Gollui Thusim
……..✍ Smartmyn Doungel
Masanglai jin , kho khat a hin gollhang migen thei tah khat ana um in ahi.Hiche Gollhang pa jong nikhat hi ava le2 leh Leng innpi khat ah aga vah lut khatan ahi.
Hichun lengpan jong gollhang pa kom’a chun epi iti tale tia nahung valet jeng hitam tin anadong tan ahileh, gollhang panjong adonbut pajin, vo Lengpa keima hi migenthei kahin, naleng gam sunga cheng kahije, neilung set inlang nasoh pa hi toh mun khat neipen tia naheng a kahung Tao ahi. Hichun lengpan jong gollhang pa chu aven, alungset lheh jenge, hinla lengpan tupet nangding in tohmun ong aumpoi hijong leh ka Bong(cow) ho chingtup in pang nan nate tin abong chingin apansah tai.
Gollhang pan jong hiti chun lengpa bong chu niseh in aching jin kitup keichan avesui jingin ahi.
nikhat hi gollhang pan jong Lengpa bongho Chu gammang lentah khat ah agaching jin, Chuleh vadung pang lithuh tah (Santai li ) kiti mun khat ah jong hin aga ching jin ahi.
Nikhat hi , hiche (Santai li) pang’a Bong achin pet hin, nisa asat val jeh chun kichol nading in agallam ma thing phung hoi tah khat amun thinglim noija chun aga tou tan ahileh, thing on chung a touding chun, (Phaimun) le (Va-Ah ) chu ahung kichu lhon tan, ahileh
Vo,,,Va-ah nikhat le, abul-sana aleh dangka chunga katou nileh eina kivet maitan tin aleng mangtai.
chungleng vacha ganhing mai2 jin bon abul sana aleh dangka a aboija ahol thei a ahile, kei Mihem kahin, hiche abulsana aleh dangka chu kamudoh tokah se a kahol ding , kahol doh thou2 ding ahi tin aki tom lah in,
gam mang noija, Lengpa bong achin chu inlam kinung le ta lou vin, a Bong chin ho dalhan, abul sana aleh dangka holdingin aki pat doh tan ahi.
Hichun ache che jeng tan ahileh, nisa alhum tan, Igallang khat ah inkhat amun hiche insung a mei vah phe det2 khat aum chu agal mutan ahi. Gollhangpan jong
tujan hiche in ah khun kijan geh den hen tin in chu ajonjeng tan ahi.
In agalhun chun in neite ninupa kom chun Hepile Hepu tujan na in lhon ah neijan ge sah lhon nin tin atao tan ahi, hichun nupate nin, jong katei Boipu janlai tah a hoilai pha go nahim hungin2 hung jan geh pan lang nomtah in kichol in lang jingkho a hung vah teng kipat doh kit tan nate tin ana lamto lhon in ahi.
hichun gollhang pa jong kipah tah in insung ah chun alut in nomtah in aki chol do tai.
gollhang pan jong in neite nupa kom ah chun asei tan, Hepi le Hepu kei ma hi abul sana aleh dangka hol’ a hung kipat doh kahi tin aseipeh lhon tai.
hichun nupa tenin jong katei Boipu nalung gel chu ahoijin apha lheh jenge chen lang hung lolhing tei2 jin, nahol chu nahin mu thei leh nahung kile lam teng hung pa kit tei2 jin, ka ahchal doi neikhat leh Kachanu lhonjong kapeh tha lhon ding nahi’e tin asei peh lhontai.
Ajingkho ahung vah kit tan, gollhang pa jong ahung kipat dohkit tai. ahung hung in ahileh, lam pi pam ah in khat amun, adang chah jeh in insung a chun tuidon din aga lut tan ahileh, tehse tenupa khat ma ana um kit in , Hepi le Hepu natui lhon gah don inge kadang achah val tai atin ahileh tehse teni nupan jong don o nachim set’in donin tin twi chu ape lhon tan ahi.
hichun teh se tenin, jong adong lhon in, Boipu hoilang cheding nahim ati lhon leh, Golhangpan jong abul sana aleh dangka hol’a cheding kahi tin adon but kit tan ahileh, tehese tenin jong aphai chen lang hichu nahin muteng keini kom ma hung pa kit’in ka buipi doi nei le kachanu jong kapeh tha lhon ding nahi e tin avai lhahkit lhon tan ahi. gollhang pan jong henge atin akipat doh kit in ache kit tai.
