Home Kuki Black Day Story π‹πŽπ”π“π„πˆ πŠπ”πŠπˆ πŠπ‡πŽ π“π‡π”π’πˆπŒ 𝐋𝐄 π“π‡πˆπ‹π’πŽπ‡ π†πˆπŒππ„πˆ

π‹πŽπ”π“π„πˆ πŠπ”πŠπˆ πŠπ‡πŽ π“π‡π”π’πˆπŒ 𝐋𝐄 π“π‡πˆπ‹π’πŽπ‡ π†πˆπŒππ„πˆ

346
0

Pic: Loutei Kuki Village, Ukhrul District, Manipur (April 1993)

Loutei Kuki Kho hi Ukhrul District, Phungyar-Phaisat Sub-Division hop sung a um ahin,
Imphal a pat kilometer somthum le thum (33) vel chan bou ahi. Chuleh Loutei Kuki kho inn jat
chu somthum (30) anahin, mi simjat hi jakhat le somthum le nga (135) vel ana hi e. Loutei Kuki
Kho hi Manipur lengte khang lai a pat ana um chuleh British te’n Dai (Rights) le Map jong ana
pih peh u ahitai.

LOUTEI GAM UM DAN CHULE A GAMGI
Loutei gam hi Loutei Kuki le Loutei Tangkhul @Riha chengkhomna chule nehbomnana gam ahi. Thoubal vadung gal solam langa ana chengkhom cheh ahilhon in; phat chomkhat jouvin Loutei Tangkhulpa in government a permission bei in vadung gal lhumlam langa chenna ahin kisem in gam ga, loulho, thingpoh ama chang phat chomna in amang tan ahile Loutei Kuki haosoapu Pu (L) Thongkhothang Baite in jong vadung gal langa galkai a kho chen ding ahin ngaiton ahile Loutei Tangkhul haosapa Homi (s/o (L) Chamba Tangkhul) in ana jah da in ahi.

Tangkhulpa Homi amatah jong government permission bei a anachen jeh in government in ana leusah (fine) in ahi. Loutei Kuki haosapu Pu (L) Thongkhothang Baite in jong lhumlam a kho chonna ding a government agadoh a lekha apeh le Loutei Tangkhulpa in, β€œhung galkai theipon nate”, atin ahin khahtan tan ahile nehbomna gam ahijeh in, Loutei Kuki haosapu in, β€œnang khut noi a chengla kahipon iti nang in nei kha thei ding ham”, ti in government a lekha ape in ahileh Loutei Tangkhulpa in, β€œnehbomna gam chu kei a bou ahi”, atijeh in Loutei Kuki haosapu in, β€œnang le kei in inehbomna gam ahi”, ati in akidin te to lhon tan ahile hiche a kon chun Loutei Kuki le Loutei Tangkhul kah a 1955 kum chun GAM CASE ana um in Loutei Tangkhul parao (guest house / bungalow) a ahung kiheh pan lhon tan ahi. Hiche Kum a pat chun hiche case hi State High Court (then under the jurisdiction of Gauhati High Court) chan a akiheh jing jeng lhon tan ahi. Phatsotpi che jou 17th October, 2013 chun Loutei gam chu Loutei (K) le Loutei (T) ti a compensation kibang a ana mu lhon to kilhonnin Loutei gam chu anehbom lhonna gam ahi ti photchen ana hitai.

Loutei Kuki kho gamgi:

North
:
Anal Lok (also called Heibong Lok by Loutei Tangkhul), Langyinkong Lok (also called Gokotdung/Gokot vapi dung by Loutei Kuki), Marongkong Lok, Lokmacha
South
:
Lokmacha, Arathei, Ishingkhong Lok, Ikong Lok (also called Siridung by Loutei Kuki), Moneng Chingtek
East
:
Mapithel Ching
West
:
Ukhrul Road
LOUTEI KUKI HAOSA Loutei Kuki kho hung chen a pat Haosa hung hi ho: 1. Pu (L) Helthong Baite (Maharaja/Lengte khanglai) 2. Pu (L) Mangkhothong Baite (British khanglai or Anglo-Kuki War lai) 3. Pu (L) Thongyang Baite (Japan gaal) 4. Pu (L) Thongkhothang @Pamong Baite (Japan gaal jou)
LOUTEI HAOSAPU (L) THONGKHOTHANG LE AJINU PI (L) TOHNENG LAIGILGA Pu (L) Thongkhothang @Pamong Baite le Pi Tohneng laigilga hin chapa 5 (nga) le chanu 1 (khat) anahing lhon in, anoi a chengse hi ahiuve.
1. Jangkhothang Baite
2. Tongkhojang Baite
3. Jangkhongam Baite
4. Thangkholet Baite
5. Jangkhotong Baite
6. Nengboi Baite

