-Lelen Kipgen
“Chingboi hin ipi lunggel anei dem?” tin lungjin nan kadimin, imuthei louvin ka hahkhovah tan ahi. “Ipi hijongle Chingboi toh velkhat ki kimuto henlang hileh,” tin Chingboi toh kimuto ding chu kangahlel lhehtan ahi. Jan imulouva kigelkhovah kahijeh chun ajingin nangchet in school kajontan, Chingboi hung lhun ding ngahlelin ahung nading lam kave jingtan, ahinlah hicheni chun school ahungkai tapon ahi. Chingboi school ahunglou phat chun kalunggim na akibe cheh chehtan, katouthim thei tapon class kila jong chu asuhsah jong aumthei tapon ahi. Sunin Chingboi loinu in lekha khat ahinchoiyin ken jong Chingboi letter ahiding chu kahetan, lekha ipeh peh chun wash room lang kajon jelin lekha chu kasimtan ahile kamit a kho athim jengtan ahi.
alekha sut chu hichehi ahi,
“Heu Boilen, tuni school hungkaiya nang toh ikah thimthu meibang jing cheng hi kimaito’a kamchangtah a kihoulim ding kanom lheh e, hijongle singsung mite lungmol jeh in lunggel bang ahijou tapoi. Heu Boilen, janlhah in kaniten kau Gogou dingin ihung thumuvin chabel ahindom uvin ahile heno le hepan kau Gogou dingin iphal lhontai. Hijongle ikitepna kageldoh jingin chun le jo te lunggel leh atohgon cheng’u kajochanin kating in ahinlah katinjou ding tahsan aumtapoi. Heu Boilen, nalungsetpen kahile nilhah khojinkon le tuibong peace ground langa neina ngah in lungtup molso tahite, eini dinga lampi umsun hiche bouhi ahitai. Hiche ka lekha hi namua ahile lungtup molso dinga neina nga ding ka kinem e.”
Hitia lekha ahinsut kamu chun angol kabang jengin ahi. Final exam kon ahitoh, ibuipi ding kapaneo ten la asopi a jong isim talouvu, kakipui jeng kitlou le la kalungset kachan ding hikit, itih a jong kana gelphah lou kamasang hinkho’a dinga aloutheilouva kakilhan ding thil hahsatah ni ahung umdoh jeng chu alhan ding dan kahethem theipon kangol doh kigu liu jengin ahi.
Nilhah school kikhan khanin bazar a ahsa(broilar) Kg1 kachon, atui nathei chanin kahonin inning inkah lah ho kasuthengin, khojin konin “ipi hijongle ki kimupi intin, abui jongle hin kipui ding ahijenge,” tin kaloipa Daniel kakipuiyin peace ground lang kajon lhontan ahi. Amun kalhung lhonin ahile anaum naipon, chuphat in keinin jong ahung ding kangah lhontai. Kagolpa Daniel injong ka kipui ding adeisah in ahin keivang ka kigellha thei mong mongpon imajouse kagel le kalung ajingin mohngol in kangolin kigellhah na jong kaneithei tapon ahi.
Chomkhat setpi kanga jou lhonin aloinutoh ahung lhonin kei imuphat chun alhisohtan, kenjong kalhemin alungmon nading kaseipeh in chuin kabon uvin keinimalam hinkho ding lunggel kahin seikhom taovin ahi. Chingboi jong lungtup molso dinga hung kondoh ahitan, kaloiteni’n jong ka kichen lhon ding chu aphatsah lhonin keivang chu kakigellha thei tapon ahi. Hitia chomkhat setpi kakihou jou uvin kaloitenin jong ahasei val lhonjeh chun “asohsoh soh, bolchop ding ahijenge,” tin ka kigellhatan, Kahinkhoa kachenkhompi ding le ka-inneipi ding, chule christian insungnom kasemkhompi dingin Chingboi kahin kipuitan ahi. Hitichun aloinu akinungle in, kaloipa le Chingboi toh ken kaumna in-kahinjon taovin ahi. Kho jong ajingtan, an kaneuvin chuin Chingboi nu le pa tenjong kaumna veng ahet u ahijeh chun in-na kagepi ngampon kaloipa Daniel koma gehdingin kache taovin ahi.
Hitichun nomleng daleng ajinei chu kahitai. Ajingin inlang thinglhang lang kahinjon lhontan, kakhou gari lhunglou ahijeh chun kengin lam kahinjot lhontan ahile aneova pat thinglhang lamjot khalou ahijeh chun alel lheh jengin, nilhah lang khojin konin kakho u kagalhung nah nahlhonin ahi. ka-in jong koima aumlou phat chun ahomkeuvin aumtan chuphat in Joicy te in a kapuiluttan ahile Joicy nu le pan jong kipahtah in inalem lhonin ahi. I-buipi ding sopi sanggam kaneilou vangin Joicy te jalin kalung amongin, amahon jong insungmi bangin igeluvin, ingailu lheh uvin ahi.
