(Based on true love story)
-Lelen Kipgen
Keihi sepoy kahin tutua hi IMA(Indian Military Accademy) Dehradun a officer training instructor a um kahi. Sepoy hinkho hi nopna akivang lheh e, sun teng kaseilet na thinglhang gam ngaiyin hinkho kamang jin janteng jailan ka-oi jie. Lunghel he mi kahikit jehchun keidingin ahahsadeh e, ahin inchen louchen ding gelnan hahsa lheh jongle nomsatah banga kaum mei angaitan ahi. Suty hung pot a singsungmi ngaichengtoh kimelmu’a lenpi gol le pai ngaicheng toh hinkhonom man ding kal ngahlel in phat le ni kasimjing jie, ahin suty ahung kipot teng phat le nikho jong achal deh jin, chomloukah le vaikonphat alhingkit jitan, lunghelin kavaikondoh kit jitai.
Phat le ni jong achalin, velkhat hi keijong Suty kahungpot kit tan, phat sotpi insungmi loi le gol ngaichengtoh kimuto lou akihitah jenchun kaphat chu kahomtho lheh jengin, “anop nathei chanin phat kimang hen,” tin loi le golho toh kihomthotah in hinkhonom kahinmang taovin ahi. Nikhat hi kaloihotoh kahung vahdoh kit taovin ahile school form a kivon nungah ni ahung lhonin ken jong kaven ahile khatnu chu hoikasa lhehtan, kana ngoldentan ahi. Ahung nai chan lhonin hoi kasacheh cheh in kavetnom cheh cheh jengin, mitphe louvin kanaven ahi. Amani chu jahcha thimtan in ahung lhonin, kakom u ahung lhun lhonchun kahung kindot jengin aumdan chu anangol dendan kahitai.
Amani jong achepei lhontan, chuin kenjong kaloiho jah a, “chenu chu kamukha hih e koi ahidem?” tin kadongin ahile kaloiho mikhat in, “Ass… nan doh dan chu thilkhat aum tabouve,” tin ihin daiyin ahile ken jong, “ahipoi, kamukhah loujeh a chu kahindoh mei mei ahibouve,” tin kakilep in, ahin lungsunga vang khulangpeh kanagei mantan ahi. Chuin kaloipan kajah a, “amanu chu amin Kimneo, Sugnu langho ahiye. Tua hilaiya lekhasim a um ahi. A Whatsapp number nadei jongle kapeh thei nahiye,” tin eihin daikit in ahile kenjong, “thip o, ipi ding kati hih e,” tin kadonbut in, ahinlah kalungthim a vang “a number iti kilahdoh thei ding ham?” tibou chu kabuipi kit tan ahi.
Kimneo kamudoh a pat chun kalunglaiya acham jingtan, keiya loudin pamai kasalheh jengin ahi. Nilhah in kaloipa koma chun Kimneo number kaga thumtan ahile, “sun a chu ipiding kati hih e nati hilou ham?” tin ahin seikit in ken jong, “kino o, inpe louyin,” katin ahile inpe tai. A number kaneitah vang chun kahoupi ngamkit tapon, Whatsapp profile picture kaven ahile hoikasa lheh jengin, kisonlel nan kadimin kahoupi ngamkit tapon ahi. Jan ka imut konin Whatsapp a,
KEIMA: “Hii… Kimneo, na imut hitam?” tin ka text tan ahile ginchat sangin eihin reply peiyin,
KIMNEO: “lekha kasim nalaiye, nang koi nahita?”
KEIMA: “sun a lampia kaloiho toh kahung ule naloinutoh nahung lhona ekito’u chula, nei het tam?”
KIMNEO: “oh, ipi thu hita heu? neihin text jengin kiphatlam sah a.”
Lekha kasim nalaiye atijeh chun kasuhbui nompon,
KEIMA: “Ima jong ahideh poi, moh a ikihetto thei ding ham tia kahin text ahiye. ipi hijongle lekha nasim nalai le jing lang leh ki-ol houkit tate o? mangpha.”
KIMNEO: “Umm, heu nang jong mangpha.”
Kagelsangin ana houpi nop lheh jengin, ahamdan a konchun mipha ahiding kahe theiye. Hitichun kahung kihou jing lhontan ahile keijong kachephat alhingkit tan, insungmi loi le gol ngaicheng dalhan ka vaikonkit tai. Jingkal nilhah, phat ong kaneiseh leh kakihou jing lhontan, kalungsetna thu seiding chu kanom lheh jengtan hinlah kiphatlam nan kadimin seidoh theilouvin kaum jitan ahi. Nilhah khat hi angai bangin kaki text kit lhontan ken jong, dongma anei aneilou thu kadongin ahile, a classmate ho khat toh ana kingaiya akikhan lhontah dan ho aseiyin, chuin kenjong “tuhi bah chance ahi,” tin kiphatlam nale jachat naho peilhan lungset thimthu kahin lel pantai.
