Home Shonkhogin Haokip A BRIEF TESTIMONY OF MR. SHONKHOGIN (HEGIN) HAOKIP

A BRIEF TESTIMONY OF MR. SHONKHOGIN (HEGIN) HAOKIP

372
0

Christa thisan jalla sopi ngaitah teho jouse koma kahin seinom pen tah chu ahileh Keijong Whatsapp group a ka hunglut a pat’in Pathen ngaicha, Pathena lunglut, Pathen ngailu tamtah kamuthei jin in Pathen kathangvah in nangho jouse chunga jong kaki pana kahin phonge. Keijong PATHEN LENG GAM KIPANA THUPHA group creator khat a kahung pan toh kilhonin, gospel message hohi a hung kison ahileh, tahsa hina a chu retirement aki hitah vangin whatsapp group laha dinga mithah akihijeh chun, mi phabep in thudoh hungkidongji tichu, nang koi nahim, ipi na natoh, koi houbung nahim, houbunga ipi panmun natuhham tihohi ahung kidong jin, hiche hohi kagelleh dih kasan, hijeh a chu amasapen tah a chu eima introduce ahi lou leh I testimony ho chu ana thot masat ding dan ahin, ana kithot ma sat tah loujeh a tunia hi, ka testimony achom lam tah a nini nithum hijong leh hung kiso jom ding ahin, chuti hen lan hileh khonunga ngampella Pathen thua kilungset totah a ikiloikhom be chehna uminte ti ka tahsane. Keiding a vang chu PATHEN (PAKAI JESU) NGAILU JOUSE HI KOI PHUNG KOICHANG HIHEN LANG KOIJAT KOINAM HIJONG LEH KASOPI KAU KANAO BANG BANGA KANGAI LUT AHIJENG E.

Tun Testimony a lut taohite:

1.KAPENTHAH MASANG HINKHO PHABEP:
Jesu hungvah ding ahitai ti thuso hi kum 36 masanga ana kiso ahin, ahinla kanatoh na toh ka kop thei lou phatna ana kiso jom jou lou ahi tan, tuhin Pathen lung set jal lin kanatohna a kona ka kichol toh lhonin, Pathen in pha asah leh Pathen Lenggam Kipana Thupha sojom kitdingin akingai ton, amasa pen tah in kei ma hinkho thusim a kon in kapat nomin, aban ban a Pathenin eima puina dungjuijuva chejom ding in, taona akineijin, hijeh chun, amasapen in, kei ma hi kaneolaija pat-in Pathen houding kana tha nom lheh jengin, ahinla kapa chu thempu ahijeh in, Christian kahiding eina phalpoi. Kum 13 don in kapa hetlou kah in Pathen na kanalut tai. Pathen na kalut nia patin kahinkho hi aphalou Pathen thu toh kitoh lou kitiphot chu kanabol tapon, Pathen hou khat hina jallin kahinkho chu dihtah a hing dingin kana kitemin, hijeh chun mi mu dingin mipha tahin kana umin ahi. Hiche toh kilhonin, thilpha bolna lama hihenlang Pathen natohna lampang hijong leh, Pathen kin kiti phot phot chu thanomtah in kana pangin ahinla ima cha aga ana umpon ahi. Apolama miphadana kaum vangin kasung lam chu koima val kanahi dehpoi, Pathen mitmu din mi bep bep chonse chu kanahi thou thou in ahi. Adihtah a Pathen kahouthei lou vangin kalungthima hin Pathen dihtah ngaichatna aum um jingjengin, Pathen hollin suh len toulen anakithon, tichu Pathen thu kiseina jousea ka chelouna le kajaolouna behseh anaumpon, adeh in Imphal sunga thuseiho jouse hi kana jaolouna behseh aumpoi.