LOUTEI KUKI AIDED L.P. SCHOOL 1982 kum chun Loutei Kuki khomun a Loutei Kuki Aided L.P. School ana ki phutdoh in, kanaopa Pu (L) Thangkholet Baite chu 1991 phatlai in Ukhrul District Aided Elementary School Teachers’ Association (AESTA) a President in anapang in ahi. Hiche phatlai chun A. Aza in Ukhrul District Education Officer (DEO) anatuh in chuleh Th. Bira Singh in Director of Education (S), Government of Manipur anatuh e. Naga-Kuki gaal masang chan chun hiche school hi phaten ana kikai (function) in ahi. Hinlah, 1993 Naga-Kuki gaal a pat chun phat chomkhat pi school kai ima ana um thei tapon ahi. Ahivangin, Loutei Kuki kho hetjingna ding le school ana umsa thah phudohna ding in Loutei (K) Haosapu Pu (L) Thongkhothang Baite in Education Commissioner P. Sharat kithopi na jal in Loutei Kuki Aided L.P. School (better known as L.T. English School) hi 1998 kum chun New Lambulane, Imphal inn-mun a thah tungdoh ana hitai. Pathen phatthei bohna jal in tuni chan gei hin School hi phaten a kikai (function) jing in chuleh amachal jing in ahi.
LOUTEI THILSOH GIMNEI (1993) Jat le nam kikah a thuboi ahung kipat tillai tah a chu New Lambulane, Imphal (River Bank) a khu Haosapu Pu (L) Thongkhothang Baite inn kisah khoh lai tah anahi in ahi. Boina asan jing to lhon in April 5, 1993 ni in eiho nam sepai golhang ho in Ukhrul bus Gwaltabi mun a ana ting uvin ahile khosung mite ho jong kichatna le tijatna in ana lodim in ahi, ajeh chu Naga te in lethuhna hinbol tei uvin te tia kichatna anahi in ahi. Khosung mite lunggim leh lung lengvaitah a aum phat uvin, New Lambulane a ka innsungmi cheng hotoh kaki houkhom uvin inn sah khoh lheh jongle chelou akhoh tai ti in, ka nu Tohneng Baite (w/o Thongkhothang Baite, Chief of Loutei Kuki) le ka upa (Jangkhothang Baite, mi upa) lamkaina in kanaopa Thangkholet Baite, ka tupa Tongpao Baite (from Zalenphai, tua Lhungtin Saikul tia kihe) chule kanaopa Jangkholun Baite ( Pu Thangjang Baite chapa ani channa) amaho cheng Imphal New Lambulane inn a kon in Date 6 April 1993 nikho in Loutei Kuki kho jon dingin Kartoos khat akipoh uvin ana kalsong uvin ahi.

Yaingangpokpi alhun uvin Jangkholun chu akho mun Twisomjang kho jon ding a ache kigot laitah in akihou khom kit uvin, β€œthuboi lai ahitoh Thi le thikhom ding, Hin le hingkhom ding kilhonbom taute”, ti in Loutei lang joh ache khom tauvin ahi. Hitia lampi ajot jing laiju, Loutei Kuki khosung phah kon β€˜Chalsi Vadung’ aphah uva akichol pa uva twi adon laitah uvin hetman louvin Loutei Tangkhul le NSCN-IM ho mi somni (20) vel in hem le thal choipum in ahin lonkhum un amasapen in kartoos khat achoi uchu alahpih uvin, chujouvin pasal sese chu akhut le amit akan peh uvin gammang lah a apuimang uvin lungsetna beihel in ana that gam uvin ahi.

