Home N Lhungdim A BRIEF CRITICAL APPRAISAL OF THE PERFORMANCES OF TEN KUKI MLA’s IN...

A BRIEF CRITICAL APPRAISAL OF THE PERFORMANCES OF TEN KUKI MLA’s IN MANIPUR

55
0

Kuki pao in Manipur a Kuki MLA um 10 ho giltah a anatoh nao nungvet mavetna.

Asun
N.Lhungdim
Thangting House
Molnom-West

n lhungdim
N-Lhungdim

2nd December, 2022

Tukum 2022 March lha in Manipur Legislative Assembly Election ana um in Kuki MLA 10 tobang ahung kaidoh in tun lha 8 alhingta in achesa lha 8 sunga ipi pi atohdoh uvem? Ipi tohding agot uham giltah a vel vetna chomcha nei ute.

MLA ahung kaidoh holah ahin kahetdan in mikhat bou grassroot politician ahi in adang hohi chunglang a kona hung kumlha Beuracrat ngen ahi. Beuracrat hi a officer hi a table koma ana touho chu politician hina a alhahsamnao lenpen chu milhan toh kibang a um hi amaho dinga hahsatna tamtah um ahi. Akineosah pena aum ujongleh agamsung uva milhan hotoh thakhat a chamdela aum uhi thilbai ahipon ahi.

Achesa MLA ho themkhat vetsahna dingin kisei leh Pu Holkhomang Haokip chu akipatna High school Headmaster ahivangin adihtah achu amachu educationist hilou jehin school chu adalha in election atet Henglep Constituency a MLA masapen ahi. Henglep gamsung ahi phung le chang dol a ama phung hi tamlou ahijehin phungtam ho asugenthei lheh jeng uvin ahi. Ahinla hetding chu Kuki politician tunichan a ama tobang a lolhing aum naipon ahi ajehchu MLA ahin aban ah MP jong Cabinet Minister jong ana hikit in chuleh Kuki Inpi ajong President Inpi pu in ana pangkit in ahi.

Aban ah Pu Chungkhokai Doungel ahileh Custom dept. a top bureaucrat ana hi in politics ahunglut in Kuki hon ana tuhkhah loubeh Finance Minister ahung hi in Kuki ten aphatchompi lheh in ahi. Natoh langa thempen himaithei ahi ajehchu Minister ihileh natoh dan themding angai in ahinla ama lhahsam nachu milham hotoh kitohdel a um hi thilbai ahipon ahi. Hijeh chun a constituency miho leh ama kikah a gap lentah ana umjui in ahi.

Aban a khat seikit leuhen Pu T.N Haokip ahi in amahi akipat dan ahoi in ahinla akichaina lang ahoimo cheh cheh in amipi avoter hotoh kitimatlou in aumdoh tan ahi. Ajehchu aman voter ho sangin haosa phabep khatleh service abolpeh phabep khat toh thingnoimi hojoh ana khohsah in ahi. Ama lhahsam napen a seiding in amahi Christian ahivanga Houin a kikhom ngailou Christian ahin ahi. Hiti langa chu Pu C.Doungel, Pu Holkhomang Haokip amaho hi phatah a Houin kaimi ana hikit un ahi. Christian ihi leh Houin kaiding Houin kaikeo hilou a Soma khat pehding hohi hailou behding ahi. Lhagao thu chu achom ahi in mipi toh kigop nadinga houin kai ngai ahi chukit leh soma khat napeh louleh Houbung a na share umlou tobang ahi.

Tun tuni a tulai MLA 10 ho aban ban in sei ute.