Ahivangin lungmona dihtah ahilouleh lunglhai na dihtah kana mujou pon, ahinla Pathen in ama kangai chatna chu eihet pi jingin,amatoh kimutotei na dingin lampi ahin gongtan, hiche lampi chu ipiham itileh, chutabanga miphalhem a kaum laitah chun, P.U.C exam kahung fail tan, kahinkhoa exam fail kha lou kanahijeh chun, naa kasabehseh in vamaang ding chan geijin lung kana ngaitotan,hitabang lungthim ka ngaito laitah in, Pathen in kakoma nava maang a hoilaiham khat na thile chun, na lhagao hoilang asuhding ham eitin, chuphatin kei jong kakigel leh, DAMUN MEIDIL tilou adang aum tapoi, ti kahin gel doh phat in Pathen giltah leh thuhtah a kahin holleh, kachonset na ho jeh in tija kichan kana umin, chonsetna ho chu iloding hitam tin, lunggim lung khamin kanaumin, hiche lai tah chun Pathen thu seipa khat in, Proverb 28:13 ahin simin, KOIHI- LEH ACHONSET NA SEL GUH ACHU KHANGTOU LOU DING, AMAVANG KOIHILEH ACHONSETNA HO PHONGDOH A DON LOUVA KOIPAN PATHEN A KONA HEEPINA AKIMU DING AHI, atichun kalung thim a thanopna leh kipa na adimset tan, chonset suhmangna thei thudol ka muchun kakipah lheh jengin, hichun, kakikholin ahileh themmo kachanpi thei chonsetna ho jouse chu Pathen henga kisih pumin kakiphondoh in, ngaidam kaki thum in, ahinla amasa pena ka chonset kakiphon ni chun, ka cenema vetnom na ho chu kana phong doh ngam tapon, ipijeh in em itileh phongdoh jong leh kanung vet kit ding jeh chun kana im dentan ahi. Hijehchun, chonset dang tamtah kaphon doh vangin kalungthim sunga kipana dihtah kananei pon, mihon a pengthah tai ati vanguvin keima kipana chu alhing thei pon ahi. Chomkhat jouvin, ka houbung mite hon tahsana Baptaiz bol dingin eihin koutaove. Keijong kaga cheleh nilhahchun an-ngola taona neija kikhol dingin kaumtaovin, Pathena katao laitah uvin, Pathen lhagao thengin, councilling eiboltan, hitihin eihoupin ahi.

ACHONPHALOU CHUN CHONPHAT LOU BOL JING HEN, ABOH A CHU BOH JINGHEN CHULEH ACHONPHA A CHUN CHONPHAT BOL JING HEN, ATHENG A CHU ATHENGIN UM JING HEN, VEUVIN KEIMA KA HUNG VAH DING AHITAI. Thuph.22:11, eihintin ahi, chuin keima dingin eiledoh pih kit in, Cenema vehon vejing taovin, avelou hon vetda tao vin, Veuvin keima kahung vah ding ahitai eihintin, keijong naa kasa behseh jengin, Pathen cenema kavet tah lou ding ahi, lungset tah in neingaidamin katileh, satan in eiphoh in, najoujou chun Pathen koma kitem hih tang, ajouleh namit chot lo ding hichu, ahin titan ahi. Hiche phat chun keijong kakigelleh satan thusei chu adihtoh akilouve, ipi jeh in am itileh, tuma sang a chu cenema vet louna dinga ijatvei ham khat chu Pathen henga kitepna kananeija khatvei cha jong kanajolou mong mong ahitai, hijeh a chu eihin pho ahi. Hichipet tah chun Pathen in challenge eihin boltan, namit achotle chotante, Bible Mark 9:47 in ..MIT NI NEIJA DAMUNNA NAKILELUT SANGIN, MITLANG KHAT CHO A PATHEN GAM LUT NANGMA DINGIN APHAJOI eihinti ahi. Hichephat chun keima jong kakap jah jengin, kathi le thi kahin le hing tin Pathen koma kalung thim apumpia kakipelut leh satan jong athipchet tan ahi. Hichun, Pathen thun eihin donbut paijin, KEIMA CHRISTA TOH THINGPELA KIKHETBEH THAA KAHITAI, KEIMA AHINGA KAHI TAPOI, CHRISTA CHU KEIJA HINGA AHIBOUVE, TUA TAHSA PHEA KAHIN HI KEIMA EINGAILUA KEIMA DINGA KIPEDOH PATHEN CHAPA TAHSAN VANGA CHU HINGA KAHI BOUVE. Gal.2:20 tin eina houpin ahi. Chuche nia patchun Pathen in ka cenema vetnomna lung thim chu kahet loukah in eina lahdoh peh tan, cenema vetna a addict kanahina chu aman bailam tahin eilahdoh pehtai.Hiche a kon chun Pathen in kahinkho eihin khel pih in, lhagao lam mopohna le phaat phat loudanho eimusah in, kapenthah jouva patin Pathen in lhagao mang thah ho lainat pina jallin, message aphat aphat chan eina pen ahinla keimala aseidohtheijin kana umhihlaijin, hichun, Pathen in, lekha pheng thengsel chunga sut’in lang thotdoh in atiphat, hiche thuso JESU HUNG VAH DING AHITAI ti thupi hi mangcha a Pathen thu Pathen in eipeh ho chu kana sut doh a ana kihom ji ahin, kum phabep akiso jouva ka bank natoh toh kana koptha jou lou phat na ana kisojomlou ahitai.

