AHSISOMLENG-II

(Part-II)

“Thilha nungah toh kilungset thusim”

Written by: Lelen Kipgen

Chu in kamang tobangin kamun, lhumlama konin Ahsisomleng khat ahung lengin, kakom ahung lhunin sun a kamu nungahnu chu ahung kisoh in ahi. Hiche pet chun kichatje jong kahepon, amelhoina chun kalung amonsah e. Chu in kakhut jetlam atuh in oltah in kalengtou lhonin, meibol chungvum a Ahsi ho lah achun kaleng le lhontan ahi. Noilam kahin vetsuh leh jalkhun chunga katahsa kho helou ka-inkoten aboipi chu kamun kalung adong lheh jenge. Sot thim khat jouvin inlam kile tahite, nainkoten nakou kou uve atin, kahung kile lhonin, khosung kahin phah lhon phat in ama alengtouvin, Ahsisomleng akisoh in alengmang tan ahi. Aman eidalhah phat chun kahung khangdoh in, kalupna jalkhun chunga kana ihmun ahi. Jingkho ahungvah phat in kadamsel kittan, louvat a kon kit ding kati leh ka-inkoten lou kondatan, nadam poi eitiuvin, kalouvat ban chu amahon avat un, louvat chai kah chun kakichol tan ahi.

Masang jep lai chu Juneh khang ahijeh ham thinglhang gama hin Thilha Sangah jong anatam deh hileh akilome. Jan teng chung langa Ahsi tobang lenthim aleng le jin, chomkhat jou leh akikhen jal jin tampi akisoh jin ahi. Masanglai tehse hon hiche Ahsi tobang alengle ji ho chu “Bom” anatiuve. Nilhum kon, nidangsan don a gama ivaleh khoisa/saiselip akija jin ahi. Hiche hi tukhangin jong thinglhang gama chavang lai, phat khat khat leh akija ji nalaiye. Louto a Si umna noiya chun gari lam khat aume. Hiche kuma chu kagamu hi Meilhei hon thing alah-u ahi. Jankhat hi meilhei ho gari a natong hon janin hiche lampi chu ahin jot uvin, Si umna noiya lampia chun Sakhi khat gari in ahin tanglih uvin, gari nunglanga ahin kipoh uvin, in ahung lhun uva avet uleh a-sapoh uchu akeh khat lang anakine chaiye atiuvin ahi.

Tehseho seidanin hilai Si a chengte hi Gelgum thilhate, thilha giloute ahiuve atiuvin ahi. Keijong phattin in hiche nungahnu bou chu kagelgel jengtan, amelhoina chun kalungsung alodim jinge. Phat khat khat le Thilha nungah ahi ding chu kagingmo jin, ahinlah amelhoina leh aphatna ho chun kakichatna jouse aselmang jou ji tai.

Vao pah lai ahitan, changtu phat ahitai. Ka-inkote akile jiuvin, kei chu louva chang kitu ho Jucha Vachaten alo ji jeh uchun louva kageh jin ahi. Vaopah tolkhe ho chu Sakhi hon alo ji jeh chun nilhah lam leh lou vel lah a vaopah changin kache jin, khojin nung leh lou buh lam kahin jon jie. Hiti chun nilhah khat hi natoh kichaiyin Sa chang din gamlang kajon kittan ahi. Lou gal langa vakom khat a hin vao phung khat aumin, apah tolkhe ho chu Sakhi in alo jeh chun akoma thingphung khat a chun kakaldoh in, Sa kahin chang pantan ahi. “Ngun” kiti hi vakoma Si jat khat ahin, ham/peng thei ahi; A-Si chu peng ahipon, achengte ham/peng ji ahi. Ahamgin hi Sagol honte pen tobang khu ahi jin, ahe kha lou dinga detmah umtah ahi. Tukhangin jong thinglhang munkhat khat a aum nalaiye.

Hiti chun keijong Sa kahin chang tan, kho jing pei ding ahitan, Sa ahung tapon ahi. Chomkhat kaum le kho ajing tan, Sa hung lou ding hitante, lou buh lam kijon henlang nomin kikichol tahen, tin katouna thingphunga kon chun kahung kumlhan ahile noilanga Ngun chu ahung peng in, Sagolte kahisah jeh chun jan noiya chun apen na lang chu kajon tan ahi. Apenna mun kalhun le imacha aum tapon, Sa nung mong mong aum tapon ahi. Chomkhat jouvin lungdong tah a kaum laiyin chung langa ahung peng kitin, chung lang kajot le imacha aum kit pon, hiti chun mun chom choma apeng jin, kache ji leh angei ngei ahijie. Ajonan Ngun ahi ding chu kahetan, loulam jon ding kakisah le gamnoiya chun kaumna lam kahe tapon, kagam mang tan ahi. Chu phat in kaumna mun achun akihet theina din theuboh khat kakoiyin, lou lam hidia kaginmona lang, chung langa chun kache tan ahile saothim kache jouvin theuboh kakoina mun chu kahung lhung kit in kalung adong lheh e. Kachena lang hi dihlou hinte tin noilam a kachesuh kit in ahile theuboh kakoina mun mama chu kahung lelhun kit in, hiti chun suhna ding helouvin kaumtan ahi.

