Home Thungainom AW HE ADA KAHI!

AW HE ADA KAHI!

16
0

Published by Thusimbu

Lunn VaipheiStory Writer

Thadou-Kuki Moral Story

Mibolthei tah gollhang khat hi anaum in ahi. Hiche gollhangpa hin abolthei dan chu Games & Sports lang iti jongle Football/Volleyball kiti ho jong athem in miho’n avetnom ji lheh un ahi. Chukeo hilouvin lasah jong athem in, a aw(voice) jong chu ngainom nom aum jengin ahi.

Mit a vetdin jong amel ahoiyin atahsa jong alhingset jeng in, demna ding behseh umlou ahi. Hinlah chubanga pen vangphatah a ahung pen vangin, amachun Pathen thu lampang ahiteng nahsah in anei jipon, Pathen ginna jong aneipon, ama bolthei naleh ami hina joh achun akisong in, ma le ama chu alungthim tah in akichoisang in olmona neilou tah in Hinkho amang in ahi.

Nikhat hi aloi mi themkhat toh, sa le nga kitha a golnop/hinkhonom manding, ati tauvin ahi. Hinlah hiche akitep nau nikho chu Pathen ni (Sunday) ahin ahi. Chuti ahijeh achun anu leh apa’n jong phamo asa lhon in nidang phatdanga ana hil ngai lhon bang in ahil toh apho akop kit lhon tan ahi. Hichun anu’n jong ahoulim pin, “Boipu Pathen Houin Theng sunga naloi nagol nungah/gollhang hon Pathen vahchoila awgin ngeitah a ging dup dup a ahin sah ji teng ule, kalungthim tah in, ‘Aw kei chapa/chanu jong hitobanga Pathen kivahchoina mun a khun ana jao hitave leh o,’ katin midang chate ka otcha ji’n kei le kei kana kingaise ji lheh e. Hijeh chun nang jong khonung leh nahung kisih lou nadin, tu kiti phat kijen petcha, nakhangdon hoilaiya hin Pathen a kitulut inlang Ama vahchoina leh Ama thangvahna in hinkho mangpan tan, hinkho hi khatseh bou ineiyu ahin, phat jong hi akituhtang thei poi, ajoleh nang jong nakum le lha hung tam cheh cheh intin nalung leh natha hung lhasam intin chuni tengle chun phat ana geisang tante, chutengleh nangin jong, ‘Kakhang hoilaiya Pakai Vahchoi ding kana thaset a, Houin theng jotding kana thaset chu tunvang kakisih tai, tilou seiding dang nahet louding ahitai, hijeh chun tupet in hoitah in kigel inlang Pathen Maicham beljing din kigo tan boi,” tin ahil lhon tan ahi.

Hinlah achapa gollhangpa chun imachalou tah in adonbut in, kei chu kon ipi seijongleh kabol ding ahi kati chu bol jeng, kabol lou ding ahi kati jong chu bol lou jeng kahi, ti’n kibolthei sah tah in apotdoh mang jel tan ahi. Ama chu mibolthei ahijeh a chun mun jouse a lhahmahna anei deh pon ahi.

Hinlah phat le nikho ache jing bangin ama (Gollhangpa) jong chu akum ahung tam deu deu tan ahile, ama sanga themjo le bolthei jo midang ahung kisep doh tan, ama boltheina phat chu ahung kichaitan ahi. Phat le nikho la angai yin ache jingin hitichun ama jong alhanglhah lang mong mong ahung hitan, alungin ajo vangin atha’n ajou mong mong tapon ahi. Akhang hoilai, aphat hoilai, athahat lai chuleh a-aw (voice) hatlaiya Pathen vahchoila kisahna mun ho leh Pathen thu kiseina mun ho ana pel le le jeh achun Ama jong ahung kisih pan tan ahi, hinlah amaa dingin vang thil jouse leh phat jouse chu akipel ana hitai.

Aw…. Kaphat chesa ho chu koukit thei hileng kanom e, ngailut jal a kanu leh kapa’n eina hilna ho chu aguilhung gamtai, aw he ada kahitai. Tu’n vang jun le eh sang-in jong kaman anem jo tai, ti’n akisihna chu doujou ta louvin ahinkho lhum keiyin kipana kiti him him neithei talouvin hinkho amangtan ahi. Akhanghoi laiya Pathen thu le la nahsah mo a koiya ama nop nop a chonho chu nikhat leh hung kisih tei diu ahi.

#Kisihna kiti hi alou (damdawi) bei ahin jen a jendam thei ahipoi.  
# Nu le pa thu ngai kiti hi Pathen kipana ahina ban a, ichunga i-nu leh i-pa kipana jong ahin, chule eima tah dinga jong kipana ahi, ajeh chu nu leh pa te'n achateu chu athina diu lampi akomu ngaipoi.

Asimdoh jouse chunga Pathen lhagao theng in na hintong intin, phatthei eiboh cheh tauhen…….

Previous articleMARAM NUNGAHNU
Next articleVANGAMA NAKILENA DING TICKET NAKIKAH (BOOKED) HITAM ?

LEAVE A REPLY

Please enter your comment!
Please enter your name here