-Lelen Kipgen
(7629033890)
Aham doh jousen “Chingboi, Chingboi,” atiuvin akisulih deh deh jiuvin keivang chun imachan jong kanagel peh ji pouvin ahi. Kaloi kagol ho chu dongma nei toh hibangse asoh lhajeng uvin, kei chu town lah, mitam nalah a school kaikhalou kahijeh chun jachat nan kadimjin koima jong kahou ngam ji pon ahi. Hitichun kiphatlam pum pum leh jahcha pum pumin school kahung kai kaitan ahi.
Kanu jong thinglhang langah achangin aumin, kei lekhasim ding gelkhoh najalin ulsa longin na atongin ahi. Velkhat khat leh eihung vil jin, atam jo’n ama ahung thei lou jeh in sum inthot tho jin ahi. Sum inthot ho chu neh le chah chohna, school fee, chule insan man kape jin ahile kei kimanchah nading aum ji tapon ahi. Ahinlah ka hahsat naho kanu kahetsah nom ji pon ahi. Ajehchu aman jong ajochan a sum le pai ahol a amu kham kham inthot ji ahijeh chun “ka hahsat naho kihetsah le kisu lunggim val inte,” tin kahetsah ji tapon, ihin thot kham kham chun ka kimangcha jin ahi.
Kapute, ka paneote jong Lamka langa aum taovin, ahinlah kasopi kasanggam tia genthei nikho’a belthei jong ahipouvin, velkhat tou kholailenga akiche jongle hetkhah lou bolin ibol jiuvin, che jong kachenom ji tapon ahi. Keini nucha gentheitah a kakhosah lhon vangin, velkhat cha jong seki, makhai in jong ikithopi khah pouvin, ahinlah ima’n jong kageldeh pon ahi. “Kei jong lekha hoitah a kasim ding nikhokhat leh kei jong jeep le car a kalhai ding ahi,” tin kei le kei ka kitilkhou jin ahi.
Nilhah le kachangin maicham kasem jin, kanu dingin katao jin kahinkho Pathen kom’a ka kilhan doh jingin ahi. Hitichun kum le lha jong ahung kiheiyin class9 kahinsim tan ahi. Kaloihon dongma nei dingin eijol jiuvin, abang kom leh katha anom jin ahinlah, “ei mi vaicha, mi neibang kinei joulou koi lungset jong kichang jou ding ham,” tin kisonlel nan kadim jin ahi. Ahinlah kum lhomcha kihi jongle golhang hinkho hinmang pan akihitah jeh chun nungah melhoi imitsih in ahung kive le pantan ahi. Ka class uva “Chingboi,” kitinu chu guhthimin hoi kahin salheh tan, aguh in kahin thimvet jingtan, lungset lama analut dan chu kahitai. Ahinlah amahi mi melhoi ahijeh chun ka school uva koima ahelou, hoi salou aumpon, ahel lou, ajol lou akithangset abang jeng uvin ahi. Mi aching athem, amelhoitah tah hon ahel uvin ahinlah koiman ahel doh jou pon ahi. Aching athem, amelhoi, mi housa tah tah hon bon hel a heldoh joulou, kei ima hilou pen pa’n aguh in Chingboi kahin lungset tan ahi.
Ka nun sum ihinthot nga jou lou phat le ka kimanchan nading ahung lhasam jitan, hijeh chun ka umna in-nei ten kolchu heh na khat aneiyuvin, Saturday ni leh new bazar a kolchu kaheh jin, ka kimanchah nading sum kalojin ahi. Class 10 beh jo a sepoy beh akipan doh jou khat le tin, hahsa lheh jongle themjil na ka masot jingin ahi. Ka umna in-neiten jong ka hahsat ka genthei ihet them peh uvin, kabuina ijat hamkhat in ikithopi jiuvin ahi.
Hitichun phat le nikho achal dungjuiyin Chingboi kalungsetna jong achal jingin, aman ihetphah peh lou vangin aguh a kalungsetna chu ana pilhing lhehtan ahi. Chingboi school ahung lou ni le chun sun nilhumin ka school kai jong anommo liu jin ahi. Loi le gol ho kom a sei ding jong kaseingam pon, Chingboi kalungset na hetsah ding jong kiphatlam nale jachat nan kadimin, hinkho mandan hahsa kasalheh jin ahi.
Saturday ni bouva kolchu kaheh ji chu ka kimanchah na alhing joupon, hejeh chun hapta kahlah nikhat nini school kailouvin kolchu heh in sum ka kilo jin ahi. Hitia school ka kailou na ahung tam phat chun school kailou jeh in mol kahin ne jingtan, teacher hon eijep ji teng ule chun Chingboiyin mai nguitah in ina thimvet jin ahi. Hichelai chu auto jong anatam naipon, reckshow anatam nalaiyin ahi. Abang ni leh jingkal school kai masangin rickshow a tui katol jin, bu kihon man louvin school kache jin, abang le kavaigei kit jin assembly a mol kane kit jin ahi. Nilhah jong le school kikhan phat le reckshow in tui katol kit jin, khojin nung le leltah in bu ka kihon jin ahi.