KEIMA: “Kimneo, gelkhel hih in sot a pat nakoma seinom ngaichat khat kaneiyin, ahinlah kiphatlam nale jachat naho jeh in tunichanin seidoh theilouvin kaumin, kagenthei pilheh e. Namel kamu nia pat in kalunglaiya nacham jingin, suntin jantin nang gelnan hinkho kamang jinge. Kimneo, thengtah in seimei leng ken nang kalungset e, nang beiyin hingjou ponge, nalung ahile lungset in kalungsetna hi neisanpeh jengtan,” tin kaseitan ahile chomkhat akingaito’n, chuin kajah a,
KIMNEO: “Heu, kiphatlam sah a kei ima hilou pen nalungset neichan ham? nei lungset chu kakipahe, ahin khonung le keidia kana joh hung hikha ding ham tin kasang ngam poi. Heu, kigelphan khonung le nahung kisih khah ding ahi.”
KEIMA: “Kimneo, kalungsetna hi lungsunga kon lungset thengsel ahin kisih ponge. Kalungsetna neisanpeh le kahinkho’n kamilungset na sangpenin nalungset jing ingting, na kimvela palbang kisung jing nange. Kimneo, lungset in kalungsetna neisanpeh jengtan, keivang nanglouvin hingjou ponge.”
KIMNEO: “Heu, chuchan geiya nei lungset ahile henge, kalungset e. Ahin numei lunglhom kahin nalung kahinto joulou meithei ahi, hijongle nei hethem ji tang o.”
KEIMA: “Kakipahe, kalungsetna neisanpeh jeh in, Kimneo kisonglel hih in kitah tah a nei lungset jing poule keidin alhingset tai.”
Hitichun kalungset pen in kalungsetna eisanpeh phat chun kipanan kadimin, kamoh nui nui jengtan ahi. Hichenia kipat chun Kimneo toh kilungset hinkho chu kahinmang lhontan ahile hinkhoman anomlheh jengin ahi. Jan teng chung chollha vahnuiya kilungtoh tah in lungset thimthu kalel khomji lhonin, kihomtho tah in khat le khat ka kikhohsah to jing lhonin ahi.
Kum le lha achalin, phat le ni jong nilem kihei bangin akiheiyin, ka kilungsetna lhon jong kumkhat lam ahitan, Kimneo inkoten jong ka kilungsetna lhon ahin hetaovin ahi. Kumlhunin Kimneo jong akho lang’u Sugnu langa Christmass mangin achetan ahi. Christmass kichaiyin keijong suty kahungpot in, nikhat hi Kimneo te in a kagachetan ahi. Hitichun a-inkote koima jong anaumpon keini bou kaum lhonin ahi. Aman insung asuthengin, kei bench a kakijamin phone kakichemin ahi. Chuin a phone charging kibol chu kalan kaven ahile a classmate ho ana kingaipi pa toh aki text na lhon ho kahin mudohtan, chuin ken jong aban banin kasimin ahile ana kithah ngai kit lhon ahi chu kahin hedoh tan, a message kasimdoh chun eitih a jong kana gelphah loubeh ahijeh chun kidang kasa valin seiding helouvin thipchet in kaumtan ahi.
Chuin Kimneo kakouvin messang ho chu kavetsah tan ahile amajong akap jah jengtan eingong koiyin ngaidam athumtan ahi. Kalungset pen, kangailut pen ahijeh chun kanol thei deh pon, kalungset pen in kap puma kakoma ngaidam athum chu kavejou dehpon, kalunghan lheh vangchun ngaidam kahinchan kit tan ahi. Chubang lungsetna sang, ima louva agel a mi toh eikop jeng chu kidang kasa lheh in ahi. Ken lungsetna dihtah a kalungset ahijeh in velkhat einungsun vangin kanol deh pon ahi. Ajehchu “janglai sakol khuni bon kikimjou louva, mihem hinkhoa ki kikimjou ding ham? lamlhang lho lhalou koi um ding ham? bolkhel aumlou le bolkhah jong umlou ding ahi.” tin kagelin, ahin tahsan na vang alhomtai. Tuni chanin lungsetna khaogui kajop jing lhonin, ken jong kalungsetna sangpen penin kalungset jing nalaiye.
_”Agam khankho ding gel’a genthei laitol kalen na, Dehradun a konin kangai lennagam kahin galdot in chung chollha vahnuiya huiva bang kamaove. Kangai selungmol lou hile genthei selung leng lou dinga. Genthei leng channa jan choldamna jeng jong nopna aumpoi kei dingin. Laidang leng tang, kati vang lungsung lengnu chollha avah emsel bangin nahung lang jie sim-saheinu. Kangai, idinga lungmol nahim? Nalungset hi nadinga alhinglel khatou kahim? Seiyin, ipi ham abulhing lou? Kalungset sangpen kachan nahin, ngai dang toh neikop ding vang kanom him himpoi. AVAL JOUSE SONGMANTAM AHIPOI. Kinepna thon koi dingin jong nomdeh ponte. Gol-o guhthim lunggel chengin hem-bang eisuna jinge. Gol lungmol jeh in lunggim lungdon naten nitin lunglai alodim jinge. Genthei tangpa selung monna dingin, Kangai selung hin heithem inlang ngailai khankho bang, lungset khaogui jop thahkit tahite. Linglou jangmol dingpi bang lungsetna phutdet tahite.”_
©2020, Lelen Kipgen, All Rights Reserved