Chingboi jong itih a genthei ipi ham jong hepha lou nu insung gentheitah te insunga ahung um chu aseilou vangin hahsa asalheh in, ahinlah alungsetpen koma um ahijeh chun kipahtah in aumtheiyin ahi. Lhakhat lam ahitan ki-inlut ding kahinsom taovin, nikhat hi keini toh Joicy nu le pa toh, abe teu, atuteu toh Chingboite in a ki-inlut dingin kache taovin ahi. In kagalhung taovin ahile anun Chingboi room sung khat a apuilut in chomkhat jouvin kot akam khumin ahin dalhatan ahi. Anite chapa Gogou jong keiho thu ajah phat in ahungin akitomjah jah jengin atuh uvin hibangse asoh uvin ahi. Chuin kihou kahinpan taovin ahile apan kaikhan teiding eigo taovin, iti katao vang uvin akidoisa tapon, Chingboi jong kakihou nao ajahdoh phat in room sunga chun akap kaptan ahi.
Hitichun nilhah lang ahitan ahinlah Chingboi inkoten alungel akhel chomdeh pouvin, chuphat in ka kilhonpi hon Chingboi dalha dingin ijol taovin keivang kanompon Chingboi room sunga kon a “Heu Boilen, nei dalha hihbeh in,” tia aka kajah chun ka kitim jou tapon keijong hakan kakaptan, anu le pa koma Chingboi toh ikhan lhonlou nadinga katao vangin eingaipeh lhon tapon ahi. Nilhah lang ahitan Joicy nu le pa te kakilhonpi hon Chingboi dalha dinga ijol jolphat uchun kenjong kalunggel kakheltan ahi. Insungmi nule pa toh kikalsong hile lung ngamtah a kipang ding ijochan a i-ji jong kichu thei ding ahin, ahinlah ka kilhonpi ho dinga jong nomlou ahijeh chun kanop kada thu umlouva kasen-ji toh ka kikhan mei angaitan ahi.
Chuin keiho jong kahung kipatdoh kigotaovin ahile Chingboi room sunga kon a eikouva aka kajah chun keijong chapang kan kakaptan ahi. Thil umdan ho kagelin, hichangei kilhungta a kasopi kasanggam ikithopi ding koima aumlou chu kasopi ho chunga kalhaset na asang lheh jengin ahi. Hitichun ka kilhonpi ho ding gelnan kasenji ngai jong leng ngailou bangin kahindalhatan, ahinlah lungsunga vang kangaina asang lheh in kakap kaptan ahi. Keini kilungset louva kikhan jong kahi lhonpon chun le jo lungmol jeh a khanna soh ahijeh chun akah le kathang atom jin phat gomkom aum le guhdoh thou thouding jong kagel jin ahi. Hitichun lam lhungin kasenji ngaiyin kalhisoh sohtan ahi.
“Ka lekhasim jong achaveitan, kasenji jong kachantan kahinkho hi kinepna ding aumtapoi,” tin janna chung chollha vahnuiya kachangin lunghelin katoujin ahi. Jan teng “kangai samang ajal tadem? ahinkho lungmong in aum nadem?” tin kei le kei kakidong jin, jingkal kho ahungvah teng “kangai khangjing athou tadem? ahinkho lungmongin aum nadem?” tin kei le kei kakidong kitjin abang komle kachun le jo koma kakiphinjin ahi. Chingboi ngaiya lunghel a kaumji teng Joicy in ilhem jin ilhamon jin ahi. An nenomlou tuidon nomlouva changa hinkho kamanjing phat chun katahsan adoujou tapon, chuphat in loi le gol lah a kahung lhapantan lom kakonjin, milah a lunglhaisel a kaumji vangin aguh in lungsung akap kapjin ahi.
Phat le ni achal dungjuiyin Chingboi kangaina jong achal jingin, kum khat valjen achetan chomkhat khat kahin haimil theitan kahinkhoman anomdomtan, ahinlah lungin vang kasen golngai amiljou pon athah jing nalaiyin ahi. Christmass konin kaloihotoh bazar kaiyin kacheuvin kaloipa Daniel toh kimuto nalou asot tahjeh chun a-in uva kagachen ahile kei imu chun akipah lheh jengin, jankhat beh gehdingin ijolin ahile kenjong kanop pehtan, “ipi hijongle chomkhat bazar a gavah hite,” tin bazar kaidingin kahung kijotdoh lhontan ahi. Hitichun sangkhol tuka kavele lelhonin ahile Chingboi loinu jong agolhotoh bazar vah in ahung uvin munkhat a kakisuto uvin ahile ama jong akipah lheh jengin chuin chao ne dingin hotel khat a kalut taovin ahi.
