(Part-I)
“Thilha nungah toh kilungset thusim”
Written by: Lelen Kipgen
Thilha kiti hi eiho mihemte banga achi achi a um ahi. Tekah nan Gelgum thilha, Gelsan thilha, Gelvom thilha leh Lhangnel thilha adang dang jong tampi aum nalaiye. Masanglai tehse ho seidan in Gelgum, Gelsan le Gelvom thilha ho hi alhangpin thinglhang gammang lah, Si lah a acheng nom jiuvin, hicheho lah a hin Gelsan thilhate hi akhoh dehset uvin, mi sukicha jingkei leh mihem hinkho suchavei ji atamjon amaho hi ahinom jiuve atiuve. Lhangnel thilhate hi vadung twi lah, Dam twi kitinna lah leh Pat lah twi kiveina lah a acheng jiuvin, twi a thi ho khu amaho bol ahi jie. Chule Lhadam kiti jong hi Thilha jat khat ahin, amaho hi muntin a aum thei un, City lah building thupi ho lah a jong aum un, thinglhang lah a jong aum un, muntin a aum thei uvin ahi. Mi athi teng alha alange, iti jiu khu mithipa lha ahipon Lhadam hi ahi jie. Amaho hi mi suhkichat leh a-eng enga bol thanom tah ahiuve.
Lockdown hung kipat til, May lha sung chu chena ding vana ding jong umlou, kaum chim manin thusim kajih jin, sun nilhum lhumin thusim kanaboipi jie. June lha chun lockdown akhoh cheh cheh jeh in thinglhang lang kapute khoa chomkhat kihuilha din kana chen ahi. Kaga lhun le eikichat u ham, iti khat ham koiman chibai cha jong eibol pouvin, keijong katot in kapu koma nopmo kasa thime kati le hanui in einuisat in, hiti chun kakidai dai lhonin ahi.
Ajing in kapun thangve a che ding aseiyin kache lhon le Sakhi achal lhingset khat ana-oh in, kakipah lheh jenge. Sa chu kahinpo lhonin, nilhah in asung apoh in kahon uvin, kholhom milhom ahijeh chun khothing in kane khopset uve. Kapute chu khosung Haosa ahijeh un a-in uchu mi akitit lheh jengin, nilhah le kholaileng mi atam lheh jie. Nilhah khat hi kholaileng ho houlim chu kangai le khosung gollhang khat thu aseijun, kangai ngai le kalung alut lheh jengin gollhangpa chu kimupia athu ho phatecha kihoulimpi ding kanom lheh tan ahi. Changham bollai ahijeh chun sun le lou kakon jiuvin, nilhah khat hi kahung vailhun un gangchelin kakisutheng in, an kaneh chaiyin aseiju gollhangpa te in chu kajon tan ahi.
Hiche gollhangpa hi amin Ngamcha ahi. Kaneo jep laiya thinglhang kache teng amaho toh chun kana kivop jiu ahin, aman jong phatah in eihe e. Insung kaga sunglhah le tapsah a anatouvin jahcha thimtah in einave e; Kenjong “baii, nadam dam hinam?” kati le henge kadame atin, ham jong aham nom beh pon, kenjong Sikhar kapoh chu kapeh le akilah in, anen hiti chun hahsa thim sesu in katou uvin ahi. Anu apate leh kholaileng mi atam jeh chun kalunggel bang ahithei pon, jan asot phat in kicholdo din inlam kajon tai.
Ajing chu Sunday ahin, sun Houin kikhenin kenjong Ngamcha te in chu kajon kittan ahi. Amahi kholai jong leng lou, in a kikhum chahkheh ahi. Mihon mingol a akoi vang uvin ken midang thilha nungah toh kipol ho thusim kana ha het jeh chun athil umdan kahethem in angolin kagel poi. Kahoupi jong leh loi le gol ngeitah leh aching tah bangin kahoupi jie. Kagalhun le room sunga kot anakikam khumin nomtah in ana kijam e; Vaiham laitah a nomtah a ana ihmut chu jan ihmu chim lou ahi ding chu kahe theiye. “Baii, baii, kot hung hongo” tia kakou kou le nangchet in kot chu ahung hongin, hunglut o atin akijam pei kittan ahi. Keijong Phone a la kalha choh thet in akoma kakijam in ahile anam thethu jenge. Thilha hi anam khat um ahi. Gam in abol itihou, suhkhah nei itihou khu anam khat aum jie; Hiche anam khu mijousen ahethei kitpon, ahethei khat, aja thei khat um ahi. Kenjong hiche nam ho hi kaja thei jie.