  1. Achunga kasei bangin grassroot politician khatbou um ahin ama chu Pu Chinlunthang Singngat MLA pa chu ahi. Adangho jouse hi chunglanga kona hungkum suh thingnoimi in ahin dopsang loingen ahibou in ahi. Aban ah Pu Chinlunthang hi apa Pu Thangkhanlal chu Singngat MLA vei tamtah ana kai chu grassroot politician mong mong ahi. Hijeh chun ama hi Singngat ahi vei tamtah kaiding a gotsa tobang ahitan ahi. Pu Chinlunthang in amasa a ana bolkhel pen chu hiti ahi. MLA masa Pu Hangkhanpao Taithul chu suhlhah nading in Pu Ginsuanhau toh ana kitho in vangphat umtah in ana sulha tan ahi. Pu Hangkhanpau chunga seiding chu ahileh ama hi miching kidangtah ahi in Singngat Constituency ahi amipi chu Zou ho ahi in midang sanga lhahsamna ana neijeh uva kichepna a ana nei uh ahi. Kajah dan in ajinu hin sum le pai sana dang adei behseh jeha ama kibalhuh lo ahi tin asei uvin ahi.
  2. Aban ah Churachandpur MLA laha town a MLA pa Pu L.M Khaute hi Govt. natoh Police a alenpen ana pang Director General of Police ana hi in sum jong ahao in ahinla amahi amipi hotoh akitimat dinghi thilbai hiding in katahsanpon ahi. Town a MLA ana hi masa Pu Phungzathang Tonsing leh Pu Hangkhanlien Valte amani chun ima dang gellou a building sahding chohbe ding tibou ana boipi lhon in ama ni sangin phajo dingin katahsan in ahi ajehchu tukah a anatoh ho ivetleh lamlen phalou tamtah asem in chuleh school leh college hojong akhohsah e ti kahen ahi.
  3. Aban ah Henglep MLA Pu Letzamang Haokip hi ahikit in ahi. Ama gam hi Constituency laha gam khangtoulou pena ana kisei ahi. Kadei dan leh mipi deidan hin Pu Letzamang hin amaspen in Henglep Headquarter a chuh le khal a gari lheilut theina dingin ngaito masapen leh kadeisah in ahi. Aban ah Henglep MLA ahijeh in aphat tamjon Henglep ah chengleh kadei in ahi. Ajehchu Henglep MLA ahin Henglep chu a in ahi in a in a chenglou MLA chu a inveng hotoh kitimatna hahsa ding ahi.
  4. Aban ah Saikot MLA Pu Paolenlal Haokip ama chung chang themkhat sei ute. Pu Paolenlal Haokip hi grassroot politician ahipon Delhi a Air condition office a nomtah a toupa chu in le lou neilou a a constituency aum hi hahsa maithei ahi. Ama hi grassroot politician ahilou vangin MLA dangho sangin grassroot politician hina ding ha ngaito pen in kamu in ahi. Ajehchu Mini Secretariat ah office ahong in a office chu Wind of Change office akiti in chuleh akom ah akithopi ding mi tahsan um 3 leh 4 akikoi in amaho chun asun ajan in na atong un ahi. Anatoh laha thilhoi tah khatchu akho akho a PM Health card, CM Health card asempeh hi MLA danghon akhohsah lou aman akhohsah ho ahoilheh jengin ahi. Ajehchu koima adam jingkei ki umlou dammo phatleh sum jahding hol lele sanga card a kona free a kijenthei chu hiche sanga phajo umlou ahi. Pu Paolenlal Haokip athilbol hoi khatchu election a ama vote ana pe leh pelou ho achom bollou hi thil hoitah ahi. Ajehchu hiche bollah a khohse pen chu Pu Phungzathang Tonsing ahi apelou jouse chu engbol nathei chan a ana engbol ahi. Hiche lah a classic case khat chu Bungmual a Dr. Langkhogin kitipa chu khat ahi. Ama chun Pu Gouzagin ana support jeha aum na jouse a suon le le na ana to ahi.

Ahileh tun grassroot politician kiti hi ipi tina ham themkhat sei ute. Ahilchen na ah hitin akisun in ahi. Grassroot means common or ordinary people, especially as contrasted with the leadership or elite of a political party, social organization, etc.; the rank and file ,the agricultural and rural areas of a country inhabiting these areas, especially as a political, social, or economic group.

Chukit leh hitin akisei kit in ahi. Grassroots movement is one that uses the people in a given district, region or community as the basis for a political or economic movement. Grassroots movements and organisations use collective action from the local level to effect change at the local, regional, national or international level. Grassroots movements are associated with bottom-up, rather than top-down decision making, and are sometimes considered more natural or spontaneous than more traditional power structures.

Achunga grassroot movement ho isei taovin tun MLA dangho themkhat sei ute.