Kanu Haosapi Pi Tohneng vang chu amit akan vang uvin ima ana losam pouvin ahi. Hinlah Haosapi chu akapjah jeng in ahile NSCN-IM ho chun, β€œna hin kilhonpi pasal ho chu ima lo pouvinge”, tin ajou jou un ana lhamon uve. NSCN-IM ho in pasal chengse atha jou phat uvin haosapi adalha uvin achemang tauvin ahi. Phat chomkhat jouvin Haosapi Pi Tohneng in mi husan le ham ahiloule ao gin ima ajah lou phat in amit kikan na chu akilhep lhah in akhodah le achate chule alhonpi cheng amel amu doh tapo in chuphat in a aw neisun sun in awthong jeju in asam sam jeng tan ahi. Ahivangin donbutna amu tapon ahi. Khojin muthim in ahin mano tah jeh in Haosapi jong kap le mao pum in khosung ahin jon tan ahi. Kap pum pum a Loutei Kuki khoto ahung gei in ahile khosung mite tija pum a ana um sa chu kichatna le tijatna in athahbeh in ahin lonkhum kit tauvin ahi.

Hichun kichat tijat husan jeh in galmi te ahung tai ti in khosung a pasal hon gammang lam a nunao chapang phabep athahdoh uvin gammang noi a aga kiseldohsah tauvin ahi. Chomkhat jouvin Haosapi ahi ahetdoh phat uvin mipi akiseldoh ho chu aga nungpui kit uvin ahi. Hichun akiseldoh cheng chun ahung pui pau kom a chun, β€œipi thu um hitam?”, tin adong un ahile mi pui a che pa chun tija behseh uvin te ti in, β€œima aumpoi”, ati in ahin le puitai. Hinlah khosung ahinphah uva Haosapi in athilto/athu ho aseipeh phat uvin khosungmi nunao chapang jaona in akap lou le apona lou aum tapon ahi. Hiche nikho jan a hin lunggim tah le lungdong tah in kap le mao pum in khomite jong kiveng pum in ana kihah khovah tai.
Ajing nikho nisim 7 April, 1993 in kho kinaipi Sielmei, Mongbung chule Lamlai ho thu akithot in, β€œkasopite ho thilong (corpse body) hol ding in, neihung panpeh un”, tin thuthot akibol in, hitolhon chun pasal hangsan cheh Kartoos le thihnang pum in ahung uvin Loutei Kuki khomite hotoh thilong ho chu gamlah aki hol in ahileh gamlah a chun athisa a akhut le amit kikan pum a ana um u chu ahin kimudoh in, chuin thilong phoh ding chu kakihou kit uvin ahile moh phoh louva government kom a Report peh masat ding ti in kakiphatsah uvin, hitolhon chun kasopite ho thilong chu amun maman akidalha in ahi. Hiche thilsoh jouva pat chun jan teng le nunao chapangho gamlah a akikisel sah ji in, khosung chu golhang le upa hon akingah den ji in ahi.

Hitichun ni ni le jan ni hinkho ana kimangin ahi. Nithum lhin ni Date 9 April, 1993 nikho in pona tah a pan hinla Nampi lamkai, mimal, insungmi chuleh government police ho ahung uvin kasopite ho thilong chu phohna akinei in Loutei Kuki khomun a kon New Lambulane Imphal inn mun ahung kilhut in ahi. Chuin thilong chu insungmite mopohna hitalouvin Nampi in mopohna akilah in, pohnatna jal in mi asang aja in New Lambulane inn-mun apat Christian Cemetery (Chingmeirong, Imphal) chan keng a kijotna ana kinei in ahi. Loupitah le pona tah in Pastor Dongkho Singson, KCC in vuilemna ananei in ahi.
Langkhat langa thilong akipoh doh chun adalhah khosung mite kichatah leh lung lengvaitah a akium jing in, hung pot pai ding la kichatna in akidim kit in, chuphat chun Nampi Lamkaiho kom a sepai neihin solpeh uvin tia tepna le taona akinei dungjui in Date 11 April 1993 nikho in sepai ho jaona in Loutei Kuki Kho ahung kidalha tan ahi. Khosung mite in ama ama poh jou thilcheh akipoh toh lhon un Loutei Kuki kho dalha in kho kinaipi le apilhingpen Mongbung kho ahin kijon tan ahi. Khogemsa Loutei Kuki kho chu ahung kidalhah kal ni ni jou in Tangkhul-Naga ho a che uvin aga hal mang kei tauvin ahi. Mongbung kho a nithum tobang akium jouvin Mongneljang kho a Grouping Centre a akipansa kit in ahi. Loutei Kuki kho a kon hung gaaljam mi phabep tuni nikho chanhin Mongneljang kho a acheng den tauvin chule abang khat ama ama hinathei le hinnathei cheh akijot tauvin ahi.