2.PENTHAH JOUVA HINKHO A TOHKHOMPI DINGA JIDING KAHINHOL DAN:

Pathen cha hina aki chan jouvin, akham kham in Pathen na ahung ki tong in, chuban in jinei phat ahung hi toh kilhon in hinkhoa Pathen na tohkhompi thei ahung kihol in ahileh, Pathen na tohkhom pithei numei chu ana hahsa lheh jeng in, lungdon manin Pathen hebeh sehlou ho kisen jong ana kevekhan ahi leh, lhagao hinkho asu kha mama jengin, nikhat hi Pathen henga an-ngol in gomi phung noija katao lai tahin Pathen in kichieh tah in eikihoupin, aman keima koma hitihin eina seipeh e.Naji dingin lungkham hihin, keima naa natoh chu phate chan tongin, nana toh dungjuija naji kapeh ding nahi eihin tin ahi. Hiche phat chun keijong kaki pah lheh jengin, Pathen koma hitin kana taotai.

Henge Pakai nasei bang bangin bol tang kate, katin Ama koma hitin kana taove, Pakai leiset chunga nungah ahoi apha aching athem tam tah umjongleh, keima ding hilou ho chu itabang in hoihenlang itabang in pha jongleh keima mit vet in, ahoi jin neimu sah hih beh in, Amavang kei ma dinga na phat sah pen pen chu, hoihen lang hoi hih jongleh keima mit mu-in ahoitah in neimu sah in, achu tilouleh nang man neideipeh chu kahet thei lou ding ahi katileh, hitabang bang chun Pathen in eilolhit peh in, tua kaloinu hi aneova patna kamusa kahetsa ahibouvin, a-i tih in jong amatoh kichenna ding lungthimjong aum khapon, ama hi phaisung a keima um natoh naicha um ahibouvin, keihin mun chomchom suhvet tou vet anakitho ahi.

Ahinla Pathen in katao na bang banga eihin bu lhit pihni chun, kagel phah lou beh in, tua kaloinu te ainuva Pathen thu jalla kikhopna khat um ahin, hiche a kaga che na a amahi kana taona bang bangin Pathenin eimusah tan, kidang kasalheh jeng in, chuin insung mite koma a athuhi akilhutna ahileh amahonjong Pathen lenggam jallin, imacha boilou hel lin ahinphat sah soh kei taovin, hiche a kona chu jineina hi kahin nei ahi, Pathen dong puma Pathen asei bang banga kibol ahitoh kilhonin, tuni hi kakichen kal lhon kum 36 aval tan, kajinei hi kaki sihpi khahpoi, tuni chan gei jin kalung alhaisele tihi Pathen loupina dinga kaphondoh ahi.

3. JINEIJOUVA INCHEN SEMNA DINGA GOVT. NATOH KA HIN HOL FAN :

Abanin Inchen semna dingin Govt. natoh ahung kihol in ahileh, Pathen phatthei boh na jallin, natoh tampi ahung kimun, tampi kimulah a chu ideidei ana kiki lhena a Bank Natoh hi achaina kana kilhen khah ahi. Hiche kana lhenlo na jong hi, Pathen thujalla kanalhen ahi. Bank a kilutleh khonung thuguh ho hi kihahetbe thei dingham, adeh a 666 kitihohi kanaboipi ten ahin, hicheho jeh a chu Bank kana kilhen khah ahi. Ahin la khonunga kavetleh Pathenin eilung set na jalla chu keidinga kihinsona tahsalama hihenlang lhagaolam hijong leh Pathen thilgon anahikhan ahi. Natoh dangho jouse chu lekha hasima kisima kibol ahin, Bank penpa vanghi Manipur Govt. noija natoh kineisa ahitah jeh a chu lekhajong sim chom louva Bank kilut leh khonung thuguh ho kihetbente tina sehseh chubouva chu kaga bolleh kahin mu ahin, Pathen peh mong mongin kangaitoi.

