–Lelen Kipgen
(7629033890)
Ka buneh jong hoilang gei hitam jong kahe tapon, ka buneh namun a chun kamoh ka dentan ahi. Kachunnu ha dammo thu kajah phat chun jan jong nomma imuthei louvin lunggim lungkham nan ibomin ka lhisoh khovahtan ahi. Ajingin in-lang cheding katile school exam kon ahikit jeh chun kalung aboitan, ahinlah kachunnu ahadammo jehchun in-lam che dingin ka kigongtan ahi. Kachedoh ding Chingboi kahetsah man lou jeh chun lekha khat a ka chunnu adamlou thu leh in-lam kache ding thu kajih in kaloiho khat kapohsah tan, kei in-lam jon dingin parking lam kahinjon tan ahi. Katou nading Bus akipatdoh lou laijeh chun bazar a kachunnu in adu dinga kaginchat nehthei ho chu tamtah kachon, chuin munkhat a dil kijoh ho chu kavet le hoithei kasalheh in kanao Joicy dingin khat kachohpeh in, hitichun parking lam kahinjonin ahile gari jong akipat doh pei tan, kachunnu mel muding kal ngahlel pumin in-lam kahin jontan ahi.
Khosung gari alut loujeh chun gari lhunna kipat in kengin lam kajot tan, sottah in-lam phalou kahijeh chun gam le go ho jong ana kikhel thei lheh in, amol alhang angui hiu hiuvin, Ju ham Va ham ho chu angai thei lheh in lunghel akaiphongin ahi. Hitichun nilhah lamin In kalhungtan ahile khangpheiya kachunnu anat thohgimma alup a akoma mi thamkhat in atoupi kamu chun kalungse valin kamit a konin kalhi ana long man in ahi. Chuin ka chunnu’n “Boi, nahung lhun hitam?” tia kipahtah a eihin houpi chun kanu kangai valin akom kajonin akhut katuh in, “Heno, ibola na dammo ham? kalung agimji val’e tukal dammo ji tahih o,” tin ka kaptan ahi. Chuin kachunnu’n eilhemin, “Boi, ibola naka ham? kap tahih in kadam ding ahitai. Boi, naumna nom nom hinam? neh le chah, na kimanchah na naphat hinam?” tin eidongin, chuin ken jong, “Henge hema, kaphanai,” tin ka donbutin chuin nehthei kapoh ho chu kanehsah in ahile ama jong akipah lheh jengin ahi.
Hitichun chomkhat ka tou tou uleh kho jong ajing peitan ahi. Kanu ahanat jeh chun kapute, ka paneote ho hetsah ding katile kanu’n, “Hetsah jong le chun hung la hung pouvintin, na lhaset sah bep hiding ahi. Seida jengtan,” ati jeh chun kahetsah tapon ahi. Kei lunggel a chu “amahon imacha’n igel hih ujong leh kihetsah mei mei hen,” tia kagel ahin, ahinlah kachunnu thusei ho chu kagelle dih jong kasa’n, “lhaset kihol bep kahi ding ahibouve,” tin kahetsah nom tapon ahi.
Chingboi toh kilungset hinkho himangpan kahi lhonin chomkhat cha jong nomma hinkho kimanpi man louva kahin dalhah pei chu kalung anommo lheh in, exam kon ahitoh kachunnu adamlou toh kalungim valin jan jong imu thei louvin kajan kigelin ahi. Kachunnu ahanat jeh chun khosungmi atoupi thei chanin ihung toupi uvin, chule khosunga kaloi kagol ho, nungah golhang hon jong ihung toupi uvin ahile kalung anomdomin ahi. Atouthei katou uvin, a-imu thei ka imu uvin, hitichun ka khovah nah nah uvin ahi. Keivang chu imuthei louva kigel khovah kahitai.
Jingkalin kachunnu adamlou toh kei kajanha na a kalel toh bu jong kahon ngap lou phat chun kanao Joicy in bu ihung honpeh lhonin, insunga bolthei thei ihung bolpeh lhonin, ken jong kanao Joicy dinga dil(muffler) kachoh chu kapen ahile ama jong akipah lheh jengin ahi. Joicy te hi kapa damlaiya pat a insung khat tabanga hung um kahiuvin, hahsat ni kipani teng jongle kingap nan kaneiji lhonin, kapute leh kapaneo ten hetkhah lou bol a ibol ji vang uvin Joicy te jal’a keini nucha lungmong lhamong’a khosa kahi lhonin ahi.