Hichun ache chen ahile, inkhat apha kit tan alel jeh chun aga kinga pa kit tan ahileh, in nei tenupan katei boipu hoilam che ding nahim tin ahin dong kit lhon tan ahileh, amapan jong hepile hepu Abul sana aleh dangka hol’a che ding kahi tin asei peh tan ahileh, in nei tenin jong ,aw apha e chen lang nahin mu pou2 le ka in lhon ah hungpa kit in lang ka Bongchal doi nei khat leh kacha nu kapeh tha lhon ding nahi tin asei peh kit lhon tan ahi, gollhang pan jong henge atin alampi jot ban jot kit din akipat doh kit tai.
Hichun ache chen ahileh gam mang thuh tah khat apha tan , aki hei le2 leh agallang ah khoneo khat agah mun ama jong hiche kho chu ajon tan, khosung aga lhung in khat ah
aga lut in ahileh, tehse teni nupa khat ana um kit lhon in,
gollhang pan jong Hepi le Hepu, nisa lhum ding ahitan, tujan na in lhon ah nei ge sah lhon tan tin atao tai.
Hichun tehse tenin jong henge hung geh pa tan, ahile boipu hoilam jon kigo a gam hichan pi a hi hung nahim tin adong lhon tan ahileh
Hichun gollhang pan jong Hepi le Hepu kei migen thei lengpa bong ching mei mei a pang kahin, kabong chin na mun’a thing on chung khat a va-ah le Phaimum ahung kichun , Phaimum achan lou phat in , lhase tah in Va-ah kom in abul sana aleh dangka chunga katou nile neina kivet in atin, ganhing lunggel neilou vin bon hichu agel theileh kei mihem in hichu eti hol’lou va kaum thei ding ham kati a, hiche hol’a chu hung kondoh kahi tin asei tai.
hichun tehse tenin jong aphai olmo hih in keinin nahin kitho pi lhon nange , abulsana aleh dangka umna chu keinin kahe lhon nai ati peh lhon tan ahi.
hichun gollhang pa jong alung gel anom chom in akipah lheh jengin nomtah in tehse teni in ah chun aki chol do tan ahi.
jingkho ahung vah phat in tehse tenin jong tupa nang man tunin In ana ngah in lang keini lou kon ah gache lhon ninge , hinla eti ham khat na sunteng mei si ahung pah a in kah nading bang din mun a hung um khah leh, insung dan na, beltan sunga kikoi (lal) khu ana dom doh tan tin asei peh lhon avaikon doh lhontai.
tehse teni jong lou akon doh lhon tan, gollhang pan jong agel tan , epi e ati leh, kapi le kapuhin thil manlu hijat pi um ma in meijin akah le beltan sunga lel, dom doh da ei sei lhon ahidem tin alung theh tan, ama jong indan sung ah alut in beltan sung’a, lel, chu agah hondoh le, wow..! insung chu avah jengtan, gollhang pan jong agah khoileh, atoh khah na laitah akhut jong chu avah kit tan, atijat toh pon khat alan akhut chu atheh le la avah chu alha mang tapon, hichun varenda a khom phung a chu agah theh kitleh khom phung jong chu avah set kit tan, hichun , indan sung ah alhai lut in,
beltan sunga , lel, chu agasing tup chet in, varenda a khomphung akhoina avah laitah chu, chem pong khat alan athemlha tan, ama khut vah jong chu ponse in aki tom tan ahi.
Nilhah ahi phat in, tehse teni ahung lhon tan, varenda a khom ki themlha chu amu lhondoh tan, gollhang pa khut kitom jong chu amu pai ngal lhon tan ahi. hichun tehsepun jong tupa nakhut chu enaki lo ham tin adong tan ahileh, gollhang pan jong , Hepu tuni varenda a khom kathem le kakhut kaki sat khah jeh a katom ahi tin alep tan ahi.