  1. Kangpokpi District a Saitu MLA Pu Thangminlen thu themkhat kisei leh ama hi Hengbung haosa ahi in chuleh institution lentah jong aboipi in social worker phatah leh hoitah mivang ahin ahi. Ahinla ama jong hi chunglang akon a hung kumsuh ahijehin a voter hotoh akitimat dinghi hahsa lheh in kamu in ahi. Hiti chun function leh adang danga Chief Guest a che tilou hi mipi toh akimatna alhom in ahi.
  2. Aban ah Kangpokpi town MLA Pi Nemcha Kipgen hi ahileh ama hi a profession hi nurse ahi in damlou jenna lang vang them dingin katahsan in ahi. Ajehchu keima tah toh Tezpur a posting kahi lai in Tezpur Christian Hospital ah nurse in ana pangin mi apanpi nom ho panpi ding agotleh chihna kidangtah anei e tijong kahe in ahi. Ahinla MLA hiding a mipi toh kitimatna anei dinghi hahsa lheh in kamu in ahi. Ajehchu ama hi grassroot politician ahipon thingnoimi ho thahat a kaidoh ahi in akaidoh hi aphatna chu Kangpokpi constituency hi unreserved ahi in til achu Nepali ho ana kaijui ahi.
  3. Aban ah Saikul MLA Pi Kimneo Hangsing hi seikit ute. Ama jonghi table kom a tou Beuracrat ana hi in grassroot politician ahipon ahi. Adihtah achu Saikul MLA dinga chu Social leh Political Organisation a nasa taha ana pang masanga MLA ana pang Pu Doukhomang Khongsai hi ama sanga phajo hi Saikul Constituency in amukit uleh Saikul Constituency hoding hamphatna lentah hiding ahi. Ahinla Saikul Constituency hi phung le chang thingnoimi ho kitetna ahijehin ama dinga hahsatna atamjeha tukum a election ajong ana tetlou ahi. Tuchung MLA tet holaha kaiding a dei umpen chu Pu Chungkhokai Doungel ahi. Ama hi ana kaidoh leh grassroot politician ahilou vanga Chief Minister material nei Kuki MLA ama leh Pu Holkhomang bou ahi. Pu Holkhomang hi grassroot politician ana hijongleh ama lhahsam nachu a insung akon a support aneilou jeh hipen in kahen ahi. Ajehchu politician hohi ajinu in aha support ngai ahi. Pu Holkhomang chu a inneipi akona support mulou politician ahi. Nupa akithotoh louleh aga deibanga sohlou ahi.
  4. Aban ah Tengnoupal MLA Pu Letpao Haokip hi BJP Govt. 1 a Flood Control & Irrigation, Water Resources Minister ana hi in a itih flood tuilen gam hilou MLA pa Water Resources Minister kihisah chu Chief Minister pa in akiloipi nu Pi Olish Politics a ahatna dinga ana koi hijo dingin katahsan in ahi. Atahbah in tukum election Pi S.S Olish chu MLA ahung kaidoh in ahi. Ama hi Old Kuki laha Lamkang ho ahi in New Kuki group a Mangvung ho ahibou in ahi. Ahinla ama hi grassroot politician ahipon MLA nu leh mipi ho akitimat naohi deibang ahiding tahsan aumpon ahi. Pu Letpao Haokip chungchang kisei kitleh ama thilgon laha hoi kasahpen chu insung khat a Govt. service neikhat umsah ding kiti agot hi MLA khatcha in agotlou thil hoitah leh phatah in kahen ahi. Ajehchu Govt. kham peh phatleh MLA masahon favouritism leh nepotism aha nei in Pu T N Haokip in a inko te khat achapa 3 tah service apeh chu kageldoh in ahi. Ipi dinga Govt. service hi khohtah a kasei ham itileh Kuki te angai in Govt. Service akon a i economy uhi hung kipan ahi. Vetsah nadingin insung khatchu sum lakh 10 pejong lechun amaho inchen kisemdoh na a aneilou heldiu ahi. Ahinla service khat nabolpeh leh hichepa chun a inchen ho akisuhtup a a inko ho school akaisah a machalna leh khantouna anei thei ahi.

Achaina langin pu kitileh keiding a jeh maithei ahi in ajehchu Paolenlal Haokip hi keidinga sielpi sungkon ahi in ama kho nung hi ahoi leh apha in kamu in anatoh hi phatah a atoh leh khonung a Manipur Chief Minister material ahung hiding hi hahsa behseh in kamupon ahi. Pu Paolenlal hi Houin a kikhom ham kikhom louham kahepon akaina Houbung a akikhop teiding dei aum in ahi. Houin kai keo hilou a soma khat jong alha sum san a kon a apeh jingding dei aum kit in ahi ajehchu Houin kailou MLA akideipon ahi. Tulai in Rahul Gandhi BJP hon ademnao chu Half Hindu ahi ti nelna dingin achena gam jouse ah temple a chelou in aumpon ahi. Hindu gam a letding itileh temple visit teiding angai banga Christian gam a Houin kailou MLA chu akideipon ahi.

Achaina kei in tulai MLA ding hi thepna langa asan ding angai in masang lai a contractor khangchu akichai tan Singngat MLA Pu Ginsuanhao leh Saikul MLA Jamthong amani chun sum anei man a kingolpei lhon ahi in tulai khang adingin outdated ahilhon tan ahi.

Anukhah pen a iseinom uchu MLA kaidoh 10 hon lha 8 sunga atohdoh uhi nalung lhai uh hinam? Nalunglhai lou jongleh kum 4 tah anei nalai uvin hil thei aum leh hil uvinlang mipi thalheng MLA mong mong ideichat uh ahi. In le lou neiding sum le pai chopkhom ding MLA ideipouvin ahi. Churachandpur High School luilah a no. 2 Gandhi Memorial High School hi Govt. Higher Secondary School a dopsang dinghi Pu Paolenlal in anatoh khohpen a anei dingin kadei in ahi. Ajehchu Higher Secondary school tamtah umjongleh fee peh a chate kum 2 lekha simsah hi thil hahsatah ahi nalai in ahi. Gandhi Memorial High School chu Govt. Higher Secondary School hileh alhompen a chapang 300, 400 in lekha manbei a class-xi leh xii ahinchai theidiu ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleARE MANIPUR MEITEIS MOVING FORWARD OR BACKWARD?
Next articleBuying an Essay Is Not the Only Way to Get a Good Grade in College

LEAVE A REPLY

Please enter your comment!
Please enter your name here