Sunin kanao Joicy toh tui kakhai lhonin, thing kapo lhonin sun nilhumin amatoh ka kivop le kalung amongin ahi. Kanu jong hospital a hinpoh ding katiule, “ipi hijong le tujan veutin aphatdom lou le jing lang le po nao hite,” tin ka khongai taovin ahi. Hitichun jan ahung hikit tan, khosung miteho, loi le gol ho jong kanu toupi dingin ahung kikhomkit taovin, cha ka ki-om uvin kajantou kit taovin ahi. Janlhah imulou kahijeh chun kalel lheh jengin, ahinlah jan langin kanu ahanat cheh cheh jeh chun lunggim nan ibomin ka imuthei deh pon ahi.
Jansot langhin ahaithei tapon akhut akeng kameh uvin, kap pumin kachunnu kakoutan ahile, chomkhat jouvin ahung haidoh kit in, kachunnu ka-it valjeh chun akhut lha louvin katuh chahtan idalhah lou nadingin ka kap jingtan, Pathenin kachunnu toh ikhan lhon lou nadingin katao jingtan ahi. Chomkhat jouvin ahung hahdoh in, “Boi Boilen,” tin ihin kouvin ken jong, “ipi ham hema?” tin ka kikhin naiyin ahile kajah a, “Boi, napan eikoutai.” tia ahinsei chu kaluboh ahbom te aphatan, kachunnu toh kikhan ding kahitai ti kahet phat chun hakan kakaptan ahi. Chuin kachunnu’n ihin houvin kajah a,
KACHUNNU: “Naosen Boi, kei napa komma anache masa ding kahitai. Ven, ihinkho hi eini khut a um ahipoi, kaphat alhintah jeh a aloutheilouva ana masa ding kahitai. Boi, kadalhah nung le hung kap hih in, lhase kisa hih nikhokhat le nang jong kei leh napa komma nahung ding nomma iumkhom diu ahi. Boi, na chunnu hi neilou genthei kahin, mi neibang jong kaneisah jou pon, genthei jeh a minei mi nga otcha puma hinkho naman hi nachunnu jeh ahi, Nei ngaidam ta o boi. kanung teng Pathen song pumin kitah tah in hinkho hinmangin lang, Christian insung nom nahin semdoh ding hi kakinepna ahi. Boi, napan ikoutai.”
Thu hicheng aseichai chaiyin amit asingin iti kaka a iti kakou vangin ihou tapon, kachunnu’n itih a kinung mukit talou dinga idalhah ahi kahet phat chun hakan kakaptan ahi. “Ka Jopa la aum tapon, ka inko ka sanggam ikhohsah ding kapate kapute’n la ikhohsah pouvin, hijongle kachunnu jal a kilungmong ham ham a tua aman idalhah kit le kei kachanga ipi kati a hoilang kasuh ding hitam?” tin lungjin nan kadimin, kachunnu kangai valin angol kabangtan min ihoupi jong le asuhsah kaum thei tapon ahi.
Hitichun chunnu lhangaiyin jankhovah in ka kaptan, mihon ilhem uvin ahinlah eilhembi ding kachunnu aumtahlou jeh in kei vang lhepbi jou kahitapon, ka chunnu long komma chun ka kap kaptan ahi. Taikho hung vah le kachunnu nidang banga hung jing thou dingin kagelin taikhovah kal ka ngahlel lheh jengin ahi. Jingkhovah konin ahpa akhongtan, ahinlah kachunnu kho helouvin thinglong bangin lhonglaiya akijamin, “Hema, kho vah ding ahitai hung thou loiyo,” tin kakou kouvin ahinlah kachunnu’n ijahpeh tapon, kachunnu’n ihoulou phat in ka kapkit jitan ahi.