Hichun , tehsepun, tupa na ching na lom2 me, tunvang, abul sana aleh dangka um na jong nahe tai.
ven keini hi kateh lhon tan, chale nao jong khonung’a neile gou lo ding kanei lhon pon, etih tah leh hiche thil hi asoh dem ti’a kum ejat hamkhat kana nga nga lhon ahin, tunin nang nahung in kalung among tai. kei kathi nung teng kanei kagou jong pan na bei hi thou thou ding ahi tah jeh in,
nangman hiche abulsana aleh dangka hi kichin tup mai tan, nangma tabang a lung len leh alunggel chepi , atup len koima aumpoi, nalungel najui jing peh jeh in, tunin nalungtup namol so tai.
ven tunia hi, nangma, hiche abul sana aleh dangka neipa nahi ding tah jeh in, naji dingin, Pathen chanu te gaki pui tan, che2 le chun gam mang lentah khat um intin, hichegam mang sung’a chun tuikol khat um in te, hilai mun ah chun, che inlang tuipang a chun kisel le chun Pathen chanu te, numei sagi/7 ahi uvin , nisa guija kon in hung kiban lhao vin tin, tui kolsung’a chu ahung kisil phat uleh ven lang alah uva nadei pen2 nu von chu nahin jam pi ding ahi tin asol lhon tan ahi.
Jingkho ahung vah tan gollhang pa jong Pathen chanu te vedin akipat doh tan, apileh apu seibang’in, gam mang thuh tah mun ah chun aga valut tan ahileh, tuikol khat ana um tahbeh in ama jong , tuipang a chun atouvin akisel’in, Pathen chanu te hung ding chu angah tan ahi.
chom khat agah touleh, Pathen chanu techu, nisa gui ah ahung kiban lhao vin, ahi. numei 7 ahi uvin, amel jong u chu ahoi thei lheh jeng uvin ahi,.ama ho jongb ahung kichem pan ngaltao vin, kungkal/high jump abol’un ahileh, alah uva aneo pen nuchu ahat pen tan, hichun, longjump/chop abol’un ahileh aneo pen nu ma ma chu ahat pen kit tan ahi, weight gihdan aki tekit uleh aneo pen nu ajang pen kit tan ahi, kilhaitet/race abolkit uleh aneo pen nu ahat pen kit tan ahi,
hiti chun abol jouseo a chun aneo pen nu chu ahat pen jing jeng tan ahi. kichep jouse abol chaijun, tui kolsung a chun kisil ding akigo taovin, avon’u asutlhao vin akeo seh un,
tuilah achun achom lut taove, hichun gollhang pan ave ave in ahileh alah uva aneopen nu chu hoi asa pen in deijong adei pen tan , aneo pen nu von chu ahin lan ahung jam tan ahileh,
aneopen nun ahin mudoh tan ahin nung del’in, vo nangpa ana ding’o, ka von chu kajun le ka eh abeh e naki dah lou ham ati leh, gollhang pa jong chu ading den jeng tan ahi.
Hichun , nungah nu chun, gollhang pa chu leitho tho 7 noi ah abeng lut tan ahi.
Jan ahung hiphat in, gollhang pa In a hung ki nung le tah lou jeh in, tehse teni jong alung kham lhon tan ahi, hichun tehse pin kasei dem2 hilou ham..??
epi seijong leo naki nung hei lou ding ahi nati peh lou jeh a leinoi thosagi 7 sunga abeh lut u hitei ding ahi tai
tin, tupheng aki choi lhon in aga leidoh lhon leh Gollhangpa jong ana thi deh chet in ahi.
hichun, anle tui aneh sah lhon’in, atha akido doh phat in avel’in, asol kit lhon tan, tuvang epi sei jong ule naki nung hei tah loubeh ding gam mang nahin khel tokah se a, nahung kinung hei kit talou ding ahi’e tin availhah lhontan ahi.
hichun gollhang pajong aki pat doh kit in , tuikol pang’a chun agatou kit tan ahileh Pathen Chanute chu ahung kisil ding a ahung kit phat un, aneopen nu von chu ahin kilah kit in ahung jam kit tai.
Hichun aneo pen nun jong, ahin mudoh kit tan, ahin del’in vo,,, nangpa ana ding aw,, kavon na chun, kajun le ka eh abeh e ahin tikit vangin , gollhang pa jong kinunghei lou vin ahung jam peh in,
na jun na eh beh jong leh kanol deh poi, kadei thou2 ve atin, gam mang chu ahin khel tan ahi.
gam mang ahin khel phat in, nungah nun jong upai anei tapon, vo nangpa ana ding to, tunvang kamangtai/kachultai , ati phat in ading tan, hichun avon apen, insung ah ahin kipuilut tai.
