By: Letpao Touthang
16 September 2020 ThusimBu
Part 6 (End of the story)
Thangpi in jong phat chi dung jui in chapa ni ahin nei in, hinla a Chunnu leh Zo pa agel doh teng lungthim anuom thei ji hih beh in ahi. A chun le zo het jing na din, achapa teni chu Muonna leh Zalaithang asah tai. Hiti chun Chongnu toh kipah tah in a pu te inn a chun a khosa hun tai.
Phat chomkhat jou hin Chongnu nu leh pa jong athi tan, ima jouse chu Thangpi mo poh na a hung hi phat in Thangpi jong tahchapa tin athuoh tun² in hinkhuo a mang jing in ahi.
Mihiem hinkhuo hi kipana atam leh phat chilam aki hetdoh jou ji puon, hi bang chun ama in jong chapa ni a nei phat chun alunggel a nuom lheh jin ahi. Chule Chongnu maiso ave jin achateni bou abuoipin, chule achate ni hun kipana ding bou a gel khoh in aki sa buoi jing jin ahi. Hitia Chongnu umchan Thangpi in amu doh chu Thangpi din Chun le Zo angei jong abang diu in ahi.
Phat le ni kum leh lha aki hei jing in, phat leh nikho um dan jong a hung kikhel tan ahi. Hichi phat chun amahon jong achenna uh thinglhang apat chun khopi toh ki nai jep kho khat achun aki chuonlut uvin Muonna leh Zalaithang chu thiemjil sah ding in aguon pih tan ahi. Hiti chun achate nin jong thiemjilna lam chu pontho tah in aguot jing hun in ahi.
Muonna atahjo pa in class 12 a pass jou in service amu tan, a nu le pa kom a henu hepa tunia pat thinglhang gam a ium lai uva natoh him tah leh lel leltah pum a hinkho iman a kuon a kipana le nupsahna iki le diu ahi tai. Nang ni jong num tah a na um ding a hi tai. Hitia Achapa hun tahjo pa thu sei ajah doh hun phat chun amani jong phatchisa agel hun le alunghel lheh jeng hun in ahi.
A chapa neojo pa jong graduate a hin chai in, IAS ahin ki jih doh in, innsung a chun kipana Oo athong lha jeng tan ahi. A chateni service a hi hun phat chun khopi sung a aki chenlut diu ngai a hi tai. Ajihchu office toh inn mun kinaijep in, chule amaho dia jong munlem changjo ding a hi jih chun.
Thangpi jong aki gel in aneo apat a hung seiliet na kho mun leh thinglhang gam nup dan chu a lung in amang thei puon hichi kho mun chu ga velhah diu vin acha teni kom a chun asei tai. Chu in achate ni in jong apa hun thusei chu ahet thiem pih hun in, aki pan doh pai ngal uvin ahi.
Hichi kho mun chu aga lhung tau vin, Thangpi in jong a loi a guol ho ban nei chan chibai abol in, ama ho phat lai nikho nup dan ho chu asei un ahi. Amaho jong akum tam nung, ateh nung uh a hi vang chun nungah guolhang hinkho aman lai ho gel doh nan pinic abol na mun ho chu Government in Sana Songmantam a hol nauva asuhset deh na nung ho chu aga veu vin, a lumghel thei lheh vin ahi.
Chu in Pa.Thangpi in jong ama golhann tillai ma bang tah hih jong iki lhah na diuvin ati in aguol ngei cheng vailhah na hitin “Aw ka pienna thinglhang gam, kapu kapa luong lupna gam, agam nuop na le hoi na itia na hi tam? Mite thunei na nuoi a chul mai ding nahi tam? Phat chisa a na mel hoi na leh na min thanna jaangmei bang in aki tol mang tai” tin ki ngai lhrh jong leo a loi leh guol ngei cheng chu toh ki lhalel tah in aum un, nisa lhum kuon in ama jong achateni leh a jinu toh a inn lam uh juon in a hung kile tau vin ahi.
Muonna leh Thangpi in jong ji le cha anei hun in, Pa.Thangpi leh Nu.Chongnu jong amou teni leh atu te toh athi geiyin kipah tah in hinkho amang khom jing uvin ahi.
Beita
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