Nikhat hi ka school kailouna atam val jeh chun principal pan a-room a ikouvin eidongtan ahi. Ken jong kahahsat na, kabuina abonin kaseipeh in ahile aman jong ahethemin, school phate a kakai ding leh, lekhasim kakhohsah na dingin thu tampi’n itilkhouvin ahi. Kaloi kagolho umchan kavet a genthei ka kisah val teng le kalungthim’a adonlou lou ahung kon jin, school kai ngah doh ding pou kalunga aumjin, abang le kanu chunga kalha ase jin ahi. Ahinlah kanun jong ajochan’a pan alah a eisot ahijeh chun ka oimo nom jipon, “lekha hoitah a kasim’a ahile nikhokhat le tua kagentheina hi kile ding ahi,” tin kei le kei kaki tilkhou jin ahi.
Hitichun hahsatah in hinkho kahin mangin, gentheina ijat um jongle kajochan in themjil nalam kakhohsah jingin ahi.
Nikhat hi school a kaloipa Daniel toh ka kihoulim lim lhonin, nungah thu kahin pandoh lhontan, ken jong Chingboi kadei dan le kalungset dan ho kaseipeh in ahile aman jong, “chutia nalungset mong mong’a nadei mong le iheltah hihding ham,” tin aseiyin, ahile keijoh chu kanom kit tapon, kajahcha kit tan ahi. Kaloipa Daniel kom’a Chingboi kalungset dan ho kaseipeh chu kei ka jachat, ka kisonlel val jeh a kei hetlouva ana thimjol dan ahitai. Hiche ni’a kipat chun Chingboi jong ahindan, amivet dan masangtoh abang tapon, hou jong ihoupi nom ji tapon ahi. Ken jong kaloipa hin aseipeh ahiding chu kagingmo thimin nikhat hi kadong tan ahile aman jong “henge, kaseipeh’e hitia akibol lou le itih hijong le seidoh pon natin nalungset nachan lo ding ahi.” tin eihin donbut in ahile vet nading kahetapon, kamai asen lha jengin ahi. “ipi bola kana seidoh khoh ahidem? kiseidoh dale hibang jachat kithoh lou ding,” tin kaloipa koma kaseidoh chu ka kisih lheh jengin ahi.
Nilhah in kachangin kakigelin, kaseidoh chu ka kijansih tan imu theilou leuvin kakisih in ahi. Ajingin school che a Chingboi mel mu ding chu kajah achan, chuphat in school jong kai louvin kaum lo tan ahi. Abang le “pasal kahilou ham, cheho pou pouva kajachat le hithei ponte, het a ahet ahitah le pasal kibol chop jeng hen,” tia ka kitomlah vangin ka kidoisa tapon ahi. Nilhah in kaloipa kakom’a ahung kholaileng’in,
DANIEL: “Baii, ibola tuni school nahung lou ham?”
KEIMA: “baii, kadam thim lou jeh’a kahung lou ahiye. Baii na kichaideh’e, ibola Chingboi koma chu na nasei hamo?”
DANIEL: “ass… na pasal mo ji tave, kalungset’e natia nalungset na nasei lou le iti ahet ding ham? kaseipeh jong hi kipah tang,”
KEIMA: “ahile baii, aman ipiti nadonbut hinamo, kidoi toh nam?”
DANIEL: “Nikhat a chu kasei hija, aman ipi hijong le ama kamchang a kija hile, ati’e”
kaloipa thusei chu kagelin kidoithim le kilom kasa’n kalung ahung ngam jep tan ahi.
Ajing jingkalin angai bangin rickshaw a tui katol kitin ahile school che ding ka vaigei kit tan, kei jong kinothimtah in school kahinjon tan ahile gate pam langa Chingboi anadingin ahi. Sung lang kaven ahile assembly abol taovin, chuphat in kei jong houpi louvin kalut tan ahile aman jong hampoh louvin kanung ahinjuiyin, kihou louvin mipi masanga chun mol kane lhontan ahi. Sunin, jingkal’a gate pamlanga anadin chu kagelin ahile kei einanga ahiding chu kahen, kahoupi lou chu ka kisih lheh jengin ahi. Ama jong nidangtoh abang tapon, nilhum keijin amai nguithet in akhalah jou tapon ahi.
Aumdan chu ken kahetlou vanga nilhah khat school kikhan’a kanung ahin thimjuiya, ka umna in-ahung vet’a, chule jingkal a jong chu ka kimanchan dan, bu jong kihon man louva kabui dan ho chu ahung mu sohkei dan ahi.
Banjomkit ding.
©️2020, Lelen Kipgen, All rights Reservrd