Hichun, tehsepi leh tehsepun, tupa tun ji na nei tan kipa aumbehseh jenge , na inlang ah kinung le inlang, hiche abulsana aleh dangka jonghi kipoh in lang hin inchen pitan ati.
hichun, numei nun jong Ipi hile, kachul tah jeh in naji kahi tai, na in lang’a eche ding tah jeh in lhah nadin kei in khatvei ga pha masa hite tin numei nu chun , ajipa chu akong kah a ajep in , a in lang ah apui tan ahi.
Numei nu te In alhun lhonphat in, a uten ahin mu uvin, enao’u ahung kit tai tin kipah tah in ana lem mu ve.
hichun nidang’a abol ngai bang’un, kichep golseh abol kit un ahileh, nidang’a ema jouse a hatpen nu aneopen nuchu, ema jousen anop pen in apangjing tan ahileh, autehon eti dana ema jouse a anop pen a napan hitam ipi boina nanei hitam tin adong taovin ahileh,
anaonu uvin, jong ei etile Mihem pumkhat kivop ta hila tin site ho chu ado but tan ahi leh, hichun, auten, boinu nang nachul tai, tunin keiho kom’a umthei tapon nate atio vin, anule apa kom ah ahin puitaove.
Anuleh apan jong Boinu, nang achul nahi tan, ngailheh jongleo veng umkhom thei ehi ta pouve, hijeh chun, nanule napan kangai lut lhon vetsah nan, thilpeh kanei nom lhon in, insung’a thil ho hi nadei pen2 ven lang kipoh tan ati peh lhon tan ahi.
hichun, numei nun jong Heno le Hepa, mui/pat heh chu neipe lhon tan tin athum tai. mui/pat heh chu eheh a edei dei esei leh um jeng ji ahije,
hichun anule apan jong achanu lhon thil thumchu ahin pe lhon in, ahin sol doh lhon tan ahi.
hichun, Tehsepi le Tehsepu kom ah ahungkit lhon nlin, abulsana aleh dangka ahin kilah lhon in ahung kile lhon tai.
hiti chun ahung peh lhon in, Bongchal doinei, neite in ah chun ahung pa lhon in, ana kitep nao bangun, bongchal doi um , neite nupan jong , achanu lhon leh bangchal doi um chu ahin pe lhon in ahi.
Aban in, Bui doinei, neite nupa kom ah ahungpa kit lhon in, amani nupan jong anakitep nao bang chun, achanu leh Buidoi um, ahin pe kit lhon, tai.
hichun aban in, Ahchal doinei, neite nupa kom ah ahungpa kit taovin,
amani nupan jong ana kitep nao bang chun, achanu leh, Ahchal doium, chu ahin pekit lhon tan ahi leh,
Gollhang migenthei pa chun, Pathen chanu pum in, ji,4 anei tan hichun puilut na ding, In mun anei lou jeh chun, malai lengpa bong ana chin na ji mun, santaili pang’a chun aji te ahin puitan ahi.
Hichun aji ten In na neilou ham tin adong uvin ahileh , aman jong henge ana donbut’e
ahileh , ajiteuvin ahileh tun chen lang lengpa kom ah In munding insah nading ga thum tan tin Inmun thumding in ahinsoldoh tauve,
hichun, amapa jong aki patdoh paiyin in leng Inpi a lengpa kom ah In mun thum din ahungtan.
Leng inpi sung a hunglut ding chu agel leh, aki ngai se ma2 jengin ahi ajeh chu, abong chinlai apet adalhah a anava mang jeh chun, Lengpan ahin houna ding jouse, ahetsa ahitai.
kingai sepum pum in lengpa gate maijah ading’in, gate ngah ho kom ah chun, lLengpa toh kaki muto nom e atin, hichun gate ngah hon, nangkoi nahim tin ahindong un ahileh, kei Lengpa Bong chingpa chu kana hi’ e tin ado but in hichun, gate ngah honjong Lengpa kom in Vo,, Lengpa na Bong chingpan nakimupi nom’e, kahinsol lut thei dioham tin aga dongun ahileh, Lengpa jong akisen jah jeng in, gangchel in lesol mangun tin thu peh aneitan ahi. hichun Bong chingpa jong nguichet in ajite kom lam ah ahungki nungle tan ahi. Tone…🍇
Ajipi nun, jong ana dongin, leng pan pithu nahin seipeh hinam atile, eilut sah poi tin adonbut tai, hichun ajinun chekit nin lang gathum kit nin tin asol kit tai. ajingin, kingaise pum min ache kit tan ahile, alutsah kit tapouvin ahi.