Bank na toh kahin muphat in, State Govt. natoh chu resign kakibol in Bank chu join kaboltai. Bank a kahunglut jou phat in, Pathenin ka hinkho operation ahin pantan, insungah damona jat chomchom ahinlha luttan, nehlechah lhah samna, kaji dam mona, kacha dammona kiti hohin, nasatahin kahin khohi asugenthei lheh jengin, lungdon man in Pathen na kitongleh phadom dingham, tin Local church a head deacon kumthum kumli ahung kipangin, in na touman loukhop in Pathen natohna a suhlhai toulhai akithon, imacha apha chompon, hinkhojong apha chom pon, mijong koimacha anakihuhdoh joupoi. Hiche a kamudoh khat chu ipiham itileh, Pathen lunglhai sah na ding a anaa toh ham akin na kimanchah ham hin, Pathen alunglhaisah theipoi. Hingjing Pathen Pakai Jesu hi anaa tohpeh a thilpeh tamtah tah peh a lunglhai thei Pathen chu ahipoi, Aman amasapen tah a adeipen tah chu ahileh, ilungthim pumpia, lungthim pohkeh leuva(broken and contrite heart) ama iholdiu hi alunglhaina pentah chu ahi. Anaa tohpih leh thilpeh a kipah a lunglhai ho pathen chu milim hou ho pathen a ahibouve.

Hiche chun ama natohna le thil pehho bollouding ahilou leh nahsahmona ding tina ahidehpoi, amasa pentah a chu eimatah hi kisuh dih masat angaije tina ahi. Ama lunglhaina ding a Pathen in keima tah eina ngaichat anahin, ken, keima kikhohsah talouva mia dinga kum lhun seh a CRUSADE or CAMP a ding suhlhai toulhai kana tho vang in imacha anaphachom pon, kumsih leh Crusade kabol uvin, sum tampipi kasumang uvin, koima chan la phat chomna in aneipouve, camp kikhen nileh Revival ahiuvin, nini nithum joulangleh adap jepjep uvin, lhakhat jou leh abep bep ahiji taove. Hiche thu jonghin na satah a eisuboi ahi. Ipi atileh chubanga kaple maova taotheija chom khat jou phatleh abepbep hijiu hitam tihi boina len tah in kana neijin ahi. Hiche kaboina jong chu kho nungin Pathenin aki tohchet in donbutna eina pen ahi. Hiche boina ho jouse tichu natna satna hihenlang,inchen genthei naho hijongleh chuleh mipengthah ho kipahsot theilou hitiho jousehi Pathenin eisuh tup peh nom ahi tin kho nungin kamudoh theijin a ahi.

4.PATHEN IN LEFI TOH EISUH TONA AJEH LE PATHEN LENGGAM NATOHNA A KAHUNG LUT DAN:

Hitabang lunggim lungkhama kaumlai tah in, Pathen in amiteho ho khat katohna bank a kimuto din ahinsol in, iti hung ham itileh Bank account honga hung ahin, chulaitah a account honna dinga angaikhoh tah khat chu ahileh, keiho Bank a account neisa khat ham ahilouleh staff khat in INTRODUCE abol angaijin, amanla koima cha account nei ahepon ajojonan keikoma ahin sol lut uvin, ken ama chu account honna dingin kahet khah lou beh ahivang in kahenai tin ahe tabang bangin in INTRODUCED kanabolin, hiche account kihon jou chun, aman keima LEFI a kikhomdin INTRODUCED eina bolin, hiche nikho chun keiman kanahet lou vangin Bank a kana lut lona ajeh chu lolhit in ana umin ahi. Chua pat in LAYMENS EVANGELICAL FELLOWSHIP INTERNATIONAl Church a kahung kikhom panin ahileh kaboina ajeh ho chu ol ollin kahin kihet doh chehchehtan, ijeh in em itleh ken kato tabang bang chu amahon jong anato sau anahi.

