an ne lhon in lang che lhon in” tin an nedin kaumkit lhontai. Keiho kihoukah chun khatte ni chu room sung langa a anui jah jah lhon in keichu kajah acha cheh cheh jeng tai. Chipet tah chun a nun an hon ding in a kou in ahileh aman “ Heno, Ima khat kabol lhon e minute 10 joule hung hon nange amani jong ipi kin oval deh diu ham, gei tah in chelhon nante” ahin kiti nopsel e. Keinin jong akhohpoi heno ol a kiche jongle akhoh poi ka ti lhontai.
Hiti chun an kane khom un kahung kile dikon lhon a Chichin in kaloipa imakhat agah peh chu kamu lhih tai. Chibai kakiboh un kakikhentaove. Kahung lhon in akho u kakhel chun kaloipan lekha chu eipe in “hijo bhai, nakinepna hi atah toh e” tin eihin petai.
Kho ajintah jeh chun kasim thei lhonpon inlam kino tah in kahung lhontai. In lhun chun Thaomei kaki vah lhon in tapkong a katou lhon in kolbu kigo tokop in ol tah in lekha chu kala doh in tamsah lam kanga in ka sim tai. Alekha chu anoi a bang hi ahi e.
“He U Min, Lungset na lekha neihin peh chu kamun kakipah lheh e. Nathusei jouse chu kahethem e. Ahin kei la chapang kahinalai in dongma nei di vang kagel thei naipoi. Chuleh Manipur a kaumna lang a jong kingaipi kanei hih nai. Nungah melhoi aching athem hijat lah a na lungset na neichan hi kakipah in vangpha jong kakisa e. Ahinla tu in vang dongma nei ding kagel thei naipoi. Neilungset mong ahileh neingah ta di o. Kalunggel khat kasei peh nom in 15th August Inedpendence day ni khule Khosung a Sports Kaman diu ahin Lungset tah in hung o. Ikimu kit kahsen Pathen in naum pi jing tahen.
Keima
Lhingboi”
Phat ahung che che in 15th August ni ahung lhung tan kei ho kho jong mi ijat ham kaga cheuvin team kalhin lou jeh u chun amah o kho Football team le Volley Ball team ho a ei kilah un Sports kamang chai taove. Hichun nilhah in ka loi dang se se an ache tan keile kaloipa chu avaigei pen in kache lhon in Lhingboi le chihin toh kakivop uve. 630 Pm vel chun amaho kho kom chan eihung thah in chomkhat kihou hite katin songchung khat a kakitou lhon in kaloi te ni chun akom a eingah lhon e. Ken jong akhut katuh in “Lingboi, Na letter a nahinsei chu kamun kakipah lheh e . Hinla Keivang Nang lou in kamong jou tapoi. Chapang upat thu aumpoi. Tunia kingai jong le hen kicheng pai hite tina ahideh pon. Pathen in dam na eipeh a lekha kahin sim a ka keng a Kadin thei teng le bou ikichen di ahi e. Hiche lang teng chun Nang jong ana pilhing tan n ate. Hijong le Lungset na hi Totna ahilou jeh in phaten kigel in lang nalunggel sei in . Kei ho hi inching lou jing le nilhah a nehding kihol thu kahiuvin Lekha jong ichan kasim jou di ham kahepoi. Neikineppi nabang jong kahi joulou maithei ahi. Nalunggel hin sei tan” tin phat kapetai. Hichun aman eidon but in “He Min, Nalunggel chu kadei e hiche chu kahet nom jeh a ama sa a chu ima kicheh tah a kahin seipeh lou nahie. Genthei neile gou ima ding katipoi. Miho a kon a kahet doh chu Nang hi miphatah chule lekha gut tah nahi na ban a Pathen hemi nahi ti kahenkalungmon pi lheh e. Nei jol chu ka nu jong kaseipeh in aman jong aseipi pen chu ajole lekha sim chai lou in kicheng khaovin nate. Ahithei le dongma bol vah hih in . Ahinla Na lekha sim u tongkha lou hel a na kingai thei u le akal val um di ham. A insung anu apa jong akiki hesa ahin aphajeng e atie ati. Ahinla keivang kakisong jou poi. Kei sanga hoi le pha aching athem nahin mu ding ahin ajoleh nei lhaset sah dem tin ka dip adap e. Ipi hile neilungset le Lekha ha sim in hin sim o . Ken jong Nang tailou lunggel dang hin nei da tang e” tin aban seibe vah thei lou in aum tai. Kei jong kakipa val jeh chun seibe ding helou in chomkhat kathipbeh in chu in “ Lhingboi, kakipah e. Kisonglel pum a kahin lel kalungset na neisan peh kakipah lheh e. Nei songlel hih in. Nang kei a dia dettah a na pan laisea huipi gopi kinong hen lang nisa sa jong le na da lha pong e. Kipah tah in nei sol in. Ima lam ding gel nan lekha ha sim in hin sim ing kating nikhat le lolhing tah a I lungtup imolso ding kinem hite” katipeh e. Aman jong henge “he o, ikingai na vang hoilai in um jong le hen tuhdet jing hitin, eisuboi thei lah a kon in kiveng pha hite. Hung hapan in. Jan jong asot tan kile lhon tang e. Nang ni jong lungmong in damsel in che lhontan” tin kaki hou chai lhon tai. Keini jong inlam kajon lhon tan ahi.