Hicheho jou nung hin jong Gam Case thu a Loutei Kuki le Loutei Tangkhul hi akikiheh jing jeng nalai in ahi. Hitichun nisim 17 May, 1999 nikho in melhetlou mikhat in kapa Pu (L) Thongkhothang Baite achenna inn-mun New Lambulane a thal a ahung kap in, ahinla Pathen lungsetna jal in thal ana thon in ana sohcha e, hichun mikappa ana jammang paitan ahi. Kapa Haosapu hin kidoupi dang koima aneilou jeh in Loutei Tangkhul/NSCN-IM ho’n Gam Case jeh a ahung kap u hiding in ginmona ana kinei in ahi. Tuni nikho chan hin Gam Case jong akichepi jing in, hinlah, Loutei Kuki Kho hi thah chen ding akingaito vangin akilolhing jou naipoi.
Loutei Kuki kholai Hou-inn lampi a chun Mongphung khat ana um in hiche mongphung hi kho dalhah masangjep kum keh tobang pihi lhisoh jing jeng in ana um in ahi, tu nung a akigel a ahile kho ahung kisuhmang ding hi amamu a adip dampi hinte tin akigel jenge. Haosapi Pi Tohneng in hiche Mongphung ala choina:

β€œβ€¦..HITI DING MELTHEI HINTE TOLTHINGNU LONLHI LONNA DAIDAM KAVANGKHO…….”
Chule Pu (L) Thongkhothang Baite in angailuttah a inneipi (1925-16.09.2005) athi chule achate ni, atupa chule anaopa cheng alachoina in hitin ana sem e: β€œTOICHENG SAMANG AJALNAO VEIGAM JANG LUM SUONG KADO KUM SOT IN NAMAANGIN, KUMSOT IN NAMAANG IN KASEN ANGKOI TOICHENG CHUNGAH SAMANG KAJAL SAH E”. Hiche ki lachoina lachengte ni hi Loutei Kuki kho a thiho lhan song chunga tuni nikho chan a muthei a umnalai ahi.
Loutei Kuki kho le khomite ngailutna jal a khulsin ana toh ho:
1. Pu Jangkhothang Baite (11.07.1952 – 06.04.1993)
2. Pu Tongpao Baite (08.02.1956 – 06.04.1993)
3. Pu Thangkholet Baite (07.03.1959 – 06.04.1993)
4. Pu Jangkholun Baite (22.03.1973 β€” 06.04.1993)
Tuni nikho chan in Loutei Kuki Haosate le khosungmite in Nampi pan lahna lung in alang jing jeng in, milni umlouvin akihe jing in chule Nampi chunga seijoulou kipathu athah beh in avel in ahung kisei in ahi. Pathen in na mimal cheh uvin phatthei naboh jing tauhen.

Written by Pu Tongkhojang Baite (2nd son of Pu (L) Thongkhothang @ Pamong Baite, Chief of Loutei Kuki village) 25th August, 2018.
Address: C/o: L.T. English School New Lambulane, River Bank, Imphal-East 795001, Manipur

Previous articleSITA KHO KIBULU THUSIM 18 April 1993
Next articleSUHMIL THEILOU KAPU, NSCN-IM HON ANA THA DAN U THUSIM