Hitichun kakihoulim limuvin ahile Chingboi thu kahin seidoh taovin, kenjong adam adamlou thu kadongin ahile aloinun kajah a, “Henge adam nai, eimu cheng leh naminphah jing nalaiye, nangaidan thu ho aseijin alhisoh jinge. velkhat jineisa ahitahjeh in Gogouvin jong akichenpi tapoi. Nahung hedoh le kipah lheh inte,” tin ahin seiyin ahile kalungse valin kalhisohtan ahi. Chuin ka kithah chenpi dingin ijol lhonin keivang kanom tapoi. Hitichun kakihoulim lim uvin keile kaloipa jong kahungdoh lhontan ahi.
Nilhah in keijong inlam kile louvin kalpipa Daniel koma kagehtan, janin TV kanave lhonin ahile Chingboi ahung lhailut in eingong koiyin “Heu Boilen, ibola hibanga hi nei suhgenthei ham? nang ngaina a ichan geiya genthei kathoh nahet lou ham?” tin akaptan ahi. Chingboi mel kamu chun kipana le lhasetnan kadimin thu jong seithei talouvin kamoh kadentan ahi. Chuin Chingboiyin kajah a,
CHINGBOI: “Heu Boilen, nalungmol nalom lome na? itih le neihung pui kit ding ham tia nakingah ngah jeng a hitihchan a nahung lou, nei lungset lou hitam? kalungsetpen neiti ji hilou ham? kenvang ikitepna tunichanin kasumil naipoi, nang dingin kitah tah in kapang jing nalaiye. Heu Boilen, hungo in-langa chekit tahite,” tin kakhut akaiyin achuti katan ahi. Chuin kenjong,
KEIMA: “Chingboi, ASEN GOLNGAI MILJOU DING KOI UMINTEM? kenjong tuni chanin kahin ngai jinge, kalhilonpi jinge. Chingboi, nei ngaidamin, sangga hinkho hi kisonlel na a kadim jeh a, hichan genthei nathoh ahi. eini kilungset louva kikhan jong ihipoi, singsung mite lungmol jeh ahi. Ven tunin kahungtai, hungin inlanga che tahite,” tin kakoiyin ahile amajong akipah in, kaloipan kaumchan lhon chu kamka liuvin inave lhonin ahi. Chuin kenjong kaloipa jah a Chingboi ka kipuikit dingin kaseiyin ahile aman jong aphatsah in, ajan janin garineo khat a lampi gari lhun nachan a ihung thahdoh lhonin, keini jong jan nuiyin in-lam kahinjon lhontan ahi.
Jan nidan 1:00am vel hin khosung kagalhung lhonin ahile mi ana imu thipchet tan ahi. Chuin insunga kapuilut in ahile Joicy nu le pa jong ahung thou lhonin Chingboi amu mulhon chun kipahtah in chibai abol lhonin, maicham isempeh lhonin keini jong kalel lhon jenchun ka kichol taovin ahi. Jingkalin Joicy ahung thouvin, angei bangin kei thou dingin ka room ahung lut in ahile Chingboi amu mu chun akipah valin lhonglaiya akichomle le in ahile kahung khangdoh lhonin Joicy kipadan chu kave lhonin ahile keini jong kamoh nui lhontan ahi.
Joicy te toh chomkhat kaumkhom jou un ka in-lui chu kasutheng uvin keini jong ka-in luiyuva kakichonlut lhontan nomtah in kachengkhom lhontan ahi. Kumkhat jouvin chanu melhoitah khat kanei lhonin, kanu min kalosah lhonin Vahjaneng– Nengkhanthem (Jennifer) tin kaminsah lhontan ahi. Cha le nao kanei lhon phat chun Chingboi nu le pa lunggel jong akikheltan, kin imama ho jong kaboluvin man le mol ho jong kakhumin, tucha nupa hinan kingailutah in kakhosa thei taovin ahi. Tuhin cha numei khat le pasal khat kaneibe in, laigilga thum toh keini toh insungmi mi nga kahitaove. Insunga mineibang kanei joulou vang uvin kanei kham kham uva kalung oi-un, kingailutah le kihomtho tah in kachengkhom un, kachunnun ivailhah na bangin Christian insungnom kasemdoh theitan ahi.
BEITA.
©2020, Lelen Kipgen, All Rights Reserved