Hiti chun keijong Guwahati khopi lam a Lekha sim ban jom din kana che tan, amaho jong Manipur lam a ache un lekha sim ajom peh un. A school landline number u eipeha chun PCO a kon ka call ji in. Abang kom le letter kaki thot to kit ji lhon e.hiti chun ken jong class 12 kahin jou kittan. Aman jong class 10 ahin sim tai. Lungdang ima gellou a hitia chu lungmong a kaum lai hin ni khat lekha eihin thot kamun, hiche a chun thu tampi jong akisun pon, chomcha in hitin akisun e.
“U Min, Ikingai lhon a pat ka Lekha sim hi atongkha lheh jeng in tukum ma class 10 ka peh di ahin phatea ka sim loule ka fail tei di ahi. Nei Lungset a ka lekha sim doh ding na deileh nei haimil jeng tan. Chuleh hiche hi koima kom in sei hih in chule ka lungset lou in jong gel dan. Nein a ngah jing in lang class 10 hoi kei a kajo teng le kithah ngai kit nate. Kabol khel ahi jong le neingai damjeng in. CHuleh call hihen letter hijongle ima hin bol ji tahih in ka principal pao in ajah nom jipoi. Keima Lhingboi”
Hiche letter ka sim doh chun katha abei in ka mood a off lha jeng tan, lunggel je jang jong kahetapoi. Alangkhat a ama lekha sim jong ka suboi nom pon chuleh min class 10 ajo chan dia bou asei le ipi khoh em tin thipbeh in kangah tai. Hahsa lheh jong le kei le kei kakilhem in Ka lekha sim lang suboi lou in kapang jing e.
Class 10 ahin jo ni ding chu ka calendar ka mark in kangah ngah jeng tan kum khat ana chetai. Guwahati a kaum khom pi CCpur mi ho khat hi inlang a che doh pet in khatveineihin vetpeh in tia ka seileh “ Bhai lai school a chu kanao nu jong kai a chu o. class 10 mama ahin new year tengle chomkhat in a hung doh in te” ahinti phat chun kenjong pha kasa beh seh in inlam a ache ding chun Birthday card,new year card chuleh ama ding a kakoi Exam a dia wish ka bol na card chu kapohsah tai.
New year kichai a ka loipa ahung kile chun athu kadoh le kahinkho kajah dia jong kadei lou chu ana hitan kalungnat dan chu alhembi jou ding jog um le kaki lomsah poi. Athu umdanhi hiti ahi. Amahi CCpur a cheng mibol thei tah te chapa khat to hin kingai a alekha jong aduhdah a sim talou a hi um jeng dan ahitai. Ka loipa naonu chu class mate ahi lhon jeh chun athu jouse phatea anahet ahi. Hichun kejong kalai anabehseh in bang ka suh chu ka khut athi aput in dressing eibol peh uve. Jankhat phatah in kakigel lha tan hiti hin lunggel kanei tai, “Kitepna sukeh chu ama ahin ken ima themmo na kaneipon,Suhkhel jong kaneipoi.Ahinla min ei joulhep a ei kineppi jou loule iti kipang tei tei di ham. Vaichat jeh le gentheijeh a hi kachung a lungmong lou hinte. Dongma nei lou hile kihou kit je aum in dongma aneitah jeh chun avel inkihouda tantin, eibolna chu kitil khounan kikilah mai hen” tin nasatah in lekha kasim kittan ahi.