ajinun jong achaina ding mong2 in chen tin asol kit tan ahile, ajingin ache kit tan hitin aga seitai, lengpa kom ma ngeh nom neikahin, eiki mupi tei2 hen tin ataotai, hichun gate ngah hon lenga kom ma aga seikit nun alut sah taove, hichun, lengpan lunghang tah in ana housen, natoh ding donlou va navah mangin, najah chalouva tunia kakom ma hungkit nahim, nang toh ding kiti aumta pon nangma khel la Bongching di jong kikoi ahitai, kasoh hihen kasepai te hijong le, tuni geija kathusei palkeh a nop chon koima aum khapoi tin ahin sen jah jengtai.
hichun, Bong chingpan jong vo lengpa Bong chin ding dalha a kana va mang jeh in neingai dam min, tunin keidin nang leng gam sunga din toh ding jong ka neitapoi, ahin kasei nom khat nakom ma aume, ven naleng gam sunga kachen theina din inmun khat neipen lang inkisah ingting lungmonga kachen theina din tin ataotai. hichun lengpa jong anui aja behset jengin bulha hah2 in anuijenge, nang Bong ching mai2 , nehkham bon kilo doh joulou vin in mun di nathum ham…chen lang na na Bongchin ji namun ( Santai li vadunga ) achun gaki sah tan ahin tipeh tai, hichun Bongching pan jong ahile lengpa mun neipeh ahitah le kinop tona lekha neipen lang na mahor nei nam det peh in atikit tai, hichun lengpan jong insa dinga atah san lou jeh in , hichi in ka eh insapon te atin phalna lekha le akhut jem ma mahor anam det peh in ahinsol doh tai.
In ahung lhun nin, ajipi nun ana dongtan, epi nahinsei peh hinam atile, lekha chu apetan, hichun tunin inmun eneitaovin lungdon lungkham nading ema aumpoi tin, aji pachu alhim emutan ahi. ajipa emutlan nin, ajipi nun aji dang jouse akou khom min hitin aseitai, tunin in mun eneitao vin, ken kabol thei chasun kabol ding ahin, nanghon jong ejipao dinga epi nabol theiju vem….pan elah khom muva ejipao hi mithupi khat sotei ding engai todio ahitin aseitai.
hichun, ajipi nun, a in na ahinkipoh, ( pat-heh/mui ) chu ahinla doh in phui asam min aheh pantan, tun santaili vadung hi kitol mang hen atile, vadung chute pi chu akitol mangtan phaicham len tah pi asoh tai, hichun aseikit nin, hichi leng gam ma lengpa insanga thupi jo hung um hen lang , neile goulhingset nin hung umhen atile, asei bangin lengpa in sanga thupi jo hoijo lenjo ahung umtan, thiljouse aum nadi dol cheh a kitup tah in aumtan ahi.
hichun Bongching pa jong a emut na akon nin ahung khangtan ahile, inthupi sung ,lupna loupi tah khat na analum ahi ahin hedoh tan akin toh, atijat toh ahile, apengjah jengtan ahile, ajiten ahin dellut nun epi nati ham tin adongu vin ahile, bongching pan jong, hoilai gam neilhut nuhitam ati. hichun ajinun kicha hih in, hilai munhi nang in ahin naji nachate toh nahinkho lhum keija nom tah a nachen khom ding ahitai, ven ka in na kon na kahin kipoh ( pat-heh/mui ) chu mangcha a na emut lankah a in kana sah chaiju ahitai ati.
hichun bongching pa jong akichat na le atijat nachu a oldom tai.
Angai bangin, lengpa bongching a pangthah ho jong chun hichi santaili vadung a chu bong ahung chin ji u ahin, bongching a ahung kit leo , santaili vadung chu ana umta pon, building loupi tah a kisa chu amu doh taove, amaho jong atija behset nun lengpa kom min agasei taovin, ahile, lengpan jong ahi lou2 ding thu seiji hih un tin ahin donbut tai, hichun soh bong chinga
pangho chun vo lengpa natahsan loule nangma tah hungin lang hungve tan ati tao ve.
