By Shonkhogin (Hegin) Haokip
Maranatha Cottage
Hebron Veng Phaipijang
Langol Imphal.
..ajeh chu keima nangho ding mun sema che ding kahi. Chuleh nangho ding mun sema kachea ahileh, keima um na a chu nangho jong na umthei na diuvin keima hung kit ing ting kahenga dinga kahung pui ding nahiuve.
JOHN.14 :2B-3.
Atahsan chate
Christa a Sopi deitah teho, Pakai Jesu eiho ding mun sema achenahi asot lheh tan, atahsan chate puija ahung nadiu nikho hi anai mongmong tai tihi vannoi thusoh lasoh hon nitinin aphong aphong jenguve. Aman kahung ding konleh hiti ding khati ding ati hohi atamjo aguilhung tai. Hicheng ho lah achun, phabep gah veuhite. Gal ki satleh kidou thuthang najah dingu ahi, vai khat leh vaikhat, gamkhatle gam khat hung kidouvin tin, munchom chom a kel hunglhan tin, ling kihot ding ahi.Matt.24:1-7
Alangkhatna 2 Timothi 3:2-5. a chu ivetna ahileh, hiche teng chuleh mi ama changmai kingailua, sum ngailut, nom ham, huset le hoitho, taitom hat, nuthu pathu ngailou, lungsetna neilou, kihou champi mohel, hehset hat, ti kitimlou,..kiletsah chuleh Pathen ngailut sanga nopsah ngailut joh na, Pathen ngaisah lhem a athahat athilbol thei janom lou, hicheng chu hung umding ahi. hiche hohi ivetna ahileh alhung lou behseh aum tapoi.
Juda te Nungah lhen dan
Aman eihung pui dingdan u thusim khatna konin gahveu hite. Juda te hin, chena lhongpi khat aneijuvin, mikhat hin ji anei nom phatleh,aman adeichat nungah nu te ina chun, achen, nungah nu ina table a chun, twi glass khat agatungjin, imacha sei loubehin, atouvin, ijemtia nungah nu chun gollhangpa chu adeija ahileh, atwichu adonpeh ding ahi.Twi chu adon pehleh nungah nun kanomtai atina ahitai. Hijeh a chu gollhangpa chu kipah thanom tah in a ain lama kileji ahitai. Hiche a patna chu thildanga kisa boi talouva achenna lhonding in sahna ding a chu kipeichengji ahitai. A insah chu akichai chai leh hiche nungahnu chu agakipuiji ahi akiti. Alang khatna ahindalhah nungahnu jong chu gollhangpan ahin dalhah lhah a pat a, akigosa dema gollhangpan ahin kouding chubou angaji ahitai akiti. Gollhangpa ahinkouna ding aw chu kijahih khakhante tin, sunle janin a window ahonghong jengji akiti. Hiche thusimhi kavetleh Pakaijin eiho puija ahungphat leh abolding ho toh kitohchat ahijeh chun, hoi kasan hetbai lam jong kasai.
Kitepna antheng neho jouse
Eihonjong, Pakai table a athisan lima kitepna antheng neho jousehi nikhatleh Pakaitoh kicheng ding kahi, tia kitepna tabang ahi. Hitia athisan donho jouse chu a Pakaipa lamtona dinga hi phat jousea abaisa a umdingdol ahi. Ajehchu, eihon anidan tah chu ihepouve. Ama eihoding mun sema ache chu ajojoleh itihphat phat hijongleh eihung pui dingu ahitai. Hijeh a chu aman nahin kouphatleh nana jah ding hinam ? Hiche kikouna awhi asunga lhagaotheng neiho jousen bou ajahdiu ahin, lhagaotheng neilouhon vang ajah phah tahloudingu ahi. Hiche kouna awgin, atahsan chate a dinga ginglanglung hintin, atahsaloute a dinga a vang guhthim thu hunghiding ahi. Ajechu Pakai amatah aotoh vantil pipui awgintoh, chuleh Pathen sumkon gintoh kithoa vana kona hung kumlha ding ahi, chuleh Christa a thisaa ho chengse thoudoh ding ahiuve; chujou le eiho ahingnalai amohchengse hi amaho chengse chutoh VANLAIJOLLA PAKAI LAMTO DINGA meikonga toltouva ium khom dingu ; chuleh chutia chu aimatih chana Pakai toh iumkhom jing dingu ahitai. I.Thess.4:16-17. Hiche thilsoh ding amunhi Vanlaijol hiding ahi. Asimho jouse Pathenin phatthei boh tahen.