Ka loipa naonu result asoa chun kaloipan eiseipeh in ken jong landline a ka call in anaonu kom a Lhingboi thu kagah doh sah kit le amanjong Lhingboi jong CCpur aumpet ahi, result lading a ahung ahidan jong ahin sei e.Chuleh amajong class 10 a pass e ahintie. Ken jong khatvei beh kihou hen lang class 10 a pass chu kipapina thuthot kagah bol kigo tai. Ka call in lunghang loutah le ima cha helou bang hin ka hou pin “Lhingboi, kahin kipapi e. Nang in la nei he pha tapon, hijongle kahin gel doh jing nalai e. Imajouse a kahin kipapi e. Pathen in phhathei naboh jing hen” tia kagah seileh aman jong ama thu kahet lou ahisah jeh chun “Itih le nahung doh kit di ham. Ken jong class 10 kajoutan result kahung lahdoh ahin Khosung a kache di ahite. khatvei beh Khosung a hung o kimu louna asot tai” ahintin kenjong ka lapai in “ Lhingboi, Ikitepna ho tuhchah jing lehen kahung nom mama jeng in kangah lel mama jeng ding ahin, ahinlah tua kahung a ipikabol di ham? Koi kom a kahung di ham? Ka Lim kamel koi kamu sah di ha? Kei din vang kinepna ding aum tapon ima hung bol ding jong kaneitapoi” katipeh le “ Kei kaum hila nang din kapang jing nai he u Min.Ipi sei a kinei nahim kahethem poi.Hungdoh tei tei o” ahin ti kit e.
Kenjong ajole kahet khel ahidem tin hetchen nadin Ka loipa toh Bihu suty one week um pet in Manipur kana che lhontai. Oltah a kahin hetdoh chu ahileh amahin dongma chom anei ahin pasal pa jong kakimutopi in aman jong akingai dan hon asei in atah ahi kichen sel in kahin hetai. “Bhai, Assam lang a chu kahung maithei ahi” tiho pou in ahung tot in ahi. SUty kichai in kaloipa toh Guwahati kahung kile kit lhontai.
Khosung a ka loipa jong chu Shillong a college kai ahin, Inlam chedoh ding atin Guwahati a hin hopa in kakom a jankhat ageh in hiche ho thu chu kasei khovah kei lhon in ahi. Chuleh ama love story thusim jong asei in jan khovah kakihou lim lhon e. Chuleh lekha phatah a sim a Nikhat le I gamsung a dia natoh ding chule Mipi dia thilpha tam pi kabolnom lhon dan ho kasei khom lhon e. Kei thusim chu Aman jong kidang asa behseh jeng in atahsan thei mong mong tapoi. Hijong le kaseipeh in inlam a nache ding ahin nanagma tah in naga het chen ding ahi katipeh e. Ka loipa chu Khosung a ache ding jeh chun kenjong thu kathot in “khatvei kahung doh ding ahin chuting kimai toa seikhom nate” tin eina seipeh in katipeh e.