Hichun, leng pa jong nui chi hah2 pumin, tahsan le tahsan lou kop min asakol kang chunga atoudoh in, santaili vadung vechun ahungtan ahile, lengpan jong kidang asatai. ajeh chu sataili vadung chu ana umtapon, building thupi le loupi tah ama insanga hoijo le nom jo amu tai.
hichun aleng inpi a akinung le tan ahi.
alang khat na, bongching pa ajipi nun jong, ajo le lengpa hungthang thip khantin alungel hung sekha le ama akon na ahoi doh thei na dio vin, jan nin, ( apat heh mui ) chu apei jin, phui asam kit nin, hitin aseitai, lengpa sepai sanga hatjo le tamjo, manchah hoi2 hung um hen ati le, apet
petnin, asei bang2 in ahung umdoh tai. hichun, ka inpi uhi lengpa sepai tele asoh akol ten asuh set joulou nadio in, thopi/pal thosagi in kikai khum hen ati kit le asei bang2 in thiljouse ahi nadi dol cheh in aum kit tai.
hichun, ama nun aseiben, lengpa khopi sanga khopi lenjo, hungum doh henlang khosunga jeep le car hihen angai cha jouse hung umhen ati le asei bangin ahung umkit tai.
hichun toh di jouse achai phat nin nomtah in a emutai. jingkho ahung vah tan ahile, bongching pa jong alung dong kit tan, heka te sohle kol sepai in ei um dim tao vin, e umnao jong khopi thupi tah asoh tai, epi thu hitam atin ahi. hichun ajipi nun jong ven thiljouse hi nanga ahi tin athilbol jouse aseipeh tai.
Alang khat na , lengpan jong asepai te akhom min, tunin kon doh uhitin! , bongching pa in ega bulo dio ahin anei agou jouse jong ehin tol doh dio ahitai atin, ahung kigo chaijun ahungtao vin ahile,lengpa jong alung kham nan adim tai, ajeh chu masanga sangin double lin anahao cheh kit tan, kulpi thosagi ana kikai khum tan, ama sepai sanga bongching pa sepai atamjo tan anailut thei ta pou vin ahi. hichun lengpan jong lungthim thuh tah agongtan bongching patoh kimu to din ahungtai, hichun gate ngah hon lengpa chu alut sah ta pou ve, lengpan gate ngah ho jah a aseijin, ka bongching pa toh kaki to nom me ati tai, sepai ten adon but nun hilai insunga bongching aum pon kaleng pao bou aume ati peh taove, hichun sepai hon anakho ngaijin ati un, bongching pa komchun lenga thusei chu ahung seitaove, hichun bongching pa jong lengpan anabol naho chu agel le alung hangin, hinlut sah hih un sol mang taovin kakimu pi lou ding ahi ati tai.
hichun , ajipi nun jong ajipa jah a ven, lengpan eta bangin nabol jongle nale thuh lou ding ahije, setna chu phat na jo joh ding gon, seinom anei hin tin , ga ngailhah peh i lang pi thuham ti hemasan ati tai.
hichun, bongching pa jong akipat doh in, ajite se anunga ahung kijot nun, ajet aveija asepai te akigollun lengpa kimupi din gate maija ahung ding tai.
lengpan jong agah vetle, ajite chu amajite sanga ahoijo soh keijun athang thip cheh kit tan ahi.
hichun, bongching pan aseijin, piham lengpa nasei nom atile, lengpan jong, jingle ka ina hungo an nekhom hite atin ache tai.
Ajingin, bongching pa jong lengpan akou bangin , lengpa in na ache in malai abongchin na von nin aki von tan ahi. hichun lengpan asei tai, jingle, nang ahchal le kei ahchal eki delsah ding, nang ahchal anop joh le, naji te le nanei nagou jouse kei kachan ding, nanga ahat joh le keija se2 nang na chan ding ahi ati peh tai.
hichun, bongching pa jong lungkham tah in nangchet nin, in ahungki le tan ahile, ajiten pi thu um ham tin adong taove, aman aseitan, jing nikho hunglhung le kanei kagou kajite jouse lengpa chang di tai atin, lengpa thusei jouse asei peh tai. hichun, Ahchal doi nei hinkipoh aji nu chun lung kham hih in, ken alampi kahe nai atin, ajingin, a ahchal doi nei chu ajipa aki choisah in asol taove, bongching pa sepai te chu lengpa chunga athang tom mun, eijui dio eham khat atile, lengpa chu ekisat pi dio ahi ati taovin ahile, ahchal doi um neinu chu, khatchan ejuilou dio ahije , atin achanga asol taove.