Pathen mipa N.Daniel hin mun khatna hi Crusade anabol na chun, eiholang Crusade ho bangin, amaho jongchu Pathen thu ajahphat u chun achonset u akihet doh uvin, kaple mao pumin anatao uvin, lamkai pu chun hiche vanghi apengthah mong mong ahitaove tia ana ngaito ahitai. Ahinla kumkhat jouvin hiche ho kaple mao puma kisih ho loi chu abepbep ahitaove tithu ajah phat in aman jong Pathen koma atao tan ahileh Pathenin ama ho chu jungneilou, song lheo lah a keh muchi ho tabang ahi bou uve tin Pathenin ana hetsah in ahi. Anahetsah goh keo hilouvin, vision tabangin muchi thepa thulem avet sah tan, hiche a kona chu, MUCHI THEPA THULEM Bible Class hungkilapan ahi. Hiche Bible class dung juija penthahna ananeiho jouse hinkho akivetna ahileh, atamjohi aleiset hinkho lhumkeija Pathen natong ngen ahinao akimun ahi. Hiche thu kajah phat chun keijong katha anom lhehjengin, hijeh chun, Keijong hiche Bible Class dungjuija Pathen kahin hol a kon in, keihi koi kahim ? ti kahung kihedohin, tila chu keimahi kaneova patna thilse bolkhalou beh tabanga kigel kahin, kaki chonphatsahna (self-rightiousness) hinkho a anakihing ahin, ipi ibol vanga imacha ana phachomlou anahi.

Hitabanga Pathen chu dihtah a kahin holphat in, nikhat hi Pathen in amipa kidangtahin ahin mang chan, hiche Bible changa pansa a Pathen thu ahin sei chun, kalungthim chu hem ma kisun kabang tan, aman ahinsimin, “ PHATECHAN KIHET CHENIN, NACHONSETNA IN NIKHAT LEH NAHIN HOLDOH DING AHI ”(Be Sure, Your sin will find you out).Number. 32:23 . Hiche thu kajah nichun, kati akithing leuve, ipi jeh in em itileh keiman guhthima kana bol chonsetna ho chun nikhatleh eihin holdoh uva eihin mat ding chu kichen tah in kamutai. Keiman koimachan eimupoi kana ti chu Pathen CCTV Camera in abona coverage anabol sa ahitai ti kahetdoh chun, kakicha mama jengin ahi. Hichen ni chun kachonsetna nikhatleh eihin holdoh dingho chun, i-umchah kheh taovin, jamna ding mong mong aum tapoi. Hiche a bol ding pen chu kineo sah a ama ama koma kisih puma ngaidam ki thum ding tilou lam dang him him aumtapoi.

Hiche chun, ipi jeh a kigenthei ja, ipijeha kidammo a, ipi jeh a nehle chah sil le chen na kilhasam ham tiho jong eimudoh sah-e. Mihemhi ichonset phatleh ase apha het khenna hi mangji ahitai. Hijeh a chu itabangin kigenthei jong leh ipijeha kigenthei ham, ti kiki hedoh theiji lou ahitai. Pathen thu holgil na ahung kineiphatna chu, ipijeh a kaji dammo a, ipi jeh a kacha damlou ham ? Amasapen tah in, keima chonsetna ho jouse Pathen in eimudoh sah in, adeh in kajineina dihlou jehin kaji kacha kagenthei sah lheh jeng tai ti kahe doh in, hiche jeh chun, kasuhkhel ho jouse koma ngaidam thumdin, suhlhai toulhai kana thon, ipijeh in em itileh Keiman Pathen dou naleh mihem dounan in chonset lentah kana bol dohtai.Mipi le Pathen angsunga Dan Thenga kichenna kana bol lhon in, ahinla asunglama chu athen-ding dolin kana thenglhon tapoi. Hiche a Mipi ahungkikhom ho jousele Pathen kajoulhep jeh in, hinkhoa gim gen theina thoh dingkhop in kana umtai.