================================================================
Phat le nikho ana chal chal in hetman lou in Christmas ahung lhungtan keijong Shillong a um ka loipa toh Christmas a inlam kaga pot lhontai. Christmas ho nomtah in kamang chai un, Christmas le New Year kikah chun Lhingboi kom kachen kaga kimuto lhontai. Nidang a kimuto to abang tapon, phate chan jong eiva ngam poi. Hijongle kimuto di ache akihi jeh chun kaki houpitan, kathujah ho le kathu het ho phatah a kasei peh in ahleh ama akilep nalai in, hinla ken kahet chen ahijeh chun hitin kasiepeh tai, “Boi, Kidei kingai ihin, nungah gollhang jong ihi nalai in kihethem hite. Keichung a nalungmon lou sa sa chuleh neilungset lou sasan kiphatlam man in midang sulung na tahih in. Aman jong min hinkhoa dia nalungset ahia nakingai tah beh lhon jong kahen hijeh chun, phaten kingai lhon in lang kipah tah in hinkho hin mang lhontan. Khatvei ka tahsan na abei tah jeh in kingai kit jong le hen kitahsan na lhasam ding ahitan , nom deh taponte.Tunia hi kamcheng tah a vailhah dia hung kahije. Phaten kigel in lang nanopsah na ding chu kivet jeng tan. Na lungset lheh ing ting , nangai lheh jong leng iba ilo ding ham , lamlhung jou lou ihi maitai.” katipeh tai. Hiche kasei jou chun ama jong aki im jou tapon alunggel ahin seitai,”He o, neingaidam in ken Nang kangai dan hi aje umlou ahi. ka Lungset lheh vang in munkhat a um khom jinglou ina hijeh chun Numei chu ana kilungneo in ka um na a tua naseipa jong chun eina jol jol jeng , miphatah ahin, anu a pan jong eideisah lheh jeng in, eina jol jol u leh kahetlou kah a eina lheplhah khah u ahi. Loi le pai a ana kivop jing lai u anu adam mo in , anant lel lheh jeh chun kaloi ho toh ain uva katoupi pi jiule, alaicha ding kon chun eina kou in, ka moudia ka deilhen nahin lungset tah in kathi jeng tah jongle kachapa hi ana kichenpi tei tei in tia eina sei khum le ken jong donbut je helou a heng e kana tikhah ahitai. Hinla tuni gei in jong nang kalungset jo nalai e. Neitahsan jou nahlai ding ahileh,Angdang a a kapah sang in nang kom a hinkho lhum a um ding ka nom joi” tin alhi akitheh e. Kenjong kasei kit in, “Ipi hita leh ka sen neo lungset nahin, ka lungset masa pen jong nahin hijongle mi nu aitan ding kon cha a nakitepna aumsa ahitahle suh bulhit peh tan, ken jong ka it mama jeng in hijongle pahcha khat chu anei ni umtheilu ahijeh in kei joh in nungsun tang e. Chuleh kei hi ka future jong ima ulou migenthei insung hahsa te kahiuvin, lekha ichan kasim jou ding jong kahepoi. Khonung a na kisih na joh kahimaithei ahin , na genthei ding ka nompoi. Lungmong in Chetan, nachung a ima lhasetna neipong ting na maban hinkhoa nakipa na ding le na vangphatna ding joh paheng a thumpeh jing nang e. chuleh nang in jong neithumpeh ding in ka taove.” tin amai a asam chu kahui doh peh in amitlhi chu katheh peh tai. “Ahileh heo kakipah e, Na lunghan ding tah sang in neingailut dan kamu chen in nanga bang a eilungset aum na dem kalung akham e.Hijongle kingaidam hitin imalam khankho kivet jo hite. Hinla khen ding hita jong lehen achaina din neiphal peh le khatvei ka koi(hug) nome” atin eihin koi e. Hiti chun chomkhat set kikhenmo leu in kaki koi to lhon tai.
Jan asot tah jeh in chetate inlang a min na homo khante tin kahung lhon in kaloi teni toh kakimuto un a in chan u kaga thah tai. Anu le apa hin la ima hephalou akingai nalai eihisah lhon hintin agehdin eisei lhon in hinla kaloipa toh kahung kile lhontai.
Hiti chun ka lungset masat pen nu toh pahbang pah khomdia thimthu kana leljouse lhon hetman lou in gi bang khennan vai ana hom tan keijong kakipasal sah lheh vang in phatsot pi kana genthei pi e. Hinla o lol in kakilhem bi in lekha sim lang joh nasatah in kana khohsah tan inlam jong pot behseh lou in kana umtan. Kum ijat ham genthei tah a nungah jong hellou a lekha kana sim ga chu Pathen in aga ei lo sah tai. Loi le pai teho a kon kajah dan in lhingboi hi class 12 sim kum in CCpur a ajinei tan ahi. Hijongle ajipa mi incheng ahitoh apa business man mihao ahijeh chun anopsah e ti chu kana jan kakipa pi lheh e. Keini kah a kihoumat na kijahmat na vang ana umtapoi.