A room sung chu achop dehduh in bang lah chu thisan a kijih ham, ipia kijih ham apol belbul jenge. Room sunga furniture ho leh in-khom ho chu chem a kisatna nung adimset in, boina ijat hamkhat anato ahi chu kahethei peiye. Ipi jeh a Thilhate hin mihemte hi phat khat khat leh kichenpi ding agot jingu hintem? Bible a Pathen chapaten mihem chanute akichenpi, kiti jong mutheiyin aume; Pathen chapate ati hi koiho hintem? Van a Lucifer nungjui ho leh Vantil te anakidou un, Lucifer le anungjui ho leiset a nolhah in anaum uve. Amaho hi van a kidouna aum masanga chu Vantilte, Pathen chapate anahiuve. Amaho hin Adam son le chilhah ho chu anakichenpi uvin anasuboh uve. Hijeh a chu Pathen chapate leh mihem chanute anakicheng uve, anakiti ahi. Tua “thilha” itihou hi Pathen chapate Lucifer nung anajui ho chu ahiuve, jong akitin ahi. Achuti le Thilha leh Mihem kichen hi masang khanga kipat anaum ahitai, ti thei ahi.
Hiti chun akomah kakijam in, kadoh doh eidonbut in thudang imacha aseipon, kiphatlam aum ngap e. Ahinlah frank tah in kahoupin, akah le katot jin ahile nahchangsal in khatvei tou ahung nui ham ham jie. Chomkhat jouvin kihetmosah tahin “Baii, ibola kholai napot ji lou ham?” kati le eihin donbut vanglah in “Baii, hoima kapot nom hih e!” tin eihin donbut in “Baii, mihon nahethem hih jong le ken imajouse kahethem e” kati le lungdong tah in chomkhatpi hoitah in eiven athipchet kittan ahi. Chu in kenjong “Baii, nungahnu chu amin ipi ham?” kati le tija thim tahin eiven “kon naseipeh ham? ilah a kona nahet ham?” tin eidonbut in kenjong “koiman aseipoi; Nalim kavet a kahet nahitai. Kakoma imacha imm hih in, aboina aum le kakithopi jing ding nahi” katile “sei jong leng tansan pon nate” eitin, “baii, seijin naboina aum le nakithopi inge” tia kadoh teitei le thil umdan ho aban banin ahinsei tan ahi.
“Baii, kasei jong le koiman eitahsan ji poi. Khosungmi alen aneovin mingolin eigel uvin, kholai kapot jong le numei chapang hon eikichat jeh un hoima pot louva in a kikhum chah kheh kahiye. Henge..! mi mitvet dinga angol ma kahitai; Ajeh chu amahon ipiti kahi eihetpeh pouve. Kamalam hinkho ding hi kagel ji leh lungjin nan kadim jie. Ajouva neidoh nungahnu chun min aneipoi; Ajeh chu amahon min aneipouve. Jan teng lhumlam a konin Ahsisomleng in ahung jin, eihung pui jie. Tulah vang hi ahungna akivang lheh tai.
Ningkum kum masa chun khogal a lhangneopa khu louvin kavat uvin ahi. Hiche lhanga khu Si lentah khat um ahin, louvatna ding mun laitah a um ahi. Lou mun ding kahung kihom tauvin ahile hiche Si umna chu keiho louvin ahop tan ahi. Hiche Si chu alet dan Sanggam 4 ho beh lhinginte; Alhang changin Si ahijengin, muntin a twi aveiyin, thing amangin, hiche Si lah chu sun chang noiyin jong athim liu jie. Hiti chun lou kahin vat tauvin, Si lah chu kadalhauvin, achung lah chu kavat uvin ahi. Louvat laiyin kachangin kakon jin, khosung toh kinaicha ahijeh chun kavat nilhum jin, nilhum teng in kajon jin ahi.
Nikhat hi louvat in kakon kittan sun nisa noiya leltah a lou kanavat laiyin phulou helouvin kho ahung thimin, lungdong tah a kanaum laiyin nungah hoitah khat ahungin, ama ahung phat chun kaumna kah lhon chu avahset e. Hiche pet tah chun kichat ji jong kahe pon, kalung amongsel e. Amelput kavet le adong hoiselin kavetnom leh jenge. Kakom ahung lhunin, mesiu seuvin kajah a “heu, niseh le nachanga louvat a nahung ji hi nalel ji lou ham? Nangvang napontho val e, kan vetnom ji dan, sun nilhumin na natoh kave nilhum jie” atin ahile kalung adong lheh jenge. Chu in kenjong “nao, koi nahija hoiya kona hung nahim? namin ipi ham?” tia kadoh le meseu seuvin “ken min kanei poi” atin tol jong tongkha louvin noilang Si umna langa chun achesuh in ahi. Ama apotdoh phat chun kahung kinjap in ahile kho ahungvah tan, kagal a kakho ho louvat ho jong lungmongselin lou anavat un kalung adong lheh jenge. Hiti chun sun nilhumin thil umdan ho chu kagel nilhumin ahi.
Nilhah in matahin in kajonin, in kalhun an kaneh pet uvin ka-inkote koma kasei le nalunggel gel chu sei ji hih in, tin eitahsan tapouvin ahi. Chuphat in keijong kalunggel khat tou hinte tin kathep tai. Janin kahung dammo tan, kakhu asih in kakithing thing tan ahi. Ka-inkoten lou einehsah uvin, chomkhat jouvin ka-ihmu lha peitai. Chu in kamang tobangin kamun, lhumlama konin Ahsisomleng khat ahung lengin, kakom ahung lhunin sun a kamu nungahnu chu ahung kisoh in ahi.
To be continue.
©️2020, Lelen Kipgen
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