Hiti chun Suhna ding kahetlou phat in thingphung sangtah khat a kakaldoh in, lhavah noiya chun mol le lhangho kaven ahile lhumlama konin Ahsisomleng chu ahung leng kitin, kakom ahung lhunin nungahnu chu ahung kisoh kittan ahi. Ama kamu phat chun kalunggimna jouse kahaimil tan, ipiti kahim jong kakihet tapoi. Chu in nungahnun kajah a “heu, kicha hih in kei kaum laisen koima nasuh gentheisah ponge” tin meseu seuvin eive e. Chomkhat jouvin kakhot jetlam atuh in, van chung sanga Ahsi ho lah a chun kalengtou kit lhontan ahi. Ahsi phedet det ho lah akon chun lhumlama gamlhatah khat a mun nomtah khat akigalmun, hilai mun chu kajon lhonin ahi.

Hilai mun chu meibol chunga akikhangin, Lha leh Ahsi ho toh kinaicha ahitai. Amuna chun pahcha namkim apah in, apah ho chu mitthah(butterfly) hoitah tah hon abomin avet hoi lheh jenge. Hilai mun achun vetnom umtah tah ho eivetsah in, muntin a eipuiyin, kipahtah in hinkho kamang lhone. Nom kasah beh jeh chun phat che lam jong kahe tapon, in kadalhah kal hapta khat lam lhing dan anahitai. Hiti chun nungahnun kajah a “heu, inlam kile tahite, na inkoten nahol hol uve” atin, kenjong “ibola em nao, nangtoh umkhom nom kasah pen e hoima kache nom poi” kati le “heu, noma I-umkhomna ding phat hung lhung nante, tun inlama kilen lang kahung vil jing ding nahi” atin, inlam kahinjon lhontan ahi.

Hitia inlam jona kahung lai lhonin, kahung khangdoh in ahile Vadung pama songpi chung khat a kana umin ahi. Kakivon na ho asejou tan, katahsa chung ling le khaovin akoina akeh matmut jengin, kapumin kana cheh chuh jenge. Aumdan chu kalhagao ama toh kivop a katahsa ama macham chama gamnoiya vah le dan anahiye. Kalung amo heh hun in, imacha kageldoh thei tapon, angol tobangin kaumtan ahi. Hitia kanaum laichun khosung pasal phabep ahung un, kei eimu phat un akipah lheh jeng uve. In kalhun louna hapta khat lam ahi phat a muntin gamtina athi hol a einahol dan u ahitai. An nelou twi don lou kahi phat chun katha abeiyin, kacha thei lou phat chun inlama eipo uvin, hichenia kipat chun kalunggel asuhsah aum tapon, khosungmi hon jong mingolin eigel tauvin, ka-inkoten room sunga kot eikam khumun, mingol bolin eibol tauvin ahi.

Phat khat khat le nungahnu chun eihung vil jin, amatoh kakivop teng katahsa ama macham chamin aum jin, ajeh apol beiya kakitom jing jeh chun numei chapangin eikicha uvin, kakom kavel a koima akithah ngam tapon ahi. Nungahnu toh kahung kivop jing lhon phat chun kahin lungset doh tan, ama kamu lou teng kahaina-hu eikilahmang peh kabang jin, kakitom tom jie. Abang kah le thilha nungah toh kivop kahi chu kakihet jin, ahinlah kalungthim asungol um bangin imacha khohsahna kanei thei ji pon ahi. Aman jong eihung vil jingin, kakimuto jing lhone. Abang kom le ka room sunga ahung lut jin, kakihoulim lim ji lhone. Room sunga ahunga kakihou ji lhon teng ka-inkoten amuthei ji lou jeh un achangin akihouve, eiti jiuvin ahi.

Nilhah khat hi Ahsisomleng in ahung leng kit in, eihung puiyin molchung khat a katou lhonin, chunga Ahsi ho kave lhonin, kakihoulim lim lhone. Chomkhat jouvin ajah a “nao, itih le noma iumkhom thei ding hitam? Nang toh umkhom bou kanom e” kati le “aphat hung lhung vah jet ding ahitai” tin eidonbut e. Acham louva kilungset kahi lhontai. Thilha jong hi apha loi, aphalou loi um ahi. Eisugenthei ding hoa konin aman eiveng jinge.

To be continue.

©️2020, Lelen Kipgen

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.