Kaloipa le jinu nit hum lou in a aumjou un discharge ahung hitaovin Thinglhang kaldoh di aboijeh chun kei kom a ahung kichol uve. Ka kom’a aum sung chun lhingboi tenu pa thu chu phaten kadong in ahileh kaloipan hitin eiseipeh e.”Bhai, Lhingboi lhunna te chu eiho het bang in mi haosa mibol thei kipah tah a hinkho mang ahinaove. Anopsah un Pathen heath jong ahiuve. Hinla thu kija dan in akichen jou lhon kum ni jou in Gang(miphalou) hon sum demand abol bol jeng taovin aapan jong ana peh peh jeng ahin hinla ahinha bol phat un police a FIR ana bolleh miphalou ho chu police hon mi ni ana kaplih un , chomkhat jou in hicheholoi group mama hidia ginmo hon apa chu ana kaplih taovin , a in jong jan kah in aumlou kah un melhetlou hon ana hal lhah peh taovin ahi. Hiche ho jeh a chu lung mong lhamong a jong cheng thei talou u ana hi. Phatseh a hitia aguh guh a asuhboi jing phat un anei agou ho ahin kijoh lhon a Assam ahin jot lhon ahi. AHung till hon chun anom sa lhon in Saijang a khun gam akichoh lhon in in jong ana kisah lhon in chomkhat chu nomtah in ana cheng lhon e. Hinlah nom ahinsah lhon leh ajipa hi khamna thei a ahung kipe tan, chomkah lou in a inchen lhon ahung chavai tan, tua hi a dinmun lhon khu sei nom jong umlou a ahitai” tin eiseipeh tai. “Lungset aum lhon lheh jeng e. Ipi hileh kasei document ho hin choi lhon in lang chavang kut jou le khatvei kimu u hite o” tin kakivailhah lhontai.
Manja a District level Chavang Kut thupi tah in akimang in keijong Jingun khat a eikou jeh un kana che in gamsung mipi hole Haosa upa lamkai ho cu kajo chan in kana tilkhou in kabol thei sun gamsung a dia kabol peh ding ahi tin jong kana sei e.
Kin ichai in Ka loipa le lhingboi jipa chu kaki muto un document ho chu kalan phate chan kaki houpi in inchen khohsah ding dan ho kasei in lhingboi jipa jong aphat chesa ho a hinkho a athilto ho jeh a lung gel kisuh thei lou a ana um dan ho asei in kenjong nasatah in ka lha mon in ka tilkhouve. Ipi hileh natoh thei diu khat chu hin vetpeh ing e tin kaki vailhah unkakikhen taove. Aman vang koi kahi a ipi jeh a hichan kagel jong ana ima ahepoi.
Ken jong lampi ka hol le len ahileh council a natoh na kihong ahung um tan amani chu apply kabol sah tai. Hiche kahlah chun line kala toh chet in ahileh hiche recruitment board a chairman chu Karbi ho ka loipa ka class mate lele ana hikhan hijeh chun amani min chu ka pen amani hi tuchug kilahna a hi nana lah tei itei di ahie. Sum le pai nati jong le kipaman nape nang e tia kasei leh kaloipa Karbi pa jong chun nang sei ahijeh in sum le pai jong ti pong e. Kuki ho jong council a natong a lhom val in na mu u ngai ahi. ipi hileh exam hung pe pou pou u hen atin ken jong amani kom a lekha neokhat ana sim lhon in written exam umding ahin ijat ham beh mutei di go lhon in katin lekha bu jong sim ding kana thot e. lha thum jou in written exam ahung um tan gelsang in amanin jong ahin bol hoilheh lhon in kaloipa Karbi pa jong chun akipapi lheh e.Hinla council appointment ahijeh in a SUM sung hon bou amukit jiu ahi. Hijongle Kaloipa Karbi pan sum jong lalou in kaloiteni chu final list a kajao sah tei ei ding ahi tin kicheh tah in eisei peh e. Mi 500 kilah na ding a chun final result ahung soh in amani min jong ahung jaotai. Loipha kana nei jal leh amanin jong gunchu tah a lekha ana sim lhon jeh chun ima boilou in appointment amulhontai. Kipa umtah in appointment order jong asoh in amanin jong ajoi lhon thei lhontai.
Hiche ho kabol peh jeh chun kaloipa toh kipa thu sei in ka um na Guwahati lam in ahung lhon in kakikou hou un ahileh thil umdan ho chu kasei sei uleh aman jong ipijeh a hichan chu kakhohsah ahin hedoh tan ahi. akipah behseh in tunia kona ken jong khamna thei ho nungsun ing ka tin kaji kacha ka inchen phatah in kivet tang e tin maicham asem na a chun akap den jeng tai. Ken ka vailhah na chu hitia ken kaboipi hi lhingboi ana hetsah him him lou din kana vailhah e.