Hiche jeh tahtah a chu kajin dammona sang tahtah anatoloa, chuchea Jong kaki het dohthei dehlou phatna, kachapa lenpen chunga dammona phaloutahtah a eina pho kit anahi. Amani dammo nahin kahinkho hi imu theilou, netheilou khop a genthei na dimset kanato ana chu thildang ahipon, Pathen chakhat ana kihi ta a chubang chonsetna lentah kanabolla imacha bollou banga kana umjeh pentah chu anahi. Aban na office a thil kibolkhel ho jousejong eihin hetdoh sahkit in, tilla thil neocha cha kiti ho chu lentah tah thina thei ngen ahungsoh doh tan, Pathen angsunga kineo sah nale kipelut pumin kisutheng dingin kanom tan, nopna kapehlhah jou phat in Pathen in ahahsa umlouvin, abonchan khat le khat kikah boina hihen lang govt. toh kikah lah hijongleh abonchan, Pathen angsunga them mo nathei kiti jouse le ki-oimona thei kiti jouse chu akiki houtoh in hiche a konin Pathen koma chonset ngaidam na akithum in, hiche a konin Pathen in, nachonset nan nahin mat ding ahi, kiti chu, Tunvang nachung thu kikhol in tin nathemo na khatcha kimutalou ding ahi. Nachonset naho nakigeldoh peh louhel ding ahitai ati. Hiche thu kajah ni chun, kakipah lheh jengin, hiche a patna chu kalhagao hinkho hung kido doh kit ahi.

Hitabanga Pathen in kachonset ngaidamna eipeh jouva pat in ka insunga dammona adeh a kaji dammonale kacha dammona chu Pathenin eilahdoh peh tai. Hita banga hi Pathenin ilhahsamna a kona suh-hala(revive) suhdam ding eigot ahin, kenla kana het loujeh a thildang dang kana bol vangin imacha ana pha chompoi. Pathenin eikiledohsah(restoration) jouphatin boina ho tichu, kaji dammona hihenlang kacha dammona hijong leh eilahdoh peh tai. Chujongleh chuche nia konin, nehle chah jong imacha avat alhinglel aumtapoi. Ajehchu Pathenin eisuhhal nom jeha chu einagimbol anahibouve. Chuleh kum 34 val jen Bank na kahin tohna a jong service sung sesen, Pathen lungset na jallin, imacha boina hahsat na um lou hellin, 31 December 2018 chun superannuation retirement kana mutai. Chuleh kanatoh laija ka dream chu ahileh ka Pension phatleh Pathen na tohding hi keima dream khat chu anahi. Hijeh chun, Pathen natong dinga kigo kahijeh chun, kanatohna a Customer Service hi phatechan kana bolin ahi. Keima normal service chungchonah khonunga Pathen leng gam natohna ding tohgon to goma service kanapehtha ji ahi. Chuleh, munchomchoma transfer cheding dana a promotion kanadeilou ahin, ahinla Promotion eihin peh jou uvin jong ka in muna pansan kanakai thei nalaije. Abanah Pathen in ama ngailut theina ahilouleh ama ngaichat theina lungthim le tha eina peh jeh in jong Pa Pathen kathangvah e.

Lhagao le Tahsa lama zero a hung kipan kahi lhon in Pathenin goulah a gouloupipen chapa li eipe lhonin, chuleh nehle chah sille chen chuleh chenna gena chuleh chele valena dinga kangaichat ho jouse aphat phat cha a eipeh jeh in jong Pathen Kathang vah in, loupina jouse Pa Pathen changta hen. Imajouse ama a kona bou kimu ahibouve. Ajehchu dihtah a hinkho man tichu nehguh chah guh nelouva thengsella hinkho man kitichu thil nom ahipoi, avat alhing lel kiti chu dimset jeng ahi. Ahinla Pathen loupi na dinga kaseinom pentah chu ahileh ima cha plan, investment, savings, akibolthei louvangin Pathenin akul akhoh ho jouse aphat phat chan supply eihin bol toupeh uve tijong kaseinome. Hijeh chun Aman, amasapen tah in Ama Lenggam leh achonphatna holdoh masauvin, chutengleh adang jouse jong naki peh tha diu ahi atihi kenjong kahin chepikhat chu ahi.Matt.6:33. Pathenin asimho jouse phatthei bohtahen hen.
Abeitai.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleMILJOU PONGE-I
Next articleDr. T.S GANGTE KAHTEDAN LEH KAMUDAN