hichun, leng inpi a khosung mipi ahung kikhom tan , mipi ho chun, lengpa a oimo leng neipap ahi ati un, abang khat chun, tunin vang bongchingpa neile goujouse lengpa achangtai atiove, hichun lengpa ahchal ahin lhadoh taovin ahile, mipi a ewlah jengin, lenp
i tah ahin son2 aum jengin ahi, bongching pan jong kisong lel pum2 min ajah kah a aje kengchit chet ahchal neocha chu ahin lha doh tan ahile, sonlel lel aum jengin ,ahung ki del hon tan ahile, lengpa ahchal chun achu kha thei mong2 ta pon, ajo nan bongching pa ahchal chun, lenga ahchal chu asonga aman nin vanlanga ale toule, tolla lengpa ahchal chu matdah in achun athitai.
mipi jong a ew sot2 jengun tunin lengpa jile chate , neile gou jouse, bongchingpa changdi tai tin asam taovin ahile, lengpa ahung kitum jah jengin, tuni hin kichai ponte, jingle bongching pa bongchal le keija kidel kit ding teng chule bou ahat jo2 changbep ding ahi ati tan ahi, hichun bongching pa jong nguichet nin ain ahung vahlut tan, ahile, ajiten a na lamto un, nahung lolhin hinam ati leo, lo chu kalo lhing nai ahin, jingle, lengpa bongchal le keija kidel kit ding ahat jo2 thu a kikai ding ahi atin anang chet jenge, hichun, ajite lah a bongdoi nei hinkipoh nuchun lungkham hih in ken alampi kahe nai atin, ajing nikhon abongchal doinei chu aki kaisah in asol doh kit taove, hichun bongching pa sepai ten tunin vang keiho jong hung taovinge lengpa chu a e ahle kisat pi jengute aki ti taove, ahin, bongdoi um neinun, lungkham hih un emati ponte khat chan ejuikit lou dio ahi, aphabollin apha asebollin ase akimu di ahi ati.
hiti chun, leng in sung chu mipi aki khom dimset jengtan, mipi chun lengpa hi minei pap milungthim se ahin abong chal jong nop jo tei2 le pha hichu ati tao ve, Lengpa bongchal jong ahin lhadoh taovin ahile athao netnut jengin son2 aum jenge, bongching pan jong abongchal gop thit thet chu ahin kai lut tan ahile, lengpa anui aja vallin anui nuileh achil ahin kithal lin akhulih deh chet lotan ahi.
bongteni jong ahung kidel pan lhon tan ahile, lengpa bongchun , khatpa bong chu atat kha thei mong2 pon, ajonan bongching pa bong chun lengpa bongchal chu aki a atat nin vanlang a aleh tou jengin ahile, lengpa bongchal chu mat dah in tolla achun, athi tai.
Hichun mipin, tunin2 lengpa neile gou jouse le ajinu bongchingpa chang ding ahitai tin asam kit taovin ahile, lengpa jong akitum jah jengin, hitin ahin seitai, kaleng gam sunga hin kathu palkeh koima aumkha pon, hinla kabong chingpa hin kathu apal keh in noise tah in kabong achin lai dalhan anop aninga aga kimang chan, hijeh achun, jing nikho le, bongchingpa hi malcha a ki lhut lih ding ahitai tin aki khen taove.
Bongching pa jong lung hem tah in, ahungtan, ajiten ana lamto un, ena hiti hinam atileo, kahung lolhinge hinla jingkho hungvah le eiho da khen na kolni chu hungsoh doh ding ahitai, jingle lengpan malcha a eilhut lih ding ahitai tin akap tai. hichun, bongchingpa sepai te kitim jou ta lou vin, tujan jan na kondoh a kisat pi ding ahi ati kit taovin ahile, bongchingpa jite lah a, buidoinei hinki poh nuchun, hitin aseitai, min epi boljong le eihon elethuh loudio ahije, olmo hih un, lengpa chu abol ding kibol sah ute, emacha tilou ding ahi ken alampi kahenai ati.