Inlam akile jou u lha ni jou in nikhat hi ka whatsapp a message khat kamun hiti hin ana kijih e. “He o, Na chung a kakipah mong mong in phat hichan che nung hijong le nei ngailut nahlai a ka inchen kalou chen chatvai nung a jong hitia hi ka inchen neihung sempeh a tunia kaji jong kisem pha a kei le kacha te jong eilungset uva masang bang a Pathen thua insung alamkai kit hi aloupi val e Imajouse nang jal ahi,. nang jailin pathen ka thangvah e. Call hin bol a sei di jong kajah cha val a message kahin thot a kipathu kahinsei ahi. neina hethem in, keima Lhingboi”. Ken jong ka reply kit in, “ Kei vang ahipoi, Pathen heng a sun ajan nataona guilhung a ahi. Na kipana chu kum kho a ding hita hen. Damsel in” tin kathot e. Hiche message ka mu chun ajipa ka call in Bhai, seidoh hih in kitia ipi da nanasei peh khoh ham katileh hitn eihin dobbut e, “ Sopi hichan kei ni dia nalung nagel a nangailut tah jong sacrifice nana bol a , hiche nung a jong tunia thilpha ka chan dia lomlou neibol peh na chung a ka I im im vang in ka im jo upon kana seidoh ahitai. Pathen in naumpi hen” tin ahinsei in kenjong seidi helou in kathip chet jeng tai.
Ni phabep jou in unknown number khat a call ahung in ka pick le “U Min kei lhingboi kahi e. Seinom kanei a kahin call nahi e. 26 August khu kachanu birthday ahin inlam nahung doh jeng khat leh keini jong Diphua kaum lhontan ka in mun lhon a Maicham kasem nom un nahung tei ding kanom e “ ahin tin ken jong “Kipa aum e Lhingboi, phat kanei le hung tei ding hin gong nang e” katipeh e. ahin sei kit in “He o, nachung a kakipa na asang val in kahinkhon seichim pong e” tin ahung nuhbing den tan ken jong kala tan pai in “ Lhingboi, ipi dia lhisoh nahi ham?Hiti dinmun a kikap ngaipoi. Kana jol lai a Ka lungset e kati chu kamohsei ahipoi. Kalungset na hi. Senneo lungset nahin ken jong kalungset khat agenthei ahahsat ding chu iti kathoh jou di ham. I lungset lou ho bon kikhohsah a nang a dia achaina kabol thei sun kabolpeh nahi e. AW HE! SENKHAN LEKIT THEI LOU hita jong le hiche ka thilbol peh hi ka lungset melchihna le vetsahna hijing tahen. Lungmong sel in um tan. Na inchen phaten kisem lhon in lang agenthei ahahsa kithopi jing lhon tan. Tua kona kihou kit jong ahitehi le bol tapote” tin ka don but in ahileh aman jong eihin don but kit in “ahileh he o kakipah behseh e. Nei lungsetna ken ana hethem hih jong leng neilungset na vang asang e ti kamudoh e. Pathen in jipha tah nahinkhoa nakipa sah ding khat na pe ta hen. Ana damsel tan” tin kaki vailhah lhon tai.
Hiche jou hin ken jong ji kanei in kajinei na a jong kaloipa le aji achate, chuleh lhingboi te inko jong thanom tah in ahung lha uve. Kenjong ka lungset masat pen lhingboi ding a pan kalah thei a ain chen kasem peh chu kakipah lheh jeng e. amaho jong a incheng un mija thei le mi kingaina thei ahi jing peh uve ti kaja jing in kakipah lheh jeng e.
=======AWHE! SENKHAN LEKIT THEILOU====

—————BEITA————–BEITA———–
[Thusim hi semthu ahin akibang, akilo thim aumkhah jong le semthu thusim ahin simho dia atah bang a aum theina dia kisun ahi tin asimjouse kom a kahin hilchen e. Asim jouse chung a kakipana kahin phong in chuleh asim jousen positive hileh negative hileh feedback ka whatsapp no. 7005351453 a neihin pe diu vin kahin tem uve. Kakipah e]