Jingkho avahtan jing ninou ahungsoh emselin, vaiham donin in-lhang lang gammang lah a simthing chunga sim Chelot ahung hamin ahile ahamgin chun kalung asuhel lheh in, “Oh, nang jong na chunnu ngaiya kap hiteiyin nate o, kei jong nang banga chunnu lhangaiya kap kahi. Nachun ngaina na tongso ginngei kajah teng, genthei lunglai na sunemin jaitha kaham joupoi, mao mao datan o, simgam chelot.” tin kalungthimin kei leh kei kakihoujin ahi. Kachunnu lungnachim a kajen man lou jeh chun ka kisih lheh jengin, hitichun sun nilhumin kachunnu ngaiyin ka kap kap tan ahi. nilhah langin insunga kona lhahdoh na phat kahinmang taovin, in-neite phat ahung hitan, ahoulim ding le kachunnu long insunga konna lhadoh ding kasopi kapate ho koima aumtapon, chuphat in seitheilou houlim bol theilou hijong leng kachun long chunga houlim kahin boltan ahi. Chomkhat houlim kabol jouvin kangaitah le ka-it tah kachunnu eitih a kinung muto kit taloudingin kap pum pumin kahin lhatan ahi.
“Hema, leiset hi thinagam, kikhanna gam ahi. Tunin eini nucha kingai lheh jong le hen thinan ichung lhona vai ahop ahitah jeh in lhaset nan sang pohite, nacha nei vailhah na kamchang kahin molso ding Christian insungnom kahin semdoh tei ding ahi. Mithi le mihing kipol theilou ahi bangin eini nucha umkhom sot thei ihitapoi. Hijehchun tuni nikho hin nacha’n leiset dalha a vangam nomma choldo dingin hiche insunga konin kahin lhatai. lunglhaisei in chetan, ipakai jesu’n nakouna o-nem hiu hiu chu ngai phan lang jon jingin, kicha hih in van lam thomma goldeiten na nangah nante, chetan nunglam hin ngai tahih in, Hema, chetan.”
Hitichun aban seibe thei talouvin kadinna munna chun ka kap dentan ahi. Chuin kachunnu long chu vuilem dingin lhanmol lam jonin apotaovin, “angai poi, kanu podoh hih laiyuvin, phat chomkhat beh kachunnu toh nei umkhom sah nalai uvin, kanu kangai val’e,” tin kap pumin kaseiyin ahinlah, phat ageisang tahjeh chun aloutheilouva vuilem dingin kachunnu lhan lam jonin apotaovin ahi. Hitichun lhanmun a vuilem na kin ho jong kahin chai taovin, in-lam kahung kile taovin ahi. kahinkho chesa ho kagelin, mailam a kahinkhoman ding dan ho kagelin ka thomhao lheh jengin ahi. Ahinlah Joicy ten lungmong lhamonga kaum nadingin ilhamon jing uvin ahile amaho jalin kalung anomdomin, ahinlah kachunnu kangaina adaithei him himpon lhisonan hinkho kahin mang jingtan ahi.
Ka chunnu’n idalhah na jong nithum lam ahitan, kin ho jong kachaisoh taovin ahi. Nikhat hi ka school uva ka class mate holeh teacher ho ahung uvin, insunga Joicy le anu le apa toh khosung mi ijat hamkhat kanatou laiyuvin, amaho ahung kamu chun lhaset nan kadimin kamoh katan ahi. Chuin ka teacher ho le kaloihon ilhem uvin, sum donation ahinbol uvin 2000Rs ipeuvin, chule chini bongnoi jong ahinpo uvin, cha kadon uvin tilkhouna, lhamonna thu tampi jong iseipeh uvin ahi. Chingboi jong ahung jaovin ahinlah kihouna ding phat aumtheilou jeh chun ka kihou thei lhonpon ahi.
Chomkhat jouvin amaho jong kinungle ding ahijeh uvin, che ding akigong taovin ahi. Chuin chibai ka kibol uvin ka kilha taovin ahile Chingboi kakoma ahung in, “Heu Boilen, school nahung kai lou ding hitam?” tin mai nguitah in ihung dongin ken jong, “Nao, kahung kai kit ding ahi. Ipi hijong le hapta khat, hapta ni beh kahung um nahlai ding ahi.” tin kadonbut in, nom a kihouna man phat aumlou jeh chun hitichun ima sei man louvin ka kilha taovin ahi.
Banjomkit ding.
©2020, Lelen Kipgen, All Rights Reserved