alangkhat na, lengpa sepai ten, khopi sungchu avellun, sakol chunga atou vun kholhang asam tao ve, jing nikho le bongching pa malcha a kilhut lih ding ahitan, mipi jouse ajapha chan nin hung veovin ati un khopi sung chu malcha adong khom mun, akoh koh , abeng bengin atung dim jengun, leiko lai loi aboi lah2 jengtao ve.
ajing nikho ahung vahtan, bongching pa jong aki gotan, ajinun, hichi buidoi nei hi najah kah a kipoh inlang ko sunga naum sah teng leo, malcha nahin sun khum dio ahin teng chule bui mei hi natuh chah kheh ding, nalha lou ding, nakhut lang khat na leisai nahuh bit ji2 ding ahi tin ahin soltai.
hichun mipin jong ash kaden bongching pa chu lungset umvalle gave ute ati un abang chun voujang nat aum valle kibol nahi ati un mipi ahung kikhom dim tao ve, hichun, bongching pa kokhuh sunga ason lut taovin malcha abuh khum pan tao ve, aman jong ajah kah a aje, bui doinei chu ahinla doh in, amei atuh chah beh jengin tolla agah lha le, buichu akipei chellin leiko agei hom pet2 jengtan, bongchingpan jong anung chu leisai ahuh bit jijin ahile, bongching pa a in sung alupna noidon tah a ahung soh doh hon nin, ajiten kipah ta
h in ana lam to un asil ngim set jengun ahile, masanga sangin ajat sagi in ahoicheh jo tan, ahi.
ajiten jong ahung hindoh kipapi najallin alop mun liupi tah in golvah abollun ahi.
Alang khat na, lengpa tehon, malcha chu leiko alai sungu va chun asun dimset phat nun ahal taovin ahile, malcha chu athipval jeh in avella um mipha bep pi achilih tha tan, higoh chu hilou vin khopi sung chu malcha nam jeh chu aum dan jong ahah lheh jenge,
lengpan jong asoh tele sepai te akou khom min, tun bongchingpa elhut lih taovin, hungun cheotin ajite anei agou ga podoh ute tin bongching pa te inlam ahin jon taovin ahile, koi thimalah in, bongching pa chu masanga sanga jatsagi a ahoicheh jeh chun lengpa jong athang se tan, abulo got vangun, kulpi le sepai te chu lengpa asanga det jo ahijeh un alo naje ahe tapou vin , bongchingpa le ajite nuiseo va aki nou vu chu, lengpa le asepai ten galkang a amoh vet den taovin, ajum man nun ahung kimoh nung le kit taove.
Hichun, lengpan jong asepai te akou khom min, bongching pa malcha a elhut nuchu masanga sanga ajat sagi a ahoi cheh joh chu, kathang se val le, hijeh chun khopi sunga malcha dongkhom kit nun lang keijong kokhuh sunga malcha in neilhut nun ati tai.
hichun sepai te la lengpa thusei chu ada ngam pouvin khopi sung malcha adong ngun, kholhang asam mun jingle elengpao malcha a kilhut dinga aki gon aja pha chanin hung ve un atio vin, ajing nikhon, lengpa chu leiko kilai sunga ahenglut tao vin, malcha bengdim khat agah sungun ahile chilih pai ding aki go jeng tai, hiti chun kosung chu malcha sungdim nai lou vu, hal jong halpan nailou vun lengpa chu achilih doh tai, ahin sepai ten asei bangun abolpeh un malcha chu ahal tao vin, ajinga aga vetleo agu keoseh ana um tai.
hichun sepai jalam kaipan mipi akhom min, tun elengpao la amale ama malcha a aki lhut lih doh tan, lengbeijin la ehi thei ta pouvin, hiti umleo hen kel la ethigam dio ahitai, hijeh chun bong chingpa kom ma kipelut nutin hile hen nom esah dio ahije, eiho lengpa, sanga achingjon, aphajon, mi akhoto joi atin, ahile mipi jouse anomtao vin, ajan janin akitollun, agakipe lut taovin, hiti chun bongching pan lengvai kitah tah in apon agamsunga cham nan vai ahom min akhangtou vin nomsatah in acheng khomtaove.
Moral: hichi thusim sim jousen mi set na khat chu aset na a lethuh lou va, apha a le thuh cheh din tem ehi uve, thilpha bol na a kiman chah hi eima dingle midingin jong alangto in man na aumpoi ti emudoh un ahi.
kakipah e.
